He Koʼe ʼe Tonu Ke Ako Te Tohi-Tapu?
KO BILL neʼe tūpulaga, neʼe faigaoʼi, neʼe lelei tana ako pea neʼe mole faigataʼaʼia ʼi te faʼahi ʼo te paʼaga. Kae neʼe mole loto fīmālie he neʼe mole he ʼuhiga ʼo tona maʼuli, ʼo lotohoha lahi ai. Neʼe ina ʼahiʼahiʼi te ʼu faʼahiga lotu ʼi tana faiga ʼaē ke ina maʼu he ʼuhiga ʼo tona maʼuli kae neʼe mole ina maʼu te meʼa ʼaē neʼe ina kumi. Neʼe felāveʼi ʼi te taʼu 1991 mo te Fakamoʼoni ʼa Sehova, pea neʼe tuku age e te tēhina te tohi ʼe talanoa ai ki te manatu ʼa te Tohi-Tapu ʼo ʼuhiga mo te maʼuli. Neʼe fakatuʼutuʼu te ako Tohi-Tapu ke feala ai kia Bill ke mahino katoa ki te faʼahi ʼaia ʼo feiā pe mo ʼihi atu.
ʼE manatuʼi fēnei e Bill: “ ʼI tamatou vakaʼi tuʼumaʼu te Tohi-Tapu ʼi te ʼuluaki fai ʼaē ʼo tamatou ako, neʼe mahino ai kia ʼau neʼe ko te meʼa ʼaia ʼaē neʼe ʼau kumi. Neʼe ʼau fiafia ʼaupito ʼi taku maʼu te ʼu tali ʼi te Tohi-Tapu. ʼI te ʼosi ʼo te ako ʼaia, neʼe ʼau hake ki te moʼuga pea neʼe ʼau hifo ʼi taku kamio ʼo kalaga leʼo lahi he neʼe ʼau fiafia. Neʼe ʼau logoʼi ʼi toku kakano toku fiafia heʼe kua ʼau maʼu te ʼu tali ki taku ʼu fehuʼi.”
ʼIo ʼe mole ko te hahaʼi fuli ʼaē ʼe nātou kalaga fakafiafia ʼi tanatou kua maʼu te moʼoni ʼo te Tohi-Tapu. Kae ʼe ko he meʼa fakafiafia ki te tokolahi ia tanatou maʼu te ʼu tali ki tanatou ʼu fehuʼi maʼuhiga ʼo ʼuhiga mo te maʼuli. ʼE nātou hage ko te tagata ʼo te lea fakatā ʼa Sesu ʼaē neʼe ina maʼu te koloā neʼe fufū ʼi te gāueʼaga. Neʼe ʼui fēnei Sesu: “Pea e alu leva i tona fiafia o fakatau ia mea e ina mau, pea e ina totogi te gaueʼaga alā.”—Mateo 13:44.
Te Kalavi ʼo He Maʼuli Fiafia
Neʼe fakakaukauʼi e Bill te fehuʼi ʼaenī: Koteā te ʼuhiga ʼo te maʼuli? Ia taʼu e lauʼi afe ko te kau filosofia, mo te kau teolosia pea mo te kau tagata popoto neʼe nātou faiga ke nātou maʼu he tali ki te fehuʼi ʼaia. Neʼe lahi te ʼu tohi neʼe fai moʼo tali ki te fehuʼi ʼaia. Neʼe mole he fua ʼo tanatou ʼu faiga, pea tokolahi neʼe nātou ʼui ai ʼe mole maʼu he tali ki te fehuʼi ʼaia. Kae ʼe ʼi ai te tali kiai. Ko te tali ʼe loloto kae ʼe mole faigataʼa. ʼE fakamahino ʼi te Tohi-Tapu. Ko te kalavi ʼo he maʼuli manuʼia pea mo fiafia ʼe koʼeni: ʼE tonu ke tou maʼu he ʼu felogoi lelei mo Sehova, totatou Tupuʼaga pea mo Tāmai ʼi selo. ʼE tou lava maʼu feafeaʼi te faʼahi ʼaia?
ʼE tou lava fakaōvi ki te ʼAtua mo kapau ʼe tou maʼu te ʼu faʼahi ʼaenī e lua ʼe hage ʼe fakafehagai. Ko nātou ʼaē ʼe nātou fakaōvi kia te ia ʼe nātou manavasiʼi pea mo ʼofa kia te ia. Tou vakaʼi te ʼu vaega faka Tohi-Tapu e lua ʼe lagolago ki te talanoa ʼaia. Kua fualoa kiai, neʼe ako fakaleleiʼi e te Hau ko Salomone te ʼuhiga ʼo te tagata pea neʼe ina tohi tana ʼu manatu ʼi te tohi ʼa Tagata Tānaki. Moʼo fakanounou te ʼu meʼa ʼaē neʼe ina fakatokagaʼi, neʼe ina tohi fēnei: “Ko te manatu fakaʼosi ʼo ʼuhiga mo te faʼahi ʼaia, mai tona ʼaluʼaga ʼaē kua tou fagono kia meʼa fuli: Manavasiʼi ki te ʼAtua moʼoni pea mo taupau tana ʼu fakatotonu. He koʼena te maʼua katoa ʼo te tagata.” (Tagata Tānaki 12:13) Hili te ʼu sēkulō, ʼi te temi ʼaē neʼe fehuʼi age pe koteā te fakatotonu lahi ʼaē neʼe foaki ʼi te Lao ʼa Moisese, neʼe tali fēnei Sesu: “E ke ofa anai ki te Aliki tou Atua mo tou loto katoa, mo tou laumalie katoa, pea mo tou atamai katoa.” (Mateo 22:37) Kae ʼe mole mata faikehe koa kia koutou te ʼui ʼaē ke tou manavasiʼi ki te ʼAtua pea mo tou toe ʼofa kia te ia? Tou vakaʼi te maʼuhiga ʼo te manavasiʼi pea mo te ʼofa, pea feafeaʼi tonā ʼaoga lualua moʼo fakatuputupu he felogoi lelei mo te ʼAtua.
Te Faka ʼUhiga ʼo Te Manavasiʼi Ki Te ʼAtua
Kapau ʼe tou loto ke leleiʼia tatatou tauhi e te ʼAtua pea ʼe maʼuhiga ke tou manavasiʼi ʼaki he loto fakaʼapaʼapa. ʼE ʼui fēnei e te Tohi-Tapu: “Ko te manavasiʼi kia Sehova ʼe ko te kamataʼaga ia ʼo te agapoto.” (Pesalemo 111:10) Neʼe tohi fēnei e te ʼapositolo ko Paulo: “Tou haga maʼu te ʼofa makehe, ʼofa ʼaē ʼe feala ai ke tou tauhi ki te ʼAtua ʼaki he tauhi taputapu pea mo he aga ʼe ina leleiʼia, ʼaki he manavasiʼi faka lotu pea mo he manavahe.” (Hepeleo 12:28, MN ) Neʼe toe sio mo te ʼapositolo ko Soane ki te ʼaselo ʼi te lagi neʼe ina kamata tala te logo lelei, ʼo ʼui fēnei: “Koutou manavasiʼi ki te ʼAtua pea mo koutou faka kolōlia kia te ia.”—Apokalipesi 14:6, 7, MN.
Ko te manavasiʼi ki te ʼAtua, ʼaē ʼe ʼaoga tāfito ki te maʼuli fiafia, ʼe mole tatau ia mo te mataku ʼaē naʼa tou fai he meʼa pea tauteaʼi tatou. Ko te taʼi mataku ʼaia ʼe tautau hoko mokā gaohi koviʼi tatou e he tahi ʼe fai fakapō mo agamālohi. Kae ko te manavasiʼi ki te ʼAtua ʼe ko he manavahe pea mo he fakaʼapaʼapa lahi ki te Tupuʼaga. Pea ʼe mole tou fai anai he meʼa ʼe mole leleiʼia e te ʼAtua, koteʼuhi ko Ia te Tuʼi Fakamāu Māʼoluga pea mo Māfimāfi, pea ʼe ina maʼu te mālohi pea mo te pule moʼo tauteaʼi ia nātou ʼaē ʼe talagataʼa.
ʼE ʼAoga Lualua Te Manavasiʼi Pea Mo Te ʼOfa
Kae ʼe mole loto Sehova ke tauhi age te hahaʼi kia te ia ʼuhi pe heʼe nātou manavasiʼi kia te ia. Ko Sehova ʼe ko te ʼAtua ʼofa. Koia neʼe tohi fēnei ai e te ʼapositolo ko Soane: “Ko te ʼAtua ʼe ʼofa.” (1 Soane 4:8, MN ) Neʼe ʼofa lahi ia Sehova ʼAtua ki te malamanei, pea ʼe ina loto ke ʼofa te hahaʼi kia te ia. Kae ʼe lava felogoi feafeaʼi te taʼi ʼofa ʼaia pea mo te manavasiʼi fakaʼatua? ʼE nā pipiki tahi. Neʼe tohi fēnei e te tagata fai pesalemo: “ ʼE kaumeʼa Sehova mo nātou ʼaē ʼe manavasiʼi kia te ia.”—Pesalemo 25:14.
Koutou fakakaukauʼi age muʼa te fakaʼapaʼapa pea mo te manavasiʼi ʼa he tamasiʼi ki he tāmai mālohi pea mo poto. Kae ʼe toe loto fakafetaʼi anai te tamasiʼi ʼaia ki te ʼofa ʼo tana tāmai kia ia. ʼE falala anai te tamasiʼi ki tana tāmai pea mo ina kumi tana takitaki, ʼo falala ʼe fua lelei anai kia te ia te takitaki ʼaia. ʼE toe feiā mo kapau ʼe tou ʼofa pea mo manavasiʼi kia Sehova, ʼe tou fakalogo anai ki tana takitaki, pea ʼe fua lelei anai kia tatou. Koutou fakatokagaʼi pe koteā ʼaē neʼe ʼui e Sehova ʼo ʼuhiga mo te kau Iselaele: “Kanapaula neʼe nātou gāueʼi ʼonatou loto ke nātou manavasiʼi kia te ʼau pea mo nātou taupau tuʼumaʼu taku ʼu fakatotonu fuli, ke fua lelei ai kia nātou pea mo ʼonatou ʼu foha ki he ʼu temi ʼe heʼegata!”—Teutalonome 5:29.
Ei, ʼaki te manavasiʼi fakaʼatua ʼe mole tou maʼuli popūla kae ʼe tou maʼuli ʼāteaina, pea ʼe mole tou maʼuli mamahi kae ʼe tou maʼuli fiafia. Neʼe fakakikite fēnei e Isaia ʼo ʼuhiga mo Sesu: “ ʼE fiafia anai ʼi te manavasiʼi kia Sehova.” (Isaia 11:3) Pea neʼe tohi fēnei e te tagata fai pesalemo: “Manuʼia te tagata ʼaē ʼe manavasiʼi kia Sehova, ʼaē ʼe lahi tona fiafia ʼi tana ʼu fakatotonu.”—Pesalemo 112:1.
ʼE mahino ia ʼe mole tou lava manavasiʼi anai pea mo ʼofa ki te ʼAtua mo kapau ʼe mole tou ʼiloʼi ia ia. Koia la ʼaē ʼe maʼuhiga ai ke kita ako te Tohi-tapu. Ko te ako ʼaia ʼe tokoni mai kia tatou ke tou mahino ki te ʼulugaaga ʼo te ʼAtua pea mo tou fakamoʼoni ai, ʼaki he loto fakafetaʼi, ʼe ko he aga fakapotopoto hatatou muliʼi tana takitaki. ʼI tatatou fakaōvi ki te ʼAtua, ʼe tou fia fai tona finegalo pea mo taupau tana ʼu folafola heʼe tou ʼiloʼi ʼe fua lelei anai kia tatou.—1 Soane 5:3.
ʼE ko he meʼa fakafiafia hakita ʼiloʼi ʼe haʼele faitotonu he tahi. Neʼe moʼoni te faʼahi ʼaia kia Bill, ʼaē neʼe tou talanoa ki ai ʼi te kamataʼaga. Mole heʼeki faʼa fualoa, neʼe ina ʼui fēnei: “ ʼI te ʼu taʼu e hiva talu mai taku kamata ako ʼo te Tohi-Tapu, kua tuputupu taku ʼu felogoi mo Sehova. Ko te fiafia lahi ʼaē neʼe ʼau ʼuluaki maʼu kua liliu ʼi te temi nei ko he toe fiafia moʼoni ʼi toku maʼuli. ʼI te temi fuli pe ʼe ʼau tokagaʼi ia te ʼu faʼahi lelei ʼo te maʼuli. ʼI te ʼaho fuli ʼe lahi taku ʼu gāue ʼaoga heʼe mole ʼau kumi he ʼu fakafiafia vaʼiganoa. Kua liliu ia Sehova ko he tahi ʼe moʼoni kia te ʼau, pea ʼe ʼau ʼiloʼi ʼe tokaga moʼoni ki te ʼu meʼa ʼaē ʼe ʼaoga tāfito kia te ʼau.”
ʼI te alatike ka hoa mai, ʼe tou vakaʼi anai peʼe feafeaʼi ki te ʼatamai mālama ʼo ʼuhiga mo Sehova hana lava foaki te fiafia pea mo he ʼu fua lelei kia nātou ʼaē ʼe nātou maʼuliʼi te ʼatamai mālama ʼaia.
[Talanoa ʼo te pasina 5]
ʼE faka ʼuhiga takita fakaōvi ki te ʼatua ʼe tou ʼofa pea mo manavasiʼi kia te ia
[Paki ʼo te pasina 6]
Neʼe fiafia Sesu ʼi tana manavasiʼi kia Sehova