Te ʼu Fehuʼi ʼa Te Kau Lautohi

Koteā ʼaē ʼe tonu ke tokagaʼi e te kau Kilisitiano mo kapau ʼe nātou fia ʼai he ʼu maka maʼuhiga ʼo te māhina ʼo tonatou ʼaho tupu?

ʼI ʼihi fenua, ʼe ʼui ko te ʼu maka maʼuhiga, ʼe ʼi ai tonatou pikipikiga mo te māhina ʼo te ʼaho tupu. Peʼe ʼai e he Kilisitiano hona foʼi mama mo he faʼahiga maka maʼuhiga, ʼe ko he tonu ʼe fakalogo kia ia tokotahi. (Kalate 6:5) ʼI te fai ʼo te tonu ʼaia, ʼe ʼi ai te ʼu faʼahi maʼuhiga ʼe tonu ke nātou tokagaʼi.

ʼE ʼui fēnei e te Encyclopaedia Britannica ʼo ʼuhiga mo te maka maʼuhiga ʼo te māhina ʼo te ʼaho tupu ʼa he tahi, ʼe ko he “maka maʼuhiga ʼe faka ʼalutahi mo te ʼaho tupu ʼo he tahi, pea neʼe lau ko te ʼai ʼo te mama ʼaia ʼe kita maʼu ai te lasio peʼe kita maʼuli haohaoa ai.” ʼE toe ʼui fēnei e te tohi ʼaia: “Neʼe lau e te hahaʼi ʼaē ʼe fai fakakikite ʼaki te ʼu fetuʼu ʼe ʼi ai te ʼu mālohi fakamanamana ʼe maʼu ʼi te faʼahiga maka maʼuhiga.”

Tāfito la ʼi te ʼu temi muʼa, ʼi te manatu ʼa te hahaʼi tokolahi, ka ʼai e he tahi ia he maka maʼuhiga ʼo te māhina ʼo tona ʼaho tupu pea ʼe ina maʼu ai tona lasio. ʼE tui koa te Kilisitiano moʼoni ki te faʼahi ʼaia? Kailoa ia, koteʼuhi ʼe mahino kia ia ko Sehova ʼe ina tauteaʼi ia nātou ʼaē neʼe nātou lītuʼa kia ia kae nātou falala ki “te ʼatua ʼo te Lasio.”​—Isaia 65:11.

Lolotoga te Moyen-Âge, neʼe filifili e te hahaʼi fai fakakikite ia he maka maʼuhiga ki te ʼu māhina fuli ʼo te taʼu. Neʼe nātou fakaloto mālohiʼi te hahaʼi ke nātou ʼai te faʼahiga maka maʼuhiga ʼaia, he neʼe nātou lau ko ia ʼaē ʼe ina ʼai te faʼahiga mama ʼaia, ʼe puipui anai ia ia mai he tuʼutāmaki. Kae ki te kau Kilisitiano ʼaē ʼe nātou muliʼi ia te ʼu meʼa ʼaē ʼe fakahā age e te hahaʼi fai fakakikite ʼe nātou hala, koteʼuhi ʼe tauteaʼi te faʼahiga hahaʼi ʼaia e te Tohi-Tapu.​—Teutalonome 18:9-12.

Pea ʼe mole tau anai mo he kau Kilisitiano ke nātou faka maʼuhigaʼi he mama ʼuhi pe heʼe piki ai ia te maka maʼuhiga ʼo te māhina ʼo tonatou ʼaho tupu. ʼE mole faka maʼuhigaʼi e te kau Fakamoʼoni ʼa Sehova ia te ʼu ʼaho tupu. ʼE mole nātou fai te ʼu faʼahi ʼaia koteʼuhi ko te ʼu taʼi fakafiafia ʼaia ʼe nātou faka maʼuhigaʼi fau te tagata, pea ko te ʼu ʼaho tupu pe ʼaē ʼe tuʼu ʼi te Tohi-Tapu, ʼe ko te ʼu ʼaho tupu ʼa te ʼu tagata pule neʼe mole tauhi ki te ʼAtua.​—Senesi 40:20; Mateo 14:6-10.

Ko ʼihi hahaʼi ʼe nātou manatu ko te ʼai ʼo he foʼi mama ʼe pipiki ai he maka maʼuhiga ʼo te māhina ʼo tonatou ʼaho tupu ʼe feala ke ʼi ai hona ʼu fua lelei ki tanatou aga. Kae ʼe mole tui te kau Kilisitiano moʼoni ki te faʼahi ʼaia, koteʼuhi ʼe nātou mahino ko “te tagata foou” ʼe maʼu mai te gāue ʼa te laumālie maʼoniʼoni ʼo te ʼAtua, pea mo te maʼuliʼi ʼo te ʼu pelesepeto faka Tohi-Tapu.​—Efeso 4:22-24.

ʼE ʼi ai te puani maʼuhiga ʼe tonu ke vakaʼi, peʼe koteā te fakatuʼutuʼu ʼo te faʼahi ʼaia. ʼO ʼuhiga mo te filifili ʼa he Kilisitiano peʼe ina ʼai he mama ʼe pipiki ai he maka maʼuhiga ʼo te māhina ʼo tona ʼaho tupu, ʼe lelei ke ina fai te fehuʼi ʼaenī, ‘ ʼE ʼau fia ʼai koa te mama ʼaenī ʼuhi heʼe ʼau leleiʼia te maka ʼaē ʼe pipiki ai, logola ʼe ko he maka maʼuhiga ʼo te māhina ʼo toku ʼaho tupu? Peʼe ʼau mulimuli koa ki he faʼahiga manatu fakamanamana ʼe fakapipiki e ʼihi hahaʼi ki te taʼi maka maʼuhiga ʼaia?’

ʼE tonu ki te Kilisitiano ke ina vakavakaʼi tona loto ke ina ʼiloʼi ai te ʼu meʼa ʼaē ʼe ina uga ia ia ke ina fai te faʼahi ʼaia. ʼE ʼui fēnei e te Tohi-Tapu: “Ko te meʼa tāfito ʼaē ʼe tonu ke hāofaki, hāofaki tou loto, heʼe ko ia te ʼu matapuna ʼo te maʼuli.” (Tāʼaga Lea 4:23) ʼI tana fai te tonu ʼo ʼuhiga mo te maka maʼuhiga ʼo te māhina ʼo tona ʼaho tupu, ʼe tonu ki te Kilisitiano fuli ke ina vakavakaʼi fakalelei te meʼa ʼaē ʼe ina uga ia ia pea mo tona ʼu ikuʼaga kia ia totonu pea mo ʼihi.​—Loma 14:13.