Te ʼOfa ʼe Maʼuhiga
KO TE ʼofa ʼe ʼaoga ki te hahaʼi fuli logola tonatou taʼu, tanatou agaʼi fenua, tanatou lea, peʼe ko tonatou lanu. Kapau ʼe mole maʼu e te hahaʼi ia te ʼofa, pea ʼe mole nātou maʼuli fiafia. Neʼe tohi fēnei e te tagata kumi faitoʼo: “Ko te ʼofa pea mo te felogoi lelei mo te hahaʼi, ʼe ko te ʼu meʼa ʼaia ʼe feala ai ke tou mahaki peʼe tou logo lelei, ke tou lotomamahi peʼe tou fiafia, ke tou mamahi peʼe tou fīmālie. Kapau ʼe ʼi ai he faitoʼo foʼou ʼe feala ke ina foaki he ʼu meʼa feiā, ʼe mahino ia ʼe foaki anai e te kau tōketā fuli ia te faitoʼo ʼaia ki tanatou kau mahaki. ʼE ko he faitoʼo lelei ke foaki ki te hahaʼi.”
Kae ko te sosiete ʼo te temi nei, tāfito ʼaki te ʼu meʼa ʼaē ʼe ina fakahāhā, pea mo te hahaʼi ʼaē ʼe ʼui ko ni ʼu faʼifaʼitaki, ʼe ina faka maʼuhigaʼi age te ʼu koloā, te mālohi, te ʼiloa, te ʼu manatu pea mo te ʼu gāue ʼaē ʼe pipiki ki te ʼu felāveʼi fakasino, kae nātou meʼa noaʼi te ʼu felogoi ʼofa pea mo fakafiafia ʼaē ʼe ʼaoga ki te hahaʼi. Tokolahi te kau faiako ʼe nātou faka maʼuhigaʼi te ʼu fakatuʼutuʼu pea mo te maʼu tuʼulaga ʼi te mālama, ʼo nātou ʼui ʼe ko te ʼu meʼa tāfito ʼaia ʼo te maʼuli. Ko te poto pea mo te faiva ʼe maʼuhiga, kae ʼe tonu koa ke meʼa noaʼi te famili pea mo te ʼu kaumeʼa ʼuhi ko tanatou kumi ia te ʼu meʼa ʼaia? Neʼe fakatatau e te tagata faitohi poto ʼo te temi muʼa ia te hahaʼi popoto kae mole nātou maʼu te ʼofa, ki “he kogaʼi ukamea ʼe tagi logoaʼa peʼe ko he nafa ʼe tatagi.” (1 Kolonito 13:1, MN ) ʼE lagi koloaʼia te hahaʼi ʼaia, peʼe nātou logona, kae ʼe mole feala ʼi he temi ke nātou fiafia.
Ko Sesu Kilisito, ʼaē neʼe mahino katoa ki te hahaʼi pea mo ʼofa mamahi kia nātou, neʼe ina faka maʼuhigaʼi te ʼofa ki te ʼAtua pea mo te kāiga ʼi tana ʼu faiakonaki. Neʼe ina ʼui fēnei: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa. . . . ʼE tonu ke ke ʼofa ki tou kāiga ohage pe ko koe totonu.” (Mateo 22:37-39, MN ) ʼE ko nātou pe ʼaē ʼe nātou maʼuliʼi te ʼu palalau ʼaia ʼaē ʼe nātou liliu ko te ʼu tisipulo moʼoni ʼa Sesu. Koia neʼe ina ʼui fēnei ai: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.”—Soane 13:35.
Kae e feafeaʼi hakita maʼuliʼi te ʼofa ʼi te mālama ʼaenī? Pea ʼe lava akoʼi feafeaʼi e te ʼu mātuʼa ia te ʼofa ki tanatou fānau? ʼE hoki fakamatalatala anai te ʼu fehuʼi ʼaia ʼi te alatike ʼaē ʼe hoa mai.
[Paki ʼo te pasina 3]
ʼE faigataʼa te maʼuliʼi ʼo te ʼofa ʼi he mālama ʼe lahi ai te mānumānu