Koutou Talitali ʼAki He Faʼa Kātaki

NEʼE ʼi ai te tagata tauhi ōvi neʼe kalaga tuʼumaʼu ʼo ina ʼui “Koutou tokaga ʼe ʼi ai te lupo!” ka neʼe mole ʼi ai he lupo, pea ʼi te lakaga leva ʼaē neʼe kalaga ai ke tokoni age he tahi kia ia he neʼe tuʼutāmakiʼia moʼoni, neʼe mole he tahi neʼe tokaga age kia ia. ʼO toe feiā aipe ia ʼaho nei, ʼe tokolahi te hahaʼi ʼe nātou meʼa noaʼi te kua vave hoko mai ʼo te ʼaho ʼo Sehova, he kua lahi te ʼu fakatokaga neʼe nātou logo kiai, ka neʼe mole hoko ai he meʼa. Ko te mole ʼiloʼi ʼa te hahaʼi pe ko te fakatokaga fea ʼaē ʼe moʼoni pea mo tonu ke nātou fakalogo kiai, ʼe ko he faʼahi ʼe fiafia ai ia te fili lahi ʼa te ʼAtua, ia Satana, te “ ʼaselo [kākā] ʼo te mālama.”​—2 Kolonito 11:14.

Kapau ʼe mole kita koviʼia ʼo ʼuhiga mo te ʼaluʼaga ʼo te mālama ʼaenī, pea ʼe feala ke fakatupu tuʼutāmaki māʼiape la kia nātou ʼaē kua fualoa tanatou tauhi kia Sehova. Koteā tona tupuʼaga? Koutou vakaʼi te fakatokaga ʼaē neʼe fai e te ʼapositolo ko Petelo ʼi te ʼuluaki sēkulō.

Ke Mālama Takotou ʼAtamai

Ko te lua tohi ʼa Petelo, neʼe ko he ʼu fakamanatu ki te kau ʼuluaki Kilisitiano, pea ʼe toe ʼaoga foki kia tatou ia ʼaho nei. ʼE ina tohi fēnei, “ ʼU ʼofaina, ʼe ko te lua tohi ʼaenī ʼaē ʼe ʼau fai atu kia koutou, pea ohage ko te ʼuluaki tohi, ʼe ʼau fakaʼala ai takotou ʼu fealagia fakaʼatamai mālama, ʼaki he fakamanatu.” (2 Petelo 3:⁠1) He koʼe neʼe tuʼania feiā ia Petelo? ʼE fakahā e Petelo, ʼe ʼi ai te kau vāvā ʼe nātou vāʼi te kau kaugana ʼa te ʼAtua, ʼo vaivai ai tanatou holi ʼaē ke nātou nofo ʼalaʼala ʼi te temi ʼaē ʼe nātou maʼuʼuli ai. ʼI te temi ʼaenī, ʼe tonu ai ke tou nonofo tokaga ki te kau vāvā ke ʼaua naʼa nātou kākāʼi tatou. ʼE fakaloto mālohiʼi tatou e Petelo ke tou “manatuʼi te ʼu folafola ʼaē neʼe fai ʼi muʼa atu e te kau polofeta maʼoniʼoni.” (2 Petelo 3:⁠2; Gāue 3:22, 23) Koteā koa te ʼu meʼa ʼaē neʼe ʼui e te kau polofeta?

ʼE lahi te ʼu lakaga neʼe fakahā ai e te hahaʼi kaugana agatonu ʼa te ʼAtua, pe neʼe pulihi feafeaʼi e Sehova te agakovi ʼaki tana fakamāu. ʼE fakamanatuʼi mai e Petelo te Tulivio ʼo te ʼu ʼaho ʼo Noe, ʼaē neʼe fakahoko e te ʼAtua moʼo fakatokatoka te ʼu meʼa ʼo te kele ʼi te temi ʼaē neʼe lahi ʼaupito ai te agakovi. ʼE moʼoni, ko te Tulivio ʼaia neʼe ina pulihi te mālama ʼo te temi ʼaia. Kae neʼe taupau e te ʼAtua ia Noe pea mo tona famili ʼi te aleka, ʼo feiā mo te ʼu manu “ ʼo te ʼu faʼahiga kakano fuli pe.” ʼE lahi te ʼu fagana ʼi te malamanei katoa, ʼe nātou fakamoʼoni ki te fakamatala ʼaia ʼa te Tohi-Tapu.a​—Senesi 6:​19; 2 Petelo 3:​5, 6.

ʼE ʼui e Petelo, ko te maumau ʼaia ʼaē neʼe fakahoko e te ʼAtua neʼe ‘ko he meʼa neʼe puli’ ki ʼihi hahaʼi. Ki muli age, ko ʼihi neʼe nātou fia mulimuli ki te manatu ʼa te kau vāvā ʼo tonatou temi. Kae ʼe mole tonu ke galo kia tatou te ʼu meʼa ʼaē kua fakahoko e Sehova. ʼE ʼui fēnei mai e Petelo: “Ko te lagi pea mo te kele ʼo te temi ʼaenī kua tānaki e te folafola pe ʼaia pea mo tāʼofi ki te ʼaho ʼo te fakamāu pea mo te fakaʼauha ʼo te hahaʼi heʼe aga faka lotu.” (2 Petelo 3:⁠7) Ei, ʼe toe hoko anai te fakaʼauha mai te ʼAtua.

ʼE Mole Tuai Te ʼAtua

Kua fakalaka te ʼu taʼu ʼe lauʼi afe. He koʼe koa neʼe talitali fualoa te ʼAtua moʼo fakatokatoka te ʼu fihifihia ʼo te malamanei? ʼE fakahā mai e Petelo te tahi faʼahi maʼuhiga, ʼo ina ʼui fēnei: “Ko te meʼa ʼaia e tahi ʼe mole tonu ke puli kia koutou, ʼu ʼofaina, ko te ʼaho e tahi kia Sehova ʼe hage ko taʼu e afe, pea ko taʼu e afe ʼe hage [kia ia] ko he ʼaho e tahi.” (2 Petelo 3:⁠8) Ko Sehova, ʼe mole tatau mo tatou tana fakafuafua te temi. Ki te ʼAtua heʼegata, ko te temi loaloaga ʼaē neʼe kamata mai te fakatupu ʼo Atama ʼo aʼu mai ki te temi ʼaenī, ʼe mole pe la ko he vāhaʼa katoa. Kae tatau aipe peʼe feafeaʼi tatatou fakafuafua te temi, ʼi te taʼu fuli pea mo te ʼu ʼaho fuli ʼe fakaōvi mai te fakahoko ʼo te fakatuʼutuʼu ʼa Sehova.

“Ka kita sioʼi tuʼumaʼu te kulo, pea ʼe hage ʼe mole pula te vai.” Ko te tāʼaga lea ʼaia ko tona faka ʼuhiga, ka kita talitali ki he meʼa, pea ʼe hage kia kita ʼe tuai tona hoko mai. Kae ʼe fakaloto mālohiʼi tatou e Petelo ke tou “talitali pea mo ʼaua naʼa galo [kia tatou] te hoko mai ʼo te ʼaho ʼo Sehova.” (2 Petelo 3:​12) ʼE lava feafeaʼi hatatou maʼu he faʼahiga manatu ʼe tokoni anai kia tatou ke tou nofo ʼalaʼala ʼi te kua ōvi mai ʼo te fakaʼauha fakaʼatua?

Ko Te ʼu Gāue ʼe Maʼuhiga Age ʼi Te ʼu Palalau

ʼE faka maʼuhigaʼi e Petelo te fai ʼo he ʼu gāue. ʼE talanoa ki te ʼu “aga fakamaʼoniʼoni” pea mo te ʼu “gāue ʼaē ʼe hā ai [tatatou] pipiki ki te ʼAtua.” (2 Petelo 3:​11) Koteā te ʼu gāue ʼaia?

Ko te kau kaugana ʼa te ʼAtua ʼe nātou fai te ʼu aga ʼaē ʼe leleiʼia e te ʼAtua. Ko te tui ʼa te hahaʼi kaugana ʼaia ʼe hā ʼi tanatou ʼu gāue. ʼI tanatou fai te faʼahi ʼaia, ʼe nātou fakakeheʼi ia nātou mo te hahaʼi ʼaē ʼe gata ʼaki pe tanatou lau ʼaē ʼe nātou tui ki te ʼAtua pea mo tana ʼu fakapapau. Lagi kua koutou fakatokagaʼi, ko te gāue fai faka mafola ʼa te kau Fakamoʼoni ʼa Sehova ʼe ina fakakeheʼi nātou mo te hahaʼi. ʼE nātou ʼaʼahi atu koutou ʼi tokotou ʼapi moʼo fakahā atu kia koutou te ʼu fakapapau ʼa te ʼAtua ʼaē ʼe talanoa kiai te Tohi-Tapu. Kae ʼe nātou toe faka mafola foki tanatou ʼamanaki pea mo tanatou tui ʼi te ʼu potu fuli pe ʼaē ʼe nātou felāveʼi ai mo te hahaʼi.

Kapau ʼe maʼumaʼua he Kilisitiano ʼi te fakahā ʼo tana tui ki ʼihi, pea ʼe toe ʼāsili mālohi ai tana tui. Ka kita palalau ʼo ʼuhiga mo te ʼu meʼa ʼaē ʼe kita tui kiai, pea ʼe ʼāsili mālohi te ʼu meʼa ʼaē ʼe kita logoʼi ʼi tokita loto, ʼo tupu ai tokita fiafia. Ka tou tala te logo lelei ʼo te Puleʼaga ʼo te ʼAtua, ʼe toe fiafia foki mo Sehova. ʼE tou ʼiloʼi ʼe ‘mole heʼe agatonu ke ina galoʼi tatatou gāue pea mo te ʼofa ʼaē ʼe tou fakahā ki tona huafa,’ ohage ko tona ʼui e Paulo, ʼaē neʼe kaugā gāue mo te ʼapositolo ko Petelo.​—Hepeleo 6:⁠10; Loma 10:​9, 10.

Koteā te ʼu fua ʼaē ʼe maʼu ʼi te faiga ʼaia ke faka mafola te logo lelei ʼo te Puleʼaga ʼi te ʼu ʼaho fakamuli ʼo te tuʼu ʼo te ʼu faʼahiga meʼa ʼaenī? Ko te hahaʼi fakamalotoloto ʼe toko lauʼi teau afe ʼe nātou lolotoga ako ke nātou ʼiloʼi peʼe feala feafeaʼi hanatou felogoi mo Sehova, pea ke nātou maʼu tona ʼofa makehe pea mo te fiafia moʼoni ʼi tanatou ʼamanaki ki te maʼuli heʼegata ʼi te kele ʼaē ka liliu anai ko he palatiso.

Ko Te ʼu Meʼa ʼAē Kua Tou ʼIloʼi

Logope la kua tou ʼiloʼi ʼaki te Tohi-Tapu ko Sehova ʼAtua ʼe ina fakahoko anai tana fakatuʼutuʼu ʼi tona temi totonu, kae ʼe maʼua ke tou fakalogo ki te tahi fakatokaga ʼe fai mai e Petelo. “ ʼI takotou ʼiloʼi fakatomuʼa te faʼahi ʼaia, koutou nonofo tokaga ke ʼaua naʼa toho koutou mo nātou ʼuhi ko te hala ʼo te hahaʼi ʼaē ʼe nātou meʼa noaʼi te lao, pea ke ʼaua naʼa koutou higa mai takotou agatonu.”​—2 Petelo 3:17.

ʼE mahino ia, neʼe ʼiloʼi fakatomuʼa e Sehova, ʼe feala anai ke lotovaivai ia nātou ʼaē ʼe mole mālohi tanatou tui, heʼe hage kia nātou ʼe tuai te ʼaho ʼo te ʼAtua. Neʼe ina toe ʼiloʼi foki, ko te ʼu hahaʼi ʼaē ʼe mole aga faka lotu, ʼe feala anai ke nātou fakahalaʼi tana hahaʼi kaugana moʼoni, peʼe uga nātou ke nātou lotolotolua ʼo ʼuhiga mo te kua vave hoko mai ʼo te ʼaho ʼaē ka tāpuhā ai te huafa ʼo te ʼAtua. ʼI meʼa fakaʼofaʼofa leva mo kapau ʼe tou higa mai tatatou agatonu ʼi te ʼu ʼaho fakamuli ʼaenī!

ʼI te temi ʼaenī, ʼe mole tonu ai ke tou lotolotolua ʼo ʼuhiga mo te ʼu meʼa ʼaē ka fai anai e Sehova. (Hepeleo 12:⁠1) Kailoa, kae ʼe tonu ke tuputupu tatatou loto fakafetaʼi ki te ʼu lelei fuli ʼaē ʼe tou maʼu ʼuhi ko te loto faʼa kātaki ʼo Sehova​—te ʼamanaki ʼaē ke ina hāofaki te toko lauʼi miliona hahaʼi ʼaē ʼe nātou fakatahi mai ki te toe hahaʼi tokolahi ʼo te malamanei katoa pea ke nātou fakaʼamu ke nātou hāo ʼi te mamahi lahi. (Fakahā 7:​9, 14) ʼE fakaloto mālohiʼi fēnei tatou e Petelo: “Koutou haga tuputupu ʼi te ʼofa makehe pea mo te ʼatamai mālama ʼo ʼuhiga mo totatou ʼAliki pea mo Fakamaʼuli ko Sesu Kilisito. ʼA ia te kolōlia ʼi te temi nei ʼo aʼu ki te ʼaho ʼo te heʼegata.”​—2 Petelo 3:⁠18.

“Koutou Haga Nofo ʼi Te ʼOfa ʼo Te ʼAtua”

ʼE puipui anai tatou mo kapau ʼe tou maʼumaʼua ʼi te fai faka mafola ʼo te Puleʼaga pea mo tou kau tuʼumaʼu ki te ʼu fono faka Kilisitiano moʼo ako te Folafola ʼa te ʼAtua pea mo tauhi kia te ia. Kapau ʼe tou fai te faʼahi ʼaia, pea ʼe mole maʼu anai hatatou temi ke tou tuʼania fau ki te faka ʼāsili kovi ʼo te mālama agakovi ʼaenī. Ko te kau Kilisitiano moʼoni, ʼe mole nātou faka maʼuhigaʼi fau te ʼu meʼa ʼaē ʼe nātou matataku ai pea mo tanatou ʼu tuʼania. (1 Kolonito 15:58) Kapau ʼe tou maʼumaʼua ʼi te tauhi ʼaē kia Sehova, pea ʼe mahino ia ʼe vave anai te fakalaka ʼo te temi.

Ko te tēhina ʼo Sesu ko Suta ʼaē neʼe maʼuli ʼi te temi ʼo Petelo, ʼe ina fakaloto mālohi fēnei tatou: “Ko koutou, ʼu ʼofaina, ʼi takotou lagaʼi ake koutou ʼi takotou tui maʼoniʼoni ʼaupito, pea ʼi takotou faikole ʼaki te laumālie maʼoniʼoni, koutou haga nofo ʼi te ʼofa ʼo te ʼAtua, ʼi takotou talitali ki te manavaʼofa ʼo totatou ʼAliki ko Sesu Kilisito pea mo takotou ʼamanaki ki te maʼuli heʼegata.” (Suta 20, 21) Koutou fakatokagaʼi te maʼuhiga ʼaē ke tou maʼu te falala, pea ʼe tupu ʼaki tatatou faʼa kātaki ʼi te faikole. (1 Tesalonika 5:​17) Pea ʼe toe ʼui fēnei e Suta: “Koutou haga manavaʼofa kia nātou ʼaē ʼe lotolotolua; koutou hāofaki nātou ʼo koutou tohoʼi nātou ki tuʼa mai te afi. Kae koutou haga manavaʼofa ki ʼihi, ʼo koutou fai ʼaki te manavasiʼi, ʼi takotou fehiʼa māʼiape la ki te kofu loto ʼaē neʼe ʼulihi e te kakano.” (Suta 22, 23) ʼE maʼuhiga ʼaupito ke tou fefakaloto mālohiʼaki ʼi te ʼu temi faigataʼa ʼaenī! Pea ʼe maʼuhiga foki ke ʼaua naʼa tou higa ki te fakahala, ʼo tou manatu ko te ‘ ʼaho loaloaga ʼaenī ʼo te hāofaki’ ʼe ko he takuʼaki ke tou fai he ʼu “aga heʼeʼaoga” ohage ko te tokolahi ʼo te hahaʼi ʼo te mālama fakahehema ʼaenī.​—Suta 4; 2 Kolonito 6:​1, 2.

Kapau ʼe koutou mulimuli ki te tokoni ʼofa ʼaē neʼe fai e Petelo, mo Paulo, pea mo Suta, pea kapau foki ʼe koutou maʼumaʼua ʼi te tauhi ʼaē ki te ʼAtua, pea ʼe feala anai hakotou talitali ʼaki he loto faʼa kātaki ki te hoko mai ʼo te ʼaho ʼo Sehova. Kae ʼe koutou lava fai anai koa te faʼahi ʼaia?

ʼE fakaloto mālohi koutou ke koutou ʼolo ʼo fakalavelave ki te kau Fakamoʼoni ʼa Sehova ʼo tokotou kolo, ke nātou tokoni atu kia koutou ke mālohi takotou tui ki te fakapapau ʼa te Tupuʼaga ʼo ʼuhiga mo te maʼuli heʼegata. Koutou ako te ʼu meʼa ʼaē ʼe fakamaʼua atu kia koutou ke feala hakotou kau ki te gāue fai faka mafola ʼaē ka fakaʼosi anai ʼi te mamahi lahi ʼaē kua ōvi mai, pea ʼe mole toe fai anai ʼi he temi. (Maleko 13:10) Kapau ʼe koutou fai te faʼahi ʼaia, pea ʼe koutou maʼu anai te ʼamanaki ʼaē ke koutou maʼuʼuli ʼi te mālama faitotonu foʼou ʼaē ʼe fakapapauʼi mai e Sehova. (2 Petelo 3:​13) Koutou mulimuli ki tana ʼu fakamanatu! Koutou talitali ʼaki he loto faʼa kātaki! Koutou haga gāue mālohi ʼi te fai faka mafola!

[Nota ʼi te lalo pasina]

[Paki ʼo te pasina 7]

Koutou ako ʼi te temi nei te fakapapau ʼa te ʼAtua ʼo ʼuhiga mo te Palatiso

[Haʼuʼaga ʼo te paki pasina 5]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.