Ko He Ako Mai Te ʼu Manulele

“KOUTOU vakavakaʼi lelei te ʼu manulele ʼo te lagi, heʼe mole nātou to magisi, pea ʼe mole nātou utu magisi, pea ʼe mole nātou tānaki ki he ʼu faleoko; kaʼe fafaga nātou e takotou Tāmai ʼaē ʼe ʼi selo. ʼE mole koa la maʼuhiga age koutou ia nātou?” (Mateo 6:​26, MN ) Neʼe fai e Sesu Kilisito te ʼu palalau ʼaenī ʼi tana akonaki ʼiloa ʼi te faʼahi moʼuga ʼe ōvi ki te Tai ʼo Kalilea. Neʼe mole ko tana ʼu tisipulo pe ʼaē neʼe nātou logo ki te akonaki ʼaia. Neʼe kau ai mo he toe hahaʼi tokolahi mai te ʼu potu fuli ʼo te fenua, pea neʼe lagi liliu ʼihi ia nātou ʼaia ko he kau tisipulo ʼa Sesu. Tokolahi ia nātou neʼe ko te hahaʼi māsisiva neʼe nātou ʼaumai kia Sesu tanatou ʼu hahaʼi mahahaki ke ina fakamālōlō.​—Mateo 4:​23–5:2; Luka 6:​17-​20.

ʼI tana ʼosi fakamālōlō ia nātou fuli ʼaē neʼe mamahi, neʼe fakatokaga age e Sesu ki te maʼuhiga age ʼo te ʼu meʼa fakalaumālie. ʼI te ʼu faʼahi ʼaē neʼe ina akoʼi age kia nātou, neʼe kau ai te ʼu palalau ʼaē ʼe tuʼu ʼi ʼoluga.

Kua fualoa te maʼuli ʼo te ʼu manulele ʼo te lagi. Ko ʼihi manulele ʼe kai ki te ʼu kiʼi manu, ko ʼihi ʼe kai fuaʼi ʼakau pea mo te ʼu tegaʼi ʼakau. Kapau neʼe lava foaki fakalahi e te ʼAtua he meʼa kai maʼa te ʼu manulele, pea ʼe mahino ia ʼe lava tokoni ki tana ʼu tagata kaugana ke nātou maʼu tanatou meʼa kai ʼi te ʼaho fuli. ʼE lagi tokoni age kia nātou ke nātou maʼu hanatou gāue ke feala hanatou totogi hanatou meʼa kai. Peʼe ina faka fealagia age kia nātou ke nātou popoto ʼi te fai gāueʼaga, peʼe tauhi manu. Lolotoga te ʼu temi ʼe hoko ai te ʼu tuʼutāmaki, ʼe lava uga e te ʼAtua ia te ʼu kāiga peʼe ko te ʼu kaumeʼa lotoʼofa ke nātou maʼuli vaevae mo nātou ʼaē ʼe tau mo te faigataʼaʼia.

ʼE lahi te ʼu meʼa ʼe tou lava ako mokā tou sivisivi fakalelei te ʼu manulele. Neʼe fakatupu e te ʼAtua te ʼu manulele mo tonatou ʼu fealagia fakaofoofo ke nātou faʼu te ʼu fātaʼi ke nātou taupau ai tonatou ʼu kiʼi ʼuhi. Koutou tokagaʼi te ʼu faʼahiga fātaʼi kehekehe e lua. ʼI te paki ʼi te faʼahi hema ko te fātaʼi ʼo te faʼahiga manulele ʼaē ko te martinet. ʼE ina faʼufaʼu tona fātaʼi ʼi he maka peʼe ʼi he kaupā ʼo he ʼapi. Ko te tāpunu ʼo te fātaʼi ʼe ko he foʼi maka ʼe tautau ʼi te fuga fātaʼi, ohage ko tona tuʼu ʼi te paki, ko he ʼu tuʼapatu ʼo he fale. Ko te takele ʼo te fātaʼi ʼe ko he ʼu kiʼi moʼi pela ʼe fakapipiki tahi ʼo faʼufaʼu ohage he ipu. ʼE gāue fakatahi te manulele tagata mo te manulele fafine ki te tānaki ʼo te ʼu kiʼi moʼi pela moʼo faʼu ʼaki te fātaʼi ʼaē ʼe feala ke laka ʼi te māhina katoa tona faʼu. Pea ʼe nā fāliki te loto fātaʼi ʼaki te vao. ʼE nā fāgai toko lua tona ʼu kiʼi ʼuhi. Ko te fātaʼi ʼaē ʼe tuʼu ʼi lalo ʼe ko te fātaʼi ʼo te manulele tagata ʼaē ko te tisserin masqué. Ko te manulele ʼatamai ʼaia mai Afelika ʼe ina faʼu tona fātaʼi ʼaki he ʼu lau vao. ʼE ina lava faʼu katoa he fātaʼi ʼi te ʼaho pe e tahi, pea ʼe ina lava faʼu he tahi ʼu fātaʼi e 30 tupu ʼi tona faiʼaga e tahi!

Koteā te ako ʼe tou tāʼofi ai? Kapau ʼe foaki e te ʼAtua ki te ʼu manulele he ʼu faiva feiā mo he ʼu tuʼuga meʼa moʼo faʼu ʼaki te ʼu fātaʼi, ʼe mahino papau ia ʼe ina lava foaki ki te tagata te ʼu meʼa ʼe ʼaoga moʼo faʼu ʼaki he ʼapi. Kae neʼe fakahā e Sesu, ʼe ʼi ai te tahi age meʼa ʼe maʼuhiga age, mo kapau ʼe tou loto ke tokoni mai ia Sehova ʼAtua ke tou maʼu te ʼu meʼa fakasino tāfito ʼo te maʼuli. Neʼe fakapapau fēnei e Sesu: “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kia koutou.” (Mateo 6:​33, MN ) ʼE lagi koutou feʼekeʼaki, peʼe ‘Koteā koa ʼaē ʼe fakapipiki ki te kumi muʼa ʼo te Puleʼaga ʼo te ʼAtua?’ ʼE fiafia anai te kau Fakamoʼoni ʼa Sehova, ʼaē ʼe nātou tufa te nusipepa ʼaenī, ʼi te tali atu ki te fehuʼi ʼaia.