He “ ʼAho ʼo Te Fakamatalatala ʼo Te ʼu Lotu”
KO TE fafine pule ʼo te faleako ʼi Poloni, neʼe fai palalau mo te kau Fakamoʼoni ʼa Sehova, pea neʼe hake ia ia te fia ʼiloʼi ʼo te lotu, pea neʼe ina fakatuʼutuʼu ai maʼa tona faleako he “ ʼAho ʼo Te Fakamatalatala ʼo Te ʼu Lotu.” Neʼe ina kole ai ki te tamaliki ako—Katolika, Putisi, pea mo Fakamoʼoni ʼa Sehova—ke nātou teuteuʼi he ʼu kiʼi fai palalau fakanounou moʼo fakahā ki te kau ako te ʼu meʼa ʼaē ʼe nātou tui kiai pea mo te ʼu gāue ʼo tanatou lotu. Neʼe tali atu aipe e te toko tolu kau tūpulaga Fakamoʼoni ʼa Sehova.
ʼI te hoko mai ʼo te ʼaho ʼaia, neʼe ʼuluaki palalau ia Malwina, ʼaē ʼe taʼu 15. Neʼe ina ʼui fēnei: “Tokolahi ia koutou neʼe koutou ʼiloʼi ia mātou ʼi muʼa ʼo tamatou hū ako ʼi te faleako ʼaenī, koteʼuhi neʼe kua mātou ʼaʼahi koutou ʼi tokotou ʼapi. Lagi ʼe koutou feʼekeʼaki pe koʼe ʼe mātou haga ʼaʼahi feiā ia koutou. Koteʼuhi ʼe mātou muliʼi te faʼifaʼitaki ʼa Sesu Kilisito, te Tagata ʼaē neʼe ina fakatupu te Lotu Faka Kilisitiano. Neʼe ina faka mafola te logo lelei ʼo te Puleʼaga ʼo te ʼAtua ʼi te ʼu potu fuli pe ʼe feala ke maʼu ai te hahaʼi. Neʼe fai feiā mo te kau ʼapositolo pea mo ʼihi Kilisitiano ʼo te temi muʼa. ʼE lahi te ʼu koga meʼa ʼe ʼahiʼahiʼi ai te tui ʼa te kau Fakamoʼoni ʼa Sehova, kae kia mātou, ʼe mātou fiafia heʼe mātou maʼuʼuli ʼi te tokalelei ʼi te faleako ʼaenī, koteʼuhi ko koutou fuli ʼe koutou faka fealagia te faʼahi ʼaia. Pea ʼe mātou fakamālo atu ki te faʼahi ʼaia!”
Moʼo fakaʼosi ʼo tana palalau neʼe ʼui fēnei e Malwina: “ ʼE ʼi ai te tahi tupuʼaga ʼo tamatou ʼaʼahi koutou ʼi tokotou ʼapi. ʼE mātou ʼofa kia koutou. ʼE ʼui e te Tohi-Tapu, kua vave hoko mai te ʼu meʼa fakamataku ki te malamanei katoa. Koia ka mātou toe fisifisi anai ki tokotou matapā, koutou toʼo he temi ke koutou fakalogo. ʼE mātou fia fakahā atu peʼe feafeaʼi anai hatatou maʼuʼuli fakatahi pea mo heʼegata ʼi he palatiso ʼi te kele.”
Neʼe hoa ki ai, ia Mateusz, ʼaē neʼe taʼu 15 mo ia. Neʼe ʼui ia e Mateusz, ʼaki te ʼu taʼu, neʼe lahi te ʼu puleʼaki neʼe fakaʼaogaʼi e te kau Fakamoʼoni ʼa Sehova moʼo faka mafola te logo lelei. Ohage la ʼi te 1914—lolotoga te temi ʼaē neʼe kei fai ai te ʼu ʼata fakalogologo—neʼe fakahā e te kau Fakamoʼoni te “Photo-Drame de la Création” neʼe ko te ʼata pea mo te fakahāʼaga paki neʼe fakatagi ai mo te musika.
Neʼe palalau ia Mateusz ki te fakaʼaogaʼi ʼo te lātio moʼo faka mafola te logo ʼo te Puleʼaga pea mo fakamatalatala te polokalama MEPS (système électronique de photocomposition multilingue) ʼaē neʼe fai e te kau Fakamoʼoni ʼa Sehova. Neʼe toe palalau foki ki te tokoni ʼa te kau Fakamoʼoni ʼa Sehova moʼo fakahāhā ki te kau tōketā te ʼu faitoʼo ʼaē ʼe mole fakaʼaogaʼi ai te toto. Neʼe ina ʼui fēnei: “ ʼI te temi nei, ʼe palalau lelei te kau tōketā lalahi ʼo Poloni ki tamatou fakafisi ki te toto ʼi te ʼu faitoʼo, pea mo nātou fakatokagaʼi ʼi te taʼu fuli kua kaugamālie te kau mahaki ʼe mole ko he kau Fakamoʼoni ʼe mole nātou tali te toto mokā tafa nātou.”
Neʼe fakaʼosi te fakamatala ʼa Mateusz ʼo palalau ki te laga ʼo te ʼu Fale ʼo Te Puleʼaga pea mo ʼui maʼana: “He koʼe koa ʼe mole koutou ʼōmai ʼo mamata ki homatou fale? ʼE mole totogi te ulu kiai pea ʼe mole ʼi ai he tae falā.” ʼI tana palalau ki te fale ʼo te ʼu fakatahi lalahi ʼi Sosnowiec, neʼe ʼui fēnei e Mateusz: “ ʼE tonu ke koutou ʼolo ʼo mamata ki te toe fale lahi ʼaia. He koʼe koa ʼe mole tou ʼolo fakatahi kiai? ʼE ʼi ai tamatou manatu ki te faʼahi ʼaia, pea ko tomatou kaumeʼa ko Katarzyna ʼe palalau anai kiai.”
Ko Katarzyna, ʼaē ʼe taʼu 15, neʼe ina ʼui fēnei ʼaki he loto fiafia: “ ʼE fakaafe atu koutou ke koutou ʼōmai ki Sosnowiec ki te fakatahi faka tisitilike ʼa te kau Fakamoʼoni ʼa Sehova. ʼE lahi anai te ʼu akonaki ʼaē ka fai maʼa te kau tūpulaga.” Neʼe toe palalau ia Katarzyna ki te faʼahi ʼe mulimuli fuli kiai te kau Kilisitiano—te Fakamanatu ʼo te mate ʼa Sesu Kilisito. Neʼe ina fakaloto mālohiʼi fēnei tana ʼu kaugā ako pea mo te kau faiako: “ ʼI te taʼu kua hili, ko te toko 14 miliona tupu hahaʼi neʼe nātou kau ki te fakamanatu ʼaia. He koʼe koa ʼe mole koutou ʼōmai mo mātou ʼi hona tahi faiʼaga?”
ʼI te ʼosi ʼo tanatou fai fakamatala, ko Malwina, mo Mateusz, pea mo Katarzyna neʼe nātou tuku ki te kau faiako te tohi Les Témoins de Jéhovah : Prédicateurs du Royaume de Dieu, mo te ʼu foʼi fime viteo e lua ʼe fakamatala ai te ʼu akonaki pea mo te ʼu gāue ʼa te kau Fakamoʼoni ʼa Sehova.a Neʼe tali leleiʼi e te kau faiako, pea mo nātou fakapapau age ʼe nātou fakaʼaogaʼi anai ʼi tanatou ʼu kalasi mokā nātou palalau ki te hisitolia.
ʼI te ʼosi ʼo tanatou fai fakamatala, neʼe fai musika ia Martyna ʼaē ʼe taʼu 12, maʼa nātou fuli ʼaē neʼe kau ki te fakatahi, ki te katiko “Mālo, Ê Sehova!” Ko te kau tūpulaga Fakamoʼoni ʼaia neʼe nātou ‘lototoʼa ʼuhi ko tonatou ʼAtua’ ʼo nātou fai he fagonogono lelei. (1 Tesalonika 2:2) ʼE ko he faʼifaʼitaki lelei ʼaia ki te kau tūpulaga Fakamoʼoni ʼi te potu fuli!
[Kiʼi nota]
a Neʼe tā e te kau Fakamoʼoni ʼa Sehova.
[Paki ʼo te pasina 26]
Neʼe fakaʼaogaʼi e Katarzyna te Tohi-Tapu moʼo fai tana fai palalau
[Paki ʼo te pasina 26]
Ko te teuteu ʼa Malwina tana ʼu palalau ʼi muʼa ʼo tana fakahoko ʼi te faleako