Ko He Agamāhani Pe Koa Peʼe Ko He Aga Fakakākā?

ʼI ʼIHI faleako ʼi Polonia, ko he agamāhani ʼa te kau ako ʼe ko te totogi ʼo he meʼa ʼofa maʼa tanatou kau faiako, ʼi tanatou fakaʼamu ʼaē ke nātou maʼu ai he ʼu puani lelei mokā hoko he sivi. Kae neʼe hoko te ʼaluʼaga faigataʼa ki te finemui ʼe higoa ko Katarzyna. Neʼe feʼekeʼaki fēnei: “ ʼE tonu koa ke ʼau foaki he falā peʼe kailoa?” Neʼe ʼui fēnei age e tona ʼu kaugā ako: “ ʼE ko he agamāhani ʼa te tamaliki. ʼAua tau tuʼania, ʼe mole ke puli anai koe ʼi tau fai te faʼahi ʼaia, heʼe lahi age anai te meʼa ʼaē ka ke maʼu.”

ʼE fakamoʼoni fēnei e Katarzyna: “ ʼE moʼoni, ʼi te ʼuluaki taʼu, neʼe ʼau kau ki te tānaki falā moʼo fai ʼo he meʼa ʼofa ki te kau faiako. Neʼe hoki ʼau mahino ki muli age ki taku lagolago ki he aga fakakākā, ko he faʼahi ʼe tapuʼi e te Tohi-Tapu.” Neʼe ina manatuʼi te ʼu vaega faka Tohi-Tapu ʼe fakahā ai ia te fehiʼa ʼa Sehova ki te aga fakakākā. (Teutalonome 10:17; 16:19; 2 Fakamatala 19:7) ʼE ʼui fēnei e Katarzyna: “Neʼe ʼau mahino ki te faigafua ʼo te muli vale ki te fakaoloolo ʼo te tamaliki ako. Neʼe ʼau fakatotonu ai ʼe mole ʼau toe lagolago anai ki te aga ʼaia.” ʼI tona ʼu taʼu fakaʼosi e tolu, logope tona manukiʼi e te tahi kau ako, kae neʼe ina lava fakamahino ki ʼihi tana mole kau ki te ʼu tānaki “meʼa ʼofa” ʼaia, koteʼuhi ʼe mulimuli ki te ʼu meʼa ʼaē ʼe ina ako ʼi te Tohi-Tapu.

Ko ʼihi neʼe nātou lau ko Katarzyna ʼe manatu pe kia ia totonu pea ʼe mole fia fakatahi mo te tamaliki ako. ʼE ina ʼui fēnei: “ ʼE ʼi ai pe ʼihi ʼe mole heʼeki nātou fia fakakaumeʼa mo ʼau. Kae ʼi te tahi faʼahi, ʼe kaugamālie ia nātou ʼe nātou fakaʼapaʼapa ki te ʼu meʼa ʼaē ʼe ʼau tui kiai, pea ʼe ʼau fiafia ai.” Neʼe ʼiloa ia Katarzyna ko te Fakamoʼoni ʼa Sehova, ʼe ina maʼuliʼi te ʼu pelesepeto faka Tohi-Tapu.