Te ʼu Fehuʼi ʼa Te Kau Lautohi

Koteā te papitema maʼa te kau mate?

ʼI tana faitohi ʼo ʼuhiga mo te fakatuʼuake ki selo, neʼe tohi e te ʼapositolo ko Paulo ia te manatu makehe ʼaupito. ʼI te Tohi-Tapu King James Version, ʼe tou lau fēnei: “Koteā anai ka fai e nātou ʼaē neʼe papitema maʼa te kau mate, mo kapau la ʼe mole fakatuʼuake anai ʼi he temi ia te kau mate? He koʼe koa neʼe papitema ia nātou ʼaia maʼa te kau mate?” ʼE fakaliliu fēnei te vaega ʼaia e te Tohi-Tapu The New Jerusalem Bible: “Koteā anai ka maʼu e nātou ʼaē neʼe papitema maʼa te kau mate? Kapau anai ʼe mole fakatuʼuake te kau mate, he koʼe koa neʼe papitema maʼa nātou?”​—1 Kolonito 15:29.

ʼI henī, neʼe palalau koa ia Paulo ko nātou ʼaē ʼe kei maʼuʼuli ʼe nātou papitema maʼa nātou ʼaē neʼe mamate kae neʼe mole heʼeki nātou papitema? ʼE hage ia ko tona faka ʼuhiga ʼaia pea ʼe fakaliliu feiā ʼi ʼihi Tohi-Tapu. Kae, kapau ʼe tou sivisivi fakalelei te ʼu vaega faka Tohi-Tapu mo te lea Faka Keleka ʼo te temi muʼa ʼaē neʼe fakaʼaogaʼi e Paulo, ʼe tou maʼu ai te tahi manatu. Ko te faka ʼuhiga ʼo te palalau ʼa Paulo, ko te kau Kilisitiano ʼaē kua nātou papitema, peʼe kua nātou uku, ki te maʼuli ʼe ina taki anai nātou ki he mate agatonu ohage ko Kilisito. Hili ʼaia, pea hoki fakatuʼuake ia nātou ki he maʼuli fakalaumālie ohage ko ia.

ʼE lagolago te Tohi-Tapu ki te fakamahino ʼaia. ʼI tana tohi ki te kau Loma, neʼe tohi fēnei e Paulo: “Pe mole iloi e koutou, ko tatou fuli ae kua papitema ia Kilisito Sesu, nee papitemai tatou i tona puluhia?” (Loma 6:3) ʼI tana tohi ki te kau Filipe, neʼe palalau ia Paulo ʼo ʼuhiga mo ia totonu ʼo ina ʼui fēnei: “ ʼE ʼau kau ki te ʼu mamahi [ʼa Kilisito], ʼo ʼau taki ia ʼau totonu ki he mate ʼe tatau mo ia, ke vakaʼi ai peʼe ʼau lava kaku ʼi he faʼahiga ʼaluʼaga pe ki te fakatuʼuake ʼaia ʼo te kau mate ʼaē ʼe kamata tautonu.” (Filipe 3:​10, 11, MN ) Neʼe fakamahino ai e Paulo, ʼe kau ki te maʼuli ʼo he tisipulo fakanofo ʼa Kilisito ia te ʼahiʼahiʼi ʼo tana agatonu, ko tona maʼuli ʼe felāveʼi aipe mo te mate ʼi te ʼaho fuli, pea ʼe feala pe ke iku ki hana mate agatonu, pea hoa kiai tana fakatuʼuake ki te maʼuli ʼi te lagi.

Ko te faʼahi ʼe lelei ke tokagaʼi, he ko te ʼu vaega ʼaenī feiā mo ʼihi vaega ʼe palalau fakahagatonu ai ki te mate mo nātou ʼaē ʼe papitema, ʼe faka ʼuhiga ia ki te hahaʼi maʼuʼuli kua nātou papitema kae ʼe mole faka ʼuhiga ia kia nātou ʼaē kua mamate. Neʼe toe ʼui fēnei e Paulo ki tona ʼu tēhina Kilisitiano fakanofo: “Nee avaifo koutou fakatahi mo ia i te papitema, pea e fakatuuake koutou fakatahi mo ia aki tautou tui ki te gaue a te Atua ae nee ina fakatuuake iaʼia mai te mate.”​—Kolose 2:​12.

Ko te kupuʼi palalau faka Keleka ʼaē ʼe fakatuʼu ʼi muʼa ʼaē ko te hupér, ʼaē neʼe fakaliliu ʼi ʼihi Tohi-Tapu ki te kupu “maʼa” ia 1 Kolonito 15:29, ʼe feala ke toe faka ʼuhiga ki te kupuʼi palalau “ke liliu ko.” ʼO mulimuli ki te tahi ʼu koga tohi faka Tohi-Tapu, ʼe fēnei tona fakaliliu fakalelei te vaega ʼaia e te Tohi-Tapu Traduction du monde nouveau : “Koteā anai ka fai e nātou ʼaē ʼe lolotoga nei tonatou papitemaʼi ke nātou liliu ko he kau mate? Kapau la ʼe mole tonu ke fakatuʼuake anai te kau mate, he koʼe koa ʼe lolotoga nei tonatou papitemaʼi ke nātou liliu ai ko he kau mate?”