ʼE Fakaafe Koutou

KO TE Ōmoe Fakaʼosi, ʼaē neʼe fakatuʼu e te ʼAliki ko Sesu Kilisito kua teitei hili kiai taʼu e 2 000, ʼe mole maʼuhiga pe ʼi te faʼahi ʼo te hisitolia. ʼE malave ia ki te maʼuli ʼo te hahaʼi talu mai te temi ʼaē neʼe fakatuʼu ai. ʼE malave ki te tokolahi te ʼu fakamatala ʼo te ʼu Evaselio ʼo ʼuhiga mo te meʼa ʼaē neʼe hoko ʼi te po ʼaia, pea ʼe nātou faigaʼi ʼi he ʼu ʼaluʼaga kehekehe ke nātou fakamanatu te Ōmoe ʼa te ʼAliki.

ʼE tou mahino fuli ki te faʼahi ʼaia, koteʼuhi ko Sesu Kilisito totonu ʼaē neʼe ina fakatotonu ki tana kau tisipulo ke nātou fai ia te toʼotoʼoga ʼaia pea ke nātou fai tuʼumaʼu. Neʼe ina ʼui tāfito age kia nātou: “Koutou haga fai te meʼa ʼaenī moʼo fakamanatu kia te ʼau.”—Luka 22:19; 1 Kolonito 11:23-25, MN.

Kae ʼe mahino ia ke ʼaoga moʼoni te toʼotoʼoga ʼaia, ʼe tonu ke kita mahino lelei ki tona faka ʼuhiga, ohage ko tona fakahā mai ʼi te Folafola ʼa te ʼAtua, ia te Tohi-Tapu. Pea tahi ʼaē meʼa, ʼe maʼuhiga ke tou ʼiloʼi te meʼa ʼaē ʼe ʼui e te Tohi-Tapu ʼo ʼuhiga mo te ʼaho ʼaē ʼe tonu ke fai ai pea mo tona faʼahiga fakaʼaluʼalu.

ʼI tanatou fakalogo ki te fakatotonu ʼa Sesu, ko te kau Fakamoʼoni ʼa Sehova ʼi te malamanei katoa ʼe nātou fakatahitahi anai ʼi te afiafi ʼo te Feliafā, ʼaho 16 ʼo ʼApelili 2003, moʼo fakamanatu te mate ʼo Sesu. ʼE ko he faigamālie anai kia nātou hanatou vakavakaʼi te Tohi-Tapu pea mo fakafoʼou tanatou tui pea mo tonatou ʼofa ki te ʼAliki ko Sesu Kilisito, ʼaē neʼe ina ʼui fēnei: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼE fakaafe atu koutou ke koutou fakatahi mo nātou ʼi te afiafi ʼaia, heʼe lagi fakamālohi ai anai takotou tui pea mo tokotou ʼofa kia Sesu Kilisito pea mo te Tāmai ʼaē ʼe ʼi selo, ia Sehova ʼAtua.