Ko He Agapoto Te Hola Mai Ai

KO TE mālama ʼo te temi ʼaenī, ʼe lahi tāfito ai te fia toʼa, mo te ʼu fihi pea mo te ʼu fakahala. Ko he tahi ʼe hola mai te ʼu ʼaluʼaga ʼaia, ʼi te agamāhani ʼe ʼui ʼe ko he tahi ʼe vaivai peʼe fula, pea ʼe lagi vāʼi.

Kae ʼe fakahā lelei mai e te Tohi-Tapu, ʼi ʼihi temi ka kita hola mai te ʼu ʼaluʼaga ʼaia, pea ʼe ko he agapoto pea mo he lototoʼa. Moʼo fakamoʼoni kiai, ʼi muʼa ʼo te fekauʼi e Sesu Kilisito tana ʼu tisipulo ki te minisitelio, neʼe ʼui maʼana kia nātou: “Ka fakatagai koutou i te kolo aeni, koutou feholaki ki he tahi kolo.” (Mateo 10:23) Ei, neʼe tonu ke faiga e te ʼu tisipulo ʼa Sesu ke nātou feholaki mai te hahaʼi ʼaē neʼe nātou fakatagaʼi nātou. Ko tanatou gāue neʼe mole hage ko he tau faka lotu, ʼo nātou faiga ʼaki te mālohi ke nātou fakatafoki te hahaʼi. Neʼe nātou tala te logo ʼo te tokalelei. (Mateo 10:11-14; Gaue 10:34-37) Koia neʼe mole ʼiʼita te kau Kilisitiano, kae neʼe tonu ke nātou feholaki, ke nātou fakamamaʼo mai te ʼu faʼahi ʼaē neʼe feala ke tupu ai he ʼu fihi. ʼI tanatou fai feiā, neʼe lelei tuʼumaʼu tonatou leʼo ʼo loto ʼo feiā mo tanatou ʼu felogoi maʼuhiga mo Sehova.—2 Kolonito 4:1, 2.

ʼE tou maʼu ʼi te Tohi-Tapu, ia Tāʼaga Lea, te faʼifaʼitaki ʼe mole tonu ke tou mulimuli kiai. ʼE talanoa ʼo ʼuhiga mo te tūpulaga, neʼe mole hola ia ʼi te temi ʼaē neʼe fakahalaʼi ai, kae neʼe ina haga muliʼi te fafine paomutu “ohage ko he pipi ʼe ʼalu ke matehi.” Neʼe koteā ʼaē neʼe hoko? Neʼe hoko te malaʼia kia ia, koteʼuhi neʼe tō ki te fakahala, neʼe tuʼutāmaki ai tona maʼuli.—Tāʼaga Lea 7:5-8, 21-23.

E feafeaʼi mo kapau ʼe fakahalaʼi koutou ke koutou fai he ʼu felāveʼi fakasino heʼeʼaoga, peʼe hoko he ʼaluʼaga ʼe feala ke koutou tuʼutāmaki ai? Ohage ko tona ʼui e te Folafola ʼa te ʼAtua, ʼe lagi lelei ke koutou foimo hola mamaʼo mai te faʼahi ʼaia.—Tāʼaga Lea 4:14, 15; 1 Kolonito 6:18; 2 Timoteo 2:22.