Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• Koteā koa te lotomahino, pea he koʼe koa ʼe tonu ke maʼuliʼi te kalitate ʼaia e te kau Kilisitiano?

ʼE ko te fealagia ʼaē ke tou mahino ki te ʼaluʼaga ʼaē ʼe hoko ki he tahi, ʼe hage ʼe tou logoʼi ʼi totatou loto te mamahi ʼa he tahi. ʼE tokoniʼi te kau Kilisitiano ke nātou ‘kaugā mamahi, mo ʼofa ki te ʼu tēhina pea mo manavaʼofa.’ (1 Petelo 3:8) ʼE tuku mai e Sehova he faʼifaʼitaki kia tatou ʼo ʼuhiga mo te maʼuliʼi ʼo te lotomahino. (Pesalemo 103:14; Sakalia 2:8) Koʼeni te ʼu faʼahi ʼe feala ke tokoni mai ke tuputupu tatatou mahino ki te ʼu meʼa ʼaē ʼe ʼaoga ki ʼihi pea mo te ʼu meʼa ʼe nātou logoʼi: ke tou fakalogo, mo vakavakaʼi lelei, pea mo fakakaukauʼi.—15/4, pasina 24 ki te 26.

• Ke maʼu te fiafia moʼoni, he koʼe koa ʼe tonu ke ʼuluaki hoko ia te fakamālōlō fakalaumālie pea hoki muli mai te puleʼaki ki te ʼu mahaki fakatupu māʼimoa?

Tokolahi te hahaʼi ʼe mole nātou mahahaki kae ʼe nātou lotomamahi, ʼuhi ko te lahi fau ʼo tonatou ʼu fihifihia. Pea ʼi te tahi faʼahi, ko te kau Kilisitiano tokolahi ʼe nātou māʼimoa ʼi te faʼahi fakasino kae ʼe nātou maʼuʼuli fiafia ʼi tanatou tauhi kia Sehova. Ko nātou ʼaia ʼe kua nātou maʼu te fakamālōlō fakalaumālie, ʼe hoko anai kia nātou te faigamālie ʼaē ko te pulihi ʼo te ʼu mahaki fakatupu māʼimoa ʼi te mālama foʼou.—1/5, pasina 6 ki te 7.

• He koʼe ʼe fakatuʼu tahi e Hepeleo 12:16 ia Esau pea mo te tagata fai feʼauʼaki?

ʼE fakamatala e te Tohi-Tapu neʼe lahi age kia Esau te ʼu fakapale ʼe maʼu fakavilivili kae ina meʼa noaʼi te ʼu meʼa taputapu. Kapau ʼi te temi nei, ko he tahi ʼe ina tuku ke tuputupu ia te taʼi manatu ʼaia, ʼe feala pe ki muli age ke ina fai he agahala mamafa, ohage ko te fai feʼauʼaki.—1/5, pasina 10 ki te 11.

• Neʼe ko ai ia Tertullien, pea koteā ʼaē neʼe ʼiloa ai?

Neʼe ko te tagata faitohi pea neʼe ko te tagata fai teolosia neʼe maʼuli ʼi te lua pea mo te tolu sēkulō ʼo totatou temi. ʼE ʼiloa ʼi tana ʼu tuʼuga tohi neʼe ina fai moʼo fakahāhā te meʼa ʼe lau ko te lotu faka Kilisitiano. ʼI tana ʼu fakahāhā ʼaia, neʼe ina fakahū te ʼu manatu pea mo te ʼu fakakaukau faka filosofia ʼaē neʼe ko te fakatafito ki te ʼu hēhē ʼo te ʼu akonaki hala, ohage ko te Tahitolu.—15/5, pasina 29 ki te 31.

• He koʼe koa ʼe mole tonu ke tuku katoa te hala ki te ʼu meʼa ʼaē ʼe nātou faʼufaʼu totatou sino ʼo ʼuhiga mo te ʼu mahaki mo te aga pea mo te mate ʼo te tagata?

Neʼe ʼui e te kau popoto ʼe tupu te ʼu mahaki ʼo feiā mo tatatou aga mai te ʼu meʼa ʼaē ʼe nātou faʼufaʼu totatou sino. Kae ʼe fakahā mai e te Tohi-Tapu ia te tupuʼaga ʼo te malamanei, ʼo feiā mo te haʼuʼaga ʼo te agahala pea mo te heʼe haohaoa ki te malamanei katoa. Logope ko te ʼu meʼa ʼaē ʼe nātou faʼufaʼu totatou sino ʼe nātou tokoni ki te faʼufaʼu ʼo totatou agaaga, kae ko totatou ʼuhiga heʼe haohaoa pea mo te koga meʼa ʼaē ʼe tou nonofo ai, ʼe toe gāue mālohi pe foki ki totatou ʼuhiga.—1/6, pasina 9 ki te 11.

• Koteā ʼaē neʼe fakahā e te kogaʼi papilusi ʼaē neʼe maʼu ʼi Oxyrhynchos, ʼi Esipito ʼo ʼuhiga mo te fakaʼaogaʼi ʼo te huafa ʼo te ʼAtua?

ʼE tuʼu te Tetalakalame (te ʼu mataʼi tohi faka Hepeleo e fā ʼo te huafa ʼo te ʼAtua) ʼi te kogaʼi tohi ʼaia ʼo Sopo 42:11, 12 ʼaē neʼe toʼo mai te Septante. Ko te tahi ʼaia fakamoʼoni ʼe tuʼu te huafa ʼo te ʼAtua ʼi te Septante, ʼaē ʼe tau fakaʼaogaʼi e te kau tagata faitohi ʼo te Tauhi Foʼou.—1/6, pasina 30.

• Koteā te ʼu faʼahiga faigaoʼi ʼo te temi nei ʼe fakatatau kiai ia te ʼu faigaoʼi agamālohi pea mo fakatupu mate ʼa te kau kalatiatea ʼo te Puleʼaga Loma?

Mole heʼeki faʼa fualoa, neʼe fai ʼi te Colisée (ko he malaʼe) ʼi Loma, te ʼu fakahāhāʼaga viteo ʼe tatau mo te ʼu meʼa ʼaē neʼe hoko ʼi te ʼu malaʼe faigaoʼi Loma. Neʼe fakahā ai te ʼu tau ʼa te ʼu kuli, mo te ʼu fuhu, mo te ʼu fakaʼī fakamataku ʼa te ʼu motokā mo te ʼu motopai, ko he ʼu fuhu fakamataku ʼa te hahaʼi faigaoʼi, pea mo te fuhu ʼa te hahaʼi ʼaē neʼe ʼolo ʼo mamata ki te ʼu faigaoʼi. Neʼe mahino ki te kau Kilisitiano ʼo te temi muʼa ia te fehiʼa ʼa Sehova ki te agamālohi pea mo nātou ʼaē ʼe agamālohi, pea ʼe tonu ke toe feiā mo te kau Kilisitiano ʼo te temi nei. (Pesalemo 11:5)—15/6, pasina 29.

• ʼI tatatou faiga ʼaē ke tou liliu ko he kau faiako lelei, koteā ʼaē ʼe tou lava ako mai te faʼifaʼitaki ʼa Esitalasi?

ʼE fakamatala ia Esitalasi 7:10 ia te ʼu fakatuʼutuʼu e fā neʼe fai e Esitalasi, pea ʼe ko he ʼu faʼahi ʼe tou faigaʼi anai ke tou faʼifaʼitakiʼi. ʼE ʼui fēnei ai: “Ko Esitalasi [1] neʼe ina teuteuʼi tona loto [2] moʼo vakavakaʼi te lao ʼa Sehova, pea [3] ke ina maʼuliʼi, pea [4] mo akoʼi ʼi Iselaele te pelesepeto pea mo te faitotonu.”—1/7, pasina 20.

• Koteā te ʼu ʼaluʼaga e lua ʼo te gāue ʼe tonu ai ki he fafine Kilisitiano ke ina pūlouʼi tona ʼulu?

Ko te ʼuluaki ʼaluʼaga ʼe hoko ʼi te fakatuʼutuʼu faka famili. ʼE fakahā e te pūlouʼi ʼo tona ʼulu tana mahino ki te maʼua ʼo tona ʼohoana ke ina fai te kole pea mo te ako Tohi-Tapu. Ko te lua ʼaluʼaga ʼe hoko ʼi te ʼu gāue ʼo te kokelekasio, ʼaē ʼe ina fakahā ai ʼe mahino ki te ʼu fakatuʼutuʼu faka Tohi-Tapu ki te ʼu tēhina, ke nātou fai te ako pea mo te takitaki. (1 Kolonito 11:3-10)—15/7, pasina 26 ki te 27.

• He koʼe koa ʼe tonu ke mahino te kau Kilisitiano ko te yoga ʼe mole ko he faigaoʼi noa feiā pe kae ʼe kovi?

Ko te fakatuʼutuʼu ʼo te yoga ko te fakaliliu ʼo he tahi ke fakatahi mo he laumālie. ʼE mole hage ia ko te takitaki ʼa te ʼAtua, koteʼuhi ʼi te yoga ʼe mole kei faka gāueʼi te ʼatamai. (Loma 12:1, 2) ʼAki te yoga, ʼe lava hoko kia kita te ʼu tuʼutāmaki ʼo te gaohi meʼa fakatemonio. (Teutalonome 18:10, 11)—1/8, pasina 20 ki te 22.