“ ʼE ʼIloga Lelei Te Mālohi ʼo Te Folafola ʼa Te ʼAtua!”
“E MAULI te folafola a te Atua, pea e gaue.” (Hepeleo 4:12) ʼE maʼu te ʼu fakamoʼoni ki te mālohi ʼaia ʼo te Folafola ʼa te ʼAtua, ʼi te ʼu fakamatala moʼoni e ono ʼa te ʼu hahaʼi mai te malamanei katoa ʼi te kaletalio Calendrier des Témoins de Jéhovah 2003. ʼI lalo ifo ʼo te kupu tāfito “ Avant et après ” (Tona Maʼuli ʼi Muʼa Pea Ki Muli Age), neʼe fakahā e te kaletalio ia te tokoni ʼaē ʼe fai e te kau Fakamoʼoni ʼa Sehova moʼo akoʼi te hahaʼi ke nātou hikihiki tonatou maʼuli, mo nātou līaki tonatou faʼahiga maʼuli ʼaē ʼe fakatupu kovi kia nātou, pea mo nātou fakamālohiʼi tonatou maʼuli faka famili, pea mo nātou taupau hanatou ʼu felogoi takitokotahi mo te ʼAtua.
Neʼe momoli mai te ʼu tuʼuga tohi ʼo ʼuhiga mo te leleiʼia ʼo te kaletalio ʼo te taʼu 2003. Koʼeni te vaega ʼo te ʼu fakamatala ʼaia:
“Ko te kaletalio ʼaenī ʼe ko te fakamoʼoni ki te kau Kilisitiano moʼoni, ʼe ʼi ai ʼihi ohage ko nātou ʼaenī neʼe tau mālohi ʼo ʼuhiga mo te tui. ʼI te temi nei ʼe feala ke nātou sioʼi te ʼu paki ohage ko he fakamanatu age kia nātou te ʼu fetogi ʼaē neʼe nātou fai.”—Steven, Amelika.
“Neʼe ʼau fia tohi te ʼu kiʼi kupuʼi palalau ʼaenī moʼo fakahā atu te malave ʼi toku loto ia te kaletalio ʼo te taʼu 2003. Neʼe mole heʼeki ʼi ai he kaletalio neʼe kua malave feiā kia ʼau. Ko te ʼu fakamatala ʼaenī ʼo tonatou maʼuli, ʼe ʼau feʼāveʼaki anai mo ʼau ʼi taku kato fai faka mafola, moʼo fakahā ki te hahaʼi ia te fakamoʼoni mālohi ʼe feala ki te Tohi-Tapu ke ina fetogi te maʼuli ʼo te hahaʼi.”—Marc, Pelesike.
“Neʼe malave ʼaupito kia ʼau ia te kaletalio. Neʼe ʼau logoʼi ʼi toku loto ʼi taku lau pea mo sio ki te fetogi ʼaē neʼe fai e Sehova ki te hahaʼi ʼaia. Ko te meʼa neʼe hoko ai, neʼe uga ai ʼau ke ʼau haga fai te ʼu fetogi ʼi toku maʼuli. ʼI te temi nei kua ʼau logoʼi ʼe ʼau kau ki te famili ʼo te ʼu tēhina ʼi te malamanei katoa.”—Mary, Amelika.
“Neʼe malave ʼaupito kia Sesu ia te fakaʼofaʼofa fakalaumālie ʼo te hahaʼi. ʼE fakamālo atu kia koutou ʼi takotou faʼifaʼitakiʼi ia Kilisito, ohage ko tona hā ʼi te ʼu fakamatala ʼo te ʼu hisitolia ʼaē ʼe tuʼu ʼi tatatou kaletalio ʼo te taʼu 2003. Neʼe mole heʼeki ʼi ai he kaletalio kua malave feiā ʼi toku loto ʼo iku ai mo taku tagi.”—Cassandra, Amelika.
“ ʼI te temi ʼaē neʼe ʼau taʼu 11 ai, neʼe ʼau kamata suluka pea ki muli age neʼe ʼau toloke. Neʼe ʼau tautau manatu ke ʼau fakamate. ʼI taku ʼiloʼi ʼaē ia Sehova, neʼe tokoniʼi ia ʼau ke ʼau līaki te ʼu agamāhani ʼaia. Neʼe maʼuhiga ʼaupito ia te kaletalio ʼaenī kia ʼau. Neʼe fakamālohiʼi ʼau e te ʼu faʼifaʼitaki ʼo toku ʼu tēhina mo tuagaʼane ʼi te malamanei katoa. Kua ʼau ʼiloʼi leva ʼi te temi nei, ʼe mole ʼau tokotahi ʼi te tau ʼaia, pea ko te meʼa ʼaē ʼe maʼuhiga tāfito ʼe ko te ʼofa kia Sehova pea mo te tauhi fakamalotoloto kia te ia.”—Margaret, Polonia.
“ ʼE ʼiloga lelei te mālohi ʼo te folafola ʼa te ʼAtua! ʼI taku maʼu ia te kaletalio ʼo te taʼu 2003, neʼe ʼau faiga ke ʼaua naʼa ʼau tagi. Ko te ʼu fakamatala ʼaenī, fakatahi mo te ʼu paki, ʼe ko he meʼa fakaloto mālohi ki te tui.”—Darlene, Amelika.
“ ʼE teitei ʼalutahi te faʼahiga maʼuli ʼāfea ʼa ʼihi ia nātou ʼaia mo toku faʼahiga maʼuli ʼāfea. Neʼe foaki mai e Sehova ia te mālohi ke ʼau līaki te ʼu agamāhani kovi ʼaē neʼe mata faigataʼa tona līaki. ʼE fakamālo ʼaupito atu ki te ʼu fakamatala moʼoni ʼaia ʼo tonatou maʼuli.”—William, Amelika.