Te Meʼa ʼAē Ka Fai e Te ʼAtua—Koteā ʼAē ʼe Feala Ke Tou ʼAmanaki Kiai?
ʼI TE valu sēkulō ʼi muʼa ʼo totatou temi, ko te Hau ʼo Suta ko Esekiasi ʼi tona taʼu 39, neʼe fakahā age kia ia ʼe mole he faitoʼo ki tona mahaki. ʼI tana lotomamahi ʼaupito ʼi te logo ʼaia, neʼe kole mamahi e Esekiasi ki te ʼAtua ke ina fakamālōlō ia ia. Neʼe tali fēnei e te ʼAtua ʼaki te polofeta: “Neʼe ʼau logo ki tau faikole. Neʼe ʼau sio ki tou ʼu loʼimata. Koʼeni ʼe ʼau hilifaki anai ki tou ʼu ʼaho taʼu e hogofulu-ma-nima.”—Isaia 38:1-5.
He koʼe neʼe fai e te ʼAtua he meʼa ʼi te ʼaluʼaga ʼaia? ʼI ni ʼu sēkulō ki muʼa atu, neʼe fakapapau fēnei e te ʼAtua ki te Hau agatonu ko Tavite: “ ʼE tuʼu mālohi anai ʼi ʼou muʼa tou ʼapi pea mo tou puleʼaga ʼo aʼu ki he ʼu temi ʼe mole ʼiloʼi hona gataʼaga, ko tou ʼafioʼaga ʼe liliu anai ʼo tuʼu mālohi ʼo aʼu ki he ʼu temi ʼe mole ʼiloʼi hona gataʼaga.” Neʼe toe fakahā e te ʼAtua ko te Mesia ʼe tonu anai ke tupu ʼi te hōloga ʼo Tavite. (2 Samuele 7:16; Pesalemo 89:20, 26-29; Isaia 11:1) ʼI te temi ʼaē neʼe mahaki ai ia Esekiasi, neʼe mole heʼeki ʼi ai hona foha. Koia, neʼe feala ke gata ai te hōloga hau ʼo Tavite. Ko te meʼa ʼaē neʼe fai e te ʼAtua kia Esekiasi neʼe ina fai tāfito moʼo fakahoko tana fakatuʼutuʼu, ʼaē ko te taupau ʼo te hōloga ʼaē ka ina taki ki te Mesia.
Moʼo fakahoko tana ʼu fakapapau, neʼe lahi te ʼu lakaga neʼe fai ai e Sehova he meʼa maʼa tana hahaʼi ʼi te temi ʼi muʼa ʼo te kau Kilisitiano. Neʼe tali fēnei e Moisese ʼo ʼuhiga mo te faka ʼāteaina ʼo Iselaele mai tanatou popūla ʼi Esipito: “Koteʼuhi neʼe ʼofa Sehova kia koutou, pea koteʼuhi neʼe ina taupau tana fakapapau ʼaē neʼe ina fakapapauʼi ki takotou ʼu kui, koia neʼe fakamavae ai koutou e Sehova ki tuʼa ʼaki he nima mālohi.”—Teutalonome 7:8.
ʼI te ʼuluaki sēkulō, ko te ʼu meʼa ʼaia neʼe fai e te ʼAtua neʼe ina fai moʼo fakahoko tana ʼu fakatuʼutuʼu. Ohage la, ʼi te ala ki Tamaso, ʼi te meʼa neʼe hā faka milakulo age ki te tagata Sutea ko Saulo neʼe fakatotonu ai ke ina fakagata tana fakatagaʼi te ʼu tisipulo ʼa Kilisito. Ko te tafoki ʼa te tagata ʼaia, ʼaē neʼe liliu ko te ʼapositolo ko Paulo, neʼe ko he meʼa maʼuhiga ʼi te faka mafola ʼo te logo lelei ʼi te ʼu puleʼaga.—Gaue 9:1-16; Loma 11:13.
ʼE Tonu Koa Ke Fai Tuʼumaʼu e Te ʼAtua He Meʼa?
ʼE tonu koa ke fai e te ʼAtua he meʼa peʼe kailoa? ʼE fakahā lelei e te Tohi-Tapu ʼe mole ko he maʼua ke ina fai te faʼahi ʼaia. Logola neʼe hāofaki e te ʼAtua te kau tūpulaga Hepeleo e toko tolu mai te afi kakaha, pea mo te polofeta ko Taniela ʼi te luo ʼo te ʼu laione, kae neʼe mole ina hāofaki te tahi kau polofeta mai te mate. (2 Fakamatala 24:20, 21; Taniela 3:21-27; 6:16-22; Hepeleo 11:37) Ko Petelo neʼe faka ʼāteaina faka milakulo mai te fale pilisoni ʼaē neʼe lī ki ai e Helote Akilipa 1. Kae ko te hau pe ʼaia neʼe ina matehi te ʼapositolo ko Sakopo, pea neʼe mole tāʼofi e te ʼAtua te fakapogi ʼaia. (Gaue 12:1-11) Logola neʼe foaki e te ʼAtua ki te kau ʼapositolo te mālohi ʼaē ke nātou fakamālōlō te kau mahaki pea mo fakatuʼuake te kau mate, kae neʼe mole ina fia toʼo te “tala ʼi [te] kakano” ʼa te ʼapositolo ko Paulo, ʼaē neʼe lagi ko hona mahaki.—2 Kolonito 12:7-9; Gaue 9:32-41; 1 Kolonito 12:28.
Neʼe mole fai he meʼa e te ʼAtua moʼo tāʼofi te fakataga lahi ʼaē neʼe fai ki te ʼu tisipulo ʼa Kilisito e te Hau Loma ko Nelone. Neʼe gaohi koviʼi te kau Kilisitiano, mo tutu maʼuli nātou, pea mo lī nātou ki te ʼu manu fekai. Kae neʼe mole punamaʼuli te ʼu ʼuluaki Kilisitiano ʼi te fakafeagai ʼaia, pea ʼe mahino ia neʼe mole ina fakavaivai tanatou tui ki te maʼuli moʼoni ʼa te ʼAtua. Neʼe fakatokagaʼi age e Sesu ki tana kau tisipulo ʼe ʼave anai nātou kia muʼa ʼo te ʼu telepinale pea ʼe tonu ke nātou nofo teuteu, heʼe nātou mamahi anai pea mo matehi anai nātou ʼuhi ko tanatou tui.—Mateo 10:17-22.
Ohage pe ko tana fai ʼi te temi muʼa, ʼe mahino ia ʼe feala ia ʼaho nei ke hāofaki e te ʼAtua tana ʼu kaugana mai he ʼu ʼaluʼaga tuʼutāmakiʼia, pea ko nātou ʼaē ʼe nātou logoʼi neʼe puipui nātou e te ʼAtua ʼe mole tonu ke valokiʼi nātou. Kae ʼe faigataʼa te ʼui papau pe neʼe fai e te ʼAtua he meʼa peʼe kailoa ʼi te ʼu ʼaluʼaga feiā. Neʼe tokolahi te ʼu kaugana agatonu ʼa Sehova neʼe lāvevea ʼi te fale gāue ʼaē neʼe paʼulu ʼi Toulouse, pea mo te ʼu lauʼi afe kau Kilisitiano agatonu ʼaē neʼe mamate ʼi te ʼu lotoʼā ʼa te kau Nasi pea mo te kau Komunisi, peʼe ʼi he tahi ʼu ʼaluʼaga kae neʼe mole fai e te ʼAtua he meʼa moʼo tāʼofi te ʼu ʼaluʼaga ʼaia. He koʼe koa ʼe mole fai tuʼumaʼu e te ʼAtua he meʼa maʼa nātou fuli ʼaē ʼe ʼofa ai?—Taniela 3:17, 18.
“Te ʼu Temi Pea Mo Te ʼu Meʼa Fakafokifā”
Ka hoko he tuʼutāmaki faka natula, ko te hahaʼi fuli ʼe mamahi, tatau aipe peʼe nātou agatonu ki te ʼAtua. ʼI te fale gāue ʼaē neʼe paʼulu ʼi Toulouse, neʼe hāo ai ia Alain pea mo Liliane, kae neʼe mamate te toko 30 hahaʼi pea mo lāvevea te ʼu lauʼi teau hahaʼi, logola neʼe mole nātou fai he meʼa ʼe kovi. ʼI hona ʼaluʼaga ʼe lahi age, ko te lauʼi afe hahaʼi ʼe nātou mamate ʼuhi ko te fai fakapō, peʼe ko he ʼu fakaʼī, peʼe ko te tau, pea ʼe mole feala ke tukugakoviʼi te ʼAtua ki te ʼu malaʼia ʼaia. ʼE fakamanatuʼi mai e te Tohi-Tapu ko “te ʼu temi pea mo te ʼu meʼa fakafokifā ʼe hoko” ki te hahaʼi fuli.—Tagata Tānaki 9:11.
Ko te hahaʼi fuli ʼe nātou mahahaki, mo matutuʼa pea mo mamate. Māʼia mo nātou ʼaē ʼe nātou manatu neʼe hāofaki faka milakulo nātou e te ʼAtua, peʼe nātou ʼui neʼe fakamālōlō e te ʼAtua tonatou mahaki, ki muli age ʼe nātou mamate pe. Ko te pulihi ʼo te mahaki pea mo te mate pea mo te ‘holoholoʼi ʼo te ʼu loʼimata fuli’ mai te ʼu mata ʼo te hahaʼi ʼe hoki hoko anai ʼi te ka haʼu.—Apokalipesi 21:1-4.
Moʼo fakahoko te faʼahi ʼaia, ʼe mole ʼaoga pe ke fai he meʼa faka temi, kae ke fai he meʼa ʼe ina pulihi anai ʼo talu ai te ʼu mamahi. ʼE talanoa te Tohi-Tapu ki “te ʼaho lahi ʼo Sehova.” (Sofonia 1:14) ʼI te meʼa ʼaia ka hoko ʼi te kele katoa, ʼe pulihi anai e te ʼAtua te agakovi fuli. ʼE foaki anai ki te hahaʼi te fealagia ke nātou maʼuʼuli ʼo heʼegata ʼi he ʼu ʼaluʼaga haohaoa, pea “ ʼe mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.” (Isaia 65:17) ʼO feiā mo te kau mate ʼe toe fakatuʼuake anai nātou, ʼo fetogi ai te malaʼia lahi ʼaupito ʼaia ʼaē ʼe hoko ki te tagata. (Soane 5:28, 29) Ko te ʼAtua ʼi tona ʼofa lahi pea mo tana agalelei, ʼe ina fakatokatoka anai te ʼu fihifihia ʼo te malamanei ʼo talu ai.
Te Meʼa ʼAē ʼe Fai e Te ʼAtua Ia ʼAho Nei
Kae mole faka ʼuhiga leva ʼi te temi nei, ʼe haga sioʼi pe e te ʼAtua te ʼu mamahi ʼo te malamanei, kae mole ina fai he meʼa. Ia ʼaho nei, ʼe foaki e te ʼAtua ki te hahaʼi fuli pe, tatau aipe peʼe koteā tonatou lanu peʼe ko tanatou gāue, te fealagia ke nātou ʼiloʼi ia ia pea mo nātou maʼu he ʼu felogoi lelei mo ia. (1 Timoteo 2:3, 4) Neʼe fakamatala e Sesu te faʼahi ʼaia, ʼo ina ʼui fēnei: “E mole feala ki he tahi ke haù kia te au, kapau e mole taki mai ia kia te au e te Tamai.” (Soane 6:44) ʼE taki e te ʼAtua te hahaʼi loto moʼoni kia te ia, ʼaki te logo ʼo te Puleʼaga ʼaē e tala ʼi te kele katoa e tana kau kaugana.
Tahi ʼaē meʼa, ʼe takitaki e te ʼAtua te maʼuli ʼo nātou ʼaē ʼe nātou lotolelei ke ina takitaki nātou. ʼAki tona laumālie maʼoniʼoni, ko te ʼAtua ʼe ina ‘avahi tonatou loto’ ke nātou mahino ki tona finegalo pea mo nātou fakahoko tana ʼu fakamaʼua. (Gaue 16:14) Ei, ʼi tana foaki te faigamālie ke tou ʼiloʼi ia ia, mo tana Folafola, pea mo tana ʼu fakatuʼutuʼu, ʼe fakamoʼoni ai e te ʼAtua ʼe ʼofa moʼoni kia tatou takitokotahi.—Soane 17:3.
Moʼo fakaʼosi, ʼe tokoni te ʼAtua ki tana ʼu kaugana ia ʼaho nei, ʼo mole ina hāofaki faka milakulo ia nātou, kae ʼe ina foaki kia nātou tona laumālie maʼoniʼoni pea mo “te mālohi ʼaē ʼe laka age ʼi te mālohi māhani,” ke nātou lava kātakiʼi te ʼu ʼaluʼaga fuli pe ʼaē ʼe hoko kia nātou. (2 Kolonito 4:7, MN ) Neʼe tohi fēnei e te ʼapositolo ko Paulo: “ ʼE ʼau maʼu te mālohi kia meʼa fuli, ʼuhi ko [Sehova ʼAtua] ʼaē ʼe ina foaki mai te mālohi.”—Filipe 4:13, MN.
Koia ʼe tou maʼu ai te ʼu tupuʼaga ke tou loto fakafetaʼi ki te ʼAtua ʼi te ʼaho fuli, ʼuhi ko te maʼuli pea mo te ʼamanaki ʼaē ʼe ina foaki kia tatou ke tou maʼuʼuli ʼo heʼegata ʼi he mālama ʼe mole toe maʼu ai anai te mamahi. “Koteā anai he meʼa ke ʼau liufaki kia Sehova ki te ʼu lelei fuli ʼaē neʼe ina foaki mai kia te ʼau?” ko te fehuʼi ʼaia ʼa te tagata fai pesalemo. “ ʼE ʼau hiki anai te ipu ʼo te hāofaki lahi, pea ʼe ʼau fetapā anai ki te huafa ʼo Sehova.” (Pesalemo 116:12, 13) Ko te lau tuʼumaʼu ʼo te nusipepa ʼaenī, ʼe tokoni atu anai ke koutou mahino ki te ʼu meʼa ʼaē neʼe fai e te ʼAtua, mo te ʼu meʼa ʼaē ʼe ina lolotoga fai nei, pea mo te ʼu meʼa ʼaē ka ina fai anai, pea ʼe koutou maʼu ai te fiafia ʼi te temi nei pea mo he ʼamanaki mālohi ki te ka haʼu.—1 Timoteo 4:8.
[Paki ʼo te pasina 5]
ʼI te ʼu temi ʼo te Tohi-Tapu, neʼe mole tāʼofi e Sehova te tuki makaʼi ʼo Sakalia . . .
peʼe ko te matematehi ʼo te ʼu kiʼi tamaliki ʼaē neʼe fakatotonu e Helote
[Paki ʼo te pasina 6]
“ ʼE mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.”—Isaia 65:17
[Paki ʼo te pasina 7]
Kua ōvi mai te temi ʼaē ka pulihi ai anai te mamahi, māʼia mo te kau mate ʼe fakatuʼuake anai ia nātou