ʼE ʼAoga Koa Kia Tatou Ni ʼu Tokoni Lelei?

IA ʼAHO nei, tokolahi ʼe nātou manatu ʼe feala hanatou ʼiloʼi te meʼa ʼaē ʼe lelei pea mo te meʼa ʼaē ʼe kovi pea mo nātou fai te meʼa ʼaē ʼe nātou loto kiai. ʼE ʼui e ʼihi, kapau ʼe fiafia he tahi ʼi te ʼu meʼa fuli ʼaē ʼe ina fai pea ʼe ko he ʼu meʼa lelei. ʼE fua kovi ʼaupito te ʼu faʼahi ʼaia ki te nofo ʼohoana pea mo te maʼuli faka famili, ʼaē neʼe ʼui talu mai fualoa ʼe ko te fakatuʼutuʼu tāfito ʼaia ʼo te sosiete faka tagata.​—Senesi 3⁠:⁠5.

Tou vakaʼi te meʼa ʼaē neʼe hoko kia Veronica,a ʼaē ʼe nofo ʼi Mekesike. ʼE ina fakamatala fēnei mai: “Neʼe mole heʼeki taʼu 15 tamā nonofo ʼohoana, neʼe ʼui mai e toku ʼohoana neʼe faiʼakau. Neʼe ina ʼui mai ko te fafine ʼe kei finemui pea ʼe logo fiafia age mokā fakatahi mo ia, pea ʼe mole fia mavete mo ia. Neʼe ʼau punamaʼuli ʼaupito heʼe ko toku ʼohoana neʼe ko toku kaumeʼa lelei tokotahi ʼaia, pea ʼe mole toe nofo anai ʼi ʼoku tafa ke ma fai palalau. ʼI muʼa atu, neʼe ʼau manatu ʼe tou lotomamahi ʼaupito mokā mate he tahi neʼe tou ʼofa mamahi ai. Kae kia ʼau, ko te tono ʼe fakaloto mamahi age ia, heʼe mole kei ʼau nofo mo ia ʼaē neʼe ʼau manako ʼaupito ai pea ʼe kei ina haga fai te ʼu meʼa ʼaē ʼe ʼau mamahi ai.”

Pea ʼe ʼi ai mo te tagata ʼe taʼu 22, kua ʼosi mavete mo tona ʼohoana pea kua ʼi ai tona foha kae neʼe mole fia tokaga ki ai. ʼE ina loto ki tana faʼe ke ina taupau ia ia pea mo tona foha. Kapau ʼe mole fai e tana faʼe te ʼu meʼa fuli ʼaē neʼe ina kole age, pea neʼe ʼita pea mo palalau kovi kia ia, ohage ko he tamasiʼi neʼe mole akoʼi. Neʼe mole ʼiloʼi e te faʼe te meʼa ʼaē ʼe tonu ke ina fai moʼo tauʼi te taʼi agamālohi ʼaia.

ʼE hoko tuʼumaʼu pe te ʼu faʼahi ʼaia. ʼI te ʼu potu fuli pe ʼe tuputupu ai te ʼu mavete. Tokolahi te fānau ʼe nātou sio ki te mavae ʼo he tahi ʼi tanatou ʼu mātuʼa ʼi te loto fale, moʼo maʼuli mo he tahi kehe. Ko ʼihi tūpulaga ʼe mole kei nātou fakaʼapaʼapa ki te hahaʼi, pea mo tanatou ʼu mātuʼa, pea ʼe nātou fai he ʼu aga neʼe mole heʼeki tou sio kiai ʼi muʼa atu. Kua lahi te ʼu fenua, kua fai ai te ʼu felāveʼi fakasino heʼeʼaoga, te palu ʼo te toloke, te agakovi ʼa te kau tūpulaga, pea mo te matehi e te ʼu tamaliki ia te hahaʼi faiako peʼe ko te ʼu mātuʼa. Pea ʼe koutou tokagaʼi ia ʼaho nei, ʼi te malamanei, ʼe mole hoko pe te ʼu faigataʼaʼia ʼi te pusiaki ʼo te fānau pea mo te nofo ʼohoana.

ʼI tatatou sio ki te hoko ʼo te ʼu meʼa ʼaia, ʼe feala ke tou feʼekeʼaki peʼe koteā ʼaē kua hoko ki te sosiete. Kapau ʼe ʼiloʼi moʼoni e te hahaʼi te meʼa ʼaē ʼe lelei pea mo te meʼa ʼaē ʼe kovi, pea he koʼe ʼe mole heʼeki maʼu he ʼu puleʼaki ki te ʼu tuʼuga fihifihia? ʼE ʼaoga koa kia tatou he ʼu tokoni lelei? ʼE ʼi ai koa he tahi ʼe feala ke ina foaki mai he ʼu tokoni lelei, ʼe feala ke tou falala moʼoni ki ai? Logola te ʼui ʼa te tokolahi ʼe nātou tui ki te ʼAtua pea mo tana Folafola, kae ʼe mole ʼiloga te ʼu faʼahi ʼaia ʼi te ʼu tonu ʼaē ʼe nātou fai. Kae koteā te ʼu fua lelei ʼe feala ke tou maʼu mokā tou kumi pea mo maʼu te ʼu tokoni ʼa te ʼAtua? Tou vakaʼi te faʼahi ʼaia ʼi te alatike ʼaē ʼe hoa mai.

[Kiʼi nota]