Koutou Faiga Ke Koutou Sio Ki Te Hahaʼi Ohage Ko Te Sio ʼa Sehova

“Ko te sio ʼa te ʼAtua ʼe mole hage ko te sio ʼa te tagata.”—1 Samuele 16:7.

1, 2. Neʼe koteā te kehekehe ʼo te sio ʼa Sehova pea mo te sio ʼa Samuele ʼo ʼuhiga mo Eliape, pea koteā te ako ʼe tou lava maʼu mai ai?

ʼI TE 11 sēkulō ʼi muʼa ʼo totatou temi, neʼe fekauʼi e Sehova te polofeta ko Samuele ke ina fai he gāue ʼe mole ʼiloʼi e he tahi. Neʼe ina fakatotonu ki te polofeta ke ʼalu ki te ʼapi ʼo te tagata ʼe higoa ko Sese, pea ke ina fakanofo he tahi ʼi te ʼu foha ʼo Sese ke hau ʼi Iselaele. ʼI te temi ʼaē neʼe sio ai ia Samuele ki te foha ʼuluaki ʼo Sese, ia Eliape, ʼi tana manatu kua ina maʼu ia ia ʼaē neʼe fili e te ʼAtua. Kae neʼe ʼui age e Sehova: “ ʼAua naʼa ke tokagaʼi tona agaaga pea mo tona tauʼaluga, heʼe kua ʼau līaki ia ia. Heʼe ko te sio ʼa te ʼAtua ʼe mole hage ko te sio ʼa te tagata, heʼe sio te tagata ki te meʼa ʼaē ʼe hā ki te ʼu mata; kae ko Sehova, ʼe sio ki te loto.” (1 Samuele 16:6, 7) Neʼe mole sio ia Samuele kia Eliape ohage ko te sio ʼa Sehova kia ia.a

² ʼE faigafua pe ki te hahaʼi ke nātou faihala mokā nātou sivi te aga ʼa te hahaʼi! ʼI te tahi faʼahi, ʼe tou lava faihala ki he ʼu hahaʼi ʼe ʼasi mai ki tuʼa ʼe nātou agalelei, kae ʼi tona fakahagatonu ʼe ko he ʼu hahaʼi kākā. Pea ʼi te tahi faʼahi, ʼe lagi ʼe tou aga fefeka pea mo fakamāuʼi kovi ni hahaʼi ʼe nātou aga fakamalotoloto pea mo tou punamaʼuli ʼi tonatou ʼu ʼulugaaga.

3, 4. (a) Kapau ʼe malaga he fihifihia ʼi ni ʼu Kilisitiano e toko lua, koteā anai ʼaē ʼe tonu ke nā fai takitokotahi? (b) Koteā te ʼu fehuʼi ʼe tonu ke tou fai, mokā neʼe tou tokakovi mo he tahi Kilisitiano?

³ ʼE feala ke malaga ni ʼu fihifihia mo kapau ʼe tou valoki fakavilivili niʼihi—māʼia mo he ʼu hahaʼi kua fualoa tatatou feʼiloʼiʼaki mo nātou. Neʼe lagi hoko hokotou fihifihia lahi mo he Kilisitiano neʼe koutou kaumeʼa lelei mo ia. ʼE koutou toe fia felogoi lelei koa mo ia? Koteā anai ʼaē ka tokoni atu ʼo ʼuhiga mo te faʼahi ʼaia?

⁴ He koʼe koa ʼe mole koutou toʼo he temi loaloaga moʼo vakavakaʼi te aga ʼa te tēhina peʼe ko te tuagaʼane ʼaia? Pea ke koutou fai te faʼahi ʼaia ʼo mulimuli ki te ʼu palalau ʼaenī ʼa Sesu: “E mole feala ki he tahi ke haù kia te au, [mo] kapau e mole taki mai ia kia te au e te Tamai.” (Soane 6:44) ʼOsi ʼaia, pea ke koutou fai te ʼu fehuʼi ʼaenī: ‘He koʼe neʼe taki mai e Sehova te Kilisitiano ʼaia ki Tona ʼAlo? Koteā tona ʼu kalitate lelei? ʼE ʼau tokagaʼi koa tona ʼu kalitate ʼaia peʼe ʼau meʼa noaʼi ʼau? He koʼe neʼe ma kaumeʼa ʼi te kamata? Koteā ʼaē neʼe tupu ai taku fia kaumeʼa mo ia?’ ʼI te kamata, ʼe lagi mata faigataʼa hakotou maʼu hona ʼu kalitate lelei, tāfito la mo kapau neʼe ʼi ai he temi neʼe koutou lotomamahi ai ʼuhi ko ia. Kae ʼe ko he faʼahi ʼe maʼuhiga ʼaupito moʼo fakatokatoka te tokakovi ʼaē neʼe hoko ia koulua. Moʼo fakatā peʼe feafeaʼi te fakatokatoka ʼo te faʼahi ʼaia, tou vakaʼi age muʼa te ʼu kalitate ʼo te ʼu tagata e toko lua, koteʼuhi ʼi ʼihi temi ʼe tou tokagaʼi ia nāua ʼuhi ko tanā ʼu hala. Ko te polofeta ko Sonasi pea mo te ʼapositolo ko Petelo.

Ko He Sio Fakapotopoto ʼo ʼUhiga Mo Sonasi

5. Neʼe koteā te gāue neʼe fakatotonu age kia Sonasi, pea koteā te meʼa neʼe ina fai?

⁵ Ko Sonasi neʼe ko he polofeta ʼo te puleʼaga noleto ʼo Iselaele, ʼi te temi Hau ʼo Selopoame 2, foha ʼo Seoasi. (2 Hau 14:23-25) ʼI te tahi ʼaho, neʼe fakatotonu e Sehova kia Sonasi ke mavae ʼi Iselaele pea ke ʼalu ki Ninive, te kolo tāfito ʼo te Puleʼaga mālohi ʼo Asilia. Neʼe koteā tana gāue? Ke ina fakatokaga ki te hahaʼi ʼo te kolo ʼaia, ʼe ʼamanaki fakaʼauha tonatou kolo lahi. (Sonasi 1:1, 2) Kae neʼe hola ia Sonasi, neʼe mole fakalogo ki te fakatotonu ʼa te ʼAtua! Neʼe heka ki te vaka ʼo folau ki Talesi, ʼe vaha mamaʼo ʼosi mo Ninive.—Sonasi 1:3.

6. He koʼe neʼe fili e Sehova ia Sonasi ke ʼalu ki Ninive?

⁶ Koteā ʼaē ʼe koutou manatu kiai mokā koutou manatuʼi ia Sonasi? ʼE koutou manatu koa neʼe ko he polofeta neʼe talagataʼa? E lagi tou manatu feiā mo kapau ʼe tou vakaʼi fakavilivili tona ʼulugaaga. Kae neʼe filifili koa e te ʼAtua ia Sonasi ke polofeta ʼuhi he neʼe ko he tagata talagataʼa? Kailoa ia! Neʼe lagi ʼi ai he ʼu kalitate lelei ʼo Sonasi. Tou vakaʼi te fakamatala ʼaē ʼe fai e te Tohi-Tapu ki tona ʼuhiga polofeta.

7. Neʼe feafeaʼi te ʼu ʼaluʼaga ʼaē neʼe kaugana ai Sonasi ʼi Iselaele maʼa Sehova, pea ʼe malave feafeaʼi kia koutou ia takotou ʼiloʼi te faʼahi ʼaia?

⁷ ʼE mahino ia neʼe gāue agatonu ia Sonasi ʼi Iselaele, ko he telituale neʼe mole tali lelei ai te logo. Ko te polofeta ko Amosi, ʼaē neʼe maʼuli ʼi te temi ʼaia ʼo Sonasi, neʼe ina fakahā ko te kau Iselaele ʼo te temi ʼaia neʼe nātou manako ki te ʼu koloā faka mālama.b Neʼe fai te ʼu meʼa kovi ʼi te fenua, kae neʼe mole koviʼia e te kau Iselaele te ʼu meʼa ʼaia. (Amosi 3:13-15; 4:4; 6:4-6) Kae ʼi te ʼaho fuli pe, neʼe agatonu ia Sonasi ʼo faka mafola kia nātou. Kapau ko koutou ko he kaugā fai faka mafola ʼo te logo lelei, ʼe koutou ʼiloʼi ʼe faigataʼa mokā ʼe tou palalau ki ni hahaʼi ʼe nātou manatu pe kia nātou pea mo fakaʼauʼauganoa. Koia, logola tatatou ʼiloʼi ʼaē te ʼu vaivaiʼaga ʼo Sonasi, kae ʼaua naʼa galo kia tatou tona ʼu kalitate ʼaē ko te agatonu pea mo te faʼa kātaki, ʼi te temi ʼaē neʼe faka mafola ai ki te kau Iselaele heʼe agatonu.

8. Koteā ʼapē he ʼu faigataʼaʼia ʼe feala ke tau mo he polofeta Iselaele ʼi Ninive?

⁸ Ko te fakatotonu ʼaē ke ʼalu ki Ninive neʼe ko he fakatuʼutuʼu neʼe faigataʼa ʼaupito. Ke aʼu Sonasi ki te kolo ʼaia, neʼe tonu ke haʼele lalo ia kilometa e 800—ʼe ko he fagona faigataʼa neʼe lagi feala pe ke teitei māhina katoa. Pea ka tau kiai, neʼe tonu ke faka mafola te polofeta ki te kau Asilia, ko te hahaʼi neʼe ʼiloa ʼuhi ko tanatou aga fekai. Heʼe ʼi te agamāhani ʼi tanatou ʼu tau neʼe nātou fakamamahiʼi te hahaʼi. Neʼe nātou vikiʼi pe la tanatou ʼu aga fekai ʼaia. Koia ʼaē neʼe higoaʼi ai Ninive “ko te kolo ligi toto”!—Naume 3:1, 7.

9. ʼI te ʼamanaki mamate ʼo te kau tautai ʼi he afā mālohi, koteā te ʼu kalitate neʼe fakahā e Sonasi ʼi te temi ʼaia?

⁹ ʼI tana mole fia fakahoko te fakatotonu ʼaē neʼe fai age e Sehova, neʼe heka ia Sonasi ki te vaka ke ina ʼave mamaʼo ʼosi ia ia mai te gāue ʼaē neʼe hinoʼi age ke ina fai. Kae ko Sehova neʼe mole ina līʼakina tana polofeta pe neʼe ina fili he tahi age moʼona fetogi. Kailoa, neʼe tokoniʼi e Sehova ia Sonasi ke mahino ki te maʼuhiga ʼo tana gāue. Neʼe lagaʼi e te ʼAtua he afā mālohi moʼo fakahou te tai. Ko te vaka ʼaē neʼe heka ai Sonasi neʼe feʼāveʼaki e te ʼu peau. Neʼe ʼamanaki mamate ai te ʼu hahaʼi neʼe mole nātou fai hanatou meʼa kovi, ʼuhi pe ko Sonasi! (Sonasi 1:4) Koteā anai te meʼa ka fai e Sonasi? ʼI tana mole loto ʼaē ke mamate te kau tautai ʼuhi pe ko ia, neʼe ina ʼui age kia nātou: “Koutou hiki ʼau pea koutou lī ʼau ki te tai, pea ʼe totofu lelei anai te tai maʼa koutou.” (Sonasi 1:12) Neʼe mole manatu e Sonasi, ʼi tona ʼosi lī e te kau tautai ki te tai, ʼe hāofaki anai ia ia e Sehova mai te tai. (Sonasi 1:15) Kae neʼe tali e Sonasi ke mate, ke feala he hāofaki ʼo te kau tautai. ʼE mole koutou sio ai koa la ki te ʼu kalitate ʼaē ko te lototoʼa, te agavaivai, pea mo te ʼofa?

10. Koteā ʼaē neʼe hoko ʼi te toe fakatotonu age e te ʼAtua kia Sonasi ke ina fakahoko tana gāue?

¹⁰ Pea neʼe hāofaki leva e Sehova ia Sonasi. Ko te ʼu meʼa ʼaē neʼe hoko atu ki muʼa atu, neʼe faka ʼuhiga koa neʼe mole kei feala ke fakafofoga e Sonasi ia te ʼAtua? Kailoa, ko Sehova ʼaki he loto fakamolemole pea mo he lotoʼofa, neʼe ina toe fakatotonu age ki te polofeta ke ʼalu ʼo faka mafola ki te kau Ninive. ʼI te tau atu ʼa Sonasi ki Ninive, neʼe lototoʼa ʼo tala ki te hahaʼi ʼo te kolo, ʼe ʼamanaki fakaʼauha tonatou kolo ia ʼaho e 40 koteʼuhi kua aʼu ki te ʼAtua tanatou agakovi ʼaupito. (Sonasi 1:2; 3:4) ʼI tanatou ʼosi fagono ki te logo ʼaē neʼe tala fakahagatonu age e Sonasi, neʼe fakahemala te kau Ninive, pea neʼe mole fakaʼauha ai tonatou kolo.

11. Koteā ʼaē ʼe ʼasi mai neʼe maʼu e Sonasi he ako maʼuhiga?

¹¹ Neʼe mole heʼeki maʼu aipe e Sonasi te faʼahiga manatu ʼaē ʼe lelei. Pea ʼaki te fuʼu ʼakau, neʼe faʼa kātaki aipe Sehova ʼo akoʼi age kia ia, ʼe mole Ina sioʼi pe te meʼa ʼaē ʼe hā mai ki tuʼa. ʼE ina vakaʼi te loto. (Sonasi 4:5-11) ʼE ʼiloga leva neʼe kua mahino kia Sonasi te ako maʼuhiga, ʼi tana fakamatala fakahagatonu te ʼu meʼa ʼaē neʼe hoko kia ia totonu. Ko te tahi fakamoʼoni lahi ʼo tana agavaivai, ko tana fakahā fakahagatonu tona ʼu vaivaiʼaga māʼiape la mo te ʼu meʼa ʼaē neʼe lagi fakaufiufi hona fakamatala. ʼE tonu ke kita lototoʼa ʼo fakahā fakahagatonu takita ʼu hala!

12. (a) ʼE tou ʼiloʼi feafeaʼi ko Sesu ʼe tatau tana manatu mo te manatu ʼa Sehova ʼo ʼuhiga mo te hahaʼi? (b) Ko te manatu feafeaʼi ʼaē neʼe ina fakaloto mālohiʼi tatou ke tou taupau, ʼo ʼuhiga mo te hahaʼi ʼaē ʼe tou faka mafola ki ai te logo lelei? (Vakaʼi te talanoa ʼi te pasina 18.)

¹² ʼI te ʼu sēkulō ki muli age, neʼe talanoa lelei ia Sesu Kilisito ʼo ʼuhiga mo te meʼa ʼaē neʼe hoko ʼi te maʼuli ʼo Sonasi. Neʼe ina ʼui fēnei: “O hage pe ko te nofo a Sonasi o aho tolu mo po tolu i te taga o te ika, pea e aho tolu mo po tolu anai te nofo a te Foha o te tagata i te loto o te kele.” (Mateo 12:40) Mokā fakatuʼuake anai te polofeta ko Sonasi, ʼe ina ako anai ko Sesu neʼe ina fakatatau te temi ʼaē neʼe nofo ai ʼi te faitoka, ki te temi ʼaē neʼe nofo ai ʼi te loto fatu ʼo te ika. ʼE mole tou fiafia koa la ʼi te tauhi ki he ʼAtua ʼe mole ina līʼakina tana ʼu kaugana mokā ʼe nātou fai hanatou ʼu hala? Neʼe tohi fēnei e te tagata fai pesalemo: “Ohage pe ko te manavaʼofa ʼa he tāmai ki tona ʼu foha, ʼe manavaʼofa ia Sehova kia nātou ʼaē ʼe manavasiʼi kia te ia. Koteʼuhi ʼe ina ʼiloʼi lelei peʼe faʼu tatou ʼaki teā, ʼo ina manatuʼi ko tatou ʼe tou efu.” (Pesalemo 103:13, 14) ʼE mahino ia ko te “efu” ʼaenī—ʼe kau kiai te hahaʼi heʼe haohaoa ʼo te temi nei—ʼe feala ke ina fai he ʼu tuʼuga meʼa ʼaki te tokoni ʼa te laumālie maʼoniʼoni ʼo te ʼAtua!

He Manatu Fakapotopoto ʼo ʼUhiga Mo Petelo

13. Koteā te ʼu aga ʼa Petelo ʼe lagi tou manatuʼi, kae he koʼe neʼe fili e Sesu ia ia ke liliu ko hana ʼapositolo?

¹³ Tou vakaʼi fakanounou age muʼa he lua faʼifaʼitaki, te ʼapositolo ko Petelo. Kapau ʼe ʼui atu ke koutou fakamatalatala te natula ʼo Petelo, ʼe lagi koutou manatu fakavilivili anai neʼe ko he tagata neʼe hoko ʼoho, pea mo fialahi. ʼI ʼihi temi neʼe ʼasi ia Petelo te ʼu agaaga ʼaia. Kae neʼe fili koa e Sesu ia Petelo ke kau ki tana ʼu ʼapositolo e toko 12 mo kanapaula neʼe moʼoni ko Petelo neʼe ko he tagata neʼe mamū noa, peʼe fialahi? (Luka 6:12-14) Kailoa ia! Neʼe mole gata te sio ʼa Sesu ki te ʼu vaivaiʼaga ʼaia, pea neʼe ina ʼiloʼi te ʼu kalitate lelei ʼo Petelo.

14. (a) E feafeaʼi hatatou fakamahino te palalau fakahagatonu ʼa Petelo? (b) He koʼe ʼe tonu ke tou fakafetaʼi ki te ʼu fai fehuʼi tuʼumaʼu ʼaē neʼe fai e Petelo?

¹⁴ ʼI ʼihi temi, ko Petelo neʼe ko he tagata fakahoko palalau ʼa te kau ʼapositolo. ʼE lagi faka ʼuhigaʼi anai e ʼihi te faʼahi ʼaia ʼo ʼui neʼe mole agavaivai. Kae ʼe moʼoni koa? ʼE ʼui e ʼihi, ʼe lagi ko Petelo ʼaē neʼe matuʼa age ʼi te kau ʼapositolo—lagi neʼe matuʼa age ia Sesu. Kapau koia ʼaia, ʼe lagi tou mahino ai pe koʼe neʼe ko Petelo ʼaē neʼe ʼuluaki palalau tuʼumaʼu. (Mateo 16:22) Kae ʼe ʼi ai te tahi puani ke tou tokagaʼi. Ko Petelo neʼe ko te tagata neʼe ina leleiʼia te ʼu meʼa fakalaumālie. Neʼe ina fai te ʼu fehuʼi ʼuhi ko tana ʼuakai ki te ʼatamai mālama. Pea ko te ʼu fehuʼi ʼaia ʼe toe ʼaoga pe foki kia tatou. Neʼe fai e Sesu te ʼu palalau maʼuhiga moʼo tali ki te ʼu fehuʼi ʼa Petelo, pea ko te ʼu tali ʼaia neʼe tohi ʼi te Tohi-Tapu. Ohage la, neʼe talanoa ia Sesu ki “te tagata tauhi ʼapi agatonu” moʼo tali ki te fehuʼi neʼe fai age e Petelo. (Luka 12:41-44, MN ) Koutou fakatokagaʼi te fehuʼi ʼaenī ʼa Petelo: “Kua matou tuku ia meafuape, pea kua matou mulimuli ia te koe; kotea e matou mau anai?” Koia neʼe fai ai leva e Sesu te fakapapau fakaloto mālohi ʼaenī: “Ki he tahipe nee ina liaki te api, pe ko te u tehina, te u tuagaane, te u fanau, te u kele, uhi ko toku huafa, e lahiʼage te mea e ina mau anai pea e ina mau anai te tofia o te mauli heegata.”—Mateo 15:15; 18:21, 22; 19:27-29.

15. He koʼe ʼe tou lava ʼui ko Petelo neʼe agatonu moʼoni?

¹⁵ Neʼe ʼi ai te tahi kalitate lelei ʼo Petelo—neʼe ko te tagata agatonu. ʼI te temi ʼaē neʼe mavae ai te tokolahi ʼo te kau tisipulo ia Sesu, ʼuhi ko tanatou mole mahino ki tana ʼu faiakonaki, ko Petelo ʼaē neʼe lea maʼa te kau ʼapositolo e toko 12 pea mo ʼui maʼana: “Aliki, ke matou olo anai kia ai? E ke maù te u folafola o te mauli heegata.” (Soane 6:66-68) ʼE mahino ia neʼe ko he ʼu palalau neʼe malave ki te loto ʼo Sesu! Ki muli age, ʼi te ʼōmai ʼo te hahaʼi tokolahi ko te puke ʼo te Pule, tokolahi ʼi tana kau ʼapositolo neʼe nātou feholaki. Kae neʼe muliʼi e Petelo te hahaʼi mai mamaʼo pea neʼe hū ki te malaʼe ʼo te pelepitelo lahi. Neʼe mole fula kae neʼe lototoʼa, ko te tupuʼaga la ʼaia ʼo tana ʼalu ki te koga meʼa ʼaia. Pea ʼi te lolotoga fehufehuʼi ʼo Sesu, neʼe hoho mai Petelo ki he kūtuga Sutea neʼe nātou fakamāmāfana ʼi te afi. Neʼe ʼiloʼi ia ia e te tahi kaugana ʼa te pelepitelo lahi, pea neʼe ina valokiʼi ia ia neʼe kau mo Sesu. Ei, ko Petelo neʼe fakafisi ʼe mole ina ʼiloʼi tona Pule, kae tou manatuʼi neʼe tuʼutāmaki la Petelo ʼi te temi ʼaia ʼuhi he neʼe agatonu pea mo tuʼania pe koteā ʼaē ka hoko anai kia Sesu, pea ʼe ko he faʼahi neʼe mole lavaʼi e te kau ʼapositolo.—Soane 18:15-27.

16. He koʼe ʼe maʼuhiga ke tou tokagaʼi te ʼu kalitate ʼo Sonasi pea mo Petelo?

¹⁶ Neʼe lahi ʼaupito age te ʼu kalitate ʼo Petelo ʼi tona ʼu vaivaiʼaga. ʼO toe feiā mo Sonasi. ʼI tatatou kua mahino ki te ʼu kalitate ʼo Sonasi pea mo Petelo, koia ʼe tonu ai ke tou toe akoʼi ia tatou totonu ke tou sio ki te ʼu kalitate ʼo totatou ʼu tēhina mo tuagaʼane ʼi te faʼahi fakalaumālie ʼo te temi nei. Kapau ʼe tou fai te faʼahi ʼaia pea ʼe tou felogoi lelei anai mo nātou. He koʼe ʼe tonu ke tou sioʼi tonatou ʼu kalitate?

Tou Maʼuliʼi Te Ako ʼAia Ia ʼAho Nei

17, 18. (a) He koʼe ʼe feala ke hoko ni ʼu fihifihia ʼi te kau Kilisitiano? (b) Koteā te tokoni faka Tohi-Tapu ʼaē ʼe feala ke tokoni mai kia tatou ke tou fakatokatoka totatou ʼu fihifihia mo totatou ʼu tēhina mo tuagaʼane?

¹⁷ Ko te ʼu fafine, pea mo te ʼu tamaliki ʼe lanu kehekehe, pea mo kehekehe tonatou ʼu ako ʼe nātou lolotoga tauhi fakatahi kia Sehova ia ʼaho nei. (Apokalipesi 7:9, 10) ʼE tou sio ʼi te kokelekasio faka Kilisitiano ki te ʼu hahaʼi ʼe kehekehe tonatou ʼu ʼulugaaga! ʼE mahino ia, ʼi tatatou gāue fakatahi maʼa Sehova ʼi te temi fuli pe, ʼe hoko anai te ʼu fihifihia.—Loma 12:10; Filipe 2:3.

¹⁸ Logola ʼe tou sio ki te ʼu vaivaiʼaga ʼo totatou ʼu tēhina, kae ʼaua naʼa tou tuʼu ai. Tou faiga ʼo faʼifaʼitakiʼi ia Sehova, ʼaē neʼe hiva fēnei ki ai te tagata fai pesalemo: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?” (Pesalemo 130:3) ʼE feala anai ke tou maveuveu mo kapau ʼe tou tokagaʼi te ʼu vaivaiʼaga, kae ke “tou fekumi kia mea o te tokalelei pea mo mea e lagalaga aki tatou taki tokotahi.” (Loma 14:19) Tou faiga ke tou sio ki te hahaʼi ohage ko te sio ʼa Sehova kia nātou, ʼaua naʼa tou fakatuʼu tatatou sio ki tonatou ʼu vaivaiʼaga, kae ke tou tokagaʼi tāfito tonatou ʼu kalitate. Kapau ʼe tou fai feiā, pea ʼe tokoni mai anai kia tatou ke tou “fe’katakiʼaki.”—Kolose 3:13.

19. Koutou fakahā te ʼu fakatuʼutuʼu ʼaē ʼe feala anai ke fai e he Kilisitiano moʼo fakatokatoka ni ʼu tokakovi maʼuhiga.

¹⁹ E feafeaʼi mo kapau ʼe hoko he ʼu femahinohalaʼaki ʼe faigataʼa hatatou fakamolemole ʼi totatou loto? (Pesalemo 4:4) Neʼe kua hoko koa he meʼa feiā kia koutou pea mo he tēhina peʼe ko he tuagaʼane? He koʼe koa ʼe mole koutou faigaʼi ke koutou fakatokatoka te faʼahi ʼaia? (Senesi 32:13-15) ʼUluaki, koutou fakaōvi kia Sehova ʼi te faikole, ʼo kole ke ina takitaki koutou. ʼOsi ʼaia, pea koutou fakaōvi ki ai ʼaki “te agamālū ʼaē ʼe pipiki ki te fakapotopoto,” pea mo koutou manatuʼi tona ʼu kalitate. (Sakopo 3:13, MN ) Koutou ʼui age ʼe koutou kumi te tokalelei. Koutou manatuʼi te tokoni fakaʼatua ʼaenī: “Koutou vave ʼi te fagono, tuai ʼi te palalau, mo tuai ʼi te ʼita.” (Sakopo 1:19, MN ) Ko te tokoni ʼaē ke “tuai ʼi te ʼita,” ʼe ʼaoga kia koutou mo kapau ko he tahi neʼe ina fai pe neʼe ina ʼui atu he meʼa ʼe feala ke koutou ʼita ai. Kapau koia, koutou kole kia Sehova ke tokoni atu ke koutou maʼu te loto lolomi. (Kalate 5:22, 23) Koutou tuku ke fakahā atu e tokotou tēhina te meʼa ʼaē neʼe ʼita ai, pea koutou fakalogo lelei ki te ʼu meʼa ʼaē ʼe ina ʼui atu. ʼAua naʼa koutou tuʼusi tana palalau, tatau aipe mo kapau ʼe mole koutou tali te ʼu meʼa ʼaē ʼe ina ʼui atu. ʼE lagi hala tana manatu, kae ʼe tonu ke koutou fakalogo heʼe lagi ʼi te moʼi temi ʼaia ʼe feiā tana ʼu manatu pea mo te ʼu meʼa ʼaē ʼe ina logoʼi ʼi tona loto. Koutou faiga ke koutou mahino ki tana faʼahiga sio ki te fihifihia. ʼE lagi feala pe ke koutou faka ʼuhigaʼi te fihifihia ʼaia ohage ko tokotou tēhina.—Tāʼaga Lea 18:17.

20. Ka tou fakatokatoka he ʼu fihifihia, koteā te ʼu meʼa ʼe feala ke tou fai ke iku ki he fakatokatoka?

²⁰ Kapau kua hoko mai te temi ʼaē ʼe tonu ke koutou palalau ai, koutou fai he ʼu palalau ʼe logo lelei. (Kolose 4:6) Koutou ʼui age ki tokotou tēhina te ʼu meʼa ʼaē ʼe koutou leleiʼia ia ia. Koutou faifakalelei ʼo ʼuhiga mo ni ʼu meʼa neʼe lagi koutou fai ʼo tupu ai te tokakovi. Kapau ko takotou ʼu faiga ʼaki he agavaivai ʼe iku ki he fakatokatoka, pea ke koutou fakafetaʼi kia Sehova. Kapau ʼe mole hona fua, koutou haga kole kia Sehova ke ina takitaki koutou, ke koutou kumi he tahi age ʼu fealagia moʼo fakatokatoka ia te tokakovi ʼaia.—Loma 12:18.

21. Neʼe tokoni feafeaʼi atu te alatike ʼaenī ke koutou sio ki te hahaʼi ohage ko Sehova?

²¹ ʼE ʼofa Sehova ki tana ʼu kaugana fuli. ʼE fiafia ʼi te fakaʼaogaʼi ʼo tatou fuli ki tana gāue logola totatou ʼu vaivaiʼaga. ʼE tuputupu anai totatou ʼofa ki totatou ʼu tēhina mo tuagaʼane, mo kapau ʼe lahi te ʼu meʼa ʼaē ʼe tou mahino ʼo ʼuhiga mo nātou. Kapau kua veliveli totatou ʼofa ki he Kilisitiano, ʼe feala ke tou toe fakatuputupu. ʼE tou maʼu anai he tapuakina lahi, mo kapau ʼe tou fakatotonu ke tou faiga ke tou sio ki te ʼu kalitate lelei ʼo ʼihi—ei, tou sio kia nātou ohage ko Sehova!

[Kiʼi nota]

Koteā Anai Takotou Tali?

• Koteā te manatu ʼa Sehova ʼo ʼuhiga mo te ʼu vaivaiʼaga ʼo tana ʼu kaugana agatonu?

• Koteā te ʼu kalitate lelei ʼo Sonasi pea mo Petelo?

• Koteā ʼaē ʼe tonu ke koutou manatuʼi tuʼumaʼu ʼo ʼuhiga mo tokotou ʼu tēhina Kilisitiano?

[Talanoa ʼo te pasina 18]

Tou Fakakaukauʼi Peʼe Feafeaʼi Te Sio ʼa Te ʼAtua Ki ʼIhi

Ka koutou metitasioʼi te hisitolia ʼo Sonasi ʼi te Tohi-Tapu, ʼe tonu koa ke koutou toe vakavakaʼi takotou faʼahiga manatu ki te hahaʼi ʼaē ʼe koutou faka mafola tuʼumaʼu ki ai te logo lelei? Ohage ko te kau Iselaele, ʼe lagi nātou manatu pe kia nātou totonu peʼe mole nātou fia logo, peʼe lagi nātou fakafeagai ki te logo ʼa te ʼAtua. Kae e feafeaʼi te sio ʼa Sehova ʼAtua kia nātou? Māʼiape la mo te hahaʼi ʼaē ʼe māʼoluga ʼi te tuʼu ʼo te ʼu faʼahiga meʼa ʼaenī, ʼe lagi feala ʼi he ʼaho ke nātou kumi ia Sehova, ohage ko te hau ʼo Ninive ʼaē neʼe fakahemala ʼi tana logo ki te fai faka mafola ʼa Sonasi.—Sonasi 3:6, 7.

[Paki ʼo te pasina 15]

ʼE koutou sio koa ki te hahaʼi ohage ko te sio ʼa Sehova?

[Paki ʼo te pasina 16, 17]

Neʼe palalau lelei ia Sesu ʼo ʼuhiga mo te maʼuli ʼo Sonasi