Neʼe Manako Ki Te Finegaloʼofa

KO MILTON G. HENSCHEL, ʼaē neʼe kua fualoa tana kau ki te Kolesi Pule ʼo te kau Fakamoʼoni ʼa Sehova, neʼe gata leva tona maʼuli ʼi te kele ʼi te Moeaki, ʼaho 22 ʼo Malesio 2003. Neʼe ko tona taʼu 82.

ʼI te temi ʼaē neʼe kei tūpulaga ai, neʼe hū ia Milton Henschel ki te kau gāue ʼo te ʼu pilō lalahi ʼa te kau Fakamoʼoni ʼa Sehova, pea neʼe gāue agatonu lolotoga taʼu e 60 tupu. Mole tuai pea neʼe ʼiloa ko he tagata ʼe ina fai he ʼu fakatuʼutuʼu fakapotopoto, pea mo tokaga fakamalotoloto ki te gāue fai faka mafola ʼo te Puleʼaga. ʼI te taʼu 1939 neʼe liliu ko te sikalaipe ʼa N. H. Knorr, ʼaē neʼe ko te tagata taupau ʼo te fale ta tohi ʼa te kau Fakamoʼoni ʼa Sehova ʼi Brooklyn. ʼI te temi ʼaē neʼe kamata takitaki ai e te Tēhina ko Knorr ia te kau Fakamoʼoni ʼa Sehova ʼi te malamanei katoa ʼi te taʼu 1942, neʼe ina fakaʼaogaʼi te Tēhina ko Henschel ke tokoni age kiai. Neʼe ʼohoana te Tēhina ko Henschel mo Lucille Bennett ʼi te taʼu 1956, pea neʼe nā vaevae fakatahi ia te ʼu fiafia pea mo te ʼu fihifihia ʼo te maʼuli.

Neʼe gāue fakatahi te Tēhina ko Henschel mo te Tēhina ko Knorr ʼo aʼu ki tona mate ʼi te taʼu 1977. Neʼe tautau folau ia te Tēhina ko Henschel moʼo kaugā ʼolo mo te Tēhina ko Knorr ʼi te ʼu fenua e 150 tupu, ʼo ʼaʼahi pea mo fakaloto mālohiʼi te kau Fakamoʼoni ʼa Sehova ʼi te malamanei katoa, kae tāfito te kau misionea pea mo nātou ʼaē ʼe gāue ʼi te ʼu pilō ʼo te ʼu filiale. Ko te ʼu folau ʼaia neʼe tautau faigataʼa pea mo fakatupu tuʼutāmaki. ʼI te taʼu 1963, ʼi tana ʼalu ki te fakatahi ʼi Libéria, neʼe kau ia te Tēhina ko Henschel ʼi te hahaʼi ʼaē neʼe fakatagaʼi ʼuhi ko tana fakafisi ki te kau ki te ʼu meʼa ʼe fakahā ai tanatou tauhi ki te puleʼaga.a ʼAki he lototoʼa, neʼe toe liliu te Tēhina ko Henschel ki Libéria hili kiai te ʼu māhina, ke felāveʼi mo te pelesita ʼo te fenua, pea mo talaga ke foaki he ʼāteaina lahi age ki te tauhi ʼa te kau Fakamoʼoni ʼa Sehova ʼi te fenua ʼaia.

ʼO ʼuhiga mo te fakatokatoka ʼo te ʼu faigataʼaʼia, neʼe ʼiloa te Tēhina ko Henschel ʼi tana kumi he ʼu puleʼaki ʼaoga pea neʼe ko he tahi neʼe aga fakapotopoto. Ko nātou ʼaē neʼe fakatahi mo ia neʼe nātou leleiʼia tāfito tana aga fakatokatoka, mo tana agavaivai pea mo tana gaohi meʼa fakakata. Neʼe ko he tahi neʼe ʼatamai māsila, neʼe lahi te kau misionea neʼe ina leleiʼia ia nātou ʼi te malamanei katoa pea neʼe vave tana maʼu tonatou ʼu higoa, pea mo he ʼu kupu ʼi te ʼu lea ʼo te ʼu fenua, pea neʼe ina fai te ʼu kiʼi fakahuahua ʼaki te ʼu kupuʼi palalau ʼo he lea ʼo te ʼu fenua.

ʼE fakamanatuʼi mai e Mikea 6⁠:8 ia te loto ʼaē ʼo Sehova ʼAtua ke tou “manako ki te finegaloʼofa.” ʼE manatuʼi anai ia Milton Henschel ʼuhi ko te faʼifaʼitaki lelei ʼaē neʼe ina tuku mai ʼi te faʼahi ʼaia. Logope tona maʼumaʼua, neʼe faigafua hakita ʼalu ʼo palalau mo ia, pea neʼe agalelei. Neʼe ina leleiʼia te fai ʼo te ʼu palalau ʼaenī, “Kapau ʼe koutou lotolotolua, koutou manatuʼi ʼo fai te tonu ʼaē ʼe lelei ke fai.” Logope ʼe tou tagiʼi te mate ʼo te tēhina ʼofainaʼi ʼaia, kae ʼe tou fakafiafia ʼi tana kātakiʼi mo nofo agatonu ʼo aʼu ki te fakaʼosi, ʼo tou tui papau kua ina maʼu tona fakapale, ʼaē ko “te kolona o te mauli.”​—Apokalipesi 2⁠:⁠10.

[Kiʼi nota]

[Paki ʼo te pasina 31]

Ko M. G. Henschel mo N. H. Knorr

[Paki ʼo te pasina 31]

Ko ia mo tona ʼohoana ko Lucille