Ko Te Kau Fai Faka Mafola ʼo Te Puleʼaga

Ko Te Tohi Mai Ia Alejandra

KO TE faitohi ki he tahi ʼe ko he fakatuʼutuʼu lelei moʼo fai he fagonogono. ʼE lagi feala ʼi ʼihi temi ke koutou punamaʼuli ki tona ʼu fua, kae ko nātou ʼaē neʼe nātou haga fai ia te faʼahi ʼaia neʼe nātou maʼu ai te ʼu tapuakina lahi. ʼE nātou manatuʼi te tokoni poto ʼaenī ʼa te Tohi-Tapu: “ ʼI te uhu to tau pulapula pea ʼo aʼu ki te afiafi ʼaua naʼa ke fakamālōlō tou nima, heʼe mole ke ʼiloʼi pe kofea te potu ʼaē ka fua ai anai, peʼe ko henī, peʼe ko hē, peʼe nā tauʼaki lelei anai.”​—Tagata Tānaki 11:6.

Ko te Fakamoʼoni kei finemui ko Alejandra, ʼaē neʼe gāue ia taʼu e 10 ʼi te filiale ʼa te kau Fakamoʼoni ʼa Sehova ʼi Mekesike, neʼe ina fai tona ʼu faitoʼo ʼe higoa ko te chimiothérapie ʼuhi ko tana kosea. ʼI te kua kovi ʼo tona mahaki, neʼe mole kei ina lava fai tana ʼu gāue māhani. Kae neʼe kei maʼuhiga tuʼumaʼu pe kia ia tana minisitelio, koia neʼe fakatuʼutuʼu ai ia Alejandra ke faitohi. Neʼe palalau ʼi tana ʼu tohi ʼaia ki te fakatuʼutuʼu ʼaē ʼe tou fai ʼo ʼuhiga mo te ʼu ako faka Tohi-Tapu ʼaē ʼe mole totogi, pea neʼe ina tohi ai te numelo telefoni ʼo tana faʼe. Pea neʼe ina foaki age te ʼu tohi ki tana faʼe ke ina tuku ʼi te ʼu ʼapi ʼaē ʼe mole ina maʼu ai anai he tahi mokā fai faka mafola.

Lolotoga te temi ʼaia, ko Diojany, te kiʼi finemui mai Kuatemala, neʼe fai menasi ʼi Cancún, ʼi Mekesike. ʼI tana gāue ai, neʼe felāveʼi mo te kau Fakamoʼoni ʼa Sehova pea neʼe ina leleiʼia tanatou ʼu fai palalau. Ki muli age, ko te taumatuʼa ʼaē neʼe gāue ki ai, neʼe nā fakatuʼutuʼu ke nā hiki ʼo nonofo ʼi Mekesike pea neʼe nā fia ʼolo mo ia. Neʼe lotolotolua ia Diojany he neʼe ina tuʼania naʼa mole toe felāveʼi mo te kau Fakamoʼoni.

Neʼe ʼui age e tonā ʼu patolo: “ ʼAua naʼa ke tuʼania, ʼe ʼi ai te kau Fakamoʼoni ʼi te ʼu potu fuli. ʼE tou kumi anai nātou mokā tou tau kiai.” ʼAki te fakatuʼutuʼu ʼaia, neʼe tali ai leva e Diojany ke nātou ʼolo. ʼI tanatou tau atu ki Mekesike, neʼe kumi e te ʼu patolo ʼa Diojany ia te kau Fakamoʼoni. Kae logola neʼe ko te toko 41 000 tupu kau Fakamoʼoni pea mo kokelekasio e 730 ʼi te kolo ʼaia, kae neʼe mole nā maʼu he Fakamoʼoni ʼi te kolo ʼaia.

Neʼe lotovaivai ai ia Diojany koteʼuhi neʼe mole ina lava maʼu pe la te kau Fakamoʼoni ke hoko atu foki tana ʼu fai palalau mo nātou. ʼI te tahi ʼaho, ko tana patolo fafine neʼe haʼu ʼo ʼui age ki ai: “Kua logoʼi tau ʼu faikole e tou ʼAtua.” ʼI tana foaki age te tohi, neʼe ina ʼui fēnei age: “Neʼe tuku e te kau Fakamoʼoni tau tohi.” Neʼe ko te tohi mai ia Alejandra.

Neʼe telefoni ia Diojany ki te faʼe ʼa Alejandra pea mo Blanca tona tēhina veliveli, pea neʼe ina tali ke fai hana ako Tohi-Tapu. Hili te ʼu kiʼi vāhaʼa, neʼe felāveʼi leva mo Alejandra pea neʼe nā fiafia ʼi tana felāveʼi ʼaia. Neʼe fakaloto mālohiʼi ia ia e Alejandra ke hoko atu tana ako ke feala hana tuputupu ʼi te faʼahi fakalaumālie.

Hili te ʼu kiʼi māhina, pea mate ia Alejandra ʼi te māhina ʼo Sūlio 2003, pea neʼe ina tuku ki tona ʼu tēhina mo tuagaʼane, te faʼifaʼitaki lelei ʼo ʼuhiga mo te tui pea mo te faiga mālohi. ʼI tona ʼavaifo, neʼe malave ki te tokolahi tanatou felāveʼi mo Diojany pea mo tanatou logo ki tana ʼui ʼaē: “Ko Alejandra pea mo tona famili neʼe nātou tuku mai kia te ʼau te faʼifaʼitaki taulekaleka. ʼE ʼau fakapapau ʼe ʼau gāue anai maʼa Sehova pea mo ʼau papitema anai. ʼE ʼau fakaʼamu mālohi ke ʼau toe sio kia Alejandra ʼi te Palatiso!”

Ei, ʼe lagi tou manatu ko he tohi ʼe ko he kiʼi meʼa noa pe. Kae ʼe feala ki he tohi ke malave mālohi pea mo tologa ki te loto ʼo te hahaʼi!