Te ʼu Fehuʼi ʼa Te Kau Lautohi
ʼE lelei koa hakita faikole ki te ʼAtua kae mole tou fakaʼosi “ ʼaki te huafa ʼo Sesu”?
ʼE fakahā mai e te Tohi-Tapu ko te kau Kilisitiano ʼaē fia fakaōvi kia Sehova ʼi te faikole, ʼe tonu ke nātou fai ʼaki te huafa ʼo Sesu. Neʼe ʼui fēnei e Sesu ki tana ʼu tisipulo: “E mole he tahi e haù ki te Tamai, kapau e mole fakalaka ia te au.” Neʼe ina toe ʼui fēnei: “Ko he mea’pe e koutou kole mai i toku huafa e au fai anai, ke fakakololiaʼi te Tamai i te Alo. Kapau e kole mai e koutou he mea’pe kia te au i toku huafa, e au fai anai.”—Soane 14:6, 13, 14.
ʼO ʼuhiga mo te tuʼulaga ʼaē ʼe maʼu e Sesu tokotahi, ʼe ʼui fēnei e te tohi Cyclopedia of Biblical, Theological, and Ecclesiastical Literature: “ ʼE ko te ʼAtua tokotahi pe ʼaē ʼe tonu ke tou faikole ki ai, ʼaki ia Sesu Kilisito te Fakafelogoi. Koia, ko te ʼu kole fuli ʼaē ʼe fai ki te kau sagato peʼe ki te kau ʼaselo ʼe mole honatou ʼuhiga, pea ʼe ko he leakovi ia ki te ʼAtua. Ko te tauhi katoa ʼaē ʼe fai ki he tahi, ʼe ko he tauhi tamapua, pea ʼe tapuʼi e te lao taputapu ʼa te ʼAtua.”
E feafeaʼi leva, mo kapau neʼe hoko he meʼa fakafiafia ki he tahi, pea ina ʼui “Mālo Sehova” kae mole ina fai ʼaki te huafa ʼo Sesu? ʼE kovi koa te faʼahi ʼaia? ʼE mole feala ke ʼui ʼe kovi. Ohage la ʼe hoko fakapunamaʼuli ki he Kilisitiano he tuʼutāmaki, pea kalaga fēnei “Tokoni mai Sehova!” ʼE mole feala ke fakafisi te ʼAtua ke tokoni ki tona kaugana he neʼe mole ina kole age “ ʼaki te huafa ʼo Sesu.”
Kae ʼe tonu ke tou tokagaʼi, ka palalau leʼolahi he tahi tatau aipe peʼe ina fai ki te ʼAtua, kae ʼe mole faka ʼuhiga leva ʼe faikole. Ohage la, hili tana fakatūʼa e Sehova ʼuhi ko tana matehi tona tēhina ko Apele, neʼe ʼui fēnei e Kaino: “ ʼE mamafa fau taku fakatūʼa. ʼE ke kapu ʼau ʼi te ʼaho nei mai te fuga kele, pea ʼe fufū anai ʼau ia muʼa ʼo tou fofoga; pea ʼe ʼau liliu anai ko he tahi ʼe hēhē pea mo hola ʼi te fuga kele, pea ka maʼu ʼau e he tahi, pea ʼe ina matehi moʼoni anai ʼau.” (Senesi 4:13, 14) Neʼe ko he ʼu palalau ʼaia ʼa Kaino kia Sehova moʼo fakahā te meʼa ʼaē neʼe ʼi tona loto, tana meo ʼo ʼuhiga mo tana fakatūʼa.
ʼE ʼui fēnei mai e te Tohi-Tapu kia tatou: “ ʼE fakafeagai te ʼAtua kia nātou ʼaē ʼe fialahi, kae ʼe ina foaki tona manavaʼofa ki te hahaʼi agavaivai.” Kapau ʼe mole tou fakaʼapaʼapa ʼi tatatou ʼu palalau ki te Māʼoluga, ʼo tou fai ohage ko hatatou palalau ki he tagata, pea ʼe mahino ia ʼe tou fakahā ai ʼe mole tou agavaivai. (Sakopo 4:6, MN; Pesalemo 47:2; Apokalipesi 14:7) Pea ʼe mole ko he aga fakaʼapaʼapa mo kapau ʼe tou ʼiloʼi te meʼa ʼaē ʼe ʼui e te Folafola ʼa te ʼAtua ʼo ʼuhiga mo te tuʼulaga ʼa Sesu, kae tou faikole pe tatou ʼo mole tou fakamoʼoni kia Sesu Kilisito.—Luka 1:32, 33.
Kae ʼe mole loto e Sehova ke tou faikole ʼo mulimuli ki he ʼu faʼahiga palalau kua ʼosi fakatuʼutuʼu fakatomuʼa ia. Ko te meʼa ʼaē ʼe maʼuhiga ʼe ko te ʼu meʼa ʼaē ʼe haʼu mai tokita loto. (1 Samuele 16:7) ʼI te ʼuluaki sēkulō ʼo totatou temi, ko te ofisie ko Kolonelio ʼo te foʼi solia Loma, ‘neʼe faikole tuʼumaʼu ki te ʼAtua.’ Ko Kolonelio, neʼe ko he Senitile neʼe mole silikosisio, pea neʼe mole heʼeki ina foaki tona maʼuli kia Sehova. Logola ʼe ʼasi mai neʼe mole faikole Kolonelio ʼaki te huafa ʼo Sesu, kae ko tana ʼu faikole neʼe “hake o hage he fakamanatu ia mua o te Atua.” Koteā tona tupuʼaga? Koteʼuhi “ko ia ʼaē ʼe ina sivisivi te ʼu loto,” neʼe sio ko Kolonelio neʼe ko “he tagata tauhilotu mo teki ki te Atua.” (Gaue 10:2, 4; Tāʼaga Lea 17:3) ʼI tana maʼu te ʼatamai mālama ʼo ʼuhiga mo “Sesu Nasaleti,” neʼe maʼu e Kolonelio te laumālie maʼoniʼoni pea neʼe liliu ai ko he tisipulo ʼa Sesu kua papitema.—Gaue 10:30-48.
Moʼo fakaʼosi, ʼe mole ko te tagata ʼaē ʼe ina fakatuʼutuʼu te ʼu faikole ʼaē ʼe tonu ke fagono ki ai te ʼAtua. Kapau ʼe faikole he Kilisitiano ki te ʼAtua kae galo kia ia ke ina fai “ ʼaki te huafa ʼo Sesu,” pea ʼe mole tonu ke lotomamahi ai. ʼE ʼiloʼi lelei e Sehova tatatou ʼu tuʼakoi pea ʼe fia tokoni mai kia tatou. (Pesalemo 103:12-14) ʼE feala ke tou falala, kapau ʼe tou tui ki “te Alo o te Atua . . . kapau e tou kole he mea o fai ki tona finegalo, e ina fakalogo tatou.” (1 Soane 5:13, 14) Kae tāfito mokā nātou faikole ia muʼa ʼo te hahaʼi, ʼe fakamoʼoni e te kau Kilisitiano moʼoni ki te faka maʼuhigaʼi e te Tohi-Tapu te tuʼulaga ʼa Sesu ʼi te fakatuʼutuʼu ʼa Sehova. Pea ʼaki he loto fia fakalogo, ʼe nātou faiga ke nātou fakaʼapaʼapa kia Sesu, ʼo nātou faikole ki te ʼAtua ʼaki ia Sesu.