“ ʼE Tou Toe Fesioʼaki Anai ʼi Te Puleʼaga ʼo Te ʼAtua”

“Ki toku kaumeʼa ko Rupert, neʼe fakahā mai ʼe matehi anai ʼau ʼi te ʼaho nei. Tuku tau tagi. ʼE ʼau momoli atu toku ʼofa kia koe pea mo tou loto fale katoa. ʼE tou toe fesioʼaki anai ʼi te Puleʼaga ʼo te ʼAtua.”

ʼI TE ʼaho 8 ʼo Sūnio 1942, neʼe tohi ai e Franc Drozg te ʼu palalau ʼaia ʼi muʼa ʼo tona matehi e te kau solia Nasi. He koʼe neʼe matehi ia ia?

ʼI te ʼu fakamatala ʼo te Museum of National Liberation ʼo Maribor, ʼi Slovénie, ko te tagata taʼu 38 ʼaia pea ʼe tufuga ukamea neʼe mole fia kau ki te solia Siamani Wehrmannschaft ʼaē neʼe nātou ʼohofiʼi te kolo ko Slovénie. Neʼe ko te Bibelforscher, te higoa ʼaē neʼe foaki ʼi te temi ʼaia ki te kau Fakamoʼoni ʼa Sehova ʼi Siamani. ʼI tana fia mulimuli ki te koga tohi ʼo Isaia 2:4, neʼe mole lagolago ki te tau ʼa te kau Nasi, he neʼe lagolago ia ki te Puleʼaga ʼo te ʼAtua.—Mateo 6:33.

ʼI tona kiʼi kolo ko Ptuj, neʼe ʼiloa ai Franc ko te tēhina gāue mālohi moʼo tala te logo lelei ʼo te Puleʼaga ʼo te ʼAtua. (Mateo 24:14) Logola te ʼu faigataʼaʼia, kae neʼe ina faka mafola te logo lelei ʼo aʼu ki te temi ʼaē neʼe puke ai ʼi te māhina ʼo Maio ʼo te taʼu 1942.

Tokolahi te kau Fakamoʼoni ʼa Sehova neʼe gaohi koviʼi ʼaupito e te kau Nasi. Pea ko Franc neʼe kau ʼi te ʼu ʼuluaki Fakamoʼoni ʼaia ʼaē neʼe matehi ʼuhi ko tana tui. Ohage ko te kau Kilisitiano ʼo te ʼuluaki sēkulō, neʼe lotomālohi ʼuhi ko te ʼu palalau ʼaenī: “ ʼE tonu ke tou fakalaka ʼi te ʼu tuʼuga fakataga moʼo hū ki te puleʼaga ʼo te ʼAtua.” (Gaue 14:22, MN ) Ko tana tui mālohi ki te moʼoni ʼo te puleʼaga ʼaia ʼi selo, neʼe ʼasi ʼi tana ʼu palalau fakaʼosi ʼaenī: “ ʼE tou toe fesioʼaki anai ʼi te Puleʼaga ʼo te ʼAtua.”

[Haʼuʼaga ʼo te paki pasina 32]

Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia