Te ʼu Tokoni ʼAē ʼe Lelei ʼAupito
KO TE meʼa ʼaē ʼe tou loto moʼoni kiai, ʼe ko he maʼuli fiafia. Ke feala hatatou maʼu te maʼuli ʼaia ʼi te malamanei faigataʼa ʼaenī, ʼe tonu ke tou maʼu he ʼu tokoni lelei pea mo tou maʼuliʼi te ʼu tokoni ʼaia. Kae ʼe mole tali tuʼumaʼu e te tagata te ʼu tokoni ʼaē ka fua lelei kia ia. Tokolahi ʼe nātou ʼui ʼe tonu ke mulimuli pe te tagata ki te ʼu meʼa ʼaē ʼe loto kiai. ʼI tona fakahagatonu, ʼe fakahā e te Tohi-Tapu, ko Satana, ia ia ʼaē neʼe ina ʼuluaki fakafihiʼi te ʼuhiga ʼaliki ʼo te ʼAtua, neʼe ina fakaloto mālohi te ʼuluaki taumatuʼa ke mole nā fakalogo ki te ʼAtua. ʼE fakahā ia Senesi 3:5 tana ʼui fēnei ʼaē kia Eva: “ ʼE ʼiloʼi e te ʼAtua ʼi te ʼaho pe ʼaē ʼe koulua kai anai kiai [te fuaʼi ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi] ʼe ava moʼoni anai ʼokolua mata pea ʼe koulua liliu anai ohage ko te ʼAtua, ʼo koulua ʼiloʼi te meʼa ʼaē ʼe lelei pea mo te meʼa ʼaē ʼe kovi.”
Neʼe feala koa ke fiafia ia Atama mo Eva pea mo hāo mai te ʼu tuʼutāmaki, mo kapau ʼe nā fakalogo pe ki tanā ʼu manatu? Kailoa ia. Neʼe nā lotomamahi atu aipe he neʼe na faihala ʼi tanā manatu ʼaē ʼe nā ʼiloʼi anai te meʼa ʼaē ʼe lelei pea mo te meʼa ʼaē ʼe kovi. Neʼe mole kei ʼofa te ʼAtua kia nāua pea neʼe kamata ai tonā maʼuli faigataʼa ʼi tonā ʼuhiga heʼe haohaoa, ʼaē neʼe iku ki te mate. (Senesi 3:16-19, 23) Neʼe mafola te mate kia tatou. ʼE ʼui fēnei e te Tohi-Tapu: “ ʼAki te tagata e tahi [ia Atama] neʼe hū te agahala ki te malamanei pea ʼaki te agahala te mate, pea neʼe mafola te mate ki te hahaʼi fuli pe heʼe kua nātou agahala fuli.”—Loma 5:12, MN.
Logola te ʼu fua kovi ʼo te meʼa ʼaē neʼe filifili e Atama mo Eva, kae tokolahi ʼe mole nātou tui ʼe fakapotopoto ke tou maʼuliʼi te ʼu tokoni mai te ʼAtua, te Tupuʼaga ʼo te tagata. Kae ʼe ʼui e te Tohi-Tapu “ko te Tohi-Tapu katoa ʼe haʼu mai te ʼAtua, pea ʼe ʼaoga,” pea ʼe lava tokoni ke “katoa lelei te tagata ʼa te ʼAtua, pea mo teuteu lelei ki te ʼu gāue lelei fuape.” (2 Timoteo 3:16, 17, MN ) ʼE mahino papau ia ʼe tou fiafia lahi anai mo kapau ʼe tou mulimuli ki te ʼu tokoni ʼa te Tohi-Tapu. Ko te maʼuli faka famili ʼe ko te potu tāfito ʼaia ʼaē ʼe tonu ke tou mulimuli ai ki te ʼu tokoni ʼa te Tohi-Tapu.
Te Agatonu ʼi Te Nofo ʼOhoana
Ohage ko tona ʼui ʼi te Tohi-Tapu, neʼe fakatuʼutuʼu e te ʼAtua te nofo ʼohoana ke heʼegata. (Senesi 2:22-24; Mateo 19:6) Tahi ʼaē meʼa, ʼe ʼui e te Tohi-Tapu ke “aua naa ulihi te moeʼaga fakataumatua,” ko tona faka ʼuhiga ʼe mole tonu ki he tahi ʼi te taumatuʼa ke ina fai he ʼu felāveʼi fakasino mo he tahi kehe ʼe mole ko hona ʼohoana. (Hepeleo 13:4) Kae ʼe lagi koutou ʼiloʼi ia ʼaho nei, tokolahi te ʼu taumatuʼa ʼe mole nātou mulimuli ki te pelesepeto ʼaia. Ko te agamāhani ʼa ʼihi ko te faiʼakau mo he tahi ʼi tonatou fale gāue ʼe mole ko tonatou ʼohoana. Ko ʼihi ʼe nātou loiʼi tonatou famili ke feala hanatou nonofo ʼi he temi fualoa mo ia ʼaē ʼe nātou manako ai kae mole ko tonatou ʼohoana. Ko ʼihi, ohage ko te meʼa ʼaē neʼe hoko kia Veronica, ʼaē neʼe tou talanoa kiai ʼi te ʼuluaki alatike, neʼe nātou līaki tonatou ʼohoana kae nātou ʼolo ʼo maʼuʼuli mo he tahi ʼe tūpulaga age peʼe finemui age, ʼo nātou ʼui ʼe hage kia nātou ʼe nātou toe tūpulaga age pea mo fiafia age.
Kae ko he tahi ʼe ina fia maʼu te taʼi fiafia ʼaia, logola tona ʼu fua ʼaē ka hoko ai, ʼe mole ina maʼu ai he fiafia tologa. ʼE fakamoʼoni ia Ronald ki te faʼahi ʼaia. Neʼe manatu ia ʼe lelei age anai tona maʼuli, koia neʼe mavete mo tona ʼohoana ke ina faʼu hona maʼuli faka famili foʼou mo te fafine ʼaē neʼe fai feʼauʼaki mo ia lolotoga taʼu e ono pea kua nā maʼu tana ʼu tamaliki e lua. Kae mole faʼa fualoa ʼi tana kua mavete, neʼe līaki ia ia e te fafine! Pea neʼe ʼalu leva ia Ronald ʼo nofo mo tana ʼu mātuʼa. Neʼe ina ʼui ʼo ʼuhiga mo tona maʼuli kua “fakaʼofaʼofa.” Ko te ʼu ʼaluʼaga ʼaia kua hoko māhani. Ko te taʼi aga ʼaia ʼe hoko ʼuhi ko te ʼu holi fakasino ʼaē ʼe mole fakatātāʼofi, ʼo tupu ai te ʼu tuʼuga mavete pea mo te maumauʼi ʼo te maʼuli faka famili, ʼo iku ai mo te lotomamahi ʼa te hahaʼi tokolahi—te hahaʼi lalahi ʼo feiā mo te fānau.
ʼI te tahi faʼahi, ko te mulimuli ki te ʼu tokoni ʼa te Tohi-Tapu ʼe iku ki te fiafia moʼoni. Neʼe hoko te faʼahi ʼaia kia Roberto, ʼaē ʼe ina ʼui fēnei: “ ʼAki te tokoni ʼa te Tohi-Tapu, neʼe mole ʼau līaki toku ʼohoana. Neʼe mole ma fia tuku tamā maʼuli fiafia moʼoni ke ma holi ki he tahi kehe, tatau aipe peʼe ko he tahi ʼe tūpulaga peʼe finemui age. Ko te ako ʼaē ʼe fai mai e te Tohi-Tapu neʼe tokoni mai ke ʼau faka maʼuhigaʼi toku ʼohoana, ʼaē neʼe nofo ʼi ʼoku ʼu tafa talu mai fualoa.” Neʼe maʼuhiga ʼaupito ʼi te maʼuli ʼo Roberto te tokoni faka Tohi-Tapu ʼaē “ke mole agakākā he tahi mo te ʼohoana ʼo tona temi tūpulaga.” (Malakia 2:15) Koteā te tahi ʼu faʼahi ʼaē ʼe fua lelei ai kia tatou te ʼu tokoni ʼa te ʼAtua?
Te Pusiaki ʼo Tatatou Fānau
Kua hili kiai ni ʼu taʼu, neʼe mafola te manatu ʼo ʼuhiga mo te pusiaki ʼo te fānau, ʼe tonu ki te ʼu mātuʼa ke mole nātou fakatuʼu he ʼu tuʼakoi. Neʼe ʼui ʼe lelei age pe ke tuku te fānau ke nātou fai e nātou totonu he ʼu tonu ki tanatou ʼu fakakaukau pea mo tanatou aga. Neʼe fai te fakatuʼutuʼu ʼaia ke feala hanatou tuputupu lelei. ʼI ʼihi ʼu koga meʼa, neʼe mole lahi te ʼu fakatuʼutuʼu neʼe fai ʼo ʼuhiga mo te ako, ohage la neʼe feala ki te ʼu tamaliki ako ke nātou filifili peʼe nātou ʼolo anai ʼo ako peʼe kailoa, pea neʼe feala ke nātou filifili tonatou temi fakafiafia peʼe ko te temi ako ʼaē ʼe nātou loto kiai. Neʼe loto e te tahi faleako ke “tuku te fānau ke nātou filifili te ʼu meʼa ʼe nātou loto kiai pea ke mole fakatonutonuʼi nātou e he tahi.” Ia ʼaho nei, ko ʼihi ʼu hahaʼi fai tokoni ʼo ʼuhiga mo te aga ʼa te tagata ʼe kei nātou manatu ʼe mole lelei te fakatonutonuʼi e te ʼu mātuʼa tanatou fānau, māʼiape la mo kapau ʼe manatu e te ʼu mātuʼa ʼe ʼaoga ke fai he fakatonutonu ʼofa.
Neʼe koteā tona fua? Ko te hahaʼi tokolahi ʼe nātou manatu ʼe lahi fau te ʼāteaina ʼaē ʼe foaki ki te fānau. Kia nātou neʼe iku te faʼahi ʼaia ki te tuputupu fakamataku ʼo te fai fakapō pea mo te toloke. Ko te sivi neʼe fai ʼi Amelika neʼe hā ai ko te teitei 70 ʼi te teau ʼo te hahaʼi ʼaē neʼe faka fehuʼi neʼe nātou manatu neʼe mole feʼauga te fakatonutonuʼi ʼo te fānau pea mo te kau tūpulaga. ʼI tanatou faiga ke nātou fakamahino te ʼu fai fana ʼaē neʼe hoko ʼi te ʼu faleako pea mo te ʼu fakapō ʼaē neʼe fai e te kau tūpulaga, tokolahi neʼe nātou tukugakoviʼi “te mole kei takitaki e te ʼu mātuʼa tanatou fānau.” Pea tatau aipe peʼe mole hoko ni ʼu ʼaluʼaga feiā, kae ʼe utu e te ʼu mātuʼa pea mo te fānau te ʼu fua ʼo te mole pusiaki fakalelei ʼo te fānau.
Koteā te manatu ʼa te Tohi-Tapu ki te faʼahi ʼaia? ʼE tokoni te Tohi-Tapu ke fakahoko e te ʼu mātuʼa tanatou takitaki ʼaki te ʼofa pea mo te mālohi. ʼE ʼui fēnei e te Tohi-Tapu: “Ko te agavale ʼe pipiki ki te loto ʼo te tama, kae ko te kauʼi ʼakau ʼo te fakatonutonu ʼaē ka ina fakamamaʼo ia ia mai te aga ʼaia.” (Tāʼaga Lea 22:15) Kapau ʼe fakahoko e te ʼu mātuʼa tanā pule ʼaki te ʼofa, kae mole ʼaki te agamālohi, pea ʼe mahino ia ʼe ʼi ai anai hana ʼu ikuʼaga lelei.
ʼE tou maʼu he ʼu fua lelei mokā tou maʼuliʼi te tokoni ʼaia. Ko Arturo, ʼi Mekesike, ʼe taʼu 30 pea neʼe hoki ʼohoana pe, ʼe ina ʼui fēnei: “Ko taku tāmai neʼe ina fakahā lelei mai ki toku ʼu tēhina pea mo ʼau, ko ia pea mo taku faʼe ʼaē ʼe nā pule ʼi te loto fale. Neʼe mole nā tāʼofi ʼi he temi tanā fakatonutonuʼi ia mātou. Kae neʼe nā maʼu tuʼumaʼu pe he temi ke nā palalau mai kia mātou. ʼI te temi nei, ʼi taku kua lahi, ʼe maʼuhiga kia ʼau te maʼuli tokalelei ʼaē ʼe ʼau maʼu, pea ʼe ʼau ʼiloʼi neʼe tokoni lahi ki te faʼahi ʼaia ia te takitaki lelei ʼaē neʼe ʼau maʼu.”
Ke ʼAoga Kia Koutou Te ʼu Tokoni ʼAē ʼe Lelei Tokotahi
ʼE maʼu ʼi te Folafola ʼa te ʼAtua, te Tohi-Tapu te ʼu tokoni ʼaē ʼe lelei tokotahi ki te malamanei. ʼE mole ina foaki pe he ʼu tokoni ki te maʼuli faka famili. ʼE ina akoʼi mai te ʼu faʼahi kehekehe, heʼe ina akoʼi mai te aga ʼaē ʼe tonu ke tou maʼu ʼi he mālama ʼe tokolahi ai te hahaʼi ʼe mole nātou tali ke takitaki tonatou maʼuli e te Matapuna lahi ʼaupito ʼo te poto, ke feala hanatou fiafia ai.
Ko Sehova ʼAtua, te Tupuʼaga ʼo te malamanei, neʼe ina foaki mai te fakapapau ʼaenī ʼaki te tagata fai pesalemo ko Tavite: “ ʼE ʼau fakaliliu anai koe ke ke fakasiosio poto pea mo ʼau akoʼi anai koe ʼi te ala ʼaē ʼe tonu ke ke haʼele ai. ʼE ʼau foaki atu anai he ʼu tokoni, ʼo ʼau leʼoleʼo koe.” (Pesalemo 32:8) ʼE koutou fakakaukauʼi age koa te faka ʼuhiga ʼo te haga leʼoleʼo ʼo tatou e te Tupuʼaga, ke ina hāofaki tatou mai he tuʼutāmaki? Koia ʼe tonu ke tou fai takitokotahi te fehuʼi ʼaenī: ‘ ʼE ʼau tali koa ʼaki he agavaivai te takitaki ʼa Sehova moʼo ʼoku puipui?’ ʼE ʼui fēnei e tana Folafola ʼaki he lotoʼofa: “Falala kia Sehova ʼaki tou loto katoa pea ʼaua naʼa ke falala ki tou poto. ʼI tou ʼu ala fuli tokagaʼi ia ia, pea ʼe ina fakatonutonuʼi anai tou ʼu ala foufou.”—Tāʼaga Lea 3:5, 6.
Ko te ʼiloʼi ʼo Sehova ʼe fakamaʼua kiai he ʼu faiga pea mo he faʼa kātaki; kae ʼe feala ke aʼu te hahaʼi fuli ki te faʼahi ʼaia ʼaki te Tohi-Tapu. Ko te maʼuli ʼaē ʼe tokoni mai Sehova ke tou maʼu “ ʼe ina fakapapauʼi mai te maʼuli ʼo te temi nei pea mo te maʼuli ʼaē ka haʼu.” ʼE ko he toe meʼa maʼuhiga moʼoni mo kapau ʼe tou tokagaʼi te ʼu lelei ʼaē ʼe ina foaki mai.—1 Timoteo 4:8; 6:6.
Kapau ʼe koutou fia maʼu te fakasiosio poto ʼaē ʼe foaki e te Tohi-Tapu pea mo te ʼu tapuakina ʼaē ʼe maʼu mai te mulimuli kiai, koutou fakamuʼamuʼa ʼi tokotou maʼuli te lau pea mo te metitasioʼi ʼo te Folafola ʼa te ʼAtua. Kapau ʼe koutou fai te faʼahi ʼaia, pea ʼe tokoni atu anai ke maui mālie takotou tauʼi te ʼu faigataʼaʼia ʼo te temi nei pea mo te ka haʼu. Pea ʼe koutou ako anai te ʼamanaki ʼaē ke koutou maʼuʼuli ʼi te mālama foʼou ʼa te ʼAtua, ʼaē ka akoʼi fuli ai te hahaʼi e Sehova pea mo mahu ai anai te tokalelei.—Isaia 54:13.
[Paki ʼo te pasina 5]
Ko te ʼu tokoni ʼa te Tohi-Tapu ʼe feala ke nātou fakamālohiʼi te noʼo ʼo te nofo ʼohoana
[Paki ʼo te pasina 6]
Ko te ʼu tokoni ʼa te Tohi-Tapu ʼe ko te tafitoʼaga ʼaia ʼo he takitaki lelei, kae ʼe tou toe maʼu ai mo he fakafiafia
[Paki ʼo te pasina 7]
Ko nātou ʼaē ʼe nātou maʼuliʼi te ʼu tokoni ʼa te Tohi-Tapu ʼe nātou maʼu he maʼuli fīmālie