Neʼe Ina Fakahā Ki Tona ʼu Kaugā Ako Te ʼu Akonaki Faka Lotu ʼAē ʼe Tui Kiai

ʼE KOUTOU fia tokoni koa ki tokotou ʼu kaugā ako ke nātou mahino lelei ki te ʼu akonaki faka Tohi-Tapu ʼaē ʼe koutou tui kiai? Ko Magdalena, ʼe taʼu 18 ʼe ako ʼi te faleako ʼi Polonia, ʼe tautau palalau mo tona ʼu kaugā ako ki te ʼu akonaki ʼaē ʼe tui kiai ʼi tona ʼuhiga Fakamoʼoni ʼa Sehova. Koia ʼe tau fai age ki ai te ʼu fehuʼi ʼaenī: ‘Ko ai te kau Fakamoʼoni ʼa Sehova? ʼE koutou tui koa kia Sesu Kilisito?’ Neʼe tokoni feafeaʼi ki tona ʼu kaugā ako? Neʼe faikole ia Magdalena kia Sehova ke tokoni age kia ia pea neʼe ina fakahoko te ʼu meʼa ʼaē neʼe ina kole.​—Sakopo 1:5.

ʼI te tahi ʼaho, neʼe kole e Magdalena ki tana fafine faiako ʼaē ʼe agalelei, peʼe feala la ke ina fakahā ki te kalasi te foʼi fime viteo Les Témoins de Jéhovah : un nom, une organisation.a Neʼe tali lelei e te fafine faiako te faʼahi ʼaia. Pea neʼe ʼui fēnei e Magdalena ki tona ʼu kaugā ako: “Ko ʼau mo toku kaumeʼa ʼe ma lotolelei ke ma fakahā atu kia koutou te ʼata e minuta 90. ʼE tou sio anai te foʼi fime viteo pea mo tou fai palalau ai ʼo ʼuhiga mo te kau Fakamoʼoni ʼa Sehova. ʼE koutou fia kau kiai?” Neʼe nātou ʼio fuli kiai. Ko Magdalena pea mo Wojciech, ko te tēhina pionie kua fakapotopoto, neʼe nā teuteuʼi fakatahi ia te polokalama ʼaia.

Neʼe kamata te polokalama ʼaki te akonaki e minuta 20 ʼo fakatafito ki te kiʼi kaupepa Les Témoins de Jéhovah : Qui sont-ils ? Quelles sont leurs croyances ?* pea hoa kiai te fai palalau ʼaki te ʼu fehuʼi pea mo te ʼu tali. ʼOsi ʼaia neʼe nātou sioʼi te foʼi fime viteo ʼi te fale tānakiʼaga tohi ʼo te faleako. Neʼe foaki te ʼu tohi kia nātou takitokotahi​—ko te sila lahi ʼe maʼu ai te ʼu kaupepa, mo te tohi Les jeunes sʼinterrogent — Réponses pratiques,* mo te ʼu kiʼi pepa lotu pea mo te ʼu nusipepa.

ʼI te ʼaho ʼo te polokalama, ko te nofoʼaki neʼe ko te toko 14 kau ako, neʼe kau ai te fafine faiako pea mo te tahi kau ako e toko 4 neʼe nonofo ʼi te fale tānakiʼaga tohi. Neʼe fakahā ʼuluaki e Wojciech neʼe fakaʼaogaʼi te huafa taputapu ʼo Sehova ʼi te ʼu tohi ʼa te hahaʼi fai tuketuke pea mo faitohi Polonia. Neʼe ina toe fakahā foki neʼe tohi te huafa taputapu ʼi ʼihi tohi fai kapite Katolika ʼāfea. Neʼe ina fakahā te ʼu kaupepa ʼa te ʼu filiale kehekehe pea mo te ʼu paki ʼo te ʼu Fale Fakatahi moʼo fakamatalatala ia te gāue ʼa te kau Fakamoʼoni ʼa Sehova ʼi te temi nei.

Neʼe tupu ʼaki ai te fai palalau lelei. Neʼe fakaʼaogaʼi te Tohi-Tapu e Magdalena pea mo Wojciech moʼo tali ki tanatou ʼu fehuʼi. Neʼe malave ki te nofoʼaki pea mo fakalotoʼi nātou, ʼi tanatou ʼiloʼi ʼaē ko te kau Fakamoʼoni ʼa Sehova ʼe mole nātou faka mafola tanatou ʼu manatu ʼanatou totonu. Koteā te ʼu faʼahiga fehuʼi ʼaē neʼe fai, pea neʼe nā tali feafeaʼi kiai?

Fehuʼi: ʼE maʼu ʼi te Tohi-Tapu te ʼu kupuʼi palalau pea mo te ʼu palalau fakatātā ʼe mahino gataʼa, ʼo feala ai ki te tokolahi ke nātou fakamahino ʼaki pe tanatou ʼu manatu takitokotahi. ʼE lava feafeaʼi hatatou maʼuliʼi te Tohi-Tapu?

Tali: ʼE ʼui e ʼihi ko te Tohi-Tapu ʼe lagolago ki te manatu fuli pe. Kae koutou fakakaukauʼi age muʼa: Kapau ʼe koutou fia ʼiloʼi te manatu ʼa he tahi ʼe ina tohi he ʼu meʼa, ʼe mole faigafua age koa la he fehuʼi fakahagatonu kia ia? ʼE kehekehe Sehova mo te hahaʼi faitohi ʼaē kua mamate, heʼe kei maʼuli ia ia ʼaē neʼe ina tohi te Tohi-Tapu. (Loma 1:​20; 1 Kolonito 8:​5, 6) Ko te lau ʼo te ʼu vaega ki muʼa pea mo te ʼu vaega ki muli mai ʼo te Tohi-Tapu ʼe lava tokoni mai ki te fakamahino ʼaē ʼe totonu. Tahi ʼaē meʼa, ʼe lahi te ʼu vaega ʼi te Tohi-Tapu ʼe talanoa ai ki he manatu e tahi, pea ʼe ʼaoga anai mo kapau ʼe koutou fakatatau te ʼu vaega ʼaia. Koia tou tuku te ʼAtua ke ina takitaki tatatou ʼu manatu, ohage pe ko ia totonu ʼaē ʼe ina fakamatala mai te vaega Tohi-Tapu. Kapau ʼe tou fai feiā, pea ʼe feala anai ke tou ʼiloʼi pea mo fai tona finegalo ʼaē ʼe ina fakahā ʼi te Tohi-Tapu.

Fehuʼi: Koteā te kehekehe ʼo te kau Kilisitiano pea mo te kau Fakamoʼoni ʼa Sehova?

Tali: ʼE mātou Kilisitiano! Kae ʼe mole mātou ʼui pe ʼe mātou Kilisitiano, heʼe ko te kau Fakamoʼoni ʼa Sehova ʼe nātou faiga ke nātou maʼuliʼi te ʼu meʼa ʼaē ʼe nātou tui kiai pea mo te ʼu meʼa ʼe akoʼi age e te ʼAtua ke fua lelei ki tonatou maʼuli. (Isaia 48:17, 18) ʼE nātou ʼiloʼi ʼe nātou maʼu te moʼoni, koteʼuhi ʼe fakatafito tanatou ʼu akonaki fuli ki te Tohi-Tapu.​—Mateo 7:​13, 14, 21-​23.

Fehuʼi: He koʼe ʼe koutou ʼolo ki te hahaʼi ʼaē ʼe mole feʼiloʼiʼaki mo koutou pea mo koutou faigaʼi ke koutou fai palalau mo nātou? ʼE mole koutou fakakinauʼi koa te hahaʼi ʼaia ke nātou tui ki takotou lotu?

Tali: ʼI takotou manatu, ʼe kovi koa ki he tahi hana fehuʼi fakaʼapaʼapa atu ʼi te ala, pe koteā la takotou manatu ʼo ʼuhiga mo he faʼahiga meʼa? (Selemia 5:1; Sofonia 2:​2, 3) (ʼOsi ʼaia neʼe fai e Wojciech mo Magdalena te faʼifaʼitaki peʼe feafeaʼi tanatou fehuʼi ki te hahaʼi, peʼe tokaga moʼoni koa te ʼAtua kia nātou ʼaē neʼe tuʼutāmaki ʼi te lōmaki ʼaē neʼe tō ʼi Polonia.) Ka kua ina fakahā mai tana manatu, pea ʼe mātou fakahā age te manatu ʼa te Tohi-Tapu. Kapau ʼe mole nātou fia palalau mo mātou, pea ʼe mātou tauʼinē age pea mo mātou mavae. (Mateo 10:11-​14) Neʼe mātou fakakinauʼi koa te fai palalau? ʼE mole kei tonu koa ki te hahaʼi ke nātou fai palalau?

Fehuʼi: He koʼe koa ʼe mole kei fai ia e koutou te ʼu lafeti faka lotu?

Tali: Ko te toʼotoʼoga pe e tahi ʼe fakatotonu mai e te Tohi-Tapu ke fakamanatuʼi​—ko te ʼAho Famanatu ʼo te mate ʼo Sesu Kilisito. (1 Kolonito 11:23-​26) ʼO ʼuhiga mo te ʼu lafeti faka lotu, ʼe feala ke koutou fai he ʼu kumi ʼi te ʼu encyclopédies pea mo te tahi age ʼu tohi ʼo ʼuhiga mo tonatou ʼu haʼuʼaga. Kapau ʼe koutou fai feiā, ʼe koutou ʼiloʼi lelei ai anai pe koʼe ʼe mole mātou fai te ʼu lafeti ʼaia.​—2 Kolonito 6:​14-​18.

Neʼe lahi mo te tahi ʼu fehuʼi pea mo te ʼu tali neʼe fai kiai. ʼI te loaloaga fau ʼo te fai palalau, neʼe toe tuku ki te tahi ʼaho te sioʼi ʼo te foʼi fime viteo.

Neʼe tali feafeaʼi e te kau ako ia te faʼahi ʼaia? Tou tuku ia Magdalena ke ina fakahā mai: “Neʼe ʼau punamaʼuli he neʼe ʼi ai te ʼu fehuʼi maʼuhiga neʼe lagaʼi e ʼihi kau ako, heʼe ʼi te agamāhani ʼe nātou fakakinakina pea mo vāʼi ʼihi. Logola tanatou ʼui ʼaē ʼe mole nātou tui ki te ʼAtua, kae lolotoga te fai palalau neʼe nātou fakahā ʼe nātou tui ki te ʼAtua!” Ko nātou ʼaē neʼe kau ʼi te nofoʼaki neʼe nātou tali fakafetaʼi te ʼu tohi​—neʼe tufa kia nātou tohi e 35, mo kaupepa lalahi e 63, pea mo nusipepa e 34.

Neʼe fua lelei te fakatuʼutuʼu ʼaia neʼe fai ʼi te faleako! Neʼe ko he faʼahi neʼe tokoni ki te ʼu kaugā ako ʼo Magdalena ke nātou mahino pea mo ʼiloʼi lelei te kau Fakamoʼoni ʼa Sehova, pea neʼe ina toe fakaloto mālohiʼi te kau tūpulaga e tokolahi ke nātou fakakaukauʼi te ʼuhiga moʼoni ʼo te maʼuli. He koʼe ʼe mole koutou faigaʼi ke mahino tokotou ʼu kaugā ako ki te ʼu meʼa ʼaē ʼe koutou tui kiai?

[Kiʼi nota]

[Paki ʼo te pasina 31]

ʼE teuteuʼi e Magdalena mo Wojciech te fai palalau