“ ʼE Hage Ia ʼe Mole Fealagia Ke Tou Palalau!”
KO MICHAEL, ko te tagata avoka, neʼe tonu ke poto ʼi te fakahoko palalau. Ko tana gāue ʼaē neʼe ina fakamaʼua ia ia ki te faʼahi ʼaia. Kae hili taʼu e 16 ʼo tana nofo ʼohoana, neʼe fakahā fakahagatonu e Michael, mokā aʼu ki fale ki tona ʼohoana ko Adrienne, ko tana fakahoko faiva neʼe hage ʼe pulinoa ʼosi. ʼE manatuʼi e Michael: “Neʼe ko te ʼu lāuga, ko te ʼu meo, pea mo te ʼu mahalohalo, ko Adrienne pea mo ʼau neʼe ma kē tuʼumaʼu pe, pea neʼe ʼau manatu ko te meʼa ʼaia ʼe ina maumauʼi anai māua. Neʼe ʼau fakakaukauʼi peʼe feiā te nofo ʼohoana, ko he ʼaluʼaga heʼegata ʼo he ʼu fihi hoholo. Kapau ko te faʼahi ʼaia neʼe tonu ke feiā ʼi te maʼuli katoa, neʼe ʼau fia hola ʼau mai ai — ko taku moʼoni. Neʼe mole ʼau fia loto ki he maʼuli feiā ia taʼu e 20, 30, 40.”
Ko te ʼu manatu fēnei neʼe mole hoko pe ia kia Michael pea mo Adrienne. Ko te ʼu vāhaʼa ʼa te ʼu taumatuʼa tokolahi ʼe hage ko nāua, ko te ʼu fihi pea mo te ʼu tatāʼofi. Ko te ʼu felogoi noa pe ʼe malaga ai he ʼu feleaʼaki. ʼE nātou “fagono” ki te ʼu palalau neʼe mole puaki. ʼE nātou ʼui te ʼu meʼa ʼe mole nātou manatu pe la kiai. ʼE nātou fefihiʼaki pea mo fetukugakoviʼaki, pea nātou tahi nonofo felotokoviʼaki. ʼE mole nātou mavete, kae ko nātou ʼe mole kei nātou maʼuʼuli “ko he kakano e tahi”. (Senesi 2:24.) Ko te felogoi ʼe kua māpunuʼi ia. Ko te haʼele ki muli ʼe faka ʼuhiga anai ko te mavete; ko te haʼele ki muʼa ʼe faka ʼuhiga anai ko te ʼu fihifihia. Moʼo tekeʼi te mamahi ʼaē ʼe hoko anai mai te ʼu fili ʼaia e lua, ko te ʼu taumatuʼa ʼaia ʼe nātou fakatotonu ia nātou ke nātou tahi nofo mamaʼo koteʼuhi ke nātou tokalelei ai.
Ko te ʼu taʼi taumatuʼa ʼaia ʼe ʼaoga ke nātou ‘maʼu te poto ʼaē ʼi te taki’ ʼi tanatou nofo ʼohoana (Tāʼaga Lea 1:5). Ko te taki ʼe feala ke maʼu ʼi te Folafola ʼa te ʼAtua, ko te Tohi-Tapu. Ko te lua tohi ʼa Paulo kia Timoteo ʼe fakamoʼoni ko te Tohi-Tapu ʼe “ ʼaoga moʼo akoʼi, moʼo fakatotonuʼi, moʼo fakatokatoka ʼo te ʼu meʼa fuli”. (2 Timoteo 3:16.) Ko te Folafola ʼa te ʼAtua ʼe feala ke ina fakatokatoka te vāhaʼa faka taumatuʼa, ohage ko te meʼa ka tou vakaʼi.