Ko He ʼAho ʼe Tonu Ke Fakamanatu

KOTEĀ te ʼaho ʼaia? ʼE ko te ʼaho ʼo te mate ʼa te tagata kua teitei hili kiai taʼu e 2 000. Neʼe ina ʼui fēnei: “E au foaki toku mauli ke au toe too mai ia. E mole he tahi e ina too toku mauli maia te au, kae e au foaki’pe e au toku mauli.” (Soane 10:17, 18) Ko te tagata ʼaia neʼe ko Sesu Kilisito.

Neʼe fakatotonu e Sesu ki tana kau tisipulo ke nātou fakamanatu tona mate faka sākilifisio. ʼE toe fakahigoaʼi foki te ʼaho ʼaia ko te ‘Ōmoe ʼa te ʼAliki,’ peʼe “ko te kai a te Aliki.” (1 Kolonito 11:20) Ko te ʼAho Fakamanatu ʼaia ʼaē neʼe fakatotonu e Sesu ke fakamanatu tona mate ʼe fakahoko anai e te kau Fakamoʼoni ʼa Sehova mo ʼonatou kaumeʼa ʼi te Felianima ʼaho 24 ʼo Malesio 2005 ʼi te ʼosi tō ʼo te laʼā.

ʼE fakamahino anai ʼi te akonaki faka Tohi-Tapu, ia te ʼuhiga ʼo te pane ʼe mole ʼi ai hona meʼa fakatupu mo te vino kula ʼaē ka fakaʼaogaʼi ʼi te lakaga ʼaia. (Mateo 26:26-28) ʼI te akonaki ʼaia, ʼe maʼu anai he ʼu tali ki te ʼu fehuʼi ohage: Peʼe tonu ke fakamanatuʼi tuʼa fia te toʼotoʼoga ʼaia e te kau Kilisitiano? Ko ai ʼaē ʼe tonu ke ina kai te pane mo ʼinu te vino? ʼE ʼaoga kiā ʼai te mate ʼa Sesu? Ko te toʼotoʼoga maʼuhiga ʼaia ʼe tokoni anai kiā tatou fuli ke tou mahino ki te ʼuhiga ʼo te maʼuli pea mo te mate ʼa Sesu.

ʼE fai atu anai he fakatalitali fakafiafia kiā koutou ʼi te ʼAho Fakamanatu ʼo te mate ʼa Sesu. Koutou vakaʼi mo te kau Fakamoʼoni ʼa Sehova ʼo tokotou nofoʼaga te koga meʼa mo te hola ʼaē ʼe fai ai.