“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—Neʼe Tokoni Age Te ʼu Pelesepeto Faka Tohi-Tapu Ke Ina Fai He Toe Fetogi
KO ADRIAN neʼe ko he tūpulaga neʼe aga ʼitaʼita pea mo lotokovi. Ko tana hoko ʼita neʼe tupu ai te ʼu ʼita kovi. Neʼe ʼinu, mo suluka pea neʼe maʼuli heʼeʼaoga. Neʼe ʼiloa ia Adrian ko te punk pea neʼe ʼi ai tona tā neʼe ina fakaʼiloga tana faka tui ki te maʼuli maveuveu. ʼI tana fakamatala te ʼu taʼu ʼaia, ʼe ina ʼui fēnei: “Neʼe ʼau kosi toku ʼulu ke ʼau hage ko he punk, pea mo ʼau pani te gako ke fakatuʼu toku ʼu fuluʼi ʼulu, pea ʼi ʼihi temi neʼe ʼau pena kula peʼe ko he tahi age lanu.” Neʼe puhi e Adrian mo tona ihu.
Neʼe ʼalu ia Adrian ʼo nofo mo ʼihi kau tūpulaga agatuʼu ʼi te fale neʼe kua maumau. Neʼe nātou ʼinu kava ai pea mo nātou toloke. ʼE fakamatala fēnei e Adrian: “Neʼe ʼau fakaʼaogaʼi ia te toloke pea neʼe ʼau ʼai fakatahi mo te Valium pea mo he meʼa pe ʼe ʼau maʼu. Kapau neʼe mole kei ʼi ai he toloke peʼe ko he colle, neʼe ʼau fakahali ki haku moʼi kie ia te penisini ʼo te ʼu motokā, pea neʼe ʼau hohogi mālohi ke puli ai toku ʼatamai.” ʼI tana maʼuli ʼi te ala, neʼe fakamatakutaku te aga ʼa Adrian pea neʼe agamālohi ʼaupito. ʼI te agamāhani neʼe mole ʼi ai he tahi neʼe fia kē mo ia. ʼI te temi ʼaia, ko te hahaʼi agakovi neʼe nātou fia fakakaugā mo ia.
Māmālie pe, neʼe mahino kia Adrian ko tona “ ʼu kaumeʼa” neʼe nātou fakatahi mo ia ʼuhi pe ko te ʼu meʼa ʼaē neʼe feala ke nātou maʼu mai ia ia. Pea tahi ʼaē meʼa, neʼe kua ina maʼu leva te manatu ʼaenī, “neʼe mole ʼi ai he ikuʼaga ʼo toku ʼita fuli pea mo taku agamālohi.” ʼI tana lotomamahi pea mo tana logoʼi neʼe mole ʼi ai he ʼuhiga ʼo te maʼuli, neʼe lītuʼa ki te hahaʼi ʼaē neʼe fakatahi mo ia. ʼI tana maʼu Te Tule Leʼo ʼi te fale gāue, neʼe fia fai ki te logo faka Tohi-Tapu ʼaē neʼe tuʼu ai, pea neʼe fai ai tana ako faka Tohi-Tapu mo te kau Fakamoʼoni ʼa Sehova. Neʼe tali fakalelei e Adrian ia te fakaafe ʼaenī: “Koutou fakaovi ki te Atua pea e fakaovi atu anai kia koutou.” (Sakopo 4:8) Ko te meʼa ʼaē neʼe hoko ai, neʼe vave te tokagaʼi e Adrian te maʼua ʼaē ke ina maʼuliʼi te ʼu pelesepeto ʼaē ʼe maʼu ʼi te Tohi-Tapu.
Ko te tuputupu ʼo tana mālama ki te Tohi-Tapu, neʼe fua lelei ki te leʼo ʼo loto ʼo Adrian, pea mo tona maʼuli. Neʼe tokoni te ako ʼaia ke ina lolomi tana hoko ʼita pea mo ina gāueʼi te loto lolomi. ʼAki te mālohi ʼo te Folafola ʼa te ʼAtua, neʼe fetogi ai te aga ʼa Adrian.—Hepeleo 4:12.
Kae ʼe lava feafeaʼi ki te Tohi-Tapu ke mālohi feiā moʼo fakatupu he ʼu fetogi ʼi he tahi? ʼE tokoni mai te ʼatamai mālama ʼo ʼuhiga mo te Tohi-Tapu ke tou “kofu ki te tagata foou.” (Efeso 4:24) ʼE fetogi tatatou aga heʼe tou maʼuliʼi ia te ʼatamai mālama totonu ʼaē ʼe maʼu ʼi te Tohi-Tapu. Kae ʼe fetogi feafeaʼi te hahaʼi e te ʼatamai mālama ʼaia?
ʼUluaki ʼe fakaʼiloga lelei e te Tohi-Tapu ia te ʼu agaaga kovi ʼo te ʼuhigaʼi tagata ʼaē ʼe tonu ke līaki. (Tāʼaga Lea 6:16-19) Lua, ʼe uga tatou e te Tohi-Tapu ke tou maʼu te ʼu kalitate lelei ʼaē ʼe fakatupu e te laumālie maʼoniʼoni ʼo te ʼAtua. Ohage ko “te ofa, te fiafia, te tokalelei, te kataki, te agalelei, te agaofa, te agatonu, te agamalu, te agalolomi.”—Kalate 5:22, 23.
Ko he mahino loloto ki te ʼu meʼa ʼaē ʼe fakamaʼua mai e te ʼAtua, neʼe tokoni kia Adrian ke ina vakavakaʼi ia ia pea mo tokagaʼi te ʼu agaaga ʼo te ʼuhigaʼi tagata ʼaē neʼe tonu ke ina maʼuliʼi pea mo te ʼu agaaga ʼaē neʼe tonu ke ina molehi. (Sakopo 1:22-25) Kae neʼe mole tonu ke gata ai. ʼO hilifaki atu ki te ʼatamai mālama, neʼe tonu ke ʼi ai he meʼa ʼe ina uga ia Adrian ke tupu ai hana fia fetogi.
Neʼe akoʼi e Adrian ko te ʼuhigaʼi tagata foʼou ʼaē ʼe leleiʼia, ʼe mulimuli “ki te fakatata o ia ae nee ina fakatupu.” (Kolose 3:10) Neʼe mahino kia ia ʼe tonu ke tatau tona ʼulugaaga faka Kilisitiano mo te ʼulugaaga ʼo te ʼAtua. (Efeso 5:1) ʼAki tana ako te Tohi-Tapu, neʼe akoʼi ai e Adrian ia te ʼu felogoi ʼa Sehova mo te malamanei, pea mo ina tokagaʼi te ʼu kalitate matalelei ʼo te ʼAtua, ohage ko tona ʼofa, mo tana agalelei, mo tona lotoʼofa, mo tona manavaʼofa, pea mo tana faitotonu. Ko te taʼi mālama ʼaia neʼe ina uga ia Adrian ke ʼofa ki te ʼAtua pea mo faigaʼi ke liliu ko te faʼahiga tagata ʼaē ʼe leleiʼia e Sehova.—Mateo 22:37.
ʼAki te temi pea mo te tokoni ʼa te laumālie maʼoniʼoni ʼo te ʼAtua, neʼe lava lolomi e Adrian tana agamālohi. ʼI te temi nei ko ia mo tona ʼohoana ʼe nā maʼumaʼua moʼo tokoni ki te hahaʼi ke nātou fetogi tonatou maʼuli ʼaki tanatou mālama ki te Tohi-Tapu. ʼE ʼui fēnei e Adrian: “Kua lahi toku ʼu kaumeʼa ʼāfea kua nātou mamate, kae ʼe kei ʼau maʼuli pea mo maʼuli fiafia mo toku famili.” Ko Adrian ʼe ko he fakamoʼoni lelei ʼaia ʼo te mālohi ʼaē ʼe maʼu e te Tohi-Tapu moʼo fetogi ia te ʼu maʼuli ʼo te hahaʼi ke ʼi ai hona ʼu fua lelei kia nātou.
[Talanoa ʼo te pasina 25]
Te ʼu Pelesepeto Faka Tohi-Tapu ʼe Nātou Fetogi Te Maʼuli
Koʼeni te ʼu pelesepeto faka Tohi-Tapu neʼe tokoni ki te hahaʼi tokolahi neʼe aga ʼitaʼita pea mo agamālohi ke nātou liliu ko he ʼu hahaʼi ʼe nātou maʼuli ʼi te tokalelei:
“Koutou nofo tokalelei mo te hahai fuape. U ofaina, aua naa koutou lagavaka, kae koutou tuku ki te hauhau o te Atua [ke fakalaka te ʼita, MN ].” (Loma 12:18, 19) Koutou tuku ki te ʼAtua ke ina fakafuafua peʼe ko te temi fea pea ko ai ʼaē ʼe tonu ke fakahoko ki ai te lagavaka. ʼE ina lava fai te faʼahi ʼaia koteʼuhi ʼe ina ʼiloʼi katoa te ʼu meʼa ʼaē neʼe hoko, pea ko he tautea ʼe ina fakahoko ʼe ʼiloga ai anai tona faitotonu haohaoa.
“Iʼita pe, kae aua naa koutou agahala ai, vakai naa to ifo te laa ki toutou ita. Aua naa koutou tuku he faigamalie ki te temonio.” (Efeso 4:26, 27) ʼE feala pe ki he tahi ke matatonu tana ʼita ʼi he lakaga. Kapau ʼe hoko te faʼahi ʼaia, ʼe mole tonu ke nofo mo tona “ita.” Koteā tona tupuʼaga? Koteʼuhi ko te faʼahi ʼaia ʼe ina lava fakaneke ia ia ke ina fai he meʼa ʼe kovi, ʼo ina tuku ai “he faigamalie ki te temonio,” pea lītuʼa ia Sehova ʼAtua kia ia.
“Siʼaki te ʼita pea mo līaki te hāūhāū; ʼaua naʼa ke pukea naʼa ke fai pe he meʼa ʼe kovi.” (Pesalemo 37:8) Kapau ʼe mole kita lolomi tokita ʼita, pea ʼe feala ke kita fai ai he ʼu aga ʼe mole fakatātāʼofi. Kapau ʼe mole lolomi e he tahi tona ʼita, pea ʼe ina fai anai he ʼu palalau peʼe ko he ʼu aga ʼe mamahi ai anai te ʼu hahaʼi ʼaē ʼe pipiki mai ki ai.
[Paki ʼo te pasina 25]
“Neʼe mole ʼi ai he ikuʼaga ʼo toku ʼita fuli pea mo taku agamālohi”