Koteā Te Ōmoe Fakaʼosi?

KOTEĀ ʼaē ʼe koutou manatu kiai mokā ʼe koutou logo ki te kupuʼi palalau “te ōmoe fakaʼosi”? Tokolahi te hahaʼi ʼe nātou manatu anai ki te ʼu paki neʼe pena ʼi te kolo ʼo Italia ko Milan, e te tagata fai paki ko Léonard de Vinci (1452-1519). Lolotoga te ʼu sēkulō, neʼe faka maʼuhigaʼi te Ōmoe Fakaʼosi e te ʼu hahaʼi faiva, pea mo te hahaʼi faitohi, pea mo te kau hiva.

Koteā te Ōmoe Fakaʼosi, pea koteā tona faka ʼuhiga ki te hahaʼi ʼo te 21 sēkulō? ʼE fakahā atu anai e te ʼu encyclopédies pea mo te ʼu tikisionalio, ko te Ōmoe Fakaʼosi ʼaē ʼe toe fakahigoaʼi ko te Ōmoe ʼa Te ʼAliki, ʼe ko te taumafa ʼaē neʼe fai e Sesu Kilisito mo tana kau ʼapositolo ʼi te po ʼi muʼa ʼo tana mate faka sakilifisio. Kua fakahigoaʼi pe ko te Ōmoe Fakaʼosi, ʼuhi he neʼe ko te taumafa fakaʼosi pe ʼaia ʼa Sesu mo tana kau tisipulo agatonu. ʼE tau ke higoaʼi ko te Ōmoe ʼa Te ʼAliki, koteʼuhi neʼe fakatuʼu te toʼotoʼoga ʼaia e te ʼAliki ko Sesu Kilisito.

Lolotoga te ʼu sēkulō, tokolahi neʼe nātou sakilifisioʼi tonatou maʼuli ki te ʼu meʼa neʼe nātou lagolago mālohi kiai. Ko te ʼu mate faka sakilifisio ʼaia neʼe fua lelei ki ʼihi ʼi he kiʼi temi pe. Kae ka fakatatau mo te mate ʼo Sesu Kilisito, logola te lelei ʼo te ʼu sakilifisio ʼaia neʼe fai e te hahaʼi, kae ʼe mole nātou maʼuhiga age. Pea tahi, ʼe mole feala ki te kau mate ʼo te mālama maveuveu ʼaenī ke fua lelei ki te malamanei katoa. Koteā tona tupuʼaga?

Moʼo tali ki te fehuʼi ʼaia, pea ke koutou ʼiloʼi te ʼuhiga ʼo te Ōmoe ʼa Te ʼAliki kia koutou, ʼe mātou fakaafe atu koutou ke koutou lau te alatike ka hoa mai.