Te Manatu ʼa Te ʼAtua ʼo ʼUhiga Mo Te Kau Mate

KO TE mate ʼo he tahi neʼe kita ʼofa mamahi ai ʼe ko he meʼa fakaloto mamahi. ʼE faigataʼa ʼaupito te galoʼi ʼo ia ʼaē kua mate, pea ʼe kita logoʼi takita nofo tokotahi. Ka mate he tahi ʼe kita ʼofa mamahi ai, ʼe tupu ai hakita lotovaivai, koteʼuhi logola he maʼu koloā ʼo he tahi, peʼe maʼu tuʼulaga, peʼe poto ʼi te fakalotoʼi ʼo te hahaʼi, kae ʼe mole feala ke ina toe fakamaʼuli ake he tahi kua mate.

Kae ʼe mole tatau te sio ʼa totatou Tupuʼaga ki te ʼaluʼaga ʼaia. Neʼe ina fakatupu te ʼuluaki tagata mai te efu ʼo te kele, pea ʼe ina toe lava fakatupu ake he tagata kua mate. Koia, maʼa te ʼAtua, ko nātou ʼaē kua mamate ʼe hage pe ia ʼe nātou maʼuʼuli. ʼO ʼuhiga mo te kau kaugana agatonu ʼo te temi muʼa ʼaē kua mamate, neʼe ʼui fēnei e Sesu: “E mauli te tagata fuape kia te ia [te ʼAtua].”​—Luka 20⁠:⁠38.

ʼI te temi ʼaē neʼe nofo ai ʼi te kele, neʼe maʼu e Sesu ia te mālohi moʼo fakatuʼuake te kau mate. (Soane 5⁠:21) Koia ʼe ina maʼu te manatu ʼo tana Tāmai ʼo ʼuhiga mo nātou ʼaē neʼe mamate agatonu. Ohage la, ʼi te mate ʼo tona kaumeʼa ko Lasalo, neʼe ʼui fēnei e Sesu ki tana kau tisipulo: “ ʼE ʼau ʼalu ki ai ʼo fafagu ia ia mai tana moe.” (Soane 11⁠:​11, MN ) ʼI te manatu fakatagata, ko Lasalo neʼe kua mate, kae kia Sehova pea mo Sesu, ko Lasalo neʼe moe.

ʼAki te takitaki ʼa te Puleʼaga ʼa Sesu, ʼe ʼi ai anai “he fakatuʼuake ʼo te kau faitotonu pea mo te kau heʼe faitotonu.” (Gaue 24⁠:​15, MN ) Ki muli age, ko nātou ʼaē ka fakatuʼuake ʼe akoʼi anai nātou e te ʼAtua, mo nātou maʼu anai te ʼamanaki ki te maʼuli heʼegata ʼi te kele.​—Soane 5⁠:​28, 29.

Ei, ko te mate ʼo he tahi neʼe kita ʼofa mamahi ai, ʼe feala pe ke fakatupu ai he mamahi lahi, pea mo kita logoʼi te mamahi ʼaia lolotoga ni ʼu taʼu. Kae ko te maʼu ʼo te manatu ʼa te ʼAtua ʼo ʼuhiga mo te kau mate, ʼe feala ke tou maʼu lahi ai he fakaloto fīmālie pea mo he loto ʼamanaki.​—2 Kolonito 1⁠:​3, 4.