ʼE Mole Ko He Gaoʼi Pe
ʼE FIA gaoʼi te tamaliki. Kae ʼe fakamahino e te tohi The Developing Child, “ ʼe mole ko he gaoʼi noa feiā pe. Ko te tāfito ʼaia ʼaē ʼe hage ʼe tuputupu lahi ai tana mālama ki te ʼu meʼa ʼaē ʼi tona ʼu tafaʼaki.” Ka gaoʼi te tamaliki, ʼe akoako e te tamaliki ia te fakaʼaogaʼi ʼo tonatou ʼu fealagia, mo te mahino ki te ʼu meʼa ʼaē ʼi tonatou ʼu tafaʼaki, pea mo te felogoi mo ʼihi.
ʼI tonatou taʼu fā peʼe nima, ʼe kamata fai anai e te kihiʼi tamaliki he ʼu gaoʼi ʼo nātou fai ohage ko nātou ko he ʼu hahaʼi lalahi. ʼI te tahi lakaga, neʼe talanoa ia Sesu ʼo ʼuhiga mo te ʼu kihiʼi tamaliki ʼe nātou gaoʼi. Ko ʼihi neʼe nātou fia faʼifaʼitakiʼi he “fai ohoana,” ko ʼihi neʼe nātou faʼifaʼitaki he “fai avaifo,” pea ohage ko te fai māhani ʼa te tamaliki, neʼe nātou fetalanoaʼaki ʼi te mole fia kau mai ʼa ʼihi kau tamaliki ki te gaoʼi ʼaia. (Mateo 11:16, 17) Ko te ʼu faʼahiga gaoʼi ʼaia ʼe tokoni anai ki te tamasiʼi ʼaē ʼe lahilahi ake, ke ina fakamaʼumaʼu ʼi tona ʼatamai te ʼu meʼa ʼaē ʼe maʼuhiga.
Ko te ʼu tamaliki ʼaē ʼe tutuʼu ʼi te ʼu pāki ʼe nā fai te kiʼi gaoʼi ʼo he tahi ʼe ina takitaki he ako Tohi-Tapu. ʼE mole ko he ako moʼoni, kae kua mahino lelei kia nāua ia te maʼua ʼaē ke vaevae te logo lelei ʼo te Tohi-Tapu. Pea ko te ako ʼaia ʼe maʼuhiga, koteʼuhi neʼe fakatotonu e Sesu ki tana kau tisipulo fuli ke nātou fai he ʼu tisipulo pea mo akoʼi te hahaʼi ke nātou mulimuli ki te ʼu meʼa fuli ʼaē neʼe ina akoʼi age kia nātou.—Mateo 28:19, 20.
Ko te ʼu mātuʼa ʼe fakafiafia ki tanatou ʼu tamaliki ʼe nātou leleiʼia te faʼifaʼitakiʼi ia te fai ʼo he ʼu ako Tohi-Tapu, mo te fai ʼo he ʼu akonaki, peʼe nātou fai faka mafola ʼi te ʼu ʼapi. ʼI te agamāhani, ko te tamaliki ʼe nātou faʼifaʼitakiʼi te meʼa ʼaē ʼe fai e te hahaʼi lalahi ʼi ʼonatou tafaʼaki. Ko te ʼu gaoʼi faka Tohi-Tapu ʼaia ʼa te tamaliki ʼe ko he fakaʼiloga ʼaia ʼo tonatou akoʼi “ki te fakalogo mo te u fakatokaga i te malama o te Aliki.”—Efeso 6:4.
ʼE loto e Sehova ke kau te tamaliki ʼi te tauhi moʼoni. Neʼe ina ʼui kia Moisese ke fakatahiʼi mai “mo nātou liliki” ʼi te temi ʼaē neʼe tonu ke lau ai te Lao. (Teutalonome 31:12) Kapau ʼe fakakau te tamaliki ki te tauhi moʼoni, pea ʼe ʼiloga anai ʼi tanatou ʼu gaoʼi. Pea ko te tamasiʼi ʼaē ʼe ina faʼifaʼitaki ia ia ohage ko he minisi ʼa te ʼAtua, ʼe ko hona teuteu ʼaia ke liliu ko he minisi moʼoni.