“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—Neʼe Fetogi Katoa Te Tagata ʼAenī e Te Tohi-Tapu
NEʼE fakaʼaogaʼi tāfito e Rolf-Michael tona maʼuli ki te fai musika. Neʼe ina fakaʼaogaʼi lahi te toloke. ʼI tana kei tūpulaga, neʼe lahi ʼaupito tana ʼinu kava pea neʼe ina fakaʼaogaʼi lahi te toloke ʼaē ko te LSD, mo te cocaïne, mo te haschisch, pea mo te tahi ʼu toloke ʼe puli ai te ʼatamai.
ʼI tana faigaʼi ke ina fakahū fakafūfū te toloke ki te fenua ʼo Afelika, neʼe puke ia Rolf-Michael pea neʼe pilisoniʼi lolotoga te ʼu māhina e 13. Ko tona temi pilisoni ʼaia, neʼe ina faka fealagia ai kia ia ke ina fakakaukauʼi te ʼuhiga moʼoni ʼo te maʼuli.
Ko Rolf-Michael mo tona ʼohoana, ia Ursula, neʼe nā kumi mamahi he ʼuhiga ʼo te maʼuli pea mo nā kumi te moʼoni. Logola neʼe mole nā maʼu hanā fīmālie ʼi te ʼu lotu ʼe lau ko he ʼu lotu faka Kilisitiano, kae neʼe nā loto moʼoni ke nā ʼiloʼi te ʼAtua. Neʼe ʼi ai tanā ʼu fehuʼi kae neʼe mole hanā tali feʼauga ʼi te ʼu lotu kehekehe. Pea tahi ʼaē meʼa, neʼe mole uga ia nāua e te ʼu lotu ʼaia ke nā fetogi tonā maʼuli.
Ki muli age neʼe felāveʼi ia Rolf-Michael mo Ursula mo te kau Fakamoʼoni ʼa Sehova. ʼI tanā ʼosi kamata ako te Tohi-Tapu, neʼe malave ʼaupito kia Rolf-Michael ia te tokoni ʼaenī: “Koutou fakaovi ki te Atua pea e fakaovi atu anai kia koutou.” (Sakopo 4:8) Neʼe kua ina fakatotonu ke ina ‘līaki te ʼulugaaga ʼāfea ʼaē ʼe ʼalutahi mo tana aga ʼāfea, kae ke ina kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.’—Efeso 4:22-24.
Koteā ʼaē neʼe tokoni kia Rolf-Michael ke ina maʼu ia te ʼulugaaga foʼou? Neʼe fakahā age ki ai ʼi te Tohi-Tapu, “ ʼaki te ʼatamai mālama totonu” ʼe feala ki te ʼulugaaga ʼo he tagata ke “fakafoʼou ki te paki ʼo Ia ʼaē neʼe ina fakatupu ia ia,” ʼaē ko Sehova ʼAtua.—Kolose 3:9-11, MN.
ʼI tana mahino ki te ʼatamai mālama totonu, neʼe faigaʼi e Rolf-Michael ke ina faka ʼalutahi tona maʼuli mo te ʼu pelesepeto ʼo te Folafola ʼa te ʼAtua. (Soane 17:3) Neʼe faigataʼa tana tuku tana toloke, kae neʼe mahino kia Rolf-Michael ʼe maʼuhiga te fakaōvi kia Sehova ʼi te faikole pea mo logoʼi tana tokoni. (1 Soane 5:14, 15) Neʼe ina maʼu te tahi tokoni ʼi tana fakatahi mo nātou ʼaē neʼe kua liliu ko he kau Fakamoʼoni ʼa Sehova, pea mo tana faiga ke ina fakahoko te finegalo ʼo te ʼAtua.
Ko te tahi ʼu meʼa neʼe tokoni kia Rolf-Michael, ko tana ʼiloʼi ʼaē ko te malamanei ʼe lolotoga fakalaka nei, kae ko nātou ʼaē ʼe nātou fai te finegalo ʼo te ʼAtua ʼe nātou nonofo anai ʼo talu ai. Neʼe faka fealagia ai kia ia ke lītuʼa ki te manako ki te malamanei ʼaē ʼe faka temi pe, kae ke ina filifili te tapuakina heʼegata ʼo he felogoi lelei mo te ʼAtua ʼofa, ʼaē ko Sehova. (1 Soane 2:15-17) Neʼe malave ʼaupito kia Rolf-Michael ia te ʼu palalau ia Tāʼaga Lea 27:11: “Ke ke fakapotopoto toku foha pea mo ke fakafiafia toku loto, ke feala haku tali kia ia ʼaē ʼe manukinuki kia te ʼau.” ʼE ina ʼui fēnei ʼaki he loto fakafetaʼi: “ ʼE fakahā e te vaega ʼaenī ia te ʼofa mamahi ʼo Sehova, koteʼuhi ʼe ina faka fealagia ki te hahaʼi ke nātou fakafiafia tona loto.”
Ko te lauʼi teau afe hahaʼi, ohage ko Rolf-Michael mo tona ʼohoana pea mo tanā ʼu tamaliki e toko tolu, neʼe fua lelei kia nātou tanatou muliʼi te ʼu pelesepeto faka Tohi-Tapu. ʼE maʼu te ʼu faʼahiga hahaʼi ʼaia ʼi te ʼu kokelekasio ʼa te kau Fakamoʼoni ʼa Sehova ʼi te malamanei katoa. Meʼa fakaʼofaʼofa foki, heʼe ʼi ʼihi fenua, ʼe tukugakoviʼi hala te kau Fakamoʼoni, ko nātou ʼe ko he magaʼi lotu fakatupu tuʼutāmaki, ʼe nātou fakamavete te ʼu famili. ʼE fakahā ʼi te meʼa ʼaē neʼe hoko kia Rolf-Michael te hala ʼo te ʼu lau ʼaia.—Hepeleo 4:12.
ʼE ʼui e Rolf-Michael, ko Mateo 6:33, ʼaē ʼe ina fakaloto mālohiʼi ai tatou ke tou fakamuʼamuʼa te ʼu meʼa fakalaumālie, ʼe ko te vaega ʼaē ʼe ina takitaki tona famili, heʼe ina fakahā age kia nātou te faʼahiga maʼuli ʼaē ʼe tonu ke nātou mulimuli kiai. Ko ia mo tona famili, ʼe nātou fakafetaʼi lahi kia Sehova ʼo ʼuhiga mo te maʼuli faka famili fakafiafia ʼaē ʼe nātou maʼu nei ʼi tonatou ʼuhiga Kilisitiano. ʼE nātou manatu tahi mo te ʼu meʼa ʼaē neʼe logoʼi e te tagata fai pesalemo ʼaē neʼe hiva fēnei: “Koteā anai he meʼa ke ʼau liufaki kia Sehova ki te ʼu lelei fuli ʼaē neʼe ina foaki mai kia te ʼau?”—Pesalemo 116:12.
[Talanoa ʼo te pasina 9]
Te ʼu Pelesepeto Faka Tohi-Tapu ʼe Nātou Fetogi Te Maʼuli
Ko te ʼu pelesepeto faka Tohi-Tapu ʼaenī neʼe tokoni ki te tokolahi ke nātou faka ʼāteaina mai te ʼu agamāhani ʼaē neʼe feala ke nātou mamate ai:
“Ê, kau hahaʼi ʼaē ʼe ʼoʼofa kia Sehova, koutou fehiʼa ki te meʼa ʼaē ʼe kovi.” (Pesalemo 97:10) ʼI te ʼosi ʼiloʼi papau e he tahi ia te kovi ʼo te taʼi maʼuli ʼaia ʼaē ʼe feala ke mate ai pea kua fehiʼa moʼoni ki te ʼu aga ʼaia, ʼe faigafua age kia ia hana fai te meʼa ʼaē ʼe leleiʼia e te ʼAtua.
“Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.” (Tāʼaga Lea 13:20) Ke fakafisi he tahi ki te toloke pea mo te tahi ʼu meʼa kovi, ʼe tonu ke ina filifili fakalelei tona ʼu fakakaugā. ʼE fua lelei kia ia, mo kapau ʼe fakakaumeʼa mo he kau Kilisitiano ʼe nātou lagolago anai ki tana ʼu faiga.
“ ʼAua naʼa koutou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4:6, 7, MN ) ʼE mole feala ʼaki te toloke, ke kita maʼu ai te taʼi tokalelei ʼaia ʼo te loto pea mo te ʼatamai. Pea ko te falala ki te ʼAtua ʼi te faikole, ʼe feala ke tokoni ki he tahi ke ina tauʼi te fihifihia ʼo te maʼuli, kae mole ina fakaʼaogaʼi te toloke.
[Paki ʼo te pasina 9]
Ko te ʼAtua ʼe ina faka fealagia ki te hahaʼi ke nātou fakafiafia tona loto