ʼU Tūpulaga—ʼE Mole Galoʼi Anai e Sehova Takotou ʼu Gāue!

“ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kia nātou.”—Hepeleo 6:10, MN.

1. ʼE fakahā feafeaʼi mai e te ʼu tohi faka Tohi-Tapu ʼo Hepeleo pea mo Malakia ʼe maʼuhiga kia Sehova takotou tauhi?

NEʼE kua koutou fai koa he meʼa lelei ki hokotou kaumeʼa pea neʼe mole ina fakamālo atu? ʼE fakatupu lotomamahi ʼaupito mokā ʼe tou foaki he meʼa ʼofa ki he tahi kae mole ina faka maʼuhigaʼi, peʼe mole kei ina manatuʼi te meʼa lelei ʼaē neʼe tou fai age. Kae ʼe kehekehe ia mo Sehova mokā ʼe tou tauhi kia te ia ʼaki totatou loto katoa! ʼE ʼui fēnei e te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kia nātou.” (Hepeleo 6:10, MN ) Koutou fakakaukauʼi age muʼa te faka ʼuhiga ʼo te vaega ʼaia. Kia Sehova ʼe ko he aga heʼe agatonu anai ʼe ina fai—peʼe ko he agahala—mo kapau ʼe mole ina manatuʼi te meʼa ʼaē neʼe koutou fai pea mo te meʼa ʼaē ʼe koutou haga fai ʼi tana tauhi. ʼE ko he ʼAtua loto fakafetaʼi!—Malakia 3:10.

2. Koteā ʼaē ʼe makehe moʼoni ai te tauhi ʼaē kia Sehova?

² ʼE koutou maʼu te pilivilesio makehe ke koutou atolasio pea mo tauhi ki te ʼAtua loto fakafetaʼi ʼaia. ʼE mahino ia, ʼe ko he pilivilesio makehe mokā ʼe fakatatau ia te toko ono miliona ʼaē ʼe kaugā tui mo koutou ki te ʼu toko lauʼi miliale hahaʼi ʼo te malamanei. Pea tahi, ʼi takotou fakalogo pea mo tali te logo lelei, ʼe ko he fakamoʼoni ʼaia ʼe ko Sehova ʼe tokaga lelei kia koutou. Pea neʼe ʼui fēnei e Sesu: “E mole feala ki he tahi ke haù kia te au, [mo] kapau e mole taki mai ia kia te au e te Tamai ae nee ina fekaui mai au.” (Soane 6:44) Ei, ʼe tokoni Sehova ki te hahaʼi takitokotahi ke nātou maʼu te ʼu tapuakina ʼo te sakilifisio ʼa Kilisito.

Koutou Loto Fakafetaʼi Ki Tokotou Pilivilesio Lahi

3. Neʼe fakahā feafeaʼi e te ʼu foha ʼo Kole ia tanatou loto fakafetaʼi ki te pilivilesio ʼaē ʼo tanatou tauhi kia Sehova?

³ Ohage ko tona ʼui ʼi te ʼuluaki alatike ʼaē neʼe tou vakaʼi, ʼe koutou maʼu te pilivilesio makehe ke koutou fakafiafia te loto ʼo Sehova. (Tāʼaga Lea 27:11) ʼE ko he gāue ʼe mole tonu ke koutou meʼa noaʼi. ʼI te tahi pesalemo ʼaē neʼe tohi e te ʼu foha ʼo Kole, neʼe nātou fakahā ai tanatou fakafetaʼi ki te pilivilesio ʼaē ʼo tanatou tauhi kia Sehova. ʼE tou lau fēnei: “Ko he ʼaho e tahi ʼi tou malaʼe ʼe lelei age ia ʼi ni ʼaho e afe ʼi he tahi faʼahi. Neʼe ʼau fili ke ʼau tuʼu ʼi te matapā ʼo te fale ʼo toku ʼAtua ʼi haku feʼaluʼaki ʼi te ʼu falelā ʼo te agakovi.”—Pesalemo 84:10.

4. (a) Koteā te ʼu meʼa ʼe feala ai ke ʼui e ʼihi ko te tauhi kia Sehova ʼe ina faka tuʼakoi tonatou loto faʼifaʼitaliha? (b) Ko te ʼu faʼahi fea ʼaē ʼe fakahā totonu ai e Sehova ʼe ina tokagaʼi pea mo fakapale tana ʼu kaugana?

⁴ ʼE feiā koa tokotou loto ʼo ʼuhiga mo te pilivilesio ʼaē ko takotou tauhi ki takotou Tāmai ʼaē ʼe ʼi selo? ʼIo, ʼe lagi ʼi ʼihi temi ko takotou tauhi kia Sehova ʼe ina faka tuʼakoi takotou loto faʼifaʼitaliha. ʼE moʼoni, ko te maʼuliʼi ʼo te ʼu pelesepeto ʼo te Tohi-Tapu ʼe fakamaʼua kia kita ke kita fakafisi ki ʼihi ʼu meʼa. Kae tatau aipe pe koteā ʼaē ʼe kole atu e Sehova kia koutou, ʼe fua lelei pe ia kia koutou. (Pesalemo 1:1-3) Tahi ʼaē meʼa, ʼe sio ia Sehova ki takotou ʼu faiga pea ʼe ina fakahā atu tana fakafetaʼi ʼaē ki takotou agatonu. Koia neʼe tohi ai e Paulo ko Sehova “e ina fakapale [ia] natou e natou kumi [moʼoni] iaʼia.” (Hepeleo 11:6) Ko Sehova ʼe ina kumi te ʼu faigamālie moʼo fai ia te faʼahi ʼaia. Neʼe ʼui fēnei e te polofeta agatonu ʼo te Iselaele ʼāfea: “ ʼO ʼuhiga mo Sehova, ko tona ʼu mata ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.”—2 Fakamatala 16:9.

5. (a) Koteā te meʼa lelei ʼaē ʼe feala ke koutou fai moʼo fakahā ia te katoa ʼo tokotou loto kia Sehova? (b) He koʼe ʼe lagi feala ke mata faigataʼa takotou palalau ki ʼihi ʼo ʼuhiga mo takotou tui?

⁵ Ko te meʼa lelei ʼaē ʼe feala ke koutou fai moʼo fakahā ia te katoa ʼo tokotou loto kia Sehova, ʼe ko takotou palalau ki te hahaʼi ʼo ʼuhiga mo ia. Neʼe kua koutou maʼu koa he fealagia ke koutou palalau ai ki ʼokotou kaugā ako ʼo ʼuhiga mo takotou tui? ʼE lagi ʼi te kamata ʼe hage kia koutou ʼe fakaufiufi te faʼahi ʼaia, pea ʼe lagi koutou matataku ai. ʼE feala ke koutou fai te ʼu fehuʼi ʼaenī: ‘E feafeaʼi mo kapau ʼe nātou vāʼi ʼau? E feafeaʼi mo kapau ʼe nātou ʼui ʼe faikehe taku lotu?’ Neʼe ʼiloʼi e Sesu ʼe mole fia logo anai te hahaʼi fuli ki te Puleʼaga. (Soane 15:20) Kae ʼaua naʼa koutou manatu, ʼe koutou lainoa pea mo līʼakina. Kailoa, tokolahi te kau tūpulaga Fakamoʼoni neʼe tali leleiʼi nātou, pea neʼe fakaʼapaʼapaʼi lahi nātou e tonatou ʼu kaugā ako he neʼe nātou tali tanatou lotu.

“ ʼE Tokoni Atu Anai Ia Sehova Kia Koutou”

6, 7. (a) Koteā ʼaē neʼe lava fai faka mafola ai te taʼahine ʼe taʼu 17 ki tona ʼu kaugā ako? (b) Koteā te ako neʼe koutou maʼu mai te meʼa neʼe hoko kia Jennifer?

⁶ Kae ʼe koutou maʼu anai ʼifea te lototoʼa ʼaē ke koutou palalau ai ki takotou tui? He koʼe ʼe mole koutou tali fakahagatonu ki te hahaʼi mokā ʼe nātou faifehuʼi atu ʼo ʼuhiga mo takotou lotu? Koutou fakatokagaʼi te faʼifaʼitaki ʼa Jennifer ʼe taʼu 17. ʼE ina ʼui fēnei: “Neʼe ʼau kai ʼi te faleako. Ko te ʼu taʼahine ʼaē neʼe kakai fakatahi mo ʼau neʼe nātou lolotoga palalau ki te ʼu lotu, pea ko te tahi taʼahine neʼe ina fehuʼi mai pe koteā taku lotu.” Neʼe tuʼaniaʼi koa e Jennifer te tali ʼaē ka ina fai? ʼE ina tali fakahagatonu: “Ei, koteʼuhi neʼe mole ʼau ʼiloʼi papau peʼe nātou feafeaʼi anai mokā ʼau fakahā age taku lotu.” Pea koteā ʼaē neʼe fai e Jennifer? ʼE ina toe hoko atu: “Neʼe ʼau ʼui age ki te ʼu taʼahine, ko ʼau ko te Fakamoʼoni ʼa Sehova. ʼI te kamata, neʼe hage neʼe nātou punamaʼuli. Heʼe maʼa nātou, ko te kau Fakamoʼoni ʼa Sehova neʼe ko he ʼu hahaʼi ʼe faikehe. Neʼe tupu ai leva tanatou faifehuʼi mai kia ʼau, pea neʼe feala ai ke ʼau fakamahino fakalelei age te ʼu manatu hala ʼaē neʼe nātou maʼu ʼo ʼuhiga mo tatou. Pea talu mai te ʼaho ʼaia, ko te tahi ʼu taʼahine neʼe nātou tautau ʼōmai kia ʼau ʼo fai mai tanatou ʼu fehuʼi.”

⁷ Neʼe fakahemala koa ia Jennifer ʼi tana fakaʼaogaʼi te faigamālie ʼaia moʼo palalau ki tana lotu? Kailoa! ʼE ina ʼui fēnei: “Neʼe ʼau fiafia ʼosi ʼi te kua ʼosi ʼo tamatou kakai. Kua mahino lelei leva ki te ʼu taʼahine ʼaia pe ko ai moʼoni te kau Fakamoʼoni ʼa Sehova.” Ko te tokoni ʼaenī ʼa Jennifer ʼe faigafua pe: “Kapau ʼe koutou tuʼaniaʼi takotou faka mafola ki tokotou ʼu kaugā ako peʼe ko te hahaʼi faiako, koutou foimo faikole. ʼE tokoni atu anai ia Sehova kia koutou. ʼE koutou fiafia anai ʼi takotou fakaʼaogaʼi lelei te ʼu faigamālie ʼaē ʼe koutou maʼu moʼo fai faka mafola.”—1 Petelo 3:15.

8. (a) ʼI te temi ʼaē neʼe tonu ai ke ina fai he puleʼaki ki te meʼa neʼe mole ʼamanaki kiai, neʼe tokoni feafeaʼi te faikole kia Nehemia? (b) Koteā te ʼu ʼaluʼaga ʼi te faleako ʼe lagi ʼaoga anai ke koutou faikole fakalogologo kia Sehova?

⁸ Koutou fakatokagaʼi te tokoni ʼa Jennifer, ‘ke koutou foimo faikole’ kia Sehova mokā ʼe ʼi ai hokotou faigamālie moʼo fakahā ia takotou tui. Ko te meʼa ʼaia neʼe fai e Nehemia, ko te tagata neʼe tokaga ki te meʼa ʼinu ʼa te Hau Pelesia ko Artaxerxès, ʼi te temi ʼaē neʼe tonu ai ke ina fai he puleʼaki ki te meʼa neʼe mole ʼamanaki kiai. Neʼe lagi hā te tuʼania ʼa Nehemia koteʼuhi neʼe ina maʼu te logo, ko te kau Sutea ʼe nātou maʼuli mamahi, pea neʼe logo kua maumau te kaupā pea mo te ʼu matapā ʼo Selusalemi. Neʼe fakatokagaʼi e te hau ia te nofo hoha ʼa Nehemia, koia neʼe ina fehuʼi age ai kia Nehemia pe koteā ʼaē ʼe feiā ai. ʼI muʼa ʼo tana tali age, neʼe faikole Nehemia ke ina maʼu he tokoni. ʼOsi ʼaia, neʼe lototoʼa ʼo kole age ki te hau ke ina fakagafua age pea mo tokoni age ke liliu ki Selusalemi ʼo toe laga te kolo ʼaē neʼe kua maumau. Neʼe tali e Artaxerxès te kole ʼa Nehemia. (Nehemia 2:1-8) Koteā te ako ʼe koutou maʼu mai ai? Kapau ʼe koutou tuʼania mokā hoko he faigamālie ke koutou fakahā ai takotou tui, koutou manatuʼi ʼe feala ke koutou faikole fakalogologo. Neʼe tohi fēnei e Petelo: “Koutou vevete kia [Sehova] takotou ʼu tuʼania fuli, heʼe tokaga ia kia koutou.”—1 Petelo 5:7, MN; Pesalemo 55:22.

“Nonofo Teuteu Moʼo Tali”

9. Neʼe lava tufa feafeaʼi e Leah ʼaē ʼe taʼu 13 te ʼu tohi Les jeunes sʼinterrogent e 23?

⁹ Koutou fakatokagaʼi te tahi faʼifaʼitaki. ʼI tona temi kai ʼi te faleako, ko Leah ʼe taʼu 13 neʼe ina lau te tohi Les jeunes sʼinterrogent — Réponses pratiques.a ʼE ina ʼui fēnei: “Ko ʼihi neʼe nātou sioʼi ʼau, pea mole tuai ko te tokolahi neʼe ʼōmai ʼo tutuʼu mai muli ʼo sioʼi mai ʼoluga ʼi toku ʼu fugaʼuma ia te tohi ʼaē neʼe ʼau lolotoga lau. Neʼe nātou kamata fehuʼi mai pe koteā ʼaē ʼe talanoa kiai te tohi.” ʼI te fakaʼosi ʼo te ʼaho ʼaia, ko te ʼu taʼahine e toko fā neʼe nātou kole age kia Leah hanatou ʼu tohi Les jeunes sʼinterrogent. Mole tuai, pea fakahā e te ʼu taʼahine ʼaia te tohi ki ʼihi, pea mo nātou ʼaia neʼe nātou loto ki hanatou ʼu tohi. ʼI te ʼu kiʼi vāhaʼa ʼaē neʼe hoa mai, neʼe tufa e Leah ki tona ʼu kaugā ako pea mo tonatou ʼu kaumeʼa te ʼu tohi Les jeunes sʼinterrogent e 23. ʼI tona kamata fakafehufehuʼi e ʼihi ʼo ʼuhiga mo te tohi ʼaē neʼe ina lau, neʼe faigafua koa kia Leah hana palalau ki te faʼahi ʼaia? Kailoa! ʼE ina tala fakahagatonu: “ ʼI te kamata neʼe ʼau mataku. Kae neʼe ʼau faikole, pea neʼe mahino ai kia ʼau neʼe nofo Sehova mo ʼau.”

10, 11. Neʼe lava tokoni feafeaʼi te kiʼi taʼahine ki te pule solia Silia ke ina ʼiloʼi ia Sehova, pea koteā te ʼu fetogi neʼe ina fai?

¹⁰ ʼE lagi ko te faʼifaʼitaki ʼa Leah ʼe ina fakamanatuʼi atu te meʼa feiā neʼe hoko ki te kiʼi taʼahine Iselaele neʼe ʼave popūla ki Silia. Neʼe kilia te pule solia Silia ko Naamane. Neʼe lagi ko tona ʼohoana ʼaē neʼe kamata palalau kiai ʼo tupu ai te palalau ʼa te kiʼi taʼahine ki tana tui. Neʼe ina ʼui fēnei: “Ka na feala la ke ʼalu toku ʼaliki ki te polofeta ʼaē ʼi Samalia! ʼE mahino ia, ʼe ina fakamālōlō anai ia ia mai tona kilia.”—2 Hau 5:1-3.

¹¹ ʼAki te lototoʼa ʼa te kiʼi taʼahine ʼaia, neʼe ʼiloʼi ai e Naamane “ ʼe mole he tahi ʼAtua ʼi te kele, gata pe ki te ʼAtua ʼo Iselaele.” Pea neʼe ina fakatotonu ai ʼe “mole ina toe fai anai he holokoseta peʼe ko he sakilifisio ki he tahi age ʼu ʼatua gata pe kia Sehova.” (2 Hau 5:15, 17) ʼE mahino ia neʼe tapuakinaʼi e Sehova te lototoʼa ʼa te kiʼi taʼahine ʼaia. ʼE ina lavaʼi pea ʼe ina fai feiā anai maʼa te kau tūpulaga ia ʼaho nei. Neʼe hoko te meʼa feiā kia Leah. ʼAki te temi, ko tona tahi ʼu kaugā ako neʼe nātou ʼolo age kia ia, pea nātou ʼui age neʼe tokoni te tohi Les jeunes sʼinterrogent ke fetogi tanatou aga. ʼE ʼui fēnei e Leah: “Neʼe ʼau fiafia, he neʼe ʼau ʼiloʼi neʼe ʼau tokoni ki ʼihi ke lahi tanatou mahino kia Sehova pea neʼe ʼau tokoni kia nātou ki te fetogi ʼo tonatou maʼuli.”

12. ʼE koutou lava maʼu feafeaʼi te mālohi moʼo fakamahino takotou tui?

¹² Ohage ko Jennifer pea mo Leah, ʼe feala ke toe hoko he ʼu meʼa feiā kia koutou. Koutou muliʼi te tokoni ʼa Petelo, ʼaē neʼe ina tohi ʼe tonu anai ʼi tokotou ʼuhiga Kilisitiano, ke “koutou nonofo teuteu [tuʼumaʼu] moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:15, MN ) ʼE koutou lava fakahoko feafeaʼi te faʼahi ʼaia? Koutou faʼifaʼitakiʼi te kau Kilisitiano ʼo te ʼuluaki sēkulō ʼaē neʼe nātou kole kia Sehova ke tokoni age kia nātou ke nātou faka mafola “ ʼaki he lototoʼa.” (Gaue 4:29, MN ) ʼOsi ʼaia koutou lototoʼa ʼo fakahā ki ʼihi te ʼu meʼa ʼaē ʼe koutou tui kiai. ʼE feala ke koutou punamaʼuli ki te ʼu meʼa ʼaē ka hoko. Pea tahi, ʼe koutou fakafiafia ai anai te loto ʼo Sehova.

Te ʼu Fime Viteo Pea Mo Te ʼu Fakatuʼutuʼu Makehe

13. Koteā te ʼu faigamālie neʼe fakaʼaogaʼi lelei e ʼihi tūpulaga moʼo fai faka mafola? (Vakaʼi te ʼu talanoa ʼo te pasina 20 mo te 21.)

¹³ Tokolahi te kau tūpulaga neʼe nātou fakahā tanatou tui ki tonatou ʼu kaugā ako peʼe ki tanatou kau faiako, ʼo nātou fakaʼaogaʼi ia te ʼu foʼi fime viteo. ʼI ʼihi temi, ko te ʼu gāue ʼi te faleako neʼe ko he ʼu faigamālie moʼo fakavikiviki kia Sehova. Ohage la, ko te ʼu kiʼi tama Fakamoʼoni ʼa Sehova e toko lua ʼe nā taʼu 15, neʼe foaki age kia nāua ʼi te cours d’histoire tanā gāue ke nā fakamatala he lotu ʼi te ʼu lotu ʼo te malamanei. Neʼe nā gāue tokolua ke nā tohi tanā fakamatala ʼo ʼuhiga mo te kau Fakamoʼoni ʼa Sehova, ʼo nā fakaʼaogaʼi moʼo fakatafito kiai tanā fakamatala te tohi Les Témoins de Jéhovah : Prédicateurs du Royaume de Dieu.b ʼOsi ʼaia pea toe tuku age minuta e nima ke nā fakamatala leʼo lahi tanā gāue. ʼOsi ʼaia, pea fai age te ʼu tuʼuga fehuʼi ʼa te tagata faiako pea mo te kau ako, pea ia minuta e 20 neʼe toe hoko atu te fakamatala ʼa te ʼu tūpulaga ia muʼa ʼo tanā kalasi. Lolotoga te ʼu vāhaʼa ki muli age, neʼe hoko atu pe te faifehuʼi ʼo tonā ʼu kaugā ako ʼo ʼuhiga mo te kau Fakamoʼoni ʼa Sehova!

14, 15. (a) He koʼe ko te mataku ki te tagata ʼe ko he hele? (b) He koʼe ʼe tonu ke koutou loto falala mokā ʼe koutou fakahā takotou tui ki ʼihi?

¹⁴ Ohage ko te ʼu fakamatala ʼaenī neʼe tou talanoa kiai, ʼe koutou lava maʼu te ʼu tapuakina lahi mo kapau ʼi tokotou ʼuhiga kau Fakamoʼoni ʼa Sehova ʼe koutou palalau ki ʼihi ʼo ʼuhiga mo te ʼu meʼa ʼaē ʼe koutou tui kiai. ʼAua naʼa koutou mataku ki te tagata, naʼa feala ai ke mole koutou maʼu ia te pilivilesio pea mo te fiafia ʼaē ko te tokoni ki te hahaʼi ke nātou ʼiloʼi ia Sehova. ʼE ui fēnei e te Tohi-Tapu: “Ko te mataku ki te tagata, koʼena te meʼa ʼaē ʼe liliu ko he hele, kae ko ia ʼaē ʼe falala kia Sehova ʼe puipui anai ia.”—Tāʼaga Lea 29:25.

¹⁵ Koutou manatuʼi, ʼi tokotou ʼuhiga tūpulaga Kilisitiano ʼe koutou maʼu te meʼa ʼe ʼaoga ʼaupito ki tokotou ʼu kaugā ako—ko te faʼahiga maʼuli ʼaē ʼe lelei ʼi te temi nei pea mo te fakapapau ʼo he maʼuli heʼegata ʼi te ka haʼu. (1 Timoteo 4:8) Tou fakatokagaʼi, ʼi Amelika—ʼaē ʼe lagi ʼi takotou manatu ko te hahaʼi fuli ʼe nātou fakaʼauʼauganoa peʼe mole nātou fia logo ki te lotu—neʼe fakahā e te sivi, ʼe ko te vaelua ʼo te kau tūpulaga ʼe nātou faka maʼuhigaʼi ia te lotu, pea ko te tolu vaega ʼi te kau tūpulaga ʼe nātou ʼui ko te tui ʼe “ko he mālohi lahi” ʼi tonatou maʼuli. ʼE lagi feiā pe ʼi te tahi ʼu potu ʼo te malamanei. Pea ʼe mahino ia, ko tokotou ʼu kaugā ako ʼi te faleako ʼe nātou fiafia anai ʼi tanatou logo ki te ʼu meʼa ʼaē ʼe koutou fakahā age ʼo ʼuhiga mo te Tohi-Tapu.

ʼU Tūpulaga, Koutou Fakaōvi Kia Sehova

16. ʼO mole gata pe ʼi takotou palalau ʼo ʼuhiga mo ia, koteā te tahi meʼa ʼe tonu ke koutou fai ke fiafia ai Sehova?

¹⁶ ʼIo, ʼe mole koutou fakafiafia pe te loto ʼo Sehova ʼaki pe takotou palalau ʼaē ʼo ʼuhiga mo ia. ʼE toe ʼaoga foki ke koutou maʼuliʼi tana ʼu lekula. Neʼe tohi fēnei e te ʼapositolo ko Soane: “Koʼeni te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole faka mafasia ia.” (1 Soane 5:3, MN ) Kapau ʼe koutou fakaōvi kia Sehova, pea ʼe koutou sio anai ki te moʼoni ʼo te faʼahi ʼaia. ʼE koutou lava fai feafeaʼi ia te faʼahi ʼaia?

17. E koutou lava fakaōvi feafeaʼi kia Sehova?

¹⁷ Koutou toʼo he temi moʼo lau ia te Tohi-Tapu pea mo te ʼu tohi faka Tohi-Tapu. Kapau ʼe lahi te ʼu meʼa ʼaē ʼe koutou ako ʼo ʼuhiga mo Sehova, pea ʼe faigafua ai anai takotou fakalogo kia te ia pea mo takotou palalau ki niʼihi ʼo ʼuhiga mo ia. Neʼe ʼui fēnei e Sesu: “Ko te tagata lelei, e ina too mai te lelei i te koloa lelei o tona loto, . . . e leaʼi mai e tona gutu, te mea e fonu i tona loto.” (Luka 6:45) Koia, koutou fakafonu tokotou loto ʼaki he ʼu meʼa lelei. He koʼe ʼe mole koutou fai hakotou ʼu fakatuʼutuʼu ki te faʼahi ʼaia? ʼE lagi feala ke koutou hikihiki takotou teuteuʼi ia te ʼu fono ʼo te vāhaʼa ka haʼu. Pea ko te tahi fakatuʼutuʼu, ke koutou fai hakotou kiʼi tali fakanounou ʼaki tokotou loto katoa. ʼE mahino ia, ʼe toe maʼuhiga ke koutou maʼuliʼi te ʼu meʼa ʼaē ʼe koutou ako.—Filipe 4:9.

18. Tatau aipe mo kapau ʼe koutou mamahi ʼi he ʼu faʼahiga fakafeagai, kae koteā ʼaē ʼe koutou lava falala kiai?

¹⁸ Ko te ʼu tapuakina ʼaē ʼe tou maʼu mai tatatou tauhi kia Sehova ʼe tologa pea mo heʼegata. ʼE mahino ia, ʼi tokotou ʼuhiga Fakamoʼoni ʼa Sehova ʼe lagi koutou felāveʼi anai mo he fakafeagai peʼe ko he fakalainoa. Kae koutou manatuʼi ia Moisese. ʼE ʼui fēnei e te Tohi-Tapu “neʼe sio fakamamaʼu ia ki te totogi ʼo te fakapale.” (Hepeleo 11:24-26, MN ) ʼE feala foki ke koutou falala ko Sehova ʼe ina fakapale anai takotou ʼu faiga ʼaē ke koutou ʼiloʼi ia ia pea mo palalau ʼo ʼuhiga mo ia. ʼIo, ʼe mole ina “galoʼi [anai] takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.”—Hepeleo 6:10, MN.

[Kiʼi nota]

ʼE Kei Koutou Manatuʼi Koa?

• He koʼe ʼe feala ke koutou ʼiloʼi papau ʼe maʼuhiga kia Sehova takotou tauhi?

• Koteā te ʼu faʼahiga fai faka mafola ʼi te faleako neʼe fua lelei ki ʼihi?

• E koutou lava maʼu feafeaʼi te mālohi ke koutou faka mafola ki tokotou ʼu kaugā ako?

• ʼE koutou lava fakaōvi feafeaʼi kia Sehova?

[Talanoa ʼo te pasina 20]

Mo Te Kihiʼi Tamaliki ʼe Nātou Fakavikiviki Kia Sehova!

Neʼe feala mo te kihiʼi tamaliki ke nātou fai faka mafola ʼi te faleako. Tou vakaʼi age te ʼu faʼifaʼitaki ʼaenī.

Ko Amber ʼe taʼu 10 ʼe ʼi te kalasi ʼo te cours moyen deuxième année, neʼe ina lau te tohi ʼo ʼuhiga mo te gaohi koviʼi e te kau Nasi ia te kau Sutea ʼi te Lua Tau Faka Malamanei. Neʼe fakatotonu e Amber ke ina ʼaumai ki tana fafine faiako te foʼi fime viteo Les triangles violets. Neʼe punamaʼuli te fafine faiako ʼi tana sio ʼaē neʼe toe fakatagaʼi mo te kau Fakamoʼoni ʼa Sehova ʼi te pule ʼa te kau Nasi. Pea neʼe fakahā e te fafine faiako te foʼi fime viteo ki te kalasi katoa.

Ko Alexa ʼe taʼu valu, neʼe ina fai he tohi ki tana kalasi, ʼe ina fakamahino ai pe koʼe neʼe mole feala ke kau ki te Po Tapu. ʼI te ʼofolele ʼa te fafine faiako ki tana tohi, neʼe ina ʼui age kia Alexa ke ina lau leʼo lahi te tohi ki te kalasi pea mo te tahi age ʼu kalasi e lua! Neʼe ina ʼui fēnei ʼi te fakaʼosi ʼo tana tohi: “Neʼe akoʼi mai kia ʼau ke ʼau fakaʼapaʼapa ki te tahi ʼu lotu, pea ʼe ʼau fakamālo atu ʼi takotou fakaʼapaʼapa ki taku mole kau ki te Po Tapu.”

Mole faʼa fualoa ki tana hū ki te kalasi ʼo te cours préparatoire, neʼe ʼave e Eric ki te faleako Te Tohi ʼo Te ʼu Hisitolia Faka Tohi-Tapu pea neʼe ina kole ki tana fafine faiako peʼe feala la ke ina fakahā te tohi ki tona ʼu kaugā ako. Neʼe ʼui fēnei age e tana fafine faiako: “ ʼE ʼi ai taku tahi manatu ʼe lelei age. He koʼe ʼe mole ke lau ki te kalasi he hisitolia?” Pea neʼe lau e Eric te hisitolia. ʼOsi ʼaia, neʼe ina fakaafe ia nātou fuli ʼaē ʼe nātou fia fai ki hanatou tohi ke nātou hiki tonatou ʼu nima. Ko te toko hogofulu-ma-valu hahaʼi—ʼo kau ai mo te fafine faiako—neʼe nātou fia fai hanatou tohi! Kua mahino kia Eric ʼe ʼi ai tana telituale fai faka mafola.

Ko Whitney ʼe ko tona taʼu hiva, ʼe loto fakafetaʼi ki te kaupepa lahi Les Témoins de Jéhovah et lʼinstruction.c ʼE ina ʼui fēnei: “ ʼI te agamāhani ʼe ko taku faʼe ʼaē ʼe ina foaki ʼi te taʼu fuli te kaupepa lahi ʼaia ki taku kau faiako, kae ʼi te taʼu ʼaenī ʼe ko ʼau totonu ʼaē neʼe ʼau foaki te kaupepa. ʼAki te kaupepa ʼaia, ko taku fafine faiako neʼe ina higoaʼi ʼau ‘ko he tahi ʼe ako lelei ʼi te vāhaʼa.’ ”

[Nota]

[Talanoa ʼo te pasina 21]

Neʼe Fakaʼaogaʼi e ʼIhi Te ʼu Faigamālie Moʼo Palalau Ki Tanatou Tui

Mokā neʼe hinoʼi he gāue ke fai ʼi te faleako, ko ʼihi ʼe nātou fakaʼaogaʼi he kupu tāfito ke feala ai hanatou fai faka mafola.

Tokolahi te kau tūpulaga neʼe nātou foaki ki tanatou ʼu tagata faiako he foʼi fime viteo peʼe ko he tohi faka Tohi-Tapu, ʼe ʼalutahi mo he meʼa ʼe nātou lolotoga vakaʼi ʼi te kalasi.

Ko ʼihi ʼu tūpulaga ʼi tanatou lolotoga lau te Tohi-Tapu peʼe ko he tohi faka Tohi-Tapu, neʼe fakaōvi age ʼihi kau tūpulaga kia nātou, ʼo fai age tanatou ʼu fehuʼi.

[Paki ʼo te pasina 18]

Ko te hahaʼi ʼaē kua fakapotopoto ʼe feala ke nātou tokoni ki te akoʼi ʼo te kau tūpulaga ke nātou tauhi kia Sehova