ʼE Tonu Ke Akoʼi Tokotou Leʼo ʼo Loto
Neʼe tonu ko he ʼaho maʼuhiga ʼaia ki te kau folau pea mo te hahaʼi gāue ʼo te Vakalele ʼo Niusila 901, ʼaē neʼe ʼalu ki te Antarctique. Neʼe kua teuteuʼi e te kau folau tanatou ʼu kamela, pea neʼe nātou fiafia ʼi tanatou fakaōvi atu ki te foʼi fenua ʼaia, he neʼe nātou sisio ifo ki tona matalelei.
KO TE kapiteni, ʼaē kua taʼu 15 tana gāue ai, neʼe kua ina fai hola folau e 11 000. ʼI muʼa ʼo te malaga ʼo te vakalele, neʼe ina fakahū fakalelei ki te olotinatea te ala ʼaē ka ina toʼo, kae neʼe mole ina tokagaʼi ʼe hala te ala ʼaē neʼe tonu ke ʼalu ai. ʼI te fakalaka ʼo te vakalele ʼi te ʼao ia meta pe e 600 mo te kele, neʼe ʼī te DC-10 ʼi te Moʼuga ʼo Erebus, ʼo mamate fuli ai te toko 257 kau folau.
Ia ʼaho nei ʼe falala te ʼu vakalele ki te ʼu olotinatea moʼo taki ʼo nātou ʼi te lagi, kae neʼe foaki ki te hahaʼi honatou leʼo ʼo loto moʼo taki nātou ʼi te maʼuli. Pea ko te tuʼutāmaki ʼaē neʼe hoko ki te Vakalele 901, ʼe tou tāʼofi ai te ʼu ako maʼuhiga ʼo ʼuhiga mo totatou leʼo ʼo loto. Ohage pe ko te lava tau lelei ʼa he folau mo kapau ʼe haʼele lelei te ʼu masini pea mo totonu te ʼu naunau moʼo takitaki ʼo te vakalele, ʼo toe feiā pe mo kapau ʼe tou fia lelei ʼi te faʼahi fakalaumālie, mo te aga ʼaē ʼe tonu ke tou fai, pea mo te faʼahi fakasino, pea ʼe tonu ke lelei totatou leʼo ʼo loto pea ke takitaki e he ʼu tokoni lelei ʼo ʼuhiga mo te aga ʼaē ʼe tonu ke fai.
Meʼa fakaʼofaʼofa foki, ʼi te mālama ʼo te temi ʼaenī, kua puli te ʼu tokoni lelei ʼaia peʼe mole kei tokaga kiai ia te hahaʼi. Neʼe ʼui fēnei e te fafine faiako Amelika: “ ʼE lahi tatatou logo ʼi te temi nei ki te kau tūpulaga ʼi Amelika ʼe mole popoto ʼi te lautohi, mo te faitohi, pea mole nātou ʼiloʼi te tuʼuʼaga ʼo Falani ʼi te mape. ʼE toe moʼoni kua faigataʼa kia nātou ia te fakakeheʼi ʼo te meʼa ʼaē ʼe lelei mo te meʼa ʼaē ʼe kovi. ʼO hilifaki ki tanatou mole poto ʼi te lautohi pea mo te lau numelo, ʼe toe kau ki te lisi ʼo te ʼu fihifihia ʼi te ako, tanatou mole ʼiloʼi lelei te aga ʼaē ʼe tonu ke fai.” Neʼe toe fakatokagaʼi e te fafine ʼaia “ko te kau tūpulaga ia ʼaho nei ʼe mole nātou ʼiloʼi te aga ʼaē ʼe tonu ke fai ʼi tonatou maʼuli. Koutou fehuʼi age ki he tūpulaga peʼe ʼi ai koa he ʼu meʼa ʼe ‘lelei pea mo kovi,’ pea ʼe koutou sio ai leva ki te maveuveu ʼo tana fakakaukau, tana mole kei gū, tana lotohoha, pea mo tana lotolotolua. . . . ʼE mole fakatokatoka tonatou loto maveuveu ʼaia ʼi te temi ʼaē ʼe ʼolo ai ki te kolesi, kae ʼe ʼāsili kovi age.”
ʼE tupu te loto maveuveu ʼaia ʼuhi ko te ʼui ʼaē, ʼe fakalogo kia kita takitokotahi te aga ʼaē ʼe tonu ke fai, pea ʼe ko te manatu ʼe mafola, pea mo te ʼui ʼaē ko te ʼu lekula ʼe fetogi ʼo mulimuli ki te ʼu meʼa ʼaē ʼe leleiʼia e he tahi peʼe ki te agaʼi fenua. Koutou fakakaukauʼi age muʼa te meʼa ʼaē ka hoko, mo kapau ko he ʼu pailate vakalele ʼe mole nātou mulimuli ki te ʼu naunau ʼaē kua ʼosi fakatuʼu moʼo takitaki ʼo te vakalele, kae ʼe nātou mulimuli ki he ʼu hila ʼe mū pea mo gaūgaūe pea mo mamate ʼi ʼihi temi! ʼE mahino ia ʼe hoko tuʼumaʼu anai he ʼu tuʼutāmaki ohage ko te meʼa ʼaē neʼe hoko ʼi te Moʼuga ʼo Erebus. ʼO toe feiā, ʼi te mole kei mulimuli ʼa te malamanei ki te ʼu lekula ʼaē kua fakatuʼutuʼu ʼo ʼuhiga mo te aga ʼaē ʼe tonu ke fai, koia ʼe hoko ai te ʼu tuʼutāmaki pea ʼe tuputupu te maʼuli fakaʼofaʼofa pea mo te ʼu mātea, pea ʼe mavetevete te ʼu famili ʼuhi ko te mole nofo agatonu pea ʼe maʼuli mamahi te lauʼi miliona ʼuhi ko te SITA peʼe ko te tahi ʼu mahaki ʼaē ʼe maʼu ʼi te ʼu felāveʼi fakasino.
ʼE lagi ʼe tou leleiʼia ke tou fai te meʼa ʼaē ʼe tou loto kiai, kae ʼi tona ʼuhiga moʼoni, ko nātou ʼaē ʼe mulimuli ki te manatu ʼaia ʼe nātou hage ko te kau Ninive ʼo te temi muʼa, ʼaē neʼe mole nātou ʼiloʼi te kehekehe ʼo ‘tonatou nima mataʼu mo tonatou nima hema.’ Ko nātou ʼaē ʼe nātou mulimuli ki te taʼi manatu ʼaia, ʼe nātou hage ko te ʼu Iselaele ʼaposita ʼaē neʼe nātou ʼui “ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei.”—Sonasi 4:11; Isaia 5:20.
Koia ʼe tou lava kumi koa kifea he ʼu lao pea mo he ʼu pelesepeto ʼe tohi fakalelei pea mo totonu, ke akoʼi ai totatou leʼo ʼo loto ke ina takitaki lelei tatou? Kua mahino ki te lauʼi miliona hahaʼi ʼe ko te Tohi-Tapu ʼaē ʼe feala ke ina fai fakalelei te faʼahi ʼaia. ʼE talanoa te Tohi-Tapu ʼo ʼuhiga mo te aga ʼaē ʼe tonu ke fai ʼi te gāue pea mo te akoʼi ʼo te fānau ʼi te tauhi ki te ʼAtua, pea ʼe talanoa ki te ʼu faʼahi maʼuhiga fuli pe. (2 Timoteo 3:16) ʼI te hili ʼo te ʼu sēkulō, ʼe hā ai ʼe feala ke tou falala katoa ki tana ʼu tokoni. Mai tona ʼaluʼaga ʼaē ko te ʼu lekula faka Tohi-Tapu ʼo ʼuhiga mo te aga ʼaē ʼe tonu ke fai, neʼe fakatuʼutuʼu e te pule māʼoluga, totatou Tupuʼaga, koia ʼe nātou maʼuhiga ai ki te hahaʼi fuli pe. ʼO feala ai ke tou ʼiloʼi te meʼa ʼaē ʼe lelei pea mo te meʼa ʼaē ʼe kovi ʼi totatou maʼuli.
Kae ʼi totatou temi kua lahi age te fakahalaʼi ʼo totatou leʼo ʼo loto. ʼO feafeaʼi? Pea ʼe koutou lava hāofaki feafeaʼi tokotou leʼo ʼo loto? ʼE lelei ke tou ʼiloʼi muʼa pe ko ai ʼaē ʼe ina fakatupu te fakahala ʼaia pea e feafeaʼi tana fai te faʼahi ʼaia. ʼE tou palalau anai kiai ʼi te alatike ka hoa mai.