ʼI Lipelia ʼe Haga Tuputupu Ai Te ʼu Gāue ʼa Te Puleʼaga Logola Te Tau
KO TE tau faka sivile ʼaē ʼe fai ʼi Lipelia, kua hoko talu mai te ʼu taʼu e hogofulu tupu. ʼI te vaelua ʼo te taʼu 2003, neʼe ʼohofiʼi e te hahaʼi fakafeagai te taulaga ko Monrovia. Tokolahi te kau Fakamoʼoni ʼa Sehova neʼe tonu ke nātou feholaki mai tonatou ʼu ʼapi, pea ʼi ʼihi temi neʼe nātou fai putuputu te faʼahi ʼaia. Neʼe kaihaʼa tuʼumaʼu tonatou ʼu koloā.
ʼI te lolotoga ʼo te tau ʼaē neʼe hoko ʼi te taulaga, neʼe mamate ai te toko lauʼi afe hahaʼi. Neʼe kau ai te ʼu Fakamoʼoni e lua, ko te tēhina pea mo te tuagaʼane. Koteā ʼaē neʼe fai e te ʼu tēhina ʼi te ʼu faigataʼaʼia ʼaia, pea koteā ʼaē neʼe fai moʼo tokoni kia nātou?
Ko He Tokoni Maʼa Nātou ʼAē Neʼe Nonofo ʼi Te Faigataʼaʼia
Lolotoga te tau, ko te filiale ʼo te kau Fakamoʼoni ʼa Sehova ʼo Lipelia, neʼe nātou fakatuʼutuʼu te ʼu tokoni maʼa nātou ʼaē neʼe faigataʼaʼia. Neʼe foaki te meʼa kai, te ʼu meʼa ʼaē neʼe ʼaoga tāfito ki te ʼu ʼapi, pea mo te ʼu faitoʼo. Neʼe tahitahiga te maʼu ʼo he meʼa kai lolotoga te temi ʼaē neʼe nofoʼi ai te malaʼe vakalele e te kau solia ʼaē ʼe fakafeagai. Neʼe kua ʼiloʼi e te filiale ʼe hoko anai te faʼahi ʼaia, pea neʼe ina teuteuʼi fakatomuʼa te ʼu meʼa ʼaē ʼe ʼaoga tāfito maʼa te toko lua afe kau Fakamoʼoni ʼaē neʼe feholaki ki te ʼu Fale ʼo te Puleʼaga ʼi te kolo katoa. Neʼe fakaʼaogaʼi fakaʼutaʼuta te meʼa kai e te ʼu tēhina, ke feala hona toe ʼo aʼu ki te temi ʼaē ka toe avahi ai te malaʼe vakalele. Ko te ʼu filiale ʼo Pelesike pea mo Sierra Leone neʼe nā momoli te ʼu faitoʼo, pea ko te ʼu filiale ʼo Pilitania pea mo Falani neʼe nā momoli te ʼu mutuʼi meʼa.
Logola te ʼaluʼaga faigataʼa ʼaia, kae neʼe taupau aipe e te ʼu tēhina tonatou lotomālohi pea mo tanatou fiafia. Ohage ko te tokolahi ia nātou, neʼe ʼui fēnei e te tēhina neʼe kau ia nātou ʼaē neʼe feholaki tuʼa tolu ʼi tonatou ʼu ʼapi: “ ʼE mātou faka mafola te ʼu ʼaluʼaga ʼaia; ʼe tou maʼuʼuli ʼi te ʼu ʼaho fakamuli.”
Te Tali ʼo Te Logo Lelei
Logola te ʼu tokakovi ʼi te fenua, kae ʼe hoko atu aipe te ʼu fua lelei ʼo te gāue ʼa te kau Fakamoʼoni ʼi te fai faka mafola. ʼI Sanualio ʼo te taʼu 2003, neʼe maʼu te tupu foʼou ʼo te kau fai faka mafola, ko te toko 3 879, pea ʼi Fepualio neʼe nātou fai te ʼu ako Tohi-Tapu e 15 227.
ʼE tali lelei e te hahaʼi ia te logo lelei. Ohage la ko te meʼa ʼaenī neʼe hoko ʼi te kolo ʼi te potu saute esite ʼo te fenua. Neʼe fakatuʼutuʼu e te kokelekasio ke nātou fai te ʼAho Fakamanatu ʼo te mate ʼo Kilisito ʼi te kolo lahi ʼo Bewehn, ʼaē ʼe hola nima takita haʼele lalo kiai, mai te koga meʼa ʼaē ʼe fai māhani ai te ʼu fono. ʼI muʼa ʼo te ʼolo ʼo te ʼu tēhina ki te kolo moʼo fakaafe te hahaʼi ki te ʼAho Fakamanatu, neʼe foaki te pepa fakaafe ki te pule kolo ʼo Bewehn. ʼI tana maʼu te fakaafe ʼaia, neʼe ina toʼo tana Tohi-Tapu ʼo ʼalu ki te hahaʼi ʼo te kolo, pea ina lau age te vaega ʼaē ʼe tuʼu ʼi te pepa fakaafe. Neʼe ina fakaloto mālohiʼi te hahaʼi ke nātou ʼolo ki te ʼAho Fakamanatu ʼaia. ʼI te tau mai ʼa te kau fai faka mafola ki te kolo, neʼe kua fai tanatou gāue e te tagata ʼaia. Ko te pule kolo, mo tana ʼu tamaliki pea mo tona ʼu ʼohoana e lua, neʼe nātou ʼolo ki te ʼAho Fakamanatu. Neʼe ko te toko 27 ʼaē neʼe kau ʼi te ʼaho ʼaia. Talu mai te ʼaho ʼaia, ko te pule kolo neʼe mavae ʼi te Lotu Méthodiste, ʼo kamata tana ako mo te kau Fakamoʼoni, pea mo ina foaki te kele ke laga ai he Fale ʼo te Puleʼaga.
Neʼe Ina Fetogi Tana Aga
ʼAki te aga ʼa te ʼu tēhina, neʼe fetogi ai te manatu ʼa ʼihi kau fakafeagai ʼo ʼuhiga mo te moʼoni. Ohage ko te tagata ko Opoku. Neʼe felāveʼi te pionie makehe mo te tagata ʼaia ʼi te gāue fai faka mafola, pea ina tuku age te nusipepa ʼo Te Tule Leʼo. Neʼe fia lau e Opoku te nusipepa, kae neʼe mole ʼi ai hana falā. Neʼe tuku age te nusipepa e te pionie ʼo ina fakamahino age ʼe mole totogi, pea ina fakatuʼutuʼu ke ina toe ʼaʼahi ia ia. ʼI tana ʼaʼahi neʼe fehuʼi age e Opoku ki te pionie: “ ʼE ke ʼiloʼi peʼe ko ai ia ʼau? Ko te tokolahi ʼo takotou hahaʼi ʼi te kolo ʼo Harper, ʼe nātou ʼiloʼi ʼau. Neʼe ʼau kapu takotou ʼu tamaliki ʼi te faleako!” Pea neʼe ina fakamahino age, neʼe pule ʼi te faleako lahi ʼo te kolo, pea neʼe ina gaohi koviʼi te ʼu tamaliki ʼa te kau Fakamoʼoni ʼa Sehova, ʼuhi ko tanatou mole kau ki te hiva ʼo te fuka.
Kae neʼe fetogi e Opoku tana aga, ʼuhi ko te ʼu ʼaluʼaga e tolu neʼe sio ai ki te ʼofa faka Kilisitiano ʼa te kau Fakamoʼoni ʼa Sehova. ʼUluaki neʼe sio ki te kau Fakamoʼoni ʼe nātou gaohi fakaleleiʼi tonatou tēhina fakalaumālie neʼe mahaki kovi. Neʼe nātou fai he ʼu fakatuʼutuʼu ke ʼave ʼo faitoʼo ʼi he tahi fenua. Neʼe manatu ia Opoku ko te tēhina mahaki neʼe ko he “tagata maʼuhiga” ʼi te kau Fakamoʼoni, kae neʼe ina ʼiloʼi ki muli age ʼe mole ko he tagata feiā. Lua, lolotoga te ʼu taʼu 1990, neʼe hola ia Opoku ʼo nofo ʼi te fenua ko Côte dʼIvoire. ʼI te tahi ʼaho, neʼe fia ʼinu pea neʼe ʼalu ʼo totogi vai ʼi te tūpulaga. Neʼe ko te falā lahi ʼa Opoku, kae neʼe mole feala ki te tūpulaga ke ina ʼavage he toe. Koia neʼe ina ʼui age ai kia Opoku ke ina toʼo te moʼi vai kae mole ina totogi. ʼI tana ʼavage tana moʼi vai, neʼe fehuʼi age e te tūpulaga: “ ʼE ke manatu koa, ʼe hoko anai he temi ʼe mole tou toe sio anai ki te hahaʼi ʼe nātou fakamaʼua ke totogi te ʼu meʼa ʼaē ʼe fakatau?” Neʼe fehuʼi age e Opoku peʼe ko he Fakamoʼoni ʼa Sehova, pea neʼe ei age ia te tūpulaga. Neʼe malave kia ia te loto fia foaki pea mo te agalelei ʼa te tēhina ʼaia. Pea ki muli age, ʼi te ʼavage e te pionie makehe tana nusipepa kae mole ina totogi, neʼe faka tui ai ia Opoku neʼe faihala ʼo ʼuhiga mo te kau Fakamoʼoni, pea neʼe tonu ke ina fetogi tana aga. Neʼe tuputupu ʼi te faʼahi fakalaumālie, pea ʼi te temi nei ʼe ko he kaugā fagona.
Logola ʼe kei hoko atu te ʼu faigataʼaʼia ʼo te ʼu tēhina ʼi Lipelia, kae ʼe nātou falala ki te ʼAtua pea mo nātou agatonu ʼo kalagaʼi te logo lelei ʼo ʼuhiga mo he ʼu temi ʼe lelei age, ʼi te takitaki ʼa te Puleʼaga faitotonu ʼo te ʼAtua. ʼE mole galoʼi anai e Sehova tanatou gāue kinakina, pea mo te ʼofa ʼaē neʼe nātou fakahā ʼo ʼuhiga mo tona huafa.—Hepeleo 6:10.
[Paki ʼo te pasina 30]
MONROVIA
[Paki ʼo te pasina 31]
Lolotoga te ʼu temi faigataʼa, ko te hahaʼi ʼa Sehova ʼe nātou tokoni ki te hahaʼi ʼi te faʼahi fakasino pea mo te faʼahi fakalaumālie