Kei Koutou Manatuʼi Koa?

Neʼe koutou leleiʼia koa te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• Koteā te ʼu lelei ʼe feala ke tou maʼu mokā tou ako ʼo ʼuhiga mo te famili ʼo Safane?

Ko Safane neʼe ko te tagata hiki tohi pea mo sikalaipe ʼa te Hau ko Sosiasi ʼi Suta. Neʼe ko te tagata maʼuhiga ʼi te puleʼaga, pea neʼe lagolago Safane ki te gāue ʼa te hau ke toe fakatuʼu te tauhi moʼoni. Ko te ʼu foha e lua ʼo Safane neʼe nā tokoni agatonu ki te polofeta ko Selemia. Pea ko tona tahi foha pea mo tona ʼu mokopuna e lua, neʼe nātou toe fakaʼaogaʼi mo nātou tonatou tuʼulaga moʼo lagolago ki te tauhi moʼoni. ʼO toe feiā mo tatou, ʼe tonu ke tou fakaʼaogaʼi totatou ʼu koloā pea mo totatou tuʼulaga moʼo lagolago ki te tauhi.—15/12, pasina 19 ki te 22.

• Neʼe mālo feafeaʼi ia Irene Hochstenbach ʼi tana tauʼi tona mahaki pea mo tauhi kia Sehova?

ʼI tona taʼu fitu, neʼe mole kei logo ki he meʼa. Logola tana tuli, kae neʼe ina ako ke felogoi mo te hahaʼi pea ʼi te temi nei ʼe kaugā ʼalu mo tona ʼohoana (ko te tagata taupau feʼaluʼaki) ʼi tana ʼaʼahi te ʼu kokelekasio ʼi Holani.—1/1, pasina 23 ki te 26.

• Koteā te ʼu tohi ako foʼou e lua neʼe fakahā ʼi te ʼu Fakatahi Faka Tisitilike, ʼaē ko tona kupu tāfito ko “Te Kau Fai Faka Mafola Faʼafai ʼo Te Puleʼaga”?

Neʼe fiafia te kau Kilisitiano ʼi te malamanei katoa ʼi te tufa age ʼo te tohi Adorez le seul vrai Dieu, ʼaē neʼe fai ke ako e te hahaʼi foʼou ʼi tanatou ʼosi ako te tohi Te ʼAtamai Mālama ʼAē ʼe Ina Taki Ki Te Maʼuli Heʼegata; ko te tahi tohi foʼou ʼe ko te tohi Approchez-vous de Jéhovah, ʼaē ʼe talanoa tāfito ai ki te ʼu kalitate pea mo te ʼu aga ʼo Sehova. ʼE toe fakahā ai peʼe feafeaʼi hatatou faʼifaʼitakiʼi tona ʼu kalitate.—15/1, pasina 23 ki te 24.

• Koteā te faka ʼuhiga ʼo te ʼui ʼaē ia Tāʼaga Lea 12:5: “Ko te ʼu manatu ʼa te kau faitotonu ʼe ko te fakamāu”?

Ko te ʼu manatu ʼa te hahaʼi agalelei ʼe maʼa pea ʼe mole fakapalatahi pea ʼe faitotonu. Mai tona ʼaluʼaga ʼaē ko te hahaʼi faitotonu ʼaia ʼe nātou ʼofa ki te ʼAtua pea mo tonatou kāiga, koia ʼe mole nātou fia fai he ʼu meʼa ʼe kovi.—15/1, pasina 30.

• Koteā ʼaē ʼe feala ke tokoni ki he tahi ke manatu fakapotopoto ʼo ʼuhiga mo te gāue?

ʼE lelei ʼi tanatou kei liliki, ke akoako age te maʼuhiga ʼo te gāue. ʼE uga tatou e te Tohi-Tapu ke tou gāue lelei, ke ʼaua naʼa tou pipiko. (Tāʼaga Lea 20:4) ʼE ina toe fakaloto mālohiʼi tatou ke ʼaua naʼa tou hoha fau ʼo ʼuhiga mo te gāue. ʼE tonu ke tou fakamoʼoni ʼe maʼuhiga age ʼi totatou maʼuli te selevisi ki te ʼAtua. (1 Kolonito 7:29-31) Tahi ʼaē meʼa, ʼe falala te kau Kilisitiano moʼoni ʼe mole līaki anai nātou e te ʼAtua.—1/2, pasina 4 ki te 6.

• Ko te koga tohi fea ʼaē ʼe ʼuluaki palalau ai te Tohi-Tapu ki he ʼaletale?

Ia Senesi 8:20, ʼaē ʼe talanoa ai ki te ʼaletale ʼaē neʼe laga e Noe ʼi tana hū ki tuʼa mai te aleka ʼi te hili ʼo te Tulivio. Kae ʼe mahino mai neʼe fakaʼaogaʼi e Kaino pea mo Apele he ʼu ʼaletale moʼo momoli tanā ʼu mōlaga. (Senesi 4:3, 4)—15/2, pasina 28.

• ʼE lava fakaʼaogaʼi lelei feafeaʼi e te kau Kilisitiano te ʼu fetogi ʼaē ʼe hoko ʼi tonatou maʼuli?

Ko ʼihi neʼe nātou tali te ʼu fetogi, pe neʼe nātou fakatuʼutuʼu te ʼu fetogi ʼi tanatou gāue ke lahi ai tonatou temi ki te minisitelio. Ko ʼihi kua nātou fakaʼaogaʼi lahi tonatou temi pea mo tonatou ʼu pilivilesio ʼi te selevisi ʼo te ʼAtua, heʼe mole kei lahi tonatou ʼu maʼua faka famili, ohage la ʼi te temi ʼaē kua lalahi ai tanatou ʼu fānau pea mo ʼohoana.—1/3, pasina 19 ki te 22.

• ʼE tokoni feafeaʼi mai kia tatou te ʼu faʼifaʼitaki ʼo Sonasi pea mo te ʼapositolo ko Petelo ke tou sio ki te hahaʼi ohage ko te sio ʼa Sehova?

ʼE tou ʼiloʼi lelei te ʼu fakakaukauʼi hala ʼa Sonasi pea mo Petelo pea mo te meʼa ʼaē neʼe nā fai ʼi te ʼahiʼahiʼi ʼo tanā tui pea mo tanā fakalogo. Kae ʼe mahino ia neʼe sio ia Sehova ki te ʼu kalitate lelei ʼi tonā loto, pea neʼe ina haga fakaʼaogaʼi nāua ki tana selevisi. Ka agahala mai he tahi kia tatou peʼe tou lotovaivai ʼuhi ko he tahi, ʼe feala ke tou tokagaʼi tāfito tonatou ʼu kalitate lelei ʼaē neʼe lagi tou leleiʼia ʼi te temi muʼa, pea mo te lelei ʼaē ʼe sio kiai te ʼAtua ʼi tonatou loto.—15/3, pasina 16 ki te 19.

• He koʼe ʼe kehekehe te ʼu Tohi-Tapu ʼo ʼuhiga mo te ʼu mataʼi numelo ʼo te ʼu Pesalemo?

ʼE ʼi ai te kehekehe ʼi te ʼu mataʼi numelo ʼi te ʼuluaki tohi faka Hepeleo pea mo tona fakaliliu ki te faka Keleka e te Septante. Ko te ʼu fakaliliu ʼo te Tohi-Tapu ia ʼaho nei ʼe feala ke kehekehe, ʼo fakalogo pe neʼe fakatafito ki te tohi faka Hepeleo peʼe ki te Septante.—1/4, pasina 31.