ʼE Pulihi Anai Koa ʼi He ʼAho Te Masiva?

“KOʼENI, te ʼu loʼimata ʼo nātou ʼaē ʼe maʼuʼuli taʼomia, kae neʼe mole ʼi ai honatou tagata fakaloto fīmālie; pea neʼe maʼu te mālohi ʼi te faʼahi ʼo nātou ʼaē ʼe nātou faka taʼomia ia nātou, koia neʼe mole ʼi ai honatou tagata fakafimālie,” neʼe ko te ʼui ʼaia ʼa te Hau poto ko Salomone ʼo te Iselaele ʼāfea. (Tagata Tānaki 4:1) ʼE mahino papau ia, ʼi te hahaʼi ʼaē neʼe maʼuʼuli taʼomia ʼaē neʼe talanoa ki ai te hau, tokolahi neʼe nātou māsisiva.

ʼE mole feala pe ke fakafuafua te masiva ʼaki he ʼu sivisivi ʼi te faʼahi ʼo te paʼaga. ʼO mulimuli ki te ʼu sivi neʼe fakahā e te Banque Mondiale ʼi Sūnio 2002, “neʼe fakafuafua ʼi te 1998, ko hahaʼi e toko 1,2 miliale ʼi te malamanei ʼe nātou maʼuʼuli mo te falā e 124 ʼi te ʼaho fuli . . . pea ko te hahaʼi e toko 2,8 miliale ʼe nātou maʼuʼuli mo te falā e 248 ʼi te ʼaho fuli.” Neʼe ʼui, logola neʼe tokolahi age te hahaʼi ʼaia ʼi te ʼu sivisivi neʼe fai ki muʼa atu, “kae ʼe kei lahi fau te hahaʼi ʼaē ʼe maʼuli mamahi.”

ʼE pulihi anai koa ʼi he ʼaho te masiva? Neʼe ʼui fēnei e Sesu Kilisito ki tana ʼu tisipulo: “ ʼE koutou maʼu tuʼumaʼu pe mo koutou te kau māsisiva.” (Soane 12:8) Kae ko tona faka ʼuhiga koa ʼe hoholo pe anai te masiva pea mo tona ʼu fua kovi ʼo talu ai? Kailoa, heʼe logope la neʼe mole fakapapau e Sesu ko tana kau tisipulo ʼe nātou maʼu koloā fuli anai, kae ʼe mole tonu ke tou faka ʼuhiga ʼaki tana ʼu palalau ʼaia ʼe mole he ʼamanaki maʼa nātou ʼe masiva.

Logola te ʼu faiga ʼa te tagata pea mo te mole fakahoko ʼo tanatou fakapapau ʼaē ke fakagata te masiva, kae ko te Folafola ʼa te ʼAtua ia te Tohi-Tapu, ʼe ina ʼui papau mai ʼe mole kei tuai, pea ʼe mole tou toe sio anai ki he ʼu hahaʼi māsisiva. ʼI tona ʼuhiga moʼoni, neʼe tala e Sesu “te logolelei ki te hahaʼi masiva.” (Luka 4:18) Neʼe kau ki te logo lelei ʼaia te fakapapau ʼaē ʼe mole toe ʼi ai anai he tahi ʼe masiva. ʼE hoko anai te faʼahi ʼaia mokā fakatuʼu e te Puleʼaga ʼo te ʼAtua te ʼu ʼaluʼaga faitotonu ʼi te kele.

ʼE kehekehe ʼaupito anai te mālama ʼaē ka fakatuʼu! Ko te Hau ʼi selo ko Sesu Kilisito “ ʼe fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva.” Koia “mai te taʼomia pea mo te agamālohi ʼe ina totogi anai tonatou ʼu nefesi.”—Pesalemo 72:13, 14.

ʼO ʼuhiga mo te temi ʼaia, ʼe ʼui fēnei e Mikea 4:4: “ ʼE nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou, he ko te gutu ʼaē ʼo Sehova ʼo te ʼatu kautau ʼaē neʼe lea kiai.” Ko te Puleʼaga ʼo te ʼAtua ʼe ina fakatokatoka anai te ʼu fihifihia fuli ʼaē ʼe tau mo te malamanei katoa, pea mo ina pulihi te mahaki pea mo te mate. Ko te ʼAtua “ ʼe ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe.”—Isaia 25:8.

ʼE feala ke koutou tui ki te ʼu fakapapau ʼaia heʼe ko te ʼAtua totonu ʼaē neʼe ina fai. He koʼe koa ʼe mole koutou vakaʼi te ʼu manatu ʼaē ʼe nātou fakamoʼoni ai ʼe tau mo feʼauga ke koutou falala ki te ʼu lea faka polofeta ʼo te Tohi-Tapu?

[Haʼuʼaga ʼo te paki pasina 32]

FAO photo/M. Marzot