Te ʼu Fehuʼi ʼa Te Kau Lautohi

ʼE feala koa ke fai he fakatuʼutuʼu mokā mahaki he tēhina fakanofo pea ʼe mole feala ke kau ki te fakamanatu ʼo te Taumafa ʼa Te ʼAliki?

Ei. ʼE feala pea ʼe tonu ke vakaʼi mokā mahaki he Kilisitiano fakanofo pea lagi takoto mahaki ʼi tona palepale, ʼo mole feala ai ke kau mo te kokelekasio ki te ʼAho Fakamanatu ʼo te mate ʼo Kilisito. ʼI te faʼahi ʼaia, ʼe feala ke fakatuʼutuʼu e te kolesi ʼo te kau tagata ʼāfea he tagata ʼāfea peʼe ko he tēhina kua fakapotopoto, ke ina ʼave he koga ʼo te pane pea mo te vino ki te tēhina ʼaia ʼi te po ʼaia ʼi muʼa ʼo te hopo ake ʼo te laʼā.

Kapau ʼe feala, pea ko te tagata ʼāfea peʼe ko te tahi tēhina ʼaē ʼe ʼalu ki te tēhina fakanofo ʼaia, ʼe feala ke talanoa fakanounou ki he ʼu manatu pea mo ina lau age te ʼu vaega faka Tohi-Tapu ʼaē ʼe ʼalutahi mo te toʼotoʼoga ʼaia. ʼE feala ke mulimuli ki te faʼifaʼitaki ʼaē neʼe tuku e Sesu ʼi te temi ʼaē neʼe fai ai te Taumafa ʼa Te ʼAliki. Ohage la, ʼe feala ke ina lau ia Mateo 26:26 pea ʼi te hili ʼo te faikole, ke ina fakatoʼo age te pane ʼaē ʼe mole hona meʼa fakatupu. Pea feala ki te tēhina ke ina lau ia Mateo kapite 26, vaega 27 pea mo 28, pea ʼi te hili ʼo te tahi faikole ke ina fakatoʼo age te vino. ʼE feala ke talanoa fakanounou ki te faka ʼuhiga ʼo te pane pea mo te vino, pea ʼe feala leva ke ina fai te faikole moʼo fakaʼosi.

ʼE mahino ia, ʼe tonu ke tou faiga ke tou kau fakatahi mo te kokelekasio moʼo fakamanatu ia te Taumafa ʼa Te ʼAliki. Kae koteā ʼaē ʼe feala ke fai mokā ko he tēhina fakanofo ʼe mahaki kovi, peʼe takoto ʼi te lopitali peʼe ko he tahi age ʼaluʼaga, ʼo mole feala ai ke ina fai te ʼAho Fakamanatu ʼo te ʼaho 14 ʼo Nisani ʼi te ʼosi tō ʼo te laʼā? ʼE feala ki te tēhina fakanofo ʼaia ke mulimuli ki te fakatuʼutuʼu ʼi te Lao ʼa Moisese, pea mo ina fai tokotahi te fakamanatu mokā hili ʼaho e 30.—Faka au 9:9-14.