Te ʼu Fehuʼi ʼa Te Kau Lautohi

Ka ʼui e te ʼapositolo ko Soane “ko te ʼofa haohaoa ʼe ina lī ki tuʼa te manavasiʼi,” koteā te faka ʼuhiga ʼo te kupusiga palalau “te ʼofa haohaoa,” pea koteā te “manavasiʼi” ʼaē ʼe lī ki tuʼa?

Neʼe tohi fēnei e te ʼapositolo ko Soane: “ ʼE mole he manavasiʼi ʼi te ʼofa, kae ko te ʼofa haohaoa ʼe ina lī ki tuʼa te manavasiʼi, heʼe ko te manavasiʼi ʼe ko he meʼa ʼe ina tāʼofi. Ei, ko ʼaē ʼe maʼuli ʼi te manavasiʼi neʼe mole heʼeki liliu ia ʼo haohaoa ʼi te ʼofa.”​—1 Soane 4:​18, MN.

ʼI te ʼu vaega ki muʼa atu, neʼe talanoa ia Soane ki te palalau fakahagatonu​—tāfito ki te pikipikiga ʼo te ʼofa ki te ʼAtua pea mo te palalau faʼifaʼitaliha ʼaē kia te Ia. ʼE tou lau te faʼahi ʼaia ʼi te vaega 17: “Neʼe faka katoa fēnei te ʼofa ia tatou, ke tou palalau fakahagatonu ʼi te ʼaho fakamāu.” Kapau ko te faʼahiga ʼofa ʼaē ʼe maʼu e te Kilisitiano ki te ʼAtua pea mo tana logoʼi tona ʼofa ʼaē kia te ia, ʼe ʼiloga anai ʼi tana ʼu palalau peʼe fakahagatonu peʼe kailoa lolotoga tana faikole ki te ʼAtua.

ʼE maʼuhiga te kupusiga palalau “te ʼofa haohaoa.” Ka talanoa te Tohi-Tapu ki te kupu “haohaoa” ʼe mole faka ʼuhiga tuʼumaʼu ki he meʼa ʼe maʼoniʼoni. Ohage la, ʼi tana Akonaki ʼi te Moʼuga, neʼe ʼui fēnei e Sesu: “Koia ʼe tonu foki ke koutou haohaoa, ohage ko te haohaoa ʼo takotou Tāmai ʼaē ʼe ʼi selo.” Neʼe ʼui e Sesu ki tana kau tisipulo, kapau ʼe nātou ʼoʼofa pe kia nātou ʼaē ʼe ʼoʼofa age kia nātou, ʼe mole katoa anai tonatou ʼofa. koia ʼe tonu ai ke nātou toe ʼoʼofa foki ki ʼonatou ʼu fili ke katoa ai tonatou ʼofa. Koia ʼi te temi ʼaē neʼe talanoa ai ia Soane ki “te ʼofa haohaoa” neʼe palalau ki te katoa ʼo te ʼofa ʼo te ʼAtua kia tatou, ʼi te ʼu faʼahi fuli ʼo totatou maʼuli.​—Mateo 5:​46-​48, MN; 19:20, 21.

Ka fakaōvi he Kilisitiano ki te ʼAtua ʼi te faikole, ʼe ina ʼiloʼi lelei tona ʼuhiga agahala pea mo heʼe haohaoa. Kae kapau ʼe katoa tona ʼofa ki te ʼAtua pea mo ina logoʼi tona ʼofa ʼaē kia ia, pea ʼe mole ina tuʼaniaʼi anai mokā ʼe tonu ke fakatūʼa peʼe līʼakina. ʼE palalau fakahagatonu anai kia ia ʼo ina fakahā te meʼa ʼaē ʼi tona loto pea mo kole ke fakamolemole age ʼaki te sakilifisio faitotogi ʼaē neʼe foaki e te ʼAtua ʼaki ia Sesu Kilisito, ʼi tona ʼofa ʼaē kia tatou. ʼE falala ʼe logoʼi e te ʼAtua tana ʼu kolekole.

E feafeaʼi he “haohaoa [ʼa he tahi] ʼi te ʼofa” pea mo ina ‘lī ki tuʼa’ te manavasiʼi ʼo he tūʼa peʼe ko he līʼakina? Neʼe ʼui fēnei e te ʼapositolo ko Soane: “Ko ʼaē ʼe mulimuli ki tana folafola, ʼe moʼoni ia kua liliu moʼoni te ʼofa ʼo te ʼAtua ʼo haohaoa ia ia.” (1 Soane 2:5, MN ) Tou fakatokagaʼi: Kapau ʼe ʼofa te ʼAtua kia tatou logola ʼe kei tou agahala, pea ʼe mahino ia ʼe ʼofa anai kia tatou mo kapau ʼe tou fakahemala moʼoni pea mo “taupau [fakalelei] tana folafola.” (Loma 5:8; 1 Soane 4:​10) Ei kapau ʼe tou haga nofo agatonu, ʼe feala ke tou falala ohage ko te ʼapositolo ko Paulo ʼi tana ʼui ʼo ʼuhiga mo te ʼAtua: “Iaʼia ae nee mole ina fakahao tona Alo totonu, kae nee ina tukuʼage ia o uhiga mo tatou fuli, [he koʼe ʼe] mole ina foaki mai anai te meafuape kia tatou aki iaʼia?”​—Loma 8:​32.