Tou Pipiki Mālohi Ki Tatatou Tui Maʼuhiga!
“Kia nātou ʼaē neʼe nātou tali he tui, ʼe nātou maʼu he pilivilesio ʼe tatau mo ʼamatou.”—2 Petelo 1:1.
1. Koteā ʼaē neʼe ʼui e Sesu moʼo fakatokagaʼi ʼo tana ʼu ʼapositolo, kae koteā te laupisi ʼaē neʼe fai e Petelo?
ʼI TE po ʼaē ʼi muʼa ʼo tona mate, neʼe ʼui e Sesu ʼe līaki anai ia ia e tana ʼu ʼapositolo fuli. Ko te tokotahi ia nātou, ko Petelo, neʼe laupisi ʼo ina ʼui fēnei: “ ʼE tatau aipe, kapau ʼe nātou higa fuli ʼuhi ko koe, kaʼe mole ʼau higa anai ʼau ʼi he lakaga!” (Mateo 26:33) Kae neʼe ʼiloʼi e Sesu ʼe mole hoko feiā anai. Ko te tupuʼaga la ʼaia ʼo tana ʼui kia Petelo ʼi te lakaga ʼaia: “Neʼe ʼau hūfaki koe, ke ʼaua naʼa higa tau tui: ka ke tafoki pea ke fakamālohiʼi ʼou tēhina.”—Luka 22:32.
2. Logope la te falala fau ʼa Petelo kia ia totonu, koteā te ʼu meʼa ʼaē neʼe ina fai neʼe hā ai neʼe vaivai tana tui?
2 Ko Petelo ʼaē neʼe falala fau ki tana tui, neʼe ina ʼui ai ʼi te po pe ʼaia, ʼe mole ina ʼiloʼi ia Sesu. Neʼe fakafisi tuʼa tolu ʼe mole ina ʼiloʼi ia Kilisito! (Mateo 26:69-75) ʼE mahino ia neʼe ina manatuʼi lelei te ʼu palalau ʼaē neʼe fai age e tona Pule, “ka ke tafoki pea ke fakamālohiʼi ʼou tēhina.” Neʼe malave ʼaupito te tokoni ʼaia ki te maʼuli ʼo Petelo, ohage ko tona fakamoʼoni e te ʼu tohi e lua ʼaē neʼe ina fai, ʼaē ʼe taupau ʼi te Tohi-Tapu.
He Koʼe Neʼe Fai e Petelo Tana ʼu Tohi
3. He koʼe koa neʼe tohi e Petelo tana ʼuluaki tohi?
3 Hili kiai lagi taʼu e 30 ʼi te kua mate ʼa Sesu, neʼe fai e Petelo tana ʼuluaki tohi, ʼo ina fai ki tona ʼu tēhina ʼi Ponito, mo Kalate, mo Kapatosia, mo Asia, pea mo Pitinia, ko te ʼu faʼahi ʼaia ʼaē ʼe nātou faʼufaʼu ʼi te temi nei te potu tokelau pea mo te potu hihifo ʼo te fenua ko Turquie. (1 Petelo 1:1) ʼE mahino papau ia, ko ʼihi ʼi te kau Sutea, ʼaē neʼe lagi nātou liliu ko he kau Kilisitiano ʼi te Penikosite ʼo te taʼu 33 ʼo totatou temi, neʼe nātou kau ia nātou ʼaē neʼe faitohi kiai ia Petelo. (Gāue 2:1, 7-9) Neʼe tokolahi ia nātou ko te kau Senitile, neʼe hoko kia nātou te ʼu ʼahiʼahiʼi lahi mai te ʼu fili. (1 Petelo 1:6, 7; 2:12, 19, 20; 3:13-17; 4:12-14) Koia, neʼe faitohi ia Petelo ki te ʼu tēhina ʼaia moʼo fakaloto mālohiʼi ʼo nātou. Ko tana fakatuʼutuʼu neʼe ko te tokoni kia nātou ke nātou maʼu ‘te ikuʼaga ʼo [tanatou] tui, te hāofaki ʼo [tonatou] nefesi.’ Koia, ʼi te koga ʼaia ʼo tana tokoni, ʼe ina uga fēnei: “Koutou teteke [te Tevolo] ʼi takotou tuʼu mālohi ʼi te tui.”—1 Petelo 1:9; 5:8-10.
4. He koʼe koa neʼe tohi e Petelo tana lua tohi?
4 Ki muli age, neʼe fai e Petelo te lua tohi ki te ʼu Kilisitiano ʼaia. (2 Petelo 3:1) Koteā tona tupuʼaga? Koteʼuhi neʼe ʼi ai te tuʼutāmaki lahi. Neʼe faiga e te ʼu hahaʼi aga heʼeʼaoga ke nātou fakatuputupu tanatou ʼu aga heʼemaʼa ʼi te hahaʼi tui pea mo nātou fakahalaʼi ʼihi! (2 Petelo 2:1-3) Pea tahi ʼaē, neʼe fakatokaga ia Petelo ʼo ʼuhiga mo te ʼu hahaʼi manukinuki. Neʼe ina ʼui ʼi tana ʼuluaki tohi “ ʼe fakaōvi mai te fakaʼosi ʼo te meʼa fuli pe,” pea ʼi te temi ʼaia, neʼe lagi vāʼi e ʼihi te manatu ʼaia. (1 Petelo 4:7; 2 Petelo 3:3, 4) Tou vakaʼi te lua tohi ʼa Petelo pea mo tou sio pe neʼe feafeaʼi tana fakaloto mālohiʼi te ʼu tēhina ke nātou pipiki mālohi ki te tui. ʼI te ʼuluaki alatike ʼaenī, ʼe tou vakaʼi anai ia 2 Petelo kapite 1.
Te Fakatuʼutuʼu ʼo Te Kapite 1
5. Neʼe teuteuʼi feafeaʼi e Petelo ia nātou ʼaē neʼe nātou lau tana tohi ki te fai palalau ʼo ʼuhiga mo te ʼu fihifihia?
5 Neʼe mole kamata talanoa atu aipe ia Petelo ki te ʼu fihifihia lahi. Kae ʼe ina teuteuʼi tana palalau ki te ʼu fihifihia ʼaia, ʼo ina fakatuputupu ia nātou ʼaē neʼe nātou lau tana tohi, te loto fakafetaʼi ki te ʼu meʼa ʼaē neʼe nātou maʼu ʼi te temi ʼaē neʼe nātou liliu ai ko he kau Kilisitiano. ʼE ina toe fakamanatuʼi age kia nātou te ʼu fakapapau fakatalakitupua ʼa te ʼAtua pea mo te feala ʼaē ke nātou falala ki te ʼu lea faka polofeta ʼo te Tohi-Tapu. ʼE ina fai te faʼahi ʼaia ʼo ina fakamatala te fetogi ʼaē neʼe hoko kia Kilisito, tana sio tonu kia te ia ʼi te mālohi ʼo te Puleʼaga.—Mateo 17:1-8; 2 Petelo 1:3, 4, 11, 16-21.
6, 7. (a) Koteā te ako ʼe tou maʼu ʼi te ʼu ʼuluaki palalau ʼo te tohi ʼa Petelo? (b) Kapau ʼe tou fai tokoni, koteā ʼaē ʼe lagi ʼaoga ʼi ʼihi temi ke tou fakahā?
6 Koteā ʼaē ʼe feala ke tou ako mai te ʼu ʼuluaki palalau ʼa Petelo? ʼE mole tali leleiʼi koa la e he tahi he tokoni mo kapau ʼe tou ʼuluaki fakamanatuʼi age te ʼu faʼahi kehekehe ʼo te ʼamanaki ki te Puleʼaga lahi, ʼaē ʼe tou maʼu fuli? Pea he koʼe koa ʼe mole koutou fakaʼaogaʼi he meʼa neʼe hoko kia koutou? ʼO toe feiā aipe, ʼi te hili ʼo te mate ʼo Sesu, neʼe tautau talanoa ia Petelo ʼo ʼuhiga mo te meʼa ʼaē neʼe hā kia ia, ʼi tana sio ʼaē kia Sesu ʼi te kolōlia ʼo te Puleʼaga.—Mateo 17:9.
7 Koutou toe manatuʼi foki, ʼi te temi ʼaē neʼe tohi ai e Petelo tana lua tohi, ʼe mahino papau ia ko te evaselio ʼa Mateo pea mo te tohi ʼa te ʼapositolo ko Paulo neʼe kua lahi tona tufa. Koia, ko te ʼu hala ʼa Petelo pea mo tana agatonu neʼe kua lagi ʼiloʼi lelei e te hahaʼi ʼo tona temi. (Mateo 16:21-23; Kalate 2:11-14) Kae neʼe mole tāʼofi e te faʼahi ʼaia tana palalau faʼitaliha. ʼI tona fakahagatonu, ko nātou ʼaē neʼe nātou mahino ki tonatou ʼu vaivaiʼaga, neʼe nātou tokagaʼi lahi ai tana tohi. Koia, ka tou tokoni kia nātou ʼaē ʼe ʼi ai tonatou ʼu fihifihia, ʼe mole lelei age koa la ke tou fakahā ʼe feala ke tou hala mo tatou?—Loma 3:23; Kalate 6:1.
Ko He ʼu Fakaʼalofa Fakaloto Mālohi
8. Ko te faka ʼuhiga fea ʼaē neʼe lagi fakaʼaogaʼi e Petelo ʼo ʼuhiga mo te kupu “tui”?
8 Tou vakaʼi ʼi te temi nei te ʼu fakaʼalofa ʼa Petelo. ʼE talanoa aipe ʼo ʼuhiga mo te tui, ʼo ina ʼui kia nātou ʼaē neʼe nātou lau tana tohi, ko “nātou ʼaē neʼe nātou tali he tui, ʼe nātou maʼu he pilivilesio ʼe tatau mo ʼamatou.” (2 Petelo 1:1) ʼI henī, ko te kupuʼi palalau “he tui” ʼe lagi faka ʼuhiga ki he “tui papau mālohi” pea ʼe faka ʼuhiga ki te ʼu akonaki fuli ʼe maʼu e he Kilisitiano, ʼaē ʼe fakahigoa ʼi ʼihi temi ʼi te Tohi-Tapu ko “te moʼoni.” (Kalate 5:7; 2 Petelo 2:2; 2 Soane 1) ʼI te agamāhani, ʼe fakaʼaogaʼi te kupu “tui” ʼi te ʼaluʼaga ʼaia, kae mole fakaʼaogaʼi ʼi tona faka ʼuhiga māhani ʼaē ko te tui pe ko te falala ki he tahi peʼe ki he meʼa.—Gāue 6:7; 2 Kolonito 13:5; Kalate 6:10; Efesi 4:5; Suta 3.
9. He koʼe neʼe fiafia tāfito te kau Senitile ʼo ʼuhiga mo te ʼu fakaʼalofa ʼa Petelo?
9 Neʼe lagi fiafia tāfito te kau Senitile ʼi te ʼu fakaʼalofa ʼa Petelo. Neʼe mole felogoi te kau Sutea mo te kau Senitile, pea neʼe nātou fehiʼa kia nātou, pea neʼe kei fakapalatahi pe te kau Sutea Kilisitiano ki te kau Senitile. (Luka 10:29-37; Soane 4:9; Gāue 10:28) Kae ko Petelo, ʼaē neʼe ko te Sutea pea neʼe ko te ʼapositolo ʼa Sesu Kilisito, neʼe ina ʼui ko nātou ʼaē neʼe nātou lau tana tohi—te kau Sutea mo te kau Senitile—neʼe nātou maʼu te tui pea mo te pilivilesio ʼe tatau mo ia.
10. Koteā te ʼu ako lelei ʼe feala ke tou maʼu ʼi te ʼu fakaʼalofa ʼa Petelo?
10 Koutou fakakaukauʼi te ʼu ako lelei ʼe tou maʼu ʼi te temi nei, ʼi te ʼu fakaʼalofa ʼa Petelo. Ko te ʼAtua ʼe mole fakapalatahi; ʼe mole lahi age tona ʼofa ki he lanu pe ki he fenua. (Gāue 10:34, 35; 11:1, 17; 15:3-9) Ohage ko tona akoʼi mai e Sesu, ʼe tautēhina fuli te kau Kilisitiano, pea ʼe mole tonu ke tou fialahi ʼi he tahi. Pea tahi ʼaē meʼa, neʼe fakahā lelei e te ʼu fakaʼalofa ʼa Petelo ʼe tou faʼufaʼu he fale tautēhina ʼi te malamanei katoa, ʼe tou maʼu “he pilivilesio ʼe tatau” ʼo te tui, ʼaē neʼe maʼu e Petelo pea mo tona ʼu kaugā ʼapositolo.—Mateo 23:8; 1 Petelo 5:9.
Te ʼAtamai Mālama Pea Mo Te ʼu Fakapapau ʼa Te ʼAtua
11. ʼO hoa ki tana ʼu fakaʼalofa, koteā te ʼu meʼa maʼuhiga ʼaē ʼe fakahā e Petelo?
11 ʼO hoa ki tana ʼu fakaʼalofa, ʼe tohi fēnei e Petelo: “Ke tuputupu ia koutou te ʼofa makehe mo te tokalelei.” ʼE lava tuputupu feafeaʼi te ʼofa makehe pea mo te tokalelei ia tatou? ʼE tali fēnei e Petelo: “ ʼAki te ʼatamai mālama totonu ʼo ʼuhiga mo te ʼAtua pea mo Sesu, totatou ʼAliki.” Pea ʼe ina ʼui fēnei: “Neʼe foaki lahi mai e te mālohi fakaʼatua te ʼu meʼa fuli ʼo ʼuhiga mo te maʼuli pea mo te pipiki ki te ʼAtua.” Kae ʼe tou maʼu feafeaʼi te ʼu meʼa maʼuhiga ʼaia? “ ʼAki te ʼatamai mālama totonu ʼo ʼuhiga mo ia ʼaē neʼe ina pāuiʼi tatou ʼaki te kolōlia pea mo te vilitute.” Koia, neʼe tuʼa lua te fakahā e Petelo te maʼuhiga ʼo te ʼatamai mālama ʼo ʼuhiga mo te ʼAtua pea mo tona ʼAlo.—2 Petelo 1:2, 3; Soane 17:3.
12. (a) He koʼe neʼe fakahā lelei e Petelo te maʼuhiga ʼo te ʼatamai mālama? (b) Ke tou maʼu te ʼu fakapapau ʼa te ʼAtua, koteā ʼaē neʼe tonu muʼa ke tou fai?
12 Ko te “hahaʼi faiakonaki loi” ʼaē neʼe fakatokaga ki ai ia Petelo ʼi te kapite 2, ʼe nātou fakaʼaogaʼi te ʼu “lea kākā” moʼo fakahalaʼi ʼo te kau Kilisitiano. ʼI te faʼahi ʼaia, ʼe nātou faiga fakakākā ke toe tō te kau Kilisitiano ki te aga heʼeʼaoga, ʼaē neʼe kua faka ʼāteainaʼi nātou mai ai. ʼE fakamataku te ʼu meʼa ʼaē ʼe hoko ki he tahi neʼe faka ʼāteaina ʼaki “te ʼatamai mālama totonu ʼo ʼuhiga mo te ʼAliki pea mo Fakamaʼuli ia Sesu Kilisito,” pea ki muli ʼe toe tō ki te ʼu aga ʼaia. (2 Petelo 2:1-3, 20) ʼE hā mai, moʼo teuteuʼi fakatomuʼa tana palalau ki muli age ʼo ʼuhiga mo te fihifihia ʼaia, neʼe fakahā lelei e Petelo ʼi te kamataʼaga ʼo tana tohi, te ʼaoga ʼo te ʼatamai mālama totonu moʼo taupau ʼo te ʼuhiga maʼa ia muʼa ʼo te ʼAtua. Neʼe ina fakahā ko te ʼAtua “neʼe ina foaki lahi mai kia tatou te ʼu fakapapau maʼuhiga mo lahi ʼaupito, ke feala ʼaki te ʼu meʼa ʼaia, ke koutou liliu ʼo kau ki te natula fakaʼatua.” Kae moʼo maʼu ʼo te ʼu fakapapau ʼaia, ʼaē ʼe ko he koga tāfito ʼaia ʼo tatatou tui, ʼe ʼui e Petelo, ʼe tonu muʼa ke tou “hola mai te aga fakahehema ʼaē ʼe maʼu ʼi te malamanei ʼuhi ko te ʼu holi mālohi.”—2 Petelo 1:4.
13. Koteā ʼaē ʼe pipiki mālohi kiai te kau Kilisitiano fakanofo pea mo te “tahi ʼu ōvi”?
13 Koteā takotou manatu ʼo ʼuhiga mo te ʼu fakapapau ʼa te ʼAtua? ʼE koutou manatu koa ohage ko te manatu ʼa te toe ʼo te kau Kilisitiano fakanofo? ʼI te taʼu 1991, ko Frederick Franz, ʼaē neʼe ko te pelesita ʼo te Watch Tower Bible and Tract Society ʼi te temi ʼaia, pea neʼe pionie katoa lolotoga taʼu e 75 tupu, neʼe ina fakanounou fēnei te meʼa ʼaē ʼe logoʼi e nātou ʼaē ka nātou hau mo Kilisito: “Neʼe mātou nonofo mālohi ʼo aʼu ki te temi nei, pea ʼe mātou nonofo mālohi anai ʼo aʼu ki te fakamoʼoni e te ʼAtua ʼe ina fakahoko tana ʼu ‘fakapapau maʼuhiga pea mo lahi ʼaupito.’ ” Neʼe falala tuʼumaʼu te Tēhina ko Franz ki te fakapapau ʼa te ʼAtua ki he fakatuʼuake ki selo, pea neʼe nofo mālohi ʼi te tui ʼo aʼu ki tana mate ʼi tona taʼu 99. (1 Kolonito 15:42-44; Filipe 3:13, 14; 2 Timoteo 2:10-12) ʼO toe feiā pe, ko te hahaʼi ʼe lauʼi miliona ʼe nātou pipiki mālohi ki te tui, ʼo nātou manatuʼi te fakapapau ʼa te ʼAtua ki he palatiso ʼi te kele, ʼaē ka maʼuli ai anai te hahaʼi ʼo talu ai ʼi te fiafia. ʼE koutou kau koa ia nātou ʼaia?—Luka 23:43; 2 Petelo 3:13; Fakahā 21:3, 4.
Te Tali Ki Te ʼu Fakapapau ʼa Te ʼAtua
14. He koʼe ʼe ʼui e Petelo ko te vilitute ʼe ko te ʼuluaki kalitate ʼaē ʼe tonu ke fakatahiʼi ki te tui?
14 ʼE koutou loto fakafetaʼi koa ki te ʼAtua ʼo ʼuhiga mo te ʼu meʼa ʼaē neʼe ina fakapapauʼi mai? Kapau koia, pea ʼe ʼui e Petelo ʼe tonu ke tou fakahā totatou loto fakafetaʼi ki te ʼu meʼa ʼaia. “ ʼIo, ʼuhi ko te faʼahi ʼaia” (ʼuhi ko te foaki mai e te ʼAtua kia tatou te ʼu fakapapau maʼuhiga ʼaupito), ʼe tonu ke tou gāue mālohi. ʼE mole tonu ke gata pe ki tatatou maʼu te tui peʼe ko tatatou mālama ki te moʼoni ʼo te Tohi-Tapu. ʼE mole feʼauga te faʼahi ʼaia! Lagi ʼi te temi ʼo Petelo, ko ʼihi neʼe lahi tanatou palalau ʼo ʼuhiga mo te tui, kae neʼe nātou fai te aga heʼemaʼa. Neʼe ʼaoga ke nātou maʼu te vilitute, koia neʼe uga fēnei ai e Petelo: “Fakatahiʼi ki takotou tui te vilitute.”—2 Petelo 1:5; Sake 2:14-17.
15. (a) He koʼe ʼe hoa te kalitate ʼaē ko te ʼatamai mālama ki te vilitute, ohage ko he kalitate ʼe tonu ke ina fakatuputupu te tui? (b) Koteā te tahi ʼu kalitate ʼe ʼaoga kia tatou ke feala ke tou pipiki mālohi ki te tui?
15 ʼI tana ʼosi talanoa ki te vilitute, ʼe fakahā e Petelo te tahi ʼu kalitate e ono ʼe tonu ke tou fakatahiʼi, peʼe hilifaki, ki tatatou tui. ʼE ʼaoga te ʼu kalitate takitahi ʼaia mo kapau ʼe tou fia “nonofo mālohi ʼi te tui.” (1 Kolonito 16:13) ʼUhi ko te kau ʼaposita ʼaē ʼe nātou ‘pikopikohi te Folafola’ pea mo faka mafola he ʼu “akonaki hala,” ʼe fakatuʼu ki muli age e Petelo te ʼatamai mālama ohage ko he meʼa maʼuhiga, ʼo ina ʼui fēnei: “[ʼO fakatahiʼi] ki tokotou vilitute te ʼatamai mālama.” Pea neʼe ina toe hoko atu ʼo ina ʼui fēnei: “Ki tokotou ʼatamai mālama [koutou hilifaki] te loto lolomi, ki tokotou loto lolomi te faʼa kātaki, ki takotou faʼa kātaki te pipiki ki te ʼAtua, ki takotou pipiki ki te ʼAtua te ʼofa fakatautehina, ki tokotou ʼofa fakatautehina te ʼofa.”—2 Petelo 1:5-7; 2:12, 13; 3:16.
16. Koteā ʼaē ka hoko anai mo kapau ʼe fakatahiʼi ki te tui te ʼu kalitate ʼaē neʼe talanoa kiai ia Petelo, kae koteā ʼaē ka hoko anai mo kapau ʼe mole fai te faʼahi ʼaia?
16 Koteā anai te meʼa ʼaē ka hoko mo kapau ʼe fakatahiʼi te ʼu meʼa ʼaia e fitu ki tatatou tui? ʼE tali fēnei e Petelo: “Kapau ʼe koutou maʼu te ʼu meʼa ʼaenī pea mo mahu ia koutou, ʼe nātou taupau anai koutou ke ʼaua naʼa koutou fakapikopiko pea mo heʼe fua ʼo ʼuhiga mo te ʼatamai mālama totonu ʼaē ʼo totatou ʼAliki ko Sesu Kilisito.” (2 Petelo 1:8) ʼI te tahi faʼahi, ʼe ʼui fēnei e Petelo: “Kapau ʼe mole ʼi he tahi te ʼu meʼa ʼaenī, ʼe kivi ia, ʼo ina māpunuʼi tona ʼu mata ki te mālama, pea kua ina tuku ke ina galoʼi te fakamaʼa ʼo tana ʼu agahala ʼāfea.” (2 Petelo 1:9) Koutou fakatokagaʼi ʼe mole kei fakaʼaogaʼi e Petelo te ʼu kupu “koutou” pea mo “tatou,” kae ina fakaʼaogaʼi te ʼu kupu “he tahi,” “ ʼe ina,” pea mo “tona.” Logope la ʼe ko he meʼa fakaʼofaʼofa, ko ʼihi neʼe kivi, mo nātou galoʼi, pea mo heʼemaʼa, kae neʼe mole ʼui e Petelo ko ia ʼaē ʼe ina lau tana tohi ʼe kau ia nātou ʼaia.—2 Petelo 2:2.
Neʼe Ina Fakaloto Mālohiʼi Tona ʼu Tēhina
17. Koteā ʼaē neʼe lagi ina uga ia Petelo ke palalau ʼaki he agalelei, ke maʼuliʼi “te ʼu meʼa ʼaia”?
17 ʼI tana lagi ʼiloʼi ʼaē ʼe faigafua tāfito te fakaloto vaivai ʼo nātou ʼaē kei foʼofoʼou, ʼe fakaloto mālohiʼi fēnei nātou e Petelo ʼaki he agalelei: “Ko te tupuʼaga la ʼaia, ʼu tēhina, koutou faiga katoa te meʼa ʼaē ʼe koutou lavaʼi ke tuʼumaʼu takotou pāuiʼi pea mo takotou kua fili; he kapau ʼe koutou haga fai te ʼu meʼa ʼaia, pea ʼe mole feala anai ke koutou higa.” (2 Petelo 1:10; 2:18) Ko te kau Kilisitiano fakanofo ʼaē ʼe nātou fakatahiʼi ki tanatou tui te ʼu kalitate ʼaia e fitu, ʼe nātou maʼu anai te fakapale lahi, ohage ko tona ʼui fēnei e Petelo: “Koia, ʼe feiā anai te foaki lahi atu kia koutou ʼo te hū ʼaē ki te puleʼaga heʼegata ʼo totatou ʼAliki mo Fakamaʼuli ko Sesu Kilisito.” (2 Petelo 1:11) ʼE maʼu anai e te “tahi ʼu ōvi” te tofiʼa heʼegata ʼi te potu fakakelekele ʼo te Puleʼaga ʼo te ʼAtua.—Soane 10:16; Mateo 25:33, 34.
18. He koʼe ʼe lotolelei ia Petelo ke ina “fakamanatuʼi tuʼumaʼu” ki tona ʼu tēhina te ʼu meʼa ʼaia?
18 Neʼe loto moʼoni ia Petelo ke maʼu e tona ʼu tēhina te fakapale lahi ʼaia. ʼE ina tohi fēnei: “Koia, ʼe maʼua pe anai ke ʼau fakamanatu tuʼumaʼu atu kia koutou ia te ʼu meʼa ʼaia, logo la ʼe koutou ʼiloʼi pea ʼe koutou nofo mālohi ʼi te moʼoni.” (2 Petelo 1:12) ʼE fakaʼaogaʼi e Petelo te kupu faka Keleka ste·riʹzo, ʼaē ʼe fakaliliu ʼi te vaega ʼaki te kupu “koutou nofo mālohi,” kae neʼe fakaliliu ʼaki te kupu “fakamālohiʼi” ʼi te tokoni ʼaenī neʼe fai e Sesu ʼi muʼa atu kia Petelo: “Fakamālohiʼi ʼou tēhina.” (Luka 22:32) Ko te fakaʼaogaʼi ʼo te kupu ʼaia ʼe lagi ina fakahā mai te manatuʼi e Petelo te tokoni mālohi ʼaē neʼe ina maʼu mai tona ʼAliki. ʼI te temi ʼaenī, ʼe ʼui fēnei e Petelo: “ ʼE ʼau manatu ʼe tonu ke ʼau fakaʼalaʼala koutou ʼaki taku ʼu fakamanatu, ʼi te temi kei ʼau nofo ai ʼi te tapenakulo nei [te sino ʼo te tagata], ʼi taku ʼiloʼi kua ōvi mai te temi ke ʼau tuku ai toku tapenakulo.”—2 Petelo 1:13, 14.
19. Koteā te tokoni ʼaē ʼe ʼaoga kia tatou ia ʼaho nei?
19 Logope la ʼe ʼui e Petelo ʼaki he lotolelei, ko nātou ʼaē ʼe nātou lau tana tohi ʼe nātou “nofo mālohi ʼi te moʼoni,” kae ʼe ina ʼiloʼi ʼe feala ke hoko he tuʼutāmaki ki tanatou tui. (1 Timoteo 1:19) ʼI tana ʼiloʼi ʼaē kua vave mate, ʼe ina fakamālohiʼi tona ʼu tēhina, ʼo talanoa ki he ʼu meʼa ʼe feala ki muli age ke nātou toe manatuʼi, ke nātou mālolohi tuʼumaʼu ʼi te faʼahi fakalaumālie. (2 Petelo 1:15; 3:12, 13) ʼO toe feiā ia ʼaho nei, ʼe ʼaoga kia tatou ke fai tuʼumaʼu he ʼu fakamanatu, ke tou nonofo mālohi ʼi te tui. ʼO mole tou tokagaʼi totatou tuʼulaga, peʼe kua fualoa tatatou ʼi te moʼoni, ʼe mole tonu ke tou meʼa noaʼi te lau tuʼumaʼu ʼo te Tohi-Tapu, mo te ako takitokotahi, pea mo te kau ki te ʼu fono ʼo te kokelekasio. Ko ʼihi ʼe nātou takuʼaki tanatou mole kau ki te ʼu fono, ʼo nātou ʼui ʼe nātou gaʼegaʼe fau peʼe tatau tuʼumaʼu te ʼu meʼa ʼaē ʼe ʼui ʼi te ʼu fono, peʼe mole uga ai tanatou fia logo, kae neʼe mahino lelei kia Petelo te faigafua ʼaē ki he tahi ia tatou ke puli vave tana tui mo kapau ʼe lahi fau tana falala kia ia totonu.—Maleko 14:66-72; 1 Kolonito 10:12; Hepeleo 10:25.
Te Fakatafito Mālohi ʼo Tatatou Tui
20, 21. Neʼe fakaloto mālohiʼi feafeaʼi te tui ʼa Petelo e te fetogi fofoga ʼo Sesu pea mo nātou ʼaē neʼe nātou lau tana tohi, ʼo kau ai mo tatou ia ʼaho nei?
20 ʼE fakatafito koa tatatou tui ki he ʼu fagana neʼe faʼu e he ʼatamai poto? ʼE tali fakahagatonu fēnei e Petelo: “Kailoa, koteʼuhi neʼe mole mātou mulimuli ki he ʼu fagana fakapoto, ʼi te temi ʼaē neʼe mātou fakaʼiloʼilo atu kia koutou te mālohi pea mo te ʼafio ʼo totatou ʼAliki ko Sesu Kilisito, kae neʼe mātou sio mata ki tona taulekaleka ʼaupito.” Ko Petelo, mo Sake, pea mo Soane neʼe nātou fakatahi mo Sesu, ʼi te temi ʼaē neʼe nātou sisio ai ki tana hā ʼi te mālohi ʼo te Puleʼaga. ʼE fakamahino fēnei e Petelo: “Neʼe ina tali mai te ʼAtua te Tāmai, te faka maʼuhiga pea mo te kolōlia, ʼi te temi neʼe hifo mai ai te leʼo mai te kolōlia lahi ʼo te ʼAtua ʼo folafola maʼana: ‘Ko ia ʼaenī ʼe ko toku ʼAlo ʼofaina, ʼe ko ia ʼaē neʼe tau mo ʼau ke ʼau filifili.’ ʼIo, ko te leʼo ʼaenī neʼe mātou logoʼi, neʼe hifo ia mai te lagi ʼi te temi neʼe mātou fakatahi ai mo ia ʼi te fuga moʼuga taputapu.”—2 Petelo 1:16-18.
21 ʼI te temi ʼaē neʼe sio ai ia Petelo, mo Sake, pea mo Soane ki te meʼa ʼaia neʼe hā, ʼe mahino papau ia neʼe liliu te Puleʼaga ko he meʼa moʼoni kia nātou! ʼE ʼui fēnei ai e Petelo: “Koia ʼe mātou maʼu te ʼu tala ʼa te kau polofeta kua ʼāsili moʼoni age; pea ʼe lelei ke koutou tokaga ki ai.” ʼE moʼoni, ko nātou ʼaē neʼe nātou lau te tohi ʼa Petelo, ʼo kau ai mo tatou ia ʼaho nei, neʼe tonu ke nātou tokagaʼi te ʼu lea faka polofeta ʼo ʼuhiga mo te Puleʼaga ʼa te ʼAtua. ʼE tonu ke tou tokagaʼi feafeaʼi? ʼE tali fēnei e Petelo: “Ohage he mālama ʼe mū ʼi he faʼahi fakapōʼuli, ʼo kaku ki te ʼahoʼaho ake pea mo te hopo ake ʼo te fetuʼu ʼaho ʼi tokotou ʼu loto.”—2 Petelo 1:19; Taniela 7:13, 14; Isaia 9:6, 7.
22. (a) Koteā ʼaē ʼe tonu ke tokaga kiai totatou loto? (b) ʼE lava feafeaʼi ke tou tokagaʼi te ʼu lea faka polofeta?
22 ʼE fakapōʼuli anai totatou loto mo kapau ʼe mole tou maʼu te fakamālama ʼo te ʼu lea faka polofeta. Kae ʼi tanatou tokakaga kiai, ʼe nofo tokaga te ʼu loto ʼo te kau Kilisitiano ʼo aʼu ki te ʼahoʼaho ake, te temi ʼaē ʼe hopo ake ai te “fetuʼu ʼaho,” ko Sesu Kilisito, ʼi te kolōlia ʼo te Puleʼaga. (Fakahā 22:16) Ia ʼaho nei, ʼe tou tokakaga feafeaʼi ki te ʼu lea faka polofeta? ʼAki tatatou ako te Tohi-Tapu, mo tatatou teuteuʼi te ʼu fono pea mo tou kau kiai, pea mo ‘fakakaukauʼi te ʼu meʼa ʼaia, pea mo nofoʼaki ʼi te ʼu meʼa ʼaia.’ (1 Timoteo 4:15) Kapau ʼe liliu te ʼu lea faka polofeta ohage ko he mālama ʼe gigila ʼi te “fakapōʼuli” (totatou loto), ʼe tonu ke tou tuku ke malave mālohi ki totatou loto—ki tatatou ʼu holi, te ʼu meʼa ʼaē ʼe tou logoʼi mo uga totatou loto, pea mo tatatou ʼu fakatuʼutuʼu. ʼE tonu ke tou ako te Tohi-Tapu, koteʼuhi neʼe fakaʼosi fēnei e Petelo te ʼuluaki kapite: “ ʼE mole he lea faka polofeta ʼo te Tohi-Tapu ʼe haʼu mai he fakamahino ʼa he tokotahi. Heʼe ko te lea faka polofeta neʼe mole ʼaumai ʼaki te finegalo ʼo te tagata, kae neʼe palalau te ʼu tagata ʼi te fekau ʼa te ʼAtua, ʼi tonatou takina e te laumālie maʼoniʼoni.”—2 Petelo 1:20, 21.
23. Neʼe teuteu kiteā ia nātou ʼaē neʼe nātou lau te ʼuluaki kapite ʼo 2 Petelo?
23 ʼI te ʼuluaki kapite ʼo tana lua tohi, neʼe foaki mai e Petelo he fakaloto mālohi lahi kia tatou ke tou pipiki mālohi ki tatatou tui. ʼI te temi nei, kua tou teuteu ke tou vakavakaʼi te ʼu faʼahi maʼuhiga ʼaē ʼe hoa mai. ʼE talanoa anai te alatike ʼaē ka hoa mai ki te kapite 2 ʼo 2 Petelo, ʼaē ʼe talanoa ai te ʼapositolo ki te tauʼi ʼo te ʼu mālohi heʼeʼaoga ʼaē neʼe hū ki te ʼu kokelekasio.
ʼE Kei Koutou Manatuʼi Koa?
◻ He koʼe neʼe faka maʼuhigaʼi e Petelo te ʼatamai mālama?
◻ Koteā te lagi tupuʼaga ʼo te ʼui ʼaē ko te vilitute ʼe ko te ʼuluaki kalitate ʼaē ʼe tonu ke hilifaki ki te tui?
◻ He koʼe neʼe lotolelei tuʼumaʼu ia Petelo ke ina fai ki tona ʼu tēhina he ʼu fakamanatu?
◻ Koteā te fakatafito mālohi ʼe foaki mai e Petelo ki tatatou tui?
[Paki ʼo te pasina 9]
Ko te ʼu hala ʼaē neʼe fai e Petelo neʼe mole tupu ʼaki ai hana līaki ʼo tana tui