Te ʼu Fehuʼi ʼa Te Kau Lautohi

ʼE ʼui fēnei ia 1 Soane 4:18: “ ʼE mole he manavasiʼi ʼi te ʼofa, kae ko te ʼofa haohaoa ʼe ina līaki ki tuʼa te manavasiʼi, heʼe ko te manavasiʼi ʼe ko he meʼa fakafeagai.” Kae neʼe tohi fēnei e Petelo: “ ʼOʼofa ki te famili katoa ʼo te ʼu tēhina, manavasiʼi ki te ʼAtua.” (1 Petelo 2:17) E feafeaʼi hatatou faka ʼalutahi te ʼu vaega ʼaenī e lua?

Ko Petelo pea mo Soane neʼe ko te ʼu ʼapositolo neʼe akoʼi tonu e Sesu Kilisito. Koia ʼe feala pe ke tou falala neʼe nā talanoa pe ki te meʼa e tahi. ʼO ʼuhiga mo te ʼu vaega ʼaē neʼe tohi ʼi ʼoluga, ʼe hage ʼe fakafeagai tanā ʼu palalau mai tona ʼaluʼaga ʼaē ʼe nā palalau ki te ʼu faʼahiga manavasiʼi e lua.

Tou vakaʼi age muʼa te tokoni ʼa Petelo. Ohage ko tona fakahā e te ʼu meʼa ʼaē neʼe tohi ʼi muʼa atu pea ki muli mai, neʼe foaki e Petelo ki te ʼu tagata Kilisitiano te tokoni neʼe haʼu mai te ʼAtua ʼo ʼuhiga mo tanatou faʼahiga aga kia nātou ʼaē ʼe nofo mo te pule. Ko tona faka ʼuhiga, neʼe ina fakamahinohino te manatu ʼaē ʼe lelei ʼo ʼuhiga mo te tahi ʼu faʼahi ʼo te fakalogo. Koia, neʼe ina tokoniʼi ai te kau Kilisitiano ke nātou fakalogo ki te ʼu tagata ʼaē ʼe nātou maʼu he tuʼulaga pule ʼi te ʼu puleʼaga fakatagata, ohage ko te ʼu hau peʼe ko te ʼu kovana. (1 Petelo 2:13, 14) Neʼe toe ʼui fēnei e Petelo: “Fakaʼapaʼapa ki te ʼu faʼahiga tagata kehekehe, ʼoʼofa ki te famili katoa ʼo te ʼu tēhina, manavasiʼi ki te ʼAtua, koutou fakaʼapaʼapa ki te hau.”—1 Petelo 2:17.

ʼI tatatou vakaʼi te ʼu vaega ki muʼa atu pea ki muli mai ʼo te kapite ʼaia, ʼe mahino papau ʼi tana ʼui ʼaē ʼe tonu ki te kau Kilisitiano ke nātou “manavasiʼi ki te ʼAtua,” ko tona faka ʼuhiga ʼaē ke nātou maʼu he fakaʼapaʼapa loloto pea mo lahi ki te ʼAtua, ko te manavasiʼi ʼaē naʼa nātou fai he meʼa ʼe mole leleiʼia e te pule lahi.—Vakaʼi ia Hepeleo 11:7.

ʼE faka ʼuhiga feafeaʼi te talanoa ʼa te ʼapositolo ko Soane? ʼI te kamataʼaga ʼo te ʼuluaki tohi ʼa Soane kapite 4 neʼe talanoa te ʼapositolo ki te ʼaoga ʼaē ʼo te ʼahiʼahiʼi ʼo “te ʼu folafola ʼaē neʼe fakamānava,” ohage la ko te ʼu akonaki ʼaē mai te kau polofeta loi. ʼE mahino papau ia, neʼe mole tohi e Sehova ʼAtua te ʼu folafola ʼaia; ʼe haʼu peʼe nātou fakaʼata te mālama agakovi.

ʼO mole tatau ia mo te kau Kilisitiano fakanofo ʼaē “ ʼe ʼōmai ia mai te ʼAtua.” (1 Soane 4:1-6) Koia la ʼaē neʼe fai ai e Soane te fakaloto mālohi ʼaenī: “Kau ʼofaina, tou feʼofaniʼaki, he ko te ʼofa ʼe haʼu ia mai te ʼAtua.” Neʼe fakatotonu e te ʼAtua ke ina ʼuluaki fakahā ia te ʼofa—neʼe ina “fekauʼi mai tona ʼAlo ko he sakilifisio faifakalelei moʼo ʼatatou ʼu agahala.” (1 Soane 4:7-10) ʼE tonu ke tou tali feafeaʼi kiai?

ʼI tona fakahagatonu, ʼe tonu ke tou nonofo ʼo logo tahi mo totatou ʼAtua ʼofa. ʼE mole tonu ke tou tuʼaniaʼi peʼe ke tou tekelili ʼi te manatu ʼaē ke tou fakaōvi kia te ia ʼi te faikole. ʼI te kamataʼaga, neʼe tokoni fēnei e Soane: “Kapau ʼe mole tauteaʼi tatou ʼe totatou loto, ʼe tou maʼu te fakahagatonu ki te ʼAtua; pea tatau aipe pe koteā he meʼa ʼe tou kole, ʼe tou maʼu mai ia te ia, koteʼuhi ʼe tou taupau tana ʼu fakatotonu.” (1 Soane 3:21, 22) Ei, ko he leʼo ʼo loto ʼe lelei ʼe ina faka ʼāteaina tatou mai te loto tuʼania peʼe ko te mataku ʼo ʼuhiga mo te fakaōvi ʼaē ki te ʼAtua. ʼAki te ʼofa, ʼe tou logoʼi te fealagia ʼaē ke tou palalau peʼe ke tou fakaōvi faʼifaʼitaliha kia Sehova ʼi te faikole. ʼI te faʼahi ʼaia, “ ʼe mole he manavasiʼi ʼi te ʼofa.”

Tou fakakaukau age muʼa ki te ʼu faʼahiga manavasiʼi ʼaia e lua. ʼE tonu ke maʼu tuʼumaʼu e te Kilisitiano he manavasiʼi faka lotu kia Sehova, ʼaē ʼe tupu mai he fakaʼapaʼapa loloto ki tona tuʼulaga, ki tona mālohi, pea mo tana faitotonu. Kae, ʼe tou toe ʼoʼofa pe foki ki te ʼAtua ohage ko tatatou Tāmai pea ʼe tou logoʼi tatatou felogoi lelei ʼaē mo ia pea mo tatatou fakaōvi ʼaē kia te ia ʼaki he loto faʼitaliha. ʼO mole ʼui ke tou tuʼaniaʼi ia ia, ʼe tou falala ʼe feala hatatou fakaōvi kia te ia, ohage ko he fakaōvi faʼifaʼitaliha ʼa he ʼu fānau ki ʼanatou ʼu mātuʼa lotoʼofa.—Sake 4:8.