Tou Faʼifaʼitakiʼi Te Kau Polofeta—Sonasi
1. Kotea te ʼu kalitate neʼe maʼu e Sonasi?
1 Kotea takotou manatu ʼo ʼuhiga mo te polofeta ko Sonasi? ʼE lagi manatu e ʼihi neʼe ko he tagata neʼe fula peʼe mole loto fakamolemole. Kaʼe neʼe ha lelei ia neʼe ko he tahi neʼe agavaivai, mo lototoʼa, pea mo lotolelei ke ina sakilifisioʼi tona maʼuli. ʼE feafeaʼi hatatou faʼifaʼitakiʼi te ʼu kalitate ʼaia ʼo Sonasi?—Sakp. 5:10.
2. ʼE feafeaʼi hatatou faʼifaʼitakiʼi te agavaivai ʼo Sonasi?
2 Tana Agavaivai: ʼI te kamata, neʼe hola Sonasi ki te tahi fenua kaʼe neʼe mole alu ia ki te telituale ʼae neʼe hinoʼi ki ai. ʼE mole tou punamaʼuli ai, koteʼuhi neʼe agamalohi ʼaupito te hahaʼi Asilia, pea neʼe higoa te kolo ʼo Ninive ko “te kolo ligitoto.” (Nau. 3:1-3, MN) Kaʼe neʼe fakatonutonuʼi e Sehova ia Sonasi. Pea neʼe agavaivai Sonasi ʼo ina tali leva ke alu ki te telituale ʼae neʼe hinoʼi ki ai. (Taag. 4:13; Son. 3:1-3) Logola neʼe fakafisi ʼi te kamata, kaʼe neʼe ina fakahoko leva te finegalo ʼo Sehova. (Mat. 21:28-31) ʼE tou fakatotonu koa mo tatou ke tou fakamafola te logo lelei, maʼia pe neʼe fakatonutonuʼi tatou peʼe faigataʼa tatatou telituale?
3. Ko te ʼu faʼahi fea ʼi takotou minisitelio ʼe maʼua ke kotou lototoʼa ai pea mo te maʼuli fakasakilifisio?
3 Tana Lototoʼa Pea Mo Tana Lotolelei ʼo Sakilifisioʼi Tona Maʼuli: Neʼe lotolelei Sonasi ke ina sakilifisioʼi tona maʼuli ʼi te temi ʼae neʼe mahino ai ʼe tuʼutamaki anai te maʼuli ʼo te kau kauvaka ʼuhi he neʼe ina fai he tonu ʼe kovi. (Son. 1:3, 4, 12) Ki muli age, ʼi tana fakahoko tana gaue ʼi Ninive, neʼe ulu ʼo kaku ki te loto kolo, lagi moʼo kumi he faʼahi ke ina tala ai te ʼu fakamau ʼa Sehova. ʼE ha ʼi te ʼu faʼahi ʼaia, neʼe mole ko he tagata fula ia, kaʼe neʼe ko he polofeta lototoʼa ia ʼo te ʼAtua! (Son. 3:3, 4) Kaʼe ʼe feafeaʼi tatou ia ʼaho nei? ʼAki te lototoʼa ʼae ʼe foaki mai e te ʼAtua, ʼe feala ai ke tou lotomalohi ʼo faifakamafola logola te fakafeagai. (Gaue 4:29, 31) Pea ʼe tonu ke tou lotolelei ʼo sakilifisioʼi totatou temi mo ʼotatou koloa ki te minisitelio.—Gaue 20:24.
4. He ko ʼe ʼe lelei ke tou fakakaukauʼi te ʼu faʼifaʼitaki neʼe tuku mai e te kau polofeta ʼa Sehova?
4 ʼI te temi fuli pe ʼae ʼe kotou lau ai he ʼu aluʼaga neʼe hoko ki he polofeta ʼa Sehova, ʼe fua lelei anai kia koutou mo kapau ʼe kotou fakakaukauʼi ʼe hoko te ʼu aluʼaga ʼaia kia koutou. Kotou fai te ʼu fehuʼi ʼaeni: “Kapau la neʼe ko au, pea ʼe feafeaʼi anai koa taku aga? ʼE feafeaʼi haku faʼifaʼitakiʼi ʼona kalitate ʼi toku maʼuli?” (Hep. 6:11, 12) ʼE tou vakaʼi anai ʼi te tahi ʼu alatike ʼo Te Minisitelio ʼo Te Puleʼaga te ʼu ako ʼe feala ke tou taʼofi mai te tahi age ʼu polofeta agatonu ʼa Sehova.