‘ ʼE Mole Nofo Te ʼAtua ʼi He ʼu Fale Lotu Neʼe Faʼu e Te Tagata’
ʼE MAHINO ia, neʼe kua māhani te ʼapositolo ko Paulo ʼi te sio ki te ʼu fale lotu ʼo Athéna, koteʼuhi neʼe ʼi ai te ʼu fale lotu feiā ʼi te ʼu kolo kehekehe ʼaē neʼe ʼalu kiai lolotoga tana ʼu folau misionea. ʼI te tohi The Encyclopædia Britannica, ʼe ʼui ai neʼe ʼiloa ia Athéna, neʼe ko te ʼatua fafine ʼo te tau pea mo te poto, kae mole gata ai he neʼe ko te ʼatua fafine “ ʼo te ʼu faiva gāue pea mo te ʼu fakatuʼutuʼu fakapotopoto ki te tokalelei.”
Ko te fale lotu ʼo Athéna ʼaē ʼe ʼiloa tāfito, neʼe ko te Parthénon, ʼaē neʼe laga ʼi Atena, te kolo ʼaē neʼe fakahigoaʼi ʼaki te higoa ʼo te ʼatua fafine ʼaia. ʼE ʼui ko te fale lotu ʼaia ʼe kau ki te ʼu fale lotu lalahi ʼaupito ʼo te temi muʼa, ʼaē neʼe fakatuʼu ai te foʼi fakatātā aulo mo ivuale ʼo Athéna, e meta 12. ʼI te ʼalu ʼa Paulo ki te kolo ko Atena, neʼe kua tuʼu ai te fale lotu maka momole ʼaia kua hili kiai taʼu e 500.
Neʼe ʼasi lelei te Parthénon ʼi te temi ʼaē neʼe faka mafola ai ia Paulo ki te hahaʼi ʼo Atena, ʼo ʼuhiga mo ‘te ʼAtua ʼaē ʼe mole nofo ʼi he ʼu fale lotu neʼe faʼu e te tagata.’ (Gaue 17:23, 24) Ko ʼihi hahaʼi ʼaē neʼe fakalogo ki te faiakonaki ʼa Paulo, neʼe lagi maʼuhiga age kia nātou te lahi ʼo te ʼu fale lotu ʼa Athéna, peʼe ko te māʼoluga ʼo tona ʼu fakatātā, kae mole maʼuhiga kia nātou te ʼAtua fakapulipuli ʼaē neʼe mole nātou ʼiloʼi. Kae ohage ko te meʼa ʼaē neʼe ʼui e Paulo, ʼaua naʼa tou manatu ko te Tupuʼaga ʼo te malamanei, ‘ ʼe tatau leva mo te aulo, mo te paʼaga, peʼe ko he fakatātā neʼe faʼu e te tagata.’—Gaue 17:29.
Ko te ʼu ʼatua tagata pea mo fafine ohage ko Athéna—ʼaē neʼe nātou maʼu te kolōlia ʼaki tonatou ʼu fale lotu pea mo tonatou ʼu fakatātā—neʼe tutuʼu faka temi pe ia. Ko te fakatātā ʼo Athéna, neʼe puli ʼi te Parthénon ʼi te nima sēkulō, pea ʼe kei maʼu pe he ʼu kiʼi toega ʼo tona ʼu fale lotu. Ko ai ia ʼaho nei ʼe kei faikole kia Athéna ke ina foaki age te poto pea mo te takitaki?
ʼE kehekehe ʼosi ia mo Sehova, “te Atua heegata” ʼaē ʼe mole heʼeki sio ki ai he tahi. (Loma 16:26; 1 Soane 4:12) Neʼe tohi fēnei e te ʼu foha ʼo Kole: “Ko te ʼAtua ʼaia ʼe ko totatou ʼAtua ʼo aʼu ki he ʼu temi ʼe mole ʼiloʼi honatou gataʼaga, ei ʼo talu ai. ʼE ina takitaki anai tatou.” (Pesalemo 48:14) ʼE ʼi ai te faʼahi ʼe feala ke tou fai moʼo maʼu te takitaki ʼa Sehova ʼAtua: ko te ako ʼo tana Folafola, te Tohi-Tapu, pea mo tou maʼuliʼi tana ʼu tokoni.