Ko He Fakavikiviki Kiā Sehova ʼi Te Faleako

ʼI TE malamanei kātoa, ko te kau tūpulaga Fakamoʼoni ʼa Sehova ʼe nātou maʼu te ʼu faigamālie ke nātou vikiʼi te ʼAtua ʼi te faleako​—ʼaki tanatou palalau pea mo tanatou aga. Koʼeni te ʼu faʼifaʼitaki ʼe hā ai tanatou faʼafai ʼi tonatou temi tūpulaga.

Neʼe ʼui age ki te kiʼi finemui Fakamoʼoni ʼi Keleka ke ina fai hana fakamatala ʼo ʼuhiga mo te ʼulihi ʼo te ʼaele ʼo te kele. Neʼe ina fai tana ʼu kumi ʼi te Index des publications de la Société Watch Tower, pea neʼe ina maʼu te alatike lelei ʼi te Réveillez-vous ! ʼI te fakaʼosi ʼo tana fakamatala neʼe ina fakahā ki te fafine faiako neʼe ina toʼo tana fakamatala mai te Réveillez-vous !, pea neʼe ʼui age e tana fafine faiako neʼe lelei ʼaupito tana fakamatala. ʼI te tahi ʼaho, ʼi te fono ʼi te faleako, neʼe fakaʼaogaʼi tana fakamatala e tana fafine faiako, pea neʼe leleiʼia. Neʼe fakatotonu ai e te kiʼi tuagaʼane finemui ʼaia ke ina fakatoʼo ki tana fafine faiako he tahi ʼu Réveillez-vous !, ʼo kau ai mo te nusipepa “ Les enseignants : que ferions-nous sans eux ? ” (Koteā anai ka tou fai mokā mole ʼi ai he kau faiako?) Ki muli age neʼe vikiʼi e te fafine faiako ia te nusipepa ko te Réveillez-vous ! ki tana kau ako, pea neʼe kamata fakaʼui ai e te tahi kau ako hanatou ʼu Réveillez-vous ! Neʼe ʼaumai e te tuagaʼane ia te tahi ʼu Réveillez-vous ! ki te faleako, ke feala ai ki te kau ako ke nātou lau.

ʼI Bénin, ʼi Afelika, ko te finemui Kilisitiano neʼe tau mo te faʼahiga ʼahiʼahi ʼe mole hoko māhani. Ko te aga ʼe fai māhani e te ʼu mātuʼa ʼa te kau ako ʼo tana faleako ʼe nātou fakatahitahi ke nātou totogi he ʼu hahaʼi faiako ke nātou teuteuʼi te kau ako ki te ʼu sivi, tāfito ke nātou teuteuʼi mo nātou te ʼu koga faigataʼa ʼo te ʼu sivi. Neʼe filifili e te kau faiako ʼaia te ʼu Moeaki uhu moʼo fai te ʼu teuteu sivi. Kae neʼe mole loto kiai e te finemui Fakamoʼoni ʼo ina ʼui fēnei: “Ko te ʼu Moeaki ʼe ko te ʼaho ʼaia ʼe fai faka mafola ai te kokelekasio kātoa. ʼE ko te ʼaho tāfito ʼaia ʼaē ʼe au fiafia ai ʼi te vāhaʼa, pea ʼe mole au loto ke fetogi te fakatuʼutuʼu ʼaia!” Ko tana tāmai, ʼaē ʼe ina taupau tokotahi ia ia pea ʼe ko te Fakamoʼoni, neʼe manatu tahi mo tona ʼofafine pea neʼe ina ʼahiʼahi kole ki te ʼu mātuʼa ʼa te kau ako pea mo te ʼu hahaʼi faiako ke fetogi te ʼaho ʼaia. Kae neʼe nātou fakafisi fuli kiai. Pea neʼe fakatotonu e te finemui ke ina teuteuʼi tokotahi tana ʼu sivi. Neʼe hoko atu tana kau ki te fai faka mafola mo te kokelekasio. Neʼe manukiʼi ia ia e tana kau ako, ʼo nātou fakaneke ia ia ke tuku tana fai faka mafola pea ke lītuʼa ki tona ʼAtua. Maʼa nātou ʼe mole maʼu anai e te finemui Fakamoʼoni ia te sivi. Kae neʼe mole hoko feiā ia, heʼe ko te kau ako fuli ʼaia neʼe tokoni ki ai te kau faiako, neʼe mole nātou maʼu te sivi, kae neʼe maʼu te sivi e te finemui Fakamoʼoni. Pea neʼe gata ai leva te ʼu manukinuki. ʼI te temi nei kua ʼui age e te kau ako ki te finemui Fakamoʼoni, “ ʼE tonu ke ke haga tauhi ki tou ʼAtua.”

ʼI te République Tchèque, neʼe ʼi ai te kiʼi taʼahine ʼe taʼu 12 neʼe tonu ke ina teuteuʼi te fakamatala ʼo ʼuhiga mo he tohi. Neʼe uga ia ia e tana faʼē ke ina fakamatala te tohi Te tagata ʼaē ʼe lahi tokotahi ʼo te ʼu temi fuli. Neʼe ina kamata fēnei tana fakamatala: “ ʼI takotou manatu la, ko ai ʼapē te tagata ʼaē ʼe lahi tokotahi ʼo te ʼu temi fuli?” Neʼe palalau ai leva ʼo ʼuhiga mo Sesu, mo tona maʼuli ʼi te kele, pea mo tana ʼu akonaki. Pea neʼe ina fakamatalatala te kapite ʼaē ko tona kupu tāfito, “Ko He ʼEkenaki Ki Te Fakamolemole.” Neʼe ʼui fēnei age e tana fafine faiako: “Ko taku hoki logo ʼaē ki he fakamatala lelei ʼaupito!” pea neʼe ina fia toʼo hana tohi feiā. Ko ʼihi kau ako neʼe nātou fia fai mo nātou ki hanatou tohi. ʼI te ʼaho ake, neʼe fiafia te kiʼi taʼahine ʼaia he neʼe ina tufa te ʼu tohi feiā e 18.

ʼE fiafia ʼaupito te kau tūpulaga ʼi te fakavikiviki kiā Sehova ʼi te faleako. ʼE tonu ai mo tatou fuli ke tou mulimuli ki tanatou faʼafai ʼi tonatou temi tūpulaga.