“Ko Toku Tokoni ʼe Haʼu Mai Ia Sehova”

Ko Te Kau Tūpulaga ʼAē ʼe Nātou Fakavikiviki Ia Sehova ʼe Nātou Hikihiki Tonatou Maʼuli

“ ʼE AU loto ki te meʼa ʼaē ʼe lelei ki toku maʼuli!” Neʼe ko te fakaʼamu ʼaia ʼa te tama ʼe taʼu 15. Kae ʼe lava maʼu feafeaʼi e he tūpulaga te meʼa ʼaē ʼe lelei ki tona maʼuli? ʼI te Tohi-Tapu, ʼe tou maʼu ai te tali lelei: “Manatuʼi tou Tupuʼaga ʼi tou temi tūpulaga!”​—⁠Tagata Tānaki 12⁠:​1, Contemporary English Version.

ʼE mole gata pe ki te hahaʼi lalahi ʼe tonu ke nātou fakavikiviki pea mo kaugana kiā Sehova. Ko Samuele, te tama ʼa Elekana pea mo Ana, neʼe kei tamasiʼi ʼi te temi ʼaē neʼe tauhi ai kiā Sehova ʼi te tapenakulo. (1 Samuel 1⁠:​19, 20, 24; 2⁠:11) Neʼe ʼi ai te kiʼi taʼahine Hepeleo neʼe ina fakahā ia tana tui mālohi kiā Sehova ʼi te temi ʼaē neʼe ina ʼui age ai kiā Naamane, te pule ʼo te kautau Silia, ke ʼalu ki te polofeta ko Eliseo ke fakamālōlō ai tona kilia. (2 Hau 5⁠:​2, 3) Iā Pesalemo 148⁠:​7, 12, ʼe fakaloto mālohiʼi te ʼu tamaliki tagata pea mo fafine ke nātou fakavikiviki kiā Sehova.a ʼI tona taʼu 12, neʼe leleiʼia e Sesu te tauhi ʼaē ki tana Tāmai. (Luka 2⁠:​41-49) ʼAki te ako ʼaē neʼe nātou maʼu mai te Tohi-Tapu, ko ʼihi tamaliki tagata ʼi tanatou sisio ʼaē kiā Sesu ʼi te fale lotu neʼe nātou kalaga fēnei: “Hāofaki, ʼe mātou kole atu, te ʼAlo ʼo Tavite.”​—⁠Mateo 21⁠:​15, 16, MN.

Te Fakavikiviki Kiā Sehova Ia ʼAho Nei

Ia ʼaho nei, tokolahi te kau tūpulaga Fakamoʼoni ʼa Sehova ʼe nātou fiafia ʼi tanatou lotu pea ʼe nātou lototoʼa ʼo fakahā ia tanatou lotu ki ʼihi ʼi te faleako pea mo ʼihi atu faʼahi. Tou vakaʼi ia te ʼu faʼifaʼitaki e lua.

ʼI Pilitania, ko te kalasi ʼa Stephanie ʼaē ʼe taʼu 18 neʼe nātou fai palalau ki te fakatō fatu pea mo te tahi atu ʼu ʼaluʼaga ʼo te maʼuli. Neʼe fakahā e te tagata faiako, ʼi te temi nei kua tali te ʼu fakatō fatu, pea ʼe mole feala ki he finemui ke ina fakafihiʼi te fakatuʼutuʼu ʼaia. ʼI te temi ʼaē neʼe tali ai e te kau ako fuli ia te manatu ʼaia, neʼe logoʼi e Stephanie ʼe tonu ke ina fakahā te manatu ʼa te Tohi-Tapu ʼo ʼuhiga mo te faʼahi ʼaia. Pea neʼe maʼu e Stephanie ia te faigamālie ʼi te temi ʼaē neʼe fehuʼi age e te tagata faiako pe koteā tana manatu ki te faʼahi ʼaia. Logola tana mataku, kae neʼe fakaʼaogaʼi e Stephanie ia te temi faigamālie ʼaia ke ina fakahā ia te manatu ʼa te Tohi-Tapu. Neʼe ina fakamatala fakanounou ia te manatu ʼaē iā Ekesote 21⁠:​22-24, pea mo ʼui age kapau ʼe mole tonu ke fai he meʼa kovi ki te kiʼi tamasiʼi ʼaē kei fuafatuʼi, pea ʼe mahino ia ko te fakatō fatu ʼe fakafeagai ʼaupito ki te finegalo ʼo te ʼAtua.

Neʼe mole heʼeki lau te ʼu vaega ʼaia e te tagata faiako ʼaē neʼe ko te tagata takitaki lotu. Ko te faka mafola lototoʼa ʼa Stephanie, neʼe fakatupu ai te ʼu fai palalau ki te ʼu akonaki kehekehe mo tona ʼu kaugā ako. ʼI te temi nei, ʼe tali lelei e te kiʼi finemui te ʼu nusipepa foʼou ʼo Te Tule Leʼo pea mo te Réveillez-vous!, pea ko tona tahi ʼu kaumeʼa fafine e toko lua neʼe nā kau ʼi te fakatahi faka tisitilike ʼa te kau Fakamoʼoni ʼa Sehova, ʼaē neʼe papitemaʼi ai Stephanie moʼo fakahā ia tana foaki ʼaē ʼo tona maʼuli ki te ʼAtua.

ʼI Suliname ʼi te Potu Saute Amelika, ko Vareta ʼaē ʼe taʼu ono, neʼe ina maʼu te faigamālie moʼo vikiʼi te ʼAtua ʼi te temi ʼaē neʼe ʼaoga ai ki tana fafine faiako he fakafimālie faka Tohi-Tapu. ʼI te hili ʼo ʼaho e tolu ʼaē neʼe mole gāue ai, neʼe toe liliu mai ki te faleako ia te fafine faiako, pea neʼe ina fehuʼi age ki tana kau ako, peʼe nātou ʼiloʼi pe koʼe neʼe puli. Neʼe nātou tali age: “He neʼe ke mahaki, kaeā koa la?” Neʼe ina ʼui age: “Kailoa. Neʼe mate toku tēhina lahi, pea neʼe au lotomamahi ʼaupito. Koia ʼe au kole atu ke tuku takotou logoaʼa heʼe mamahi toku ʼulu.”

ʼI te hili hoʼatā ʼo te ʼaho ʼaia kae lolotoga moe tana faʼē, neʼe kumi e Vareta ia te ʼu nusipepa ʼāfea, ʼo ina lau tonatou ʼu kupu tāfito. Neʼe ina maʼu Te Tule Leʼo ʼo te ʼaho 15 ʼo Sūlio 2001, ʼaē ko tona kupu tāfito “ ʼE ʼi Ai Koa He Maʼuli ʼi Te Hili ʼo Te Mate?” ʼI te lahi ʼo tona fiafia, neʼe ina fafagu tana faʼē pea mo ʼui age: “Mama, mama, sio! Neʼe au maʼu te nusipepa ʼe palalau ki te mate maʼa taku fafine faiako!” Neʼe momoli ia te nusipepa ʼaia ki te fafine faiako pea mo te tohi ʼa Vareta. Neʼe ina tohi fēnei: “Ko tau nusipepa ʼaenā. ʼI te Palatiso ʼe ke toe sio anai ki tou tēhina, koteʼuhi ʼe mole loi te ʼAtua. Neʼe ina fakapapauʼi mai ʼe ina fakatuʼu anai te palatiso, pea ko te palatiso ʼaia ʼe mole tuʼu ʼi te lagi kae ʼe tuʼu ʼi te kele.” Neʼe leleiʼia ʼaupito e te fafine faiako te fakaloto fīmālie faka Tohi-Tapu ʼaē neʼe ina maʼu ʼi te ʼu alatike ʼaia.

Koutou Faʼufaʼu Tokotou Maʼuli Ki Te Ka Haʼu

Ko Sehova ʼe ko “te ʼAtua fiafia,” pea ʼe ina loto ke fiafia mo te kau tūpulaga. (1 Timoteo 1⁠:​11, MN ) ʼE ʼui fēnei ʼi tana Folafola: “Fakaʼaogaʼi tou temi tūpulaga. Fiafia ʼi te temi ʼe kei ke tūpulaga ai.” (Tagata Tānaki 11⁠:​9, Today’s English Version) ʼE sio mamaʼo ia Sehova pea mo ina ʼiloʼi te ʼu ikuʼaga ʼo he aga ʼe lelei peʼe kovi. Koia la ʼaē ʼe maʼu ʼi tana Folafola ia te fakaloto mālohi ʼaenī ki te kau tūpulaga: “Koia, ke ke manatuʼi tou Tupuʼaga lahi ʼi te ʼu ʼaho ʼo tou temi tūpulaga, ʼi muʼa ʼo te hoko mai ʼo te ʼu ʼaho faigataʼa, peʼe ko te ʼu taʼu ʼaē ka ke ʼui ai: ‘Neʼe mole au fiafia ʼi te ʼu taʼu ʼaia.’ ”​—⁠Tagata Tānaki 12⁠:⁠1.

Ei, ʼe loto e Sehova ke fiafia te kau tūpulaga ʼi tonatou maʼuli. Kapau ʼe nātou manatuʼi pea mo fakavikiviki te ʼAtua, ʼe feala anai ki te kau tūpulaga ke nātou māʼuʼuli fiafia. Māʼiape la mo te ʼu temi fihifihia, ʼe nātou falala ʼo ʼui fēnei: “Ko toku tokoni ʼe haʼu mai ia Sehova.”​—⁠Pesalemo 121⁠:⁠2.

[Kiʼi nota]

[Fakamatala ʼo te pasina 9]

“Koutou fakavikiviki kiā Sehova mai te kele, . . . kau tamaliki tūpulaga pea mo koutou foki kau tāupoʼou.”​—⁠PESALEMO 148⁠:​7, 12

[Talanoa ʼo te pasina 8]

ʼE TOKONI IA SEHOVA KI TE KAU TŪPULAGA

“Ko koe ko toku falalaʼaga, Ê Tui ʼAliki ko Sehova, toku falalaʼaga talu mai toku temi tūpulaga.”​—⁠Pesalemo 71⁠:⁠5.

“[Ko te ʼAtua] ʼe ina fakafimalieʼi tou maʼuli ʼaki te meʼa ʼaē ʼe lelei; ʼe fakafoʼou tuʼumaʼu tou temi tūpulaga ohage ko ʼaē ʼo te akūila.”​—⁠Pesalemo 103⁠:⁠5.