Ko Te Kau Fai Faka Mafola ʼo Te Puleʼaga

“Ko He ʼu Meʼa Foʼou ʼAenī Kua ʼAu Logo Kiai!”

KO DOROTA, ko he Fakamoʼoni ʼa Sehova ʼe pionie katoa ʼi Polonia, neʼe ina ʼave tana tama ʼe taʼu 14 ki te fale tōketā ʼo te faleako. Lolotoga te vakaʼi tōketā, neʼe fehuʼi age e te tōketā ko Janinaa kia Dorota ʼo ʼuhiga mo te ʼu gāue ʼaē ʼe fai e tana tama ʼi fale.

Neʼe tali fēnei e Dorota: “Kapau ʼe mole feala haku fai tamatou meʼa kai afiafi, pea ʼe ko taku kiʼi tama ʼaē ʼe ina teuteuʼi maʼa mātou toko ono. ʼE ina fakamaʼa mo te ʼapi pea mo tokoni mai mokā tonu ke gaohi he ʼu meʼa kua maumau ʼi te loto fale. ʼE ina leleiʼia te lautohi pea ʼe gāue lelei ʼi te faleako.”

Neʼe ʼui fēnei e Janina: “ ʼE hoko tahitahiga te meʼa ʼaia, heʼe kua taʼu 12 taku gāue ʼi henī, kae neʼe mole heʼeki ʼau logo ki he meʼa feiā.”

ʼI tana sio ʼaē ʼe ko he faigamālie kia ia ke fai he fagonogono faigamālie, neʼe fakamahino fēnei e Dorota: “Tokolahi te ʼu mātuʼa ia ʼaho nei, ʼe mole nātou akoʼi fakalelei tanatou fānau. Ko te tupuʼaga la ʼaia ʼo te mole fakaʼapaʼapa ʼa te fānau kia nātou totonu.”

Neʼe fehuʼi fēnei e Janina: “Koteā ʼaē ʼe ke ʼiloʼi ai te ʼu meʼa fuli ʼaia? Heʼe tokolahi te ʼu mātuʼa ʼe mole nātou ʼiloʼi te meʼa ʼaia.”

Neʼe tali fēnei e Dorota: “ ʼE maʼu te ʼu manatu maʼuhiga ʼaia ʼi te Tohi-Tapu. Ohage la, ʼo mulimuli ki te meʼa ʼaē ʼe tuʼu ia Teutalonome 6:​6-9, ʼi muʼa ʼo te akoʼi ʼo te fānau, ʼe kita akoʼi muʼa ia kita totonu. ʼE mole tonu koa la ke tou ʼuluaki fakahū ki tokita loto pea mo tokita ʼatamai te ʼu meʼa maʼuhiga ʼaē ʼe tou fia akoʼi ki takita fānau?”

Neʼe punamaʼuli ʼaupito ia Janina, pea neʼe ina kole kia Dorota pe neʼe tokoni feafeaʼi kia ia te Tohi-Tapu ke ina taupau pea mo akoʼi tana fānau.

Neʼe fakamahino fēnei e Dorota: “ ʼE ma ako te Tohi-Tapu ʼi te vāhaʼa fuli mo tamā ʼu tamaliki. ʼE mātou fakaʼaogaʼi te tohi Les jeunes sʼinterrogent — Réponses pratiques.”b Neʼe hoko atu leva tana fakamahino te tohi pea mo talanoa ki ʼihi kapite ʼe tuʼu ai.

Neʼe ʼui fēnei e Janina: “Ko he ʼu meʼa foʼou ʼaenī kua ʼau logo kiai! ʼE feala haku vakaʼi te tohi ʼaia?”

Hili kiai te hola katoa, neʼe toe haʼu ia Dorota mo te tohi.

ʼI tana lolotoga vakaʼi te tohi, neʼe fehuʼi fēnei age e Janina: “Koteā tau lotu?”

“Ko ʼau ko te Fakamoʼoni ʼa Sehova.”

“ ʼE felogoi feafeaʼi te kau Fakamoʼoni ʼa Sehova pea mo te hahaʼi ʼaē ʼe mole nātou lotu tahi?”

“Ohage pe ko tatā felogoi ʼaenī​—ʼaki he aga fakaʼapaʼapa” ko te tali ʼaia ʼa Dorota, pea ina hoko atu fēnei: “Ei, ʼe mātou loto ke nātou ʼiloʼi te moʼoni ʼa te Tohi-Tapu.”

Pea ʼui fēnei e Janina: “Kua ʼau logo fīmālie.”

ʼI tana ʼosi vakaʼi tōketā, neʼe fakaloto mālohi e Dorota ia Janina ke ina lau te Tohi-Tapu, ʼo ina ʼui fēnei: “ ʼE ina foaki atu anai he ʼuhiga ki tou maʼuli pea mo tokoni atu anai ki tau gāue.”

Neʼe ʼui fēnei e Janina: “ ʼAki tau ʼu palalau, kua ʼau holi ki te faʼahi ʼaia.”

ʼAki he aga fakaʼeteʼete pea mo mālohi, neʼe fai e Dorota ke liliu te vakaʼi ʼo te tōketā ko he fai faka mafola lelei ʼaupito.​—1 Petelo 3:​15.

[Kiʼi nota]