Ko He Toʼotoʼoga ʼe Maʼuhiga Kia Koutou
ʼI TANA kei maʼuli ʼi te kele, neʼe fakatuʼutuʼu e Sesu Kilisito te toʼotoʼoga ʼe ina faka maʼuhigaʼi ia te ʼAtua. Neʼe ko te toʼotoʼoga faka lotu pe ʼaia e tahi ʼaē neʼe ina fakatotonu ki tana kau tisipulo ke nātou fakamanatuʼi. Neʼe ko te Ōmoe ʼa te ʼAliki, ʼaē ʼe toe fakahigoa ko te Ōmoe Fakaʼosi.
Koutou fakakaukau age ʼe koutou sisio ki te ʼu meʼa ʼaē neʼe hoko ʼi muʼa ʼo te fai ʼo te toʼotoʼoga ʼaia. Ko Sesu pea mo tana ʼu ʼapositolo neʼe nātou fakatahitahi ʼi te kogafale fata ʼi Selusalemi moʼo fakamanatuʼi te Pāsikate Sutea. Neʼe kua nātou ʼosi kai te Pāsikate, neʼe ko te akeno neʼe taʼo, mo te ʼu lau ʼakau, mo te pane neʼe mole hona meʼa fakatupu, pea mo te vino kula. Neʼe fakamavae te ʼapositolo heʼe agatonu ko Sutasi Isikaliote pea neʼe kua ōvi mai te temi ʼaē ka ina lavakiʼi ai tona ʼAliki. (Mateo 26:17-25; Soane 13:21, 26-30) Neʼe ko Sesu pe mo tana toko 11 kau ʼapositolo agatonu, pea neʼe kau ai mo Mateo ia nātou.
ʼO mulimuli ki te fakamatala ʼa Mateo, neʼe fakatuʼutuʼu fēnei e Sesu te Ōmoe ʼa te ʼAliki: “Neʼe toʼo e Sesu te pane [ʼaē neʼe mole hona meʼa fakatupu] pea ʼi tana ʼosi lau te tapuaki, neʼe ina tofitofi pea ʼi tana foaki ki te kau tisipulo, neʼe ʼui maʼana: ‘Koutou toʼo, ʼo kai. Ko te meʼa ʼaenī ʼe ina fakatātā toku sino.’ Pea neʼe ina toʼo te ipu [vino] pea ʼi tana ʼosi fai te fakafetaʼi, neʼe ina foaki age kia nātou ʼo ʼui maʼana: ‘Koutou ʼiʼinu fuli kiai; heʼe ko te meʼa ʼaenī ʼe ina fakatātā toku “taʼataʼa ʼo te fuakava,” ʼaē ʼe tonu ke liligi maʼa te tokolahi ki te fakamolemole ʼo te ʼu agahala.’ ”—Mateo 26:26-28, MN.
He koʼe neʼe fakatuʼutuʼu e Sesu te Ōmoe ʼa te ʼAliki? He koʼe neʼe ina fakaʼaogaʼi te pane neʼe mole hona meʼa fakatupu pea mo te vino kula? Neʼe kai koa e te ʼu tisipulo fuli ʼa Kilisito te pane pea mo ʼinu te vino? Neʼe tonu ke fakamanatuʼi tuʼa fia te toʼotoʼoga ʼaia? Pea ʼe ʼi ai moʼoni koa hona faka ʼuhiga kia koutou?