Ko Sehova Ko Te ʼAtua ʼe ʼi Ai Tana Fakatuʼutuʼu

“ ʼIo, ohage ko taku manatu, ʼe hoko anai ia; pea ohage ko taku tokoni, koʼena te meʼa ka hoko anai.”—Isaia 14:24.

1, 2. Koteā te ʼui ʼa te tokolahi ʼo ʼuhiga mo te fakatuʼutuʼu ʼo te maʼuli?

KO TE hahaʼi ʼi te potu fuli ʼe nātou feʼekeʼaki: “Koteā te ʼuhiga ʼo te maʼuli?” Neʼe tala fēnei e te tagata takitaki faka politike ʼo te Potu Hihifo: “Kua tokolahi age te hahaʼi ʼi te temi nei ʼe nātou feʼekeʼaki, ‘Ko ai koa ia mātou? Koteā koa te ʼuhiga ʼo mātou?’ ” ʼI te temi ʼaē neʼe fakafehuʼi ai e te nusipepa te kau tūpulaga ki te ʼuhiga ʼo te maʼuli, neʼe teitei ke fēnei te ʼu tali fuli ʼa nātou: “Ko te fai ʼo te meʼa ʼe holi kiai tou loto.” “Ko te maʼuliʼi katoa te temi fuli pe ʼo te maʼuli.” “Ko te maʼuli fiafia pea mo faʼifaʼitaliha.” “Ko te maʼu fānau, pea mo maʼuli fiafia pea mo mate.” Tokolahi neʼe nātou logoʼi ko te maʼuli ko te ʼu meʼa fuli pe ʼaia. Neʼe mole he tahi neʼe talanoa ʼo ʼuhiga mo he fakatuʼutuʼu loaloaga ki te maʼuli ʼi te kele.

² Neʼe ʼui fēnei e te tagata poto ʼo te Confucianisme: “Ko te ʼuhiga pe e tahi ʼo te maʼuli ko ia ʼaē ʼe maʼu ʼi totatou maʼuli fakatagata māhani.” ʼI te faka ʼuhiga ʼo te talanoa ʼaenī, ʼe haga tutupu anai te hahaʼi, ʼe nātou faiga anai ia taʼu e 70 peʼe 80, pea nātou mamate pea nātou pupuli ʼo talu ai. Neʼe ʼui fēnei e te tagata poto ʼe faka tui ki te evolisio: “ ʼE tou fakaʼamu ki he tali ʼe ‘māʼoluga age’—kae ʼe mole maʼu ia.” Ki te ʼu tagata ʼaenī ʼe nā faka tui ki te evolisio, ko te maʼuli ko he faiga ki te taupau ʼo te maʼuli, pea ko te ikuʼaga ʼo te meʼa fuli ko te mate.

3, 4. ʼE lave feafeaʼi te ʼu ʼaluʼaga ʼo te malamanei ki te faʼahiga sio ʼa te hahaʼi ki te ʼuhiga ʼo te maʼuli?

³ Tokolahi ʼe nātou lotolotolua ki te faʼahi ʼaē ko te maʼuli ʼe ʼi ai tana fakatuʼutuʼu ʼi tanatou sisio ʼaē ki te lahi ʼo te fakaʼofaʼofa ʼo te maʼuli ʼa te tagata. ʼI totatou temi, ʼaē ʼe ʼui ai kua kaku te tagata ki te potu māʼoluga ʼo te ʼu matani gāue feiā mo te poto fakatagata, teitei ko te miliale hahaʼi ʼi te malamanei ʼe nātou mahahaki kovi peʼe mole feʼauga tanatou kakai. Ko te miliona tamaliki ʼe nātou mamate ʼi te taʼu fuli, ʼuhi pe ko te ʼu potu ʼaia. Pea tahi ʼaē meʼa, ʼi te 20 sēkulō ʼaenī, e tuʼa fā te hahaʼi age ʼo te kau mamate ʼi te tau ʼi te ʼu taʼu e fā geau kua hili. Ko te fai fakapō, ko te agamālohi, ko te fakaʼaogaʼi ʼo te toloke, ko te mavete ʼo te ʼu famili, ko te SITA pea mo ʼihi mahaki fakalialia ʼe maʼu ʼi te felāveʼi fakasino—ko te lisi ʼo te ʼu meʼa kovi fuli ʼe ʼāʼāsili tuputupu ia. ʼE mole maʼu e te kau takitaki ʼo te malamanei he ʼu puleʼaki ki te ʼu faigataʼaʼia ʼaia.

⁴ ʼI tana fakatokagaʼi te ʼu ʼaluʼaga ʼaia, neʼe fakahā fēnei e te fafine te meʼa ʼe manatu kiai te tokolahi: “ ʼE mole ʼi ai he ʼuhiga ʼo te maʼuli. Kapau ko te ʼu meʼa kovi fuli ʼaia ʼe lolotoga hoko pe ia, pea ʼe mole pe he ʼuhiga ia ʼo te maʼuli.” Neʼe ʼui fēnei e te tagata kua matumatuʼa: “ ʼI toku maʼuli, neʼe ʼau feʼekeʼaki pe koteā te ʼuhiga ʼo toku maʼuli. Kapau ʼe ʼi ai hona ʼuhiga, ʼe mole kei ʼau tokaga kiai.” Koteʼuhi tokolahi ʼe mole nātou ʼiloʼi pe koʼe ʼe fakagafua e te ʼAtua te mamahi, ko te ʼu ʼaluʼaga mamahi ʼo te malamanei ʼe mole fakatupu ia nātou he fakaʼamu ki he ʼamanaki moʼoni ki te ka haʼu.

5. He koʼe ʼe hilifaki e te ʼu lotu te fakapōʼuli ki te fakapōʼuli ʼa te malamanei ki te ʼuhiga ʼo te maʼuli?

⁵ Māʼia mo te kau takitaki lotu ʼe nātou vaelua pea mo lotolotolua ki te ʼuhiga ʼo te maʼuli. Neʼe ʼui fēnei e te tagata pule ʼāfea ʼo te katetalale ʼo Sagato Paulo ʼi Lonitoni: “Lolotoga toku maʼuli, neʼe ʼau faiga ke ʼau ʼiloʼi te ʼuhiga ʼo te maʼuli. . . . Neʼe mole ʼau lavaʼi.” ʼE moʼoni, tokolahi te kau takitaki lotu ʼe nātou ako ʼi te mate ʼe hake te kau agalelei ki selo pea ko te kau agakovi ʼe nātou ʼolo ki he ʼifeli kakaha ʼo heʼegata. Kae ko te taʼi manatu ʼaia ʼe ina tuku ki te hahaʼi ke nātou haga maʼuli mamahi. Pea kapau neʼe ʼi ai he fakatuʼutuʼu ʼa te ʼAtua ke ʼi ai he ʼu hahaʼi ʼe maʼuʼuli ʼi selo, he koʼe koa neʼe mole ina fai ia nātou ʼaia ko he ʼu laumālie ʼi tana kamata, ohage ko tana fai ʼaē te kau ʼaselo, ke tāʼofi ai te mamahi lahi ʼa te tagata? Koia ʼe lahi te fakapōʼuli ki te ʼuhiga ʼo te maʼuli peʼe ko te fakafisi ki te potu ʼaia.

Ko Te ʼAtua ʼo Te Fakatuʼutuʼu

6, 7. Koteā ʼaē ʼe ʼui e te Tohi-Tapu ʼo ʼuhiga mo te Pule Faʼitaliha ʼo te ʼatulaulau?

⁶ Kae, ʼe ʼui mai e te Tohi-Tapu, te tohi ʼaē ʼe lahi tokotahi tona tufa ʼi te hisitolia, ko Sehova, te Pule faʼitaliha ʼo te ʼatulaulau, ko te ʼAtua ʼe ʼi ai tana fakatuʼutuʼu. ʼE ina fakahā mai kia tatou, ʼe ʼi ai tana fakatuʼutuʼu loaloaga, ʼi tona fakahagatonu ko he fakatuʼutuʼu heʼegata maʼa te hahaʼi ʼi te kele. Pea ka fakatuʼutuʼu he meʼa e Sehova, ʼe mole feala ke hala mo hoko. ʼE ʼui e te ʼAtua, ohage pe ko te ʼua ʼe ina fakamaʼuli te pulapula, “ ʼe feiā pe anai te folafola ʼaē ʼe ʼalu atu ʼi toku gutu. ʼE mole feala ke toe liliu mai kia te ʼau kae neʼe mole ʼi ai hona fua, kae, ʼe ina fakahoko anai te meʼa neʼe ʼau leleiʼia, pea ʼe mahino papau ʼe toe fua lelei anai ki te meʼa ʼaē neʼe ʼau fekauʼi ki ai.” (Isaia 55:10, 11) Ko te meʼa ʼaē ʼe ʼui e Sehova ʼe ina fakahoko anai, “ ʼe hoko moʼoni anai ia.”—Isaia 14:24.

⁷ ʼE feala kia tatou tagata ke tou falala katoa ʼe taupau anai e te Māfimāfi tana ʼu fakapapau, koteʼuhi ko te ʼAtua “ ʼe mole loi.” (Tito 1:2; Hepeleo 6:18) Ka ina ʼui ʼe ina fai anai he meʼa, ko tana folafola ʼe ko he fakamoʼoni ʼe hoko anai. ʼE hage pe kua ʼosi hoko. ʼE ina tala fēnei: “Ko ʼau ko te ʼAtua pea ʼe mole ʼi ai he tahi age ʼAtua, peʼe ko he tahi ʼe tatau mo ʼau; ia Ia ʼaē talu mai te kamataʼaga ʼe ina fakahā te fakaʼosi, pea talu mai te temi kua hili [ʼe ina fakahā] te ʼu meʼa ʼe mole heʼeki hoko; ko Ia ʼaē ʼe ina ʼui: ‘ ʼE tuʼu toku tokoni, pea ko te ʼu meʼa fuli ʼe ʼau fiafia ai, ʼe ʼau fai anai’ . . . ʼIo, neʼe ʼau fakatotonu [te meʼa], pea ʼe ʼau fakahoko anai. Neʼe ʼau faʼufaʼu [te meʼa], pea ʼe ʼau fai anai.”—Isaia 46:9-11.

8. ʼE feala koa kia nātou ʼaē ʼe nātou kumi fakamalotoloto te ʼAtua ke nātou maʼu ia ia?

⁸ Pea tahi ʼaē meʼa, ko Sehova “ ʼe mole ina loto ke fakaʼauha he tahi kae ke tou fakahemala fuli.” (2 Petelo 3:9) Koia ʼaē, ʼe mole ina loto ai ke fakapōʼuli he tahi ʼo ʼuhiga mo ia. Neʼe ʼui fēnei e te polofeta ko Asalia: “Kapau ʼe koutou kumi [te ʼAtua], ʼe ina tuku anai ke koutou maʼu ia ia, kae kapau ʼe koutou līaki ia ia, ʼe ina līaki anai mo koutou.” (2 Fakamatala 15:1, 2) Koia, ko nātou ʼaē ʼe nātou fia ʼiloʼi fakamalotoloto te ʼAtua pea mo tana ʼu fakatuʼutuʼu ʼe feala ke nātou fakahoko moʼoni te faʼahi ʼaia mo kapau ʼe nātou faiga ke nātou kumi ia ia.

9, 10. (a) Koteā te meʼa ʼaē neʼe fakatuʼutuʼu ʼo ʼuhiga mo nātou ʼaē ʼe nātou fia ʼiloʼi te ʼAtua? (b) Ko he kumi ʼo te Folafola ʼa te ʼAtua ʼe ina faka fealagia mai ke tou fai te ā?

⁹ ʼO kumi kifea? Kia nātou ʼaē ʼe nātou kumi moʼoni te ʼAtua, neʼe ina foaki tana Folafola, te Tohi-Tapu. ʼAki tona laumālie maʼoniʼoni, ko te mālohi pe ʼaia neʼe ina fakaʼaogaʼi moʼo fakatupu te ʼatulaulau, neʼe takitaki e te ʼAtua te ʼu tagata agatonu ke nātou tohi te ʼu meʼa ʼe ʼaoga ke tou ʼiloʼi ʼo ʼuhiga mo tana ʼu fakatuʼutuʼu. Ohage la, ʼo ʼuhiga mo te ʼu lea faka polofeta faka Tohi-Tapu, neʼe ʼui fēnei e te ʼapositolo ko Petelo: “Ko te lea faka polofeta neʼe mole fai ʼaki te finegalo ʼo te tagata, kae ʼaki te laumālie maʼoniʼoni ʼaē neʼe lea ai ni tagata ʼaki te fakatotonu ʼa te ʼAtua.” (2 Petelo 1:21) ʼO toe feiā aipe, neʼe tala e te ʼapositolo ko Paulo: “Ko te Tohi-Tapu katoa ʼe haʼu ia mai te ʼAtua ʼe ʼaoga moʼo akoʼi, moʼo fakatotonuʼi, moʼo fakatokatokaʼi te ʼu meʼa fuli, moʼo fakatonutonu ʼi te faitotonu, ke liliu te tagata ʼa te ʼAtua ko he tagata faiva katoa, ʼo katoa ia meʼa fuli moʼo fai ʼo he gāue lelei.”—2 Timoteo 3:16, 17; 1 Tesalonika 2:13.

¹⁰ Koutou fakatokagaʼi, ʼe mole haga te Folafola ʼa te ʼAtua ʼo fakaliliu tatou ke tou faiva fakakoga, ke mole tou maʼu te meʼa fuli, kailoa ia! ʼE faka fealagia mai e te Folafola ʼa te ʼAtua ke tou “faiva katoa, ʼo katoa ia meʼa fuli.” ʼE ina faka fealagia mai ke tou mahino papau pe ko ai te ʼAtua, pe koteā tana ʼu fakatuʼutuʼu, pea mo te meʼa ʼaē ʼe ina loto ke fai e tana ʼu kaugana. Ko te meʼa ʼaia ʼe tou ʼamanaki ke tou maʼu ʼi he tohi neʼe fai e te ʼAtua. Pea ʼe ko te matapuna pe ʼaia e tahi ʼe feala ke tou kumi pea mo tou maʼu ai te ʼatamai mālama ʼo ʼuhiga mo te ʼAtua. (Tāʼaga Lea 2:1-5; Soane 17:3) ʼAki hatatou fai feiā, ʼe “mole tou hage [anai] ko he ʼu tamaliki ʼe fetafeaʼaki ʼi te ʼu fugavai pea mo feʼāveʼaki e te matagi ʼo he ʼu akonaki, ʼaki te kākā ʼa te tagata, ʼi tanatou poto ʼi te fefakaʼuluʼuluʼaki ʼaē ʼo te kākā.” (Efesi 4:13, 14) Neʼe fakahā e te tagata fai pesalemo te manatu tonu: “Ko tau folafola [ʼa te ʼAtua] ʼe ko he mālama tutu ki toku vaʼe, pea ʼe ko he mālama ki toku ala.”—Pesalemo 119:105.

ʼE Fakahā Mamalie Mai

11. ʼE fakahā feafeaʼi e Sehova tana ʼu fakatuʼutuʼu ki te tagata?

¹¹ ʼI te kamataʼaga mai ʼo te famili fakatagata, neʼe fakahā e Sehova tana ʼu fakatuʼutuʼu ʼo ʼuhiga mo te kele ʼaenī pea mo te hahaʼi ʼe nātou nonofo ai. (Senesi 1:26-30) ʼI te temi ʼaē neʼe līaki ai e tatatou ʼu ʼuluaki mātuʼa te pule faʼitaliha ʼa te ʼAtua, neʼe higa te tagata ki te fakapōʼuli fakalaumālie pea mo te mate. (Loma 5:12) Kae, neʼe ʼiloʼi e Sehova ʼe ʼi ai anai ia nātou ʼaē ʼe nātou fia tauhi anai kia te ia. Koia, lolotoga te ʼu sēkulō, neʼe ina fakahā mamalie tana ʼu fakatuʼutuʼu ki tana ʼu kaugana agatonu. Ia nātou ʼaia neʼe felogoi mo ia, neʼe kau ai ia Enoke (Senesi 5:24; Suta 14, 15), ia Noe (Senesi 6:9, 13), ia Apalahamo (Senesi 12:1-3), pea mo Moisese (Ekesote 31:18; 34:27, 28). Neʼe tohi fēnei e te polofeta ʼa te ʼAtua ko Amosi: “ ʼE mole fai anai e te Tuʼi ʼAliki ko Sehova he meʼa kae neʼe mole heʼeki na fakahā tana meʼa fakafūfū ki tana kau kaugana, te kau polofeta.”—Amosi 3:7; Taniela 2:27, 28.

12. Neʼe lahi feafeaʼi te fakamālamaʼi e Sesu ʼo ʼuhiga mo te ʼu fakatuʼutuʼu ʼa te ʼAtua?

¹² ʼI te temi ʼaē neʼe nofo ai te ʼAlo ʼo te ʼAtua, ia Sesu Kilisito, ʼi te kele, kua hili te taʼu e 4 000 ki te agatuʼu ʼi Eteni, neʼe laka age te ʼu fakamatalatala ʼo ʼuhiga mo te ʼu fakatuʼutuʼu ʼa te ʼAtua neʼe fakahā. Neʼe fakahā tāfito te fakatuʼutuʼu ʼa te ʼAtua ʼo ʼuhiga mo te fakatuʼu ʼo he Puleʼaga ʼi selo ʼe ina puleʼi anai te kele. (Taniela 2:44) Neʼe faka ʼuhiga e Sesu te Puleʼaga ʼaia ko te talanoa tāfito ʼo tana ʼu akonaki. (Mateo 4:17; 6:10) Neʼe akonakiʼi e ia mo ʼana ʼu tisipulo, ʼaki te Puleʼaga, ʼe fakahoko anai te fakatuʼutuʼu ʼuluaki ʼa te ʼAtua ʼo ʼuhiga mo te kele pea mo te tagata. ʼE liliu anai te kele ko he palatiso ʼe nofoʼi anai e te ʼu hahaʼi haohaoa, ʼe nātou maʼuʼuli anai ʼo heʼegata. (Pesalemo 37:29; Mateo 5:5; Luka 23:43; 2 Petelo 3:13; Fakahā 21:4) Pea tahi ʼaē meʼa, neʼe fakahā e Sesu mo ʼana ʼu tisipulo te ʼu meʼa ʼaē ka hoko anai ʼi te mālama foʼou ʼaia, ʼaki te ʼu milakulo neʼe faka fealagia age e te ʼAtua ke nātou fakahoko.—Mateo 10:1, 8; 15:30, 31; Soane 11:25-44.

13. ʼO ʼuhiga mo te ʼu felogoi ʼa te ʼAtua mo te tagata, koteā te fetogi neʼe hoko ʼi te Penikosite ʼo te taʼu 33 ʼo totatou temi?

¹³ ʼI te Penikosite ʼo te taʼu 33 ʼo totatou temi, kua hili te ʼaho e 50 ki te fakatuʼuake ʼo Sesu, neʼe folahi te laumālie ʼa te ʼAtua ki te kokelekasio ʼo te kau tisipulo ʼa Kilisito. Neʼe ina fetogi te Iselaele heʼe agatonu ʼi tonatou ʼaluʼaga ʼaē ko te hahaʼi ʼo te fuakava ʼa Sehova. (Mateo 21:43; 27:51; Gāue 2:1-4) Ko te folahi ʼo te laumālie maʼoniʼoni ʼi te lakaga ʼaia neʼe ko he fakamoʼoni, talu mai te temi ʼaia, ʼe fakahā e te ʼAtua te ʼu moʼoni ʼo ʼuhiga mo tana ʼu fakatuʼutuʼu ʼaki te fakahoko palalau foʼou ʼaia. (Efesi 3:10) Talu mai te ʼuluaki sēkulō ʼo totatou temi, neʼe fakatuʼu te tafitoʼaga ʼo te kokelekasio faka Kilisitiano.—1 Kolonito 12:27-31; Efesi 4:11, 12.

14. ʼE lava ʼiloʼi feafeaʼi te kokelekasio faka Kilisitiano moʼoni e te hahaʼi ʼaē ʼe nātou kumi te moʼoni?

¹⁴ ʼI te temi nei, ʼe feala ke ʼiloʼi e te hahaʼi ʼaē ʼe nātou kumi te moʼoni ia te kokelekasio faka Kilisitiano moʼoni ʼaki tana fakahā tuʼumaʼu te kalitate maʼuhiga ʼa te ʼAtua, ʼaē ko te ʼofa. (1 Soane 4:8, 16) ʼIo, ko te ʼofa fakatautehina ʼe ko te fakaʼiloga ʼo te Lotu Faka Kilisitiano moʼoni. Neʼe ʼui fēnei e Sesu: “ ʼAki te meʼa ʼaenī ʼe ʼiloʼi fuli ai e te hahaʼi ko koutou ko taku ʼu tisipulo: mo kapau ʼe koutou femaʼuʼaki te ʼofa.” “Koʼeni taku fakatotonu: ke koutou feʼofaʼofaniʼaki ohage ko taku ʼofa ʼaē kia koutou.” (Soane 13:35; 15:12) Pea neʼe fēnei te fakamanatuʼi age e Sesu kia nātou ʼaē neʼe nātou fagono ki ʼana ʼu palalau: “Ko koutou ko ʼoku kaumeʼa mo kapau ʼe koutou fai te meʼa ʼaē ʼe ʼau fakatotonu atu.” (Soane 15:14) Koia ko te kaugana moʼoni ʼa te ʼAtua ko nātou ʼaē ʼe nātou maʼuliʼi te lao ʼo te ʼofa. ʼE mole gata pe ki tanatou palalau ki te faʼahi ʼaia, koteʼuhi “ko te tui ka mole ʼi ai he ʼu gāue ʼe mate ia.”—Sake 2:26.

Ko Te Mālama

15. Koteā te meʼa ʼe feala ke ʼiloʼi papau e te kau kaugana ʼa te ʼAtua?

¹⁵ Neʼe fakakikite Sesu, ʼaki te temi, ʼe lahi anai te fakamālamaʼi ʼo te kokelekasio faka Kilisitiano moʼoni ʼo ʼuhiga mo te ʼu fakatuʼutuʼu ʼa te ʼAtua. Neʼe ina fakapapau fēnei ki tana kau tisipulo: “Ko te tokoni, ko te laumālie maʼoniʼoni, ʼaē ka fekauʼi atu anai e te Tāmai ʼi tona huafa, ko ia ʼaia ka ina akoʼi atu anai ia meʼa fuli.” (Soane 14:26) Neʼe toe ʼui fēnei e Sesu: “Koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:20) Koia, ko te mālama ki te ʼu moʼoni ʼo ʼuhiga mo te ʼAtua pea mo tana ʼu fakatuʼutuʼu ʼe tuputupu ʼi te lotolotoiga ʼo te kau kaugana ʼa te ʼAtua. Ei, “ko te ala ʼo te kau faitotonu ʼe hage ko te mālama ʼo te ʼaho ʼaē ʼe mafoa mamalie ʼo aʼu ki te katoa ʼo te mālama ʼo te ʼaho.”—Tāʼaga Lea 4:18.

16. Koteā te meʼa kua tou mālama kiai ʼo ʼuhiga mo tatatou tuʼuʼaga ʼi te ʼu fakatuʼutuʼu ʼa te ʼAtua?

¹⁶ ʼI te temi nei, ko te mālama fakalaumālie ʼaia kua gigila age ia, koteʼuhi ʼe tou maʼuʼuli nei ʼi te temi ʼaē ʼe lolotoga hoko ai te ʼu tuʼuga lea faka polofeta peʼe fakaʼau ke hoko. Ko te ʼu meʼa ʼaia ʼe nātou fakahā mai ʼe tou lolotoga maʼuʼuli nei ʼi “te ʼu ʼaho fakamuli” ʼo te tuʼu ʼo te ʼu faʼahiga meʼa agakovi ʼaenī. Ko te temi ʼaia ʼe fakahigoaʼi “ko te fakaʼosi ʼo te tuʼu ʼo te ʼu faʼahiga meʼa”; ʼe hoa anai kiai te mālama foʼou ʼa te ʼAtua. (2 Timoteo 3:1-5, 13; Mateo 24:3-13) Ohage ko tana fakakikite e Taniela, ʼe haga anai te Puleʼaga ʼa te ʼAtua ʼi selo ʼo “molomoloki pea mo fakagata te ʼatu puleʼaga fuli ʼaia [ʼaē ʼe lolotoga takitaki ʼi te temi nei], pea ko ia tonu ʼe tuʼu anai ia ʼo mole ʼiloʼi hona gataʼaga.”—Taniela 2:44.

17, 18. Ko te ʼu lea faka polofeta fea ʼaē ʼe lolotoga hoko nei?

¹⁷ ʼI te ʼu lea faka polofeta ʼaia ʼe lolotoga hoko, ʼe kau ai te lea ʼaē ʼe fakamatalatala ia Mateo Mateo 24:14 kapite 24 vaega 14. Neʼe ʼui fēnei e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” ʼI te kele katoa, ʼe lolotoga fakahoko te gāue faka mafola ʼaia e te toko miliona kau Fakamoʼoni ʼa Sehova. Pea ko te lauʼi teau afe hahaʼi ʼe nātou fakatahi mai kia nātou ʼi te taʼu fuli. Ko te faʼahi ʼaia ʼe ʼalutahi mo te lea faka polofeta ʼaē ia Isaia 2:2, 3, ʼaē ʼe ʼui ai “ ʼi te temi fakaʼosi ʼo te ʼu ʼaho” ʼo te mālama agakovi ʼaenī, ko te hahaʼi mai te fenua fuli ʼe ʼōmai anai ki te tauhi moʼoni ʼa Sehova, pea ‘ ʼe ina akonakiʼi anai nātou ki tona ʼu ala, pea ʼe nātou haʼele anai ʼi tona ʼu ala foufou.’

¹⁸ Ko te hahaʼi foʼou ʼaia ʼe nātou lolotoga fakapupu ki te tauhi ʼa Sehova “ohage ko he ʼao,” ʼo mulimuli pe ki te meʼa ʼaē neʼe fakakikite ia Isaia Isaia 60:8kapite 60, ʼi te vaega 8. ʼE toe ʼui fēnei e te vaega 22: “Ko ia ʼaē ʼe veliveli ʼe liliu anai ko te lauʼi afe e tahi, pea ko ia ʼaē ʼe veliveli ʼe liliu ia ko te puleʼaga mālohi. Ko ʼau, Sehova, ʼe ʼau fakahaʼele anai ki muʼa te faʼahi ʼaia mokā hoko tona temi.” Ko te temi ʼaia, ʼe fakahā e te ʼu fakamoʼoni, ko te temi nei. Pea ko te hahaʼi foʼofoʼou ʼe feala ke nātou falala ʼi tanatou fakatahi ʼaē mo te kau Fakamoʼoni ʼa Sehova, ʼe nātou pipiki ki te kokelekasio faka Kilisitiano moʼoni.

19. He koʼe ʼe feala ke tou ʼui ko te hahaʼi foʼofoʼou ʼaē ʼe nātou fakatahi mo te kau Fakamoʼoni ʼa Sehova ʼe nātou lolotoga ʼōmai ki te kokelekasio faka Kilisitiano moʼoni?

¹⁹ He koʼe ʼe feala ke tou ʼui papau te faʼahi ʼaia? Koteʼuhi ko te hahaʼi foʼofoʼou ʼaia, fakatahi mo te toko miliona ʼaē ʼi te loto kautahi ʼa Sehova, kua nātou foaki tonatou maʼuli ki te ʼAtua pea ʼe nātou lolotoga fai nei tona finegalo. ʼE kau ai te maʼuli ʼo mulimuli ki te lao ʼo te ʼofa faka lotu. Ohage ko tana fakamoʼoni ʼi te potu ʼaia, ko te kau Kilisitiano ʼaia neʼe nātou ‘tuki ʼanatou heletā ko he ʼu huo pea mo ʼanatou ʼu tao ko he ʼu pipi tuʼusi meʼa pea ʼe mole nātou toe akoʼi anai te tau.’ (Isaia 2:4) Neʼe fai e te kau Fakamoʼoni fuli ʼa Sehova ʼaē ʼi te malamanei te faʼahi ʼaia koteʼuhi ʼe nātou maʼuliʼi te ʼofa. Ko te faʼahi ʼaia ʼe faka ʼuhiga ʼe mole nātou fakaʼaogaʼi anai ʼi he temi he ʼu mahafu tau ʼo nātou fefakahagaʼaki peʼe nātou fakahaga ki he tahi age. ʼE gata pe kia nātou ʼe nātou fai te faʼahi ʼaia—ʼo mole nātou hage ko te ʼu lotu ʼo te malamanei. (Soane 13:34, 35; 1 Soane 3:10-12, 15) ʼE mole nātou kau ki te tauhi ki te puleʼaga ʼaē ʼe fakatupu maveuveu, koteʼuhi ko nātou ko te foʼi famili fakatautehina faka malamanei ʼe fakatahiʼi ʼaki te ʼofa, “ko he noʼo haohaoa ki te logo tahi.”—Kolose 3:14; Mateo 23:8; 1 Soane 4:20, 21.

Tokolahi ʼe Mole Nātou Fia ʼIloʼi

20, 21. He koʼe koa ʼe nonofo te hahaʼi tokolahi ʼi te fakapōʼuli fakalaumālie? (2 Kolonito 4:4; 1 Soane 5:19)

²⁰ ʼI te temi ʼaē ʼe gigila ai te mālama fakalaumālie ʼi te lotolotoiga ʼo te kau kaugana ʼa te ʼAtua, ko te hahaʼi ʼe fakaʼāʼāsili nātou ʼi te fakapōʼuli fakalaumālie. ʼE mole nātou ʼiloʼi ia Sehova peʼe ko tana ʼu fakatuʼutuʼu. Neʼe fakamatalatala e te polofeta ʼa te ʼAtua te temi ʼaia ʼi tana ʼui ʼaē: “Koʼeni ko te ʼu fakapōʼuli ʼe nātou ʼaofi anai te kele, pea mo te fakapōʼuli mātotolu, te ʼu puleʼaga.” (Isaia 60:2) Ko te meʼa ʼaia ʼe hoko, koteʼuhi ʼe mole fakahā e te hahaʼi he fakamalotoloto ʼi te ako ʼo te ʼiloʼi ʼo te ʼAtua, pea ʼe mole pe nātou fakahā he fia faiga ke ina leleiʼia nātou. Neʼe ʼui fēnei e Sesu: “Koʼeni te tupuʼaga ʼo te fakamāu: ko te mālama neʼe haʼu ki te malamanei, kae ko te tagata neʼe fia fai age ia ki te fakapōʼuli ʼi te mālama, koteʼuhi ko tana ʼu gāue neʼe kovi. Heʼe ko ʼaē ʼe ina fai te ʼu meʼa ʼaē ʼe kovi ʼe fehiʼa ia ki te mālama pea ʼe mole haʼu ia ki te mālama, koteʼuhi ke ʼaua naʼa tapuʼi tana ʼu gāue.”—Soane 3:19, 20.

²¹ Ko te faʼahiga hahaʼi ʼaia ʼe mole nātou fakamalotoloto ʼi te fia ʼiloʼi ʼo te finegalo ʼo te ʼAtua. Kae, ʼe nātou fakatafito tonatou maʼuli ki te fai ʼo te fakatuʼutuʼu ʼo nātou totonu. ʼI tanatou mole tokagaʼi ʼaē te finegalo ʼo te ʼAtua, ʼe nātou fakatupu tuʼutāmaki kia nātou totonu, koteʼuhi ʼe tala fēnei e tana Folafola: “Ko ʼaē ʼe ina leʼei kehe tona taliga ke ʼaua naʼa logo ki te lao—māʼia mo tana faikole ʼe ko he meʼa ia ʼe fehiʼaʼinaʼi.” (Tāʼaga Lea 28:9) ʼE nātou fua anai te ʼu kavega ʼo te ala ʼaē neʼe nātou fili. Neʼe tohi fēnei e te ʼapositolo ko Paulo: “ ʼAua naʼa fakahalaʼi koutou: ʼe mole feala ke kākāʼi te ʼAtua. ʼIo, ko te meʼa ʼaē ʼe to e te tagata, koia pe anai ka ina utu ake.”—Kalate 6:7.

22. Koteā ʼaē ʼe lolotoga fai e te hahaʼi tokolahi ʼaē ʼe nātou fia ʼiloʼi te ʼAtua?

²² Kae, ʼe ʼi ai te tokolahi ʼe nātou fia ʼiloʼi te finegalo ʼo te ʼAtua, ʼe nātou kumi fakamalotoloto ia ia, pea mo nātou fia fakaōvi kia te ia. ʼE ʼui fēnei e Sake 4:8, “Koutou fakaōvi ki te ʼAtua, pea ʼe fakaōvi atu anai kia koutou.” ʼO ʼuhiga mo nātou ʼaia, neʼe ʼui fēnei e Sesu: “Ko ʼaē ʼe ina fai te meʼa ʼaē ʼe moʼoni ʼe haʼu ia ki te mālama, koteʼuhi ke fakahā tana ʼu gāue ʼaē neʼe fai, ʼe felogoi mo te ʼAtua.” (Soane 3:21) Pea ʼe ko he ka haʼu fakaofoofo neʼe fakatuʼutuʼu e te ʼAtua maʼa nātou ʼaē ʼe ʼōmai ki te mālama! ʼE talanoa anai tatatou alatike ʼaē ka hoa mai ki te ʼu fakatuʼutuʼu fakaofoofo.

ʼE Feafeaʼi Anai Takotou Tali?

◻ Koteā te ʼui ʼa te tokolahi ki te ʼuhiga ʼo te maʼuli?

◻ ʼE feafeaʼi te fakahāhā tonu e Sehova ko ia ko te ʼAtua ʼe ʼi ai tana fakatuʼutuʼu?

◻ Koteā te mālama lahi neʼe hoko ʼi te ʼuluaki sēkulō ʼo totatou temi?

◻ ʼE feala he ʼiloʼi feafeaʼi koa ʼo te kokelekasio faka Kilisitiano moʼoni?