Koutou Fakaʼaogaʼi Lelei Te ʼu Fetogi ʼAē ʼe Hoko ʼi Tokotou Maʼuli
Ko Pum, mo Jan, mo Dries, pea mo Otto, ko te ʼu tagata ʼāfea e toko fā ʼe nātou nonofo ʼi Holani, pea ʼe lahi te ʼu faʼahi ʼe nātou tatau ai. Ko te ʼu tagata toko fā ʼaia kua nātou ʼohoana pea mo maʼu fānau. Tahi ʼaē meʼa, ʼi ni ʼu taʼu ki muʼa atu, neʼe nātou maʼu fuli tanatou gāue temi katoa ʼi te mālama pea mo tonatou ʼu ʼapi matalelei. Kae neʼe nātou tuku fuli tanatou gāue faka mālama pea mo nātou kamata gāue ʼi tonatou temi katoa pea mo tonatou mālohi katoa maʼa te Puleʼaga ʼo te ʼAtua. Koteā ʼaē neʼe ina faka fealagia ai kia nātou ke nātou fai te ʼu fetogi ʼaia? Ko nātou toko fā ʼaia neʼe nātou fakaʼaogaʼi lelei te ʼu fetogi ʼaē neʼe hoko ʼi tonatou maʼuli.
ʼAKI te temi, ʼe hoko te ʼu fetogi ki te tokolahi ia tatou. Ko te ʼu fetogi ohage la ko te ʼohoana, te maʼu fānau, peʼe ko te tokaga ki te ʼu mātuʼa ʼaē kua matutuʼa ʼe ko te tahi ʼaia ʼu maʼua. Kae ko ʼihi fetogi ʼe nātou foaki mai he fealagia ke lahi age totatou minisitelio faka Kilisitiano. (Mateo 9:37, 38) Ohage la, ka lalahi ake tatatou ʼu fānau, pea ʼe lagi nātou mavae ʼi te loto fale, peʼe lagi hoko mai totatou temi letelete.
Tahi ʼaē meʼa, logola ʼe hoko te ʼu fetogi heʼe tou loto kiai peʼe kailoa, kae ko ʼihi Kilisitiano neʼe fua lelei tanatou fakatuʼutuʼu he ʼu fetogi ʼi tonatou maʼuli ke feala ai ke tuputupu tanatou kau ki te minisitelio. Neʼe ko te faʼahi ʼaia ʼaē neʼe fai e Pum, mo Jan, mo Dries pea mo Otto. ʼO feafeaʼi?
Ka Mavae Te Fānau
Ko Pum neʼe tokaga ki te paʼaga ʼo te sosiete ʼe ina fakatau te ʼu meʼa faitoʼo. Ko ia pea mo tona ʼohoana ko Anny, neʼe nā tautau toʼo toko lua te selevisi pionie vaeluaʼi temi mo tanā ʼu taʼahine e toko lua. Neʼe toe fakatuʼutuʼu foki e Pum pea mo Anny he ʼu temi fakafiafia ke nātou fakatahitahi ai mo te tahi kau pionie. Neʼe nā ʼui fēnei: “Neʼe ko he puipui ʼaia moʼo tekeʼi te ʼu fihifihia ʼaē ʼe tupu mai te tahi ʼu faʼahiga fakakaugā.” Ko te faʼifaʼitaki ʼo tanā ʼu mātuʼa neʼe ina fakaloto mālohiʼi te ʼu taʼahine ʼaia e toko lua, pea neʼe nā liliu ai ʼo pionie katoa ʼi te ʼosi pe ʼo tanā ako.
ʼI te temi ʼaē neʼe mavae ai tanā ʼu taʼahine, neʼe mahino kia Pum pea mo Anny ʼaki te fetogi ʼaia kua lahi age tonā temi pea mo tanā falā ke nā folau ki he ʼu koga meʼa matalelei peʼe ki he tahi age ʼu faʼahiga mālōlō. Kae neʼe fakatotonu e te taumatuʼa ʼaia ke nā fakaʼaogaʼi te fetogi ʼaia moʼo fakalahi tonā minisitelio faka Kilisitiano. Koia neʼe kole ai e Pum ki tona patolo he ʼaho e tahi ʼi te vāhaʼa ke mole gāue ai. Ki muli age, neʼe fai e Pum te ʼu fakatuʼutuʼu neʼe feala ai ke kamata gāue ʼi te hola 7 uhu pea ʼosi ʼi te hola 2 hili hoʼatā. ʼE mahino ia, ʼuhi ko tana mole kei gāue lahi neʼe tonu ai leva ke nā fakaʼaluʼalu tonā maʼuli ʼaki he kiʼi lī totogi ʼe veliveli age. Kae neʼe nā lavaʼi te faʼahi ʼaia pea ʼi te 1991, neʼe feala kia Pum ke pionie katoa mo tona ʼohoana.
Ki muli age, neʼe kole age kia Pum ke ina leʼoleʼo te Fale ʼo Te Fakatahi ʼa te kau Fakamoʼoni ʼa Sehova. Neʼe tonu ki te taumatuʼa ʼaia ke nā mavae ʼi tonā ʼapi ʼaē neʼe nā maʼuʼuli ai ia taʼu e 30 kae nā ʼolo ʼo nonofo ʼi te kiʼi kogafale ʼo te Fale ʼo Te Fakatahi. Neʼe nā ʼolo kiai. Neʼe faigataʼa koa? ʼE ʼui e Anny, ʼi te ʼu temi fuli pe ʼaē neʼe manamanatu ai ki tona ʼapi, neʼe ina fai kia ia te fehuʼi ʼaenī, ‘ ʼE ʼau hage koa ko te ʼohoana ʼo Lote?’ Neʼe mole ‘toe fia sio ki muli.’—Senesi 19:26; Luka 17:32.
Neʼe logoʼi e Pum pea mo Anny te ʼu tapuakina lahi ʼi te tonu ʼaia neʼe nā fai. Ohage la ʼe nā fiafia ʼi tanā gāue ʼi te Fale ʼo Te Fakatahi, tanā teuteuʼi te Fale ki te ʼu fakatahi faka tisitilike, pea mo tanā felāveʼi mo te ʼu tagata taupau faka silikosikilipisio (te kau minisi feʼoloʼaki) ʼaē ʼe ʼōmai ʼo fai te ʼu akonaki ʼi te foʼi fale ʼaia. ʼI ʼihi temi, ʼe nā ʼaʼahi te ʼu kokelekasio kehekehe mokā fetogi e Pum te tagata taupau faka silikosikilipisio.
He koʼe neʼe feala ai ki te taumatuʼa ʼaia ke fua lelei tanā fakalahi tana selevisi? ʼE ʼui fēnei e Pum: “Ka hoko he fetogi lahi ʼi tokotou maʼuli, pea ʼe tonu ke koutou fakatotonu ke koutou fakaʼaogaʼi lelei te ʼu ʼaluʼaga foʼou ʼaē ʼe hoko kia koutou.”
Koutou Fakatuʼutuʼu He Maʼuli ʼe Faigafua
Ko Jan pea mo tona ʼohoana ko Woth, ko tanā ʼu tamaliki e toko tolu. Ohage ko Pum pea mo tona famili, neʼe fakaʼaogaʼi lelei e Jan te fetogi ʼaē neʼe hoko ʼi tonā maʼuli. Lolotoga ni ʼu taʼu, neʼe totogi lelei te gāue ʼa Jan ʼi te fale paʼaga, pea neʼe maʼu ai e tona famili he maʼuli ʼe fīmālie. Kae neʼe tuputupu ia ia te loto ʼaē ke lahi age tona minisitelio. ʼE ina fakamahino fēnei: “ ʼI toku maʼuli, neʼe loloto taku fakafetaʼi ki te moʼoni, pea neʼe tuputupu toku ʼofa kia Sehova.” Koia ʼi te 1986, neʼe fai e Jan he fetogi ʼi tona maʼuli. ʼE ina ʼui fēnei: “Neʼe ʼau fakaʼaogaʼi lelei te faigamālie ʼo te ʼu fetogi ʼaē neʼe fai ʼi te fale gāue pea neʼe mole lahi ai toku ʼu hola gāue. Neʼe higoaʼi fakahuahua ʼau e toku ʼu kaugā gāue ko Diwodo he neʼe ʼau gāue pe ʼi te dinsdag [te Feliatolu], mo te woensdag [te Feliafā] pea mo te donderdag [te Felianima]. Neʼe hifo toku lī totogi ʼi te 40 ʼi te teau. Neʼe ʼau fakatau tomatou ʼapi pea mo totogi te vaka neʼe mātou nonofo ai, ke feala ai hamatou gāue ʼi te ʼu koga meʼa ʼaē ʼe ʼaoga lahi ai he kau fai faka mafola ʼo te Puleʼaga. Ki muli age, neʼe ʼau fakaʼaogaʼi lelei toku letelete ʼaē neʼe ʼau toʼo fakatomuʼa, neʼe toe hifo toku lī totogi ʼi te 20 ʼi te teau, kae ʼi te taʼu 1993, neʼe feala ai ke ʼau kamata te selevisi pionie katoa.”
Ia ʼaho nei, ʼe kau ia Jan ki te Komite Faka Felogoi Mo Te Lopitali pea ʼi ʼihi temi ʼe ko ia te tagata taupau ʼo te fakatahi. Logola te mahamahaki ʼo Woth kae ʼi ʼihi temi ʼe ina toʼo te selevisi pionie vaeluaʼi temi. Ko tanā ʼu tamaliki e toko tolu kua nātou ʼohoana pea ʼaki tonatou ʼu ʼohoana, ʼe nātou faʼafai ʼi te minisitelio ʼo te Puleʼaga.
Neʼe fakatuʼutuʼu feafeaʼi e Jan pea mo Woth tonā maʼuli ke fakaʼaluʼalu lelei pe mo tonā kiʼi lī totogi? ʼE tali fēnei e Jan: “ ʼI te temi ʼaē neʼe ma maʼuli lelei ai, neʼe ma tokaga ke mole ma pipiki fau ki te ʼu koloā. ʼI te temi nei, ʼe feala ke faigataʼa heʼe tonu ke ma atalitali ʼi muʼa ʼo tamā maʼu he meʼa, kae ko te ʼu tapuakina fakalaumālie pea mo te ʼu pilivilesio ʼaē neʼe ma maʼu, neʼe lahi age ia ʼi te ʼu meʼa ʼaia.”
Ohage ko Jan pea mo Woth, ko Dries pea mo tona ʼohoana, ia Jenny, neʼe nā toe fakatotonu mo nāua ke faigafua tonā maʼuli ke lahi age tonā temi ki te gāue ʼo te Puleʼaga. Neʼe pionie ia Dries pea mo Jenny ʼo aʼu ki tanā maʼu fānau. Moʼo taupau tona famili, neʼe gāue ia Dries ʼi te foʼi sosiete lahi. Neʼe leleiʼia e tona ʼu patolo tana gāue pea neʼe nātou fakahā age kia ia ʼe feala ke hikihiki tona lī totogi. Kae neʼe fakafisi kiai ia Dries, koteʼuhi kapau neʼe ina tali pea ʼe veliveli age anai tona temi ki te ʼu gāue faka Kilisitiano.
Ko te taupau ʼo tonā famili—pea mo tanā tokaga ki te faʼe ʼa Jenny ʼaē neʼe mahaki—neʼe ʼaoga kiai he temi lahi pea mo te mālohi ʼo te taumatuʼa ʼaia. Kae neʼe hoko atu pe tanā taupau te manatu faka pionie. Koteā ʼaē neʼe tokoni kia nāua ke nā fai te faʼahi ʼaia? ʼE fakamahino fēnei e Jenny: “Neʼe nonofo te ʼu pionie ʼio māua, neʼe ma fakaafe te kau pionie ke mātou kakai fakatahi, pea mo nofo te ʼu tagata taupau faka silikosikilipisio ʼi tomā loto fale.” ʼE toe ʼui fēnei e Dries: “Neʼe ma faka faigafua tomā maʼuli pea neʼe mole ʼi ai homā ʼu maʼua. Neʼe ma fakatotonu ke mole ma fakatuʼu he matani gāue lahi, peʼe mole ma toʼo he ʼapi, ke feala hamā ʼāteaina ʼi te ʼu meʼa ʼaia ʼi te ka haʼu.”
Neʼe maʼu e Dries pea mo Jenny te ʼu fua lelei ʼi tanā fakatuʼutuʼu ʼaē ke nā fai he ʼu fetogi ke lahi age tonā temi moʼo fakahoko te ʼu gāue ʼo te Puleʼaga. Ko tanā ʼu tama e toko lua ʼe nā tagata ʼāfea ʼi te temi nei, pea ʼe pionie te tahi mo tona ʼohoana. Ko Dries pea mo Jenny neʼe nā pionie makehe, pea ki muli age neʼe feʼoloʼaki fakatahi ia Jenny mo Dries moʼo ʼaʼahi te ʼu silikosikilipisio. ʼI te temi nei, ʼe nā gāue ʼi te Petele, pea ʼe kau ia Dries ki te Komite ʼo Te Filiale.
Neʼe Nātou Toʼo Fakatomuʼa Tonatou Letelete
Ohage ko Dries pea mo Jenny, ko Otto mo tona ʼohoana, ko Judy, neʼe nā pionie ʼi muʼa ʼo tanā maʼu tanā ʼu taʼahine e toko lua. ʼI te faitama ʼa Judy ʼi tana ʼuluaki tamasiʼi, neʼe maʼu e Otto tana gāue ko te tagata faiako.
ʼI te lahilahi ake ʼo tanā fānau, ko Otto pea mo Judy neʼe nā fakaafe ʼi ʼihi temi te kau pionie ki tonā ʼapi ke sio ʼe tanā ʼu taʼahine te fiafia ʼa te kau Kilisitiano ʼaē ʼe tauhi ʼi te temi katoa. ʼAki te temi, neʼe pionie tanā taʼahine lahi. Ki muli age, neʼe kau ki te Faleako ʼo Kalaate, pea ʼaki tona ʼohoana, ʼe nā misionea ʼi te temi nei ʼi te fenua ʼi Afelika. Neʼe kamata pionie tanā taʼahine muli ʼi te 1987, pea neʼe toe pionie mo Judy.
ʼAki te ʼu fetogi ʼaē neʼe hoko ki te ʼu hola gāue ʼa Otto ʼi te faleako, neʼe ina fakaʼaogaʼi te ʼu temi mālōlō ʼaia ke pionie. Ki muli age, neʼe mavae ʼi tana gāue. ʼI te temi nei, ʼe fakaʼaogaʼi e Otto tana poto faiako moʼo fakaloto mālohiʼi te ʼu kokelekasio mokā ina ʼaʼahi te ʼu kokelekasio ʼaia.
Koteā te tokoni ʼa Otto kia nātou ʼaē ʼe nātou toʼo fakatomuʼa tonatou letelete? “Ka koutou letelete, ʼaua naʼa koutou fakatotonu ke koutou fakafīfīmālie ʼi he taʼu peʼe laka atu. ʼE faigafua hakita liliu ʼo faka māmāhani mo te maʼuli ‘fakafīfīmālie.’ ʼE mole tuai pea galo anai kia koutou te selevisi pionie. Kae ke koutou kamata takotou ʼu gāue ʼi te minisitelio pea mo te kokelekasio ʼi te temi pe ʼaē ʼe koutou letelete ai.”
Koutou Fakaʼaogaʼi Lelei Takotou Kua Māhani ʼi Te Maʼuli
ʼE moʼoni, ko te ʼu tēhina ohage ko Pum, mo Jan, mo Dries pea mo Otto ʼe mole kei nātou maʼu ʼi te temi nei te mālohi ʼaē neʼe nātou maʼu ʼi tanatou kei tūpulaga. Kae kua nātou aga fakapotopoto, kua nātou māhani ʼi te maʼuli, mo nātou maʼu te poto. (Tāʼaga Lea 20:29) ʼE nātou ʼiloʼi peʼe koteā te ʼu maʼua ʼa he tāmai, pea ʼi tanatou gāue mo tonatou ʼu ʼohoana, ʼe nātou mahino ki te ʼatu ʼu gāue ʼaē ʼe tonu ke fai e he faʼe. ʼAki tonatou ʼu ʼohoana, neʼe nātou fakatokatoka te ʼu fihifihia faka famili pea mo foaki he ʼu fakatuʼutuʼu fakalaumālie ki tanatou ʼu fānau. ʼE ʼui fēnei e Otto: “Ka ʼau ʼaʼahi te silikosikilipisio pea mo ʼau foaki he ʼu tokoni ʼo ʼuhiga mo te maʼuli faka famili, pea ʼe ʼaoga ʼaupito kia ʼau taku ʼiloʼi ʼaē pe koteā te taupau ʼo he famili.” ʼO toe feiā aipe, ko te ʼiloʼi e Dries pe koteā te ʼuhiga ʼo he tāmai, ʼe ʼaoga ʼaupito ʼi te famili ʼo te Petele, heʼe tokolahi ai te kau gāue tūpulaga.
Ei, ko te ʼiloʼi totonu e te ʼu tēhina ia te ʼu faʼahi ʼaia, ʼe tokoni ai kia nātou ke nātou tokaga ki te ʼu meʼa kehekehe ʼaē ʼe ʼaoga ki te ʼu kokelekasio. ʼI hona ʼaluʼaga fakatātā, ko tanatou māhani ʼaia ʼi te maʼuli ʼe ina fakamāsilaʼi te ʼu meʼa gāue ʼaē ʼe nātou fakaʼaogaʼi, ʼo nātou fakaʼaogaʼi tonatou mālohi ke maʼu ai he ʼu fua lelei. (Tagata Tānaki 10:10) ʼI tona fakahagatonu, ʼe feala ke nātou fakahoko lolotoga he temi he ʼu meʼa ʼe lahi age ia nātou ʼaē ʼe mālolohi ʼi te faʼahi fakasino, kae mole heʼeki nātou māhani ʼi te maʼuli.
Ko te ʼu tēhina ʼaia, ʼaki tonatou ʼu ʼohoana, ʼe ko he ʼu faʼifaʼitaki lelei maʼa te kau tūpulaga ʼi te hahaʼi ʼa Sehova. ʼE tokagaʼi e te kau tūpulaga ko te ʼu taumatuʼa ʼaia neʼe nātou tauʼi te ʼu faigataʼaʼia pea mo maʼu he ʼu tapuakina lahi ʼe fakamatala ʼi tatatou ʼu tohi. ʼE ko he meʼa fakaloto mālohi hatatou sio ki he ʼu tagata pea mo he ʼu fafine ʼe tatau tanatou manatu mo te manatu ʼaē neʼe maʼu e te tagata ko Kalepe, logola tana kua matuʼa, kae neʼe ina kole ke tuku age he gāue faigataʼa.—Sosue 14:10-12.
Tou Faʼifaʼitakiʼi Tanatou Tui
ʼE feala koa ke koutou faʼifaʼitakiʼi te tui pea mo te ʼu meʼa ʼaē neʼe fai e te ʼu taumatuʼa ʼaē neʼe tou talanoa kiai ʼi te alatike ʼaenī? Koutou manatuʼi, neʼe mulimuli tāfito tonatou maʼuli ki te moʼoni. Neʼe nātou fakatuputupu ʼi te loto ʼo tanatou ʼu fānau te holi ʼaē ke nātou pionie. Ohage ko tona ʼui e Jan, neʼe nātou fai te faʼahi ʼaia “he neʼe nātou tuku he faʼifaʼitaki ʼo ʼuhiga mo tanatou ʼoʼofa kia Sehova pea mo tana kautahi, ʼo nātou fai he ʼu fakatuʼutuʼu ke nātou fakatahitahi mo ni ʼu hahaʼi lelei, pea mo akoʼi tanatou ʼu fānau ke nātou popoto ʼi te taupau ʼo tonatou maʼuli.” Tahi ʼaē meʼa, neʼe nātou gāue pea mo gaoʼi faka famili. ʼE manatuʼi fēnei e Pum: “ ʼI te ʼu ʼaho mālōlō, neʼe ko te agamāhani ʼo tomatou famili ko te fai faka mafola ʼi te uhu pea mo fakafiafia fakatahi ʼi te hili hoʼatā.”
Tahi ʼaē meʼa, neʼe fai e te kau Kilisitiano ʼaia he ʼu fakatuʼutuʼu fakatomuʼa, ke feala ai mokā hoko he ʼu fetogi ʼi tonatou maʼuli, kua nātou ʼosi teuteu ke nātou fakaʼaogaʼi lelei te ʼaluʼaga foʼou ʼaia. Neʼe nātou fai he ʼu fakatuʼutuʼu pea mo he ʼu tonu ke feala ai hanatou fakahoko fakavilivili tanatou ʼu fakatuʼutuʼu. Neʼe nātou kumi ni ʼu ʼaluʼaga ke fakasiʼisiʼi ai tanatou gāue faka mālama, pea neʼe nātou lotolelei ke nātou fakaʼaluʼalu tonatou maʼuli ʼaki he kiʼi lī totogi ʼe mole faʼa maʼuhiga. (Filipe 1:10) Neʼe lagolago katoa te ʼu fafine ʼohoana ʼaia ki tonatou ʼu ʼohoana. Neʼe nātou holi mālohi fakatahi ke nātou hū ʼi “te matapā lahi ki te gāue,” pea neʼe nātou maʼu ai te ʼu tapuakina lahi mai ia Sehova.—1 Kolonito 16:9, MN; Tāʼaga Lea 10:22.
ʼE koutou loto koa mo koutou ke toe lahi age takotou kau ki te minisitelio? Kapau koia, pea ko te meʼa pe ʼaē ʼe lagi tonu ke koutou fai, ko te fakaʼaogaʼi lelei ia te ʼu fetogi ʼi tokotou maʼuli.
[Paki ʼo te pasina 20]
Ko Pum pea mo Anny ʼe nā leʼoleʼo te Fale ʼo Te Fakatahi
[Paki ʼo te pasina 20]
Ko Jan pea mo Woth ʼe nā kau ki te gāue fai faka mafola
[Paki ʼo te pasina 21]
Ko Dries pea mo Jenny ʼe nā gāue ʼi te Petele
[Paki ʼo te pasina 21]
Ko Otto pea mo Judy ʼe nā teuteu ki tanā ʼaʼahi ia te kokelekasio