Kau Tūpulaga, Koutou Fakavikiviki Kiā Sehova!
“Koutou fakavikiviki kiā Sehova mai te kele, . . . kau talavou pea mo koutou foki kau finemui.”—Pesalemo 148:7, 12.
1, 2. (a) Koteā te ʼu tapu ʼe ʼiloʼi lelei e te kau tūpulaga? (b) He koʼe ʼe mole tonu ke ʼiʼita te kau tūpulaga ʼo ʼuhiga mo te ʼu meʼa ʼaē ʼe tapuʼi age e tanatou ʼu mātuʼa?
ʼI TE agamāhani ʼe ʼiloʼi lelei e te ʼu fānau te ʼu meʼa ʼaē ʼe mole heʼeki fakagafua age ke nātou fai. Tokolahi ia nātou ʼe feala ke nātou kole atu peʼe ko tonatou taʼu fia ʼaē ka feala ai ke nātou fakalaka tokotahi, peʼe nātou ʼolo ʼo haʼele fualoa ʼi te pōʼuli peʼe ke nātou uli motokā. ʼI ʼihi temi, ʼe lagi manatu e he tūpulaga ʼe lahi fau te ʼu meʼa ʼaē ʼe tapuʼi age kiā ia.
2 ʼU tūpulaga, ʼe koutou ʼiloʼi ʼe manatu e takotou ʼu mātuʼa ʼe ko he aga fakapotopoto te tapuʼi atu ʼo te ʼu meʼa ʼaia, heʼe lagi nātou fai moʼo puipui ʼo koutou. Pea ʼe koutou toe ʼiloʼi foki, ʼe fiafia ia Sehova mokā koutou fakalogo ki takotou ʼu mātuʼa. (Kolose 3:20) Kae ʼe koutou manatu koa ʼe mole feala hakotou faʼitaliha ʼuhi ko te ʼu tapu fuli ʼaia? ʼE ko te ʼu meʼa maʼuhiga fuli koa ʼaē ʼe tapuʼi atu kiā koutou, ʼo aʼu ki takotou kua lalahi age? Kailoa! ʼE ʼi ai te gāue ʼe lolotoga fai ia ʼaho nei ʼe maʼuhiga age ʼi te ʼu meʼa ʼaē ʼe koutou fia fai kiai. ʼE fakagafua atu koa kiā koutou tūpulaga ke koutou kau ki te gāue ʼaia? ʼE fakagafua atu pea ʼe fakaafe atu koutou ki te gāue ʼaia e te ʼAtua Māʼoluga totonu!
3. Ko te pilivilesio fea ʼaē ʼe tuku age e Sehova ki te kau tūpulaga, pea koteā te ʼu fehuʼi ʼaē ka tou vakaʼi ʼi te temi nei?
3 Koteā te gāue ʼaia? Koutou tokagaʼi te ʼu palalau ʼaē ʼe tuʼu ʼi te vaega ʼaē ʼe fakatafito kiai te alatike ʼaenī: “Koutou fakavikiviki kiā Sehova mai te kele, . . . kau talavou pea mo koutou foki kau finemui, koutou hahaʼi mātutuʼa pea mo koutou kau tama.” (Pesalemo 148:7, 12) ʼE ʼui ʼi te vaega ʼaia ʼe ko hakotou pilivilesio lahi ʼaenī: ke koutou fakavikiviki kiā Sehova. ʼU tūpulaga ʼe koutou fiafia koa ʼi te kau ki te gāue ʼaia? Ko te tokolahi ʼe nātou fiafia ki te gāue ʼaia. Ke feala hakotou ʼiloʼi pe koʼe ʼe tonu ke koutou maʼu te fiafia ʼaia, tou vakaʼi te ʼu fehuʼi e tolu. ʼUluaki, he koʼe ʼe tonu ke koutou fakavikiviki kiā Sehova? Lua, ʼe lava fua lelei feafeaʼi takotou fakavikiviki ʼaē kiā te ia? Tolu, ko te temi fea ʼaē ʼe feala ai ke koutou kamata fakavikiviki ai kiā Sehova?
He Koʼe ʼe Tonu Ke Koutou Fakavikiviki Kiā Sehova?
4, 5. (a) Ohage ko tona tohi iā Pesalemo 148, koteā te ʼaluʼaga fakaofoofo ʼaē ʼe hoko kiā tatou? (b) ʼE lava feafeaʼi ki he ʼu meʼa ʼe mole palalau pea mo fakakaukau, ke nātou fakavikiviki kiā Sehova?
4 ʼE maʼuhiga ke koutou fakavikiviki kiā Sehova heʼe ko ia te Tupuʼaga. ʼI te Pesalemo 148 ʼe fakatokagaʼi mai te manatu moʼoni ʼaia. Tou fakatā te ʼaluʼaga ʼaia: ʼE koutou fakaōvi ki he kaugamālie, ʼe nātou lolotoga hiva te hiva mālie pea mo fakaʼofaʼofa, ʼe malave feafeaʼi anai kiā koutou? E feafeaʼi tokotou loto mo kapau ʼe koutou ʼiloʼi ʼe moʼoni te ʼu palalau ʼo te hiva ʼaia, heʼe talanoa ki he ʼu manatu ʼe koutou ʼiloʼi ʼe ko he ʼu manatu maʼuhiga, mo fakafiafia pea mo ʼaoga ki te maʼuli? ʼE koutou fia ako koa te hiva ʼaia pea mo fia hiva mo nātou? Tokolahi iā tatou ʼe tou fia fai anai te faʼahi ʼaia. ʼE fakahā ʼi te Pesalemo 148 ʼe koutou nonofo ʼi he ʼaluʼaga feiā, kae ʼe ko he ʼaluʼaga ʼe fakaofoofo age. ʼE talanoa te pesalemo ʼaia ki he toe hahaʼi tokolahi, ʼe nātou fakavikiviki fakatahi fuli kiā Sehova. Kae ʼi takotou lau te pesalemo, ʼe koutou tokagaʼi anai te meʼa faikehe. Koteā te meʼa ʼaia?
5 Ko te Pesalemo 148 ʼe talanoa ki te kau fai fakavikiviki ʼe mole nātou palalau pea mo fakakaukau. Ohage la, ʼe fakavikiviki kiā Sehova, te lāʼa, mo te māhina, mo te ʼu fetuʼu, mo te nive, mo te matagi, mo te ʼu moʼuga, pea mo te ʼu moʼuga liliki. ʼE lava fakahoko feafeaʼi te faʼahi ʼaia e he ʼu meʼa ʼe mole palalau? (Vaega 3, 8, 9) ʼE toe feiā mo te ʼu fuʼu ʼakau, mo te ʼu ika ʼo te tai, pea mo te ʼu manu kehekehe. (Vaega 7, 9, 10) Kua koutou mamata koa ki te matalelei ʼo te paletō ʼo te laʼā peʼe ko te mālama lelei ʼo te māhina ʼi te pōʼuli, peʼe koutou kakata ʼi te gaoʼi ʼo te ʼu manu peʼe koutou ōfo ʼi te matalelei ʼo he fenua? ʼI te ʼu lakaga ʼaia, ʼe hage ʼe koutou “logo” ki te hiva fakavikiviki ʼo te ʼu faʼu ʼa te ʼAtua. Ko te ʼu faʼu fuli ʼaia ʼa Sehova, ʼe nātou fakamanatuʼi mai ʼe ko ia te Tupuʼaga mafimafi, ʼe mole he tahi ʼi te ʼatulaulau ʼe mālohi age, peʼe poto age, peʼe ʼofa lahi age iā te ia.—Loma 1:20; Apokalipesi 4:11.
6, 7. (a) Iā Pesalemo 148, ko ai te ʼu meʼa maʼuli popoto ʼaē ʼe nātou fakavikiviki kiā Sehova? (b) He koʼe ʼe tou fia fakavikiviki anai kiā Sehova? Koutou tuku mai hona fakatā.
6 ʼE toe talanoa te Pesalemo 148 ki te ʼu meʼa maʼuli popoto ʼe nātou fakavikiviki kiā Sehova. ʼI te vaega 2, ko te “kautau” ʼa Sehova ʼaē ʼi selo, te kau ʼāselo, ʼe nātou fakavikiviki ki te ʼAtua. ʼI te vaega 11, ko te hahaʼi maʼuhiga pea mo ʼiloa, ohage ko te ʼu hau pea mo te ʼu tuʼi fakamāu, ʼe fakaafe nātou ke nātou kau ki te fakavikiviki ʼaia. Kapau ʼe fiafia te kau ʼāselo mālolohi ʼi te fakavikiviki kiā Sehova, pea ʼe mole feala ke ʼui e he tagata fakakelekele ʼe maʼuhiga fau ke ina fakavikiviki ai kiā Sehova. Pea ʼi te vaega 12 pea mo te 13, ʼe fakaafe koutou kau tūpulaga ke koutou fakatahi kiā nātou pea mo koutou fakavikiviki kiā Sehova. ʼE koutou fia fai koa ia te faʼahi ʼaia?
7 Koʼeni tona fakatā. Kapau ʼe koutou kaumeʼa lelei mo he tahi ʼe lagi mālohi ʼi te faigaoʼi, peʼe poto ʼi he faʼahiga gāue, peʼe poto ʼi te fai māholo, ʼe mahino ia ʼe koutou talanoa anai ʼo ʼuhiga mo ia ki tokotou famili pea mo tokotou tahi ʼu kaumeʼa. ʼE mahino ia. Pea ko tatatou ako te ʼu meʼa fuli ʼaē neʼe fai e Sehova ʼe feala ke toe malave feiā kiā tatou. Ohage la ʼe ʼui iā Pesalemo 19:1, 2, ko te lagi mo ʼona fetuʼu ʼe nātou fakatupu ‘he palalau.’ Ka tou fakakaukauʼi ʼo ʼuhiga mo te ʼu meʼa fakaofoofo ʼaē neʼe fai e Sehova, ʼe mahino ia ʼe mole feala ke tou tāʼofi tatatou fia palalau ki ʼihi ʼo ʼuhiga mo totatou ʼAtua.
8, 9. He koʼe ʼe loto e Sehova ʼe tou fakavikiviki kiā te ia?
8 Ko te tahi tupuʼaga maʼuhiga ʼaē ʼe tou fakavikiviki ai kiā Sehova, heʼe ina loto ke tou fai te faʼahi ʼaia. Koteā tona tupuʼaga? ʼE ʼaoga koa kiā te ia ke fai age e te hahaʼi he ʼu fakavikiviki? Kailoa ia. Ko tatou ʼi ʼihi temi ʼe ʼaoga ke fai mai he ʼu fakavikiviki, kae ko Sehova ʼe māʼoluga age ia tatou. (Isaia 55:8) ʼE mole lotolotolua ia ʼo ʼuhiga mo ia totonu peʼe ko tona ʼu kalitātē. (Isaia 45:5) Kae ʼe loto ia ke tou fakavikiviki kiā te ia pea ʼe fiafia mokā tou fai ia te faʼahi ʼaia. Koteā tona tupuʼaga? ʼE ko tupuʼaga e lua. ʼUluaki, ʼe ina ʼiloʼi ʼe ʼaoga kiā tatou ke tou fakavikiviki kiā te ia. Neʼe ina faʼu tatou ʼaki he ʼu manatu ki te ʼu meʼa fakalaumālie, mo hatatou fia atolasio ki te ʼAtua. (Mateo 5:3) ʼE fiafia Sehova ʼi tatatou fakahoko te faʼahi ʼaia, ohage pe ko te fiafia ʼo takotou ʼu mātuʼa ʼi tanā sio ʼaē ʼe koutou kai he meʼa kai ʼe nā ʼiloʼi ʼe fua lelei ki tokotou sino.—Soane 4:34.
9 Lua, ʼe ʼiloʼi e Sehova ʼe ʼaoga ke logo mai e te tahi ʼu hahaʼi ki tatatou fakavikiviki kiā te ia. Neʼe tohi e te ʼapositolo ko Paulo te ʼu palalau ʼaenī ki te tagata tūpulaga ko Timoteo: “Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.” (1 Timoteo 4:16) Ei, ka koutou akoʼi te hahaʼi ʼo ʼuhiga mo Sehova ʼAtua, ʼo koutou fakavikiviki kiā te ia, pea ʼe feala ke nātou toe ʼiloʼi mo nātou ia Sehova. ʼAki te ʼatamai mālama ʼaia ʼe feala ke hāofaki nātou ʼo talu ai!—Soane 17:3.
10. He koʼe ʼe tou uga tatou ke tou fakavikiviki ki totatou ʼAtua?
10 ʼE ʼi ai te tahi tupuʼaga ke tou fakavikiviki ai kiā Sehova. Koutou manatuʼi te fakatātā ʼo ʼuhiga mo takotou kaumeʼa ʼaē ʼe poto. Kapau ʼe koutou logo ki he ʼu fasituʼu ʼe fai e ʼihi ʼo ʼuhiga mo ia, ʼo nātou valokiʼi tona higoa, pea ʼe mole koutou fia vikiʼi anai koa ia ia? Neʼe lahi te valokiʼi ʼo Sehova ʼi te malamanei. (Soane 8:44; Apokalipesi 12:9) Koia ko nātou ʼaē ʼe ʼoʼofa kiā te ia ʼe uga nātou ke nātou tala te moʼoni ʼo ʼuhiga mo ia, ʼo nātou fakatonutonuʼi te ʼu manatu hala ʼaē neʼe lau. ʼE koutou loto koa mo koutou ke koutou fakahā tokotou ʼofa pea mo tokotou loto fakafetaʼi kiā Sehova, pea mo fakahā ʼe koutou loto ke Pule kiā koutou kae mole ko Satana, tona fili tāfito? ʼE feala ke koutou fai te faʼahi ʼaia ʼo koutou fakavikiviki kiā Sehova. Tou vakaʼi te lua fehuʼi, ʼaē peʼe lava feafeaʼi hatatou fakavikiviki kiā Sehova?
Neʼe Fakavikiviki Te ʼu Tūpulaga Kiā Sehova
11. Ko te ʼu faʼifaʼitaki fea ʼo te Tohi-Tapu ʼe fakahā ai ko te kau tūpulaga ʼe feala ke fua lelei tanatou fakavikiviki kiā Sehova?
11 ʼE fakahā ʼi te Tohi-Tapu ʼi te agamāhani neʼe fua lelei te fakavikiviki ʼa te kau tūpulaga kiā Sehova. Ohage ko te kiʼi taʼahine Iselaele ʼaē neʼe puke e te kau Silia. Neʼe lototoʼa ʼo fai faka mafola ki tona fafine pule ʼo ʼuhiga mo te polofeta ʼa Sehova ko Elia. Ko tana fai faka mafola ʼaia neʼe iku ai ki he milakulo, pea neʼe foaki ai he fakamoʼoni mālohi. (2 Hau 5:1-17) Pea mo Sesu neʼe toe lototoʼa ʼo fai faka mafola ʼi tana kei tamasiʼi. Neʼe fili e Sehova ke fakamatala ʼi te Tohi-Tapu te ʼaluʼaga ʼaē neʼe hoko kiā Sesu ʼi tana kei tamasiʼi, ʼi tona taʼu 12. Neʼe lototoʼa ʼo faifehuʼi ki te kau faiako lotu ʼi te fale lotu ʼo Selusalemi pea neʼe nātou punamaʼuli ai ʼi tana mahino ki te ʼu ala ʼa Sehova.—Luka 2:46-49.
12, 13. (a) Koteā ʼaē neʼe fai e Sesu ʼi te fale lotu ʼi muʼa ʼo tana mate, pea neʼe malave feafeaʼi te faʼahi ʼaia ki te hahaʼi? (b) Neʼe tali feafeaʼi e Sesu ia te fakavikiviki ʼaē neʼe fai e te kau tamaliki tagata?
12 ʼI tana kua tagata, neʼe fai e Sesu tana ʼu gāue neʼe tupu ai te fakavikiviki ʼa te ʼu tamaliki kiā Sehova. Ohage la, ʼi te ʼu ʼaho ʼi muʼa pe ʼo tana mate, neʼe nofo Sesu ʼi te fale lotu ʼi Selusalemi. ʼE ʼui ʼi te Tohi-Tapu, neʼe ina fai ai he ʼu ‘meʼa fakatalakitupua.’ Neʼe ina kapu ki tuʼa ia nātou ʼaē neʼe nātou fakaliliu te koga meʼa taputapu ʼaia ko he koga meʼa maʼa te kau kaihaʼa. Neʼe ina toe fakamālōlō te kau kivi pea mo te kau māʼimoa. Ko nātou fuli ʼaē neʼe ʼi te fale lotu, tāfito te kau takitaki lotu, neʼe tonu ia ke nātou fia fakavikiviki kiā Sehova pea mo tona ʼAlo, te Mesia. Kae tokolahi ʼi te hahaʼi, ʼi te temi ʼaia neʼe mole nātou fai he fakavikiviki. Neʼe nātou ʼiloʼi neʼe fekauʼi mai Sesu e te ʼAtua, kae neʼe nātou mātataku ʼi te kau takitaki lotu. Kae neʼe ʼi ai te kūtuga neʼe nātou palalau ʼaki he lototoʼa. ʼE koutou ʼiloʼi peʼe ko ai? ʼE ʼui fēnei ʼi te Tohi-Tapu: “ ʼI te mamata ʼa te kau pelepitelo pule pea mo te kau sekelipa ki [te ʼu meʼa fakatalakitupua] ʼaē neʼe . . . fai [e Sesu] pea mo te kalaga ʼa te tamaliki tagata ʼi te fale lotu pea mo ʼui maʼa nātou: ‘Hāofaki, ʼe mātou kole atu, te ʼAlo ʼo Tavite!’ neʼe nātou ʼiʼita pea ʼui maʼa nātou kiā [Sesu]: ‘ ʼE ke logo ki te meʼa ʼaē ʼe nātou ʼui?’ ”—Mateo 21:15, 16, MN; Soane 12:42.
13 Neʼe manatu e te kau pelepitelo ʼaia ʼe ʼui age anai e Sesu ki te ʼu tamaliki tagata ʼaē neʼe nātou fakavikiviki kiā te ia, ke nātou fakalogologo. Neʼe mole fai e Sesu te faʼahi ʼaia, kae neʼe ina tali fēnei ki te kau pelepitelo: “Ei. Neʼe mole heʼeki koutou lau koa la te meʼa ʼaenī: ‘Mai te gutu ʼo te kihiʼi tamaliki pea mo nātou ʼaē ʼe kei [meamea], neʼe ke foaki ia te fakavikiviki’?” ʼE hā lelei mai ko Sesu pea mo tana Tāmai neʼe nā fiafia ʼi te fakavikiviki ʼa te kau tamaliki tagata kiā nāua. Neʼe fai e te ʼu tamaliki te meʼa ʼaē neʼe tonu ke fai e te hahaʼi lalahi fuli ʼi te lakaga ʼaia. Neʼe mahino lelei te faʼahi ʼaia ki te fakakaukau ʼa te kau tūpulaga. Neʼe nātou sisio ki te ʼu meʼa fakatalakitupua ʼaē neʼe fai e te tagata ʼaia, tana palalau ʼaki he lototoʼa pea mo he tui lahi, pea mo tana fakahā tona ʼofa lahi ki te ʼAtua pea mo tana hahaʼi. Ohage pe ko tana ʼui, neʼe ko ia te Mesia ʼaē neʼe fakapapauʼi mai, te “ ʼAlo ʼo Tavite.” Neʼe tapuakina te tui ʼa te kau tamaliki tagata, he neʼe nātou maʼu te pilivilesio lahi ʼaē ke nātou fakahoko te lea faka polofeta.—Pesalemo 8:2.
14. ʼAki te ʼu fealagia ʼaē ʼe maʼu e te kau tūpulaga, ʼe nātou lava fakavikiviki feafeaʼi te ʼAtua?
14 Koteā te ako ʼaē ʼe tou tāʼofi mai te ʼu faʼifaʼitaki ʼaia? ʼE feala ke fua lelei te fakavikiviki ʼaē ʼe fai e te kau tūpulaga kiā Sehova. ʼI te agamāhani ʼe faigafua hanatou mahino lelei ki te moʼoni, ʼo nātou fakahā tanatou tui ʼaki he loto fakamalotoloto pea mo nātou faʼafai. ʼE nātou toe maʼu mo te meʼa ʼofa ʼaē ʼe talanoa kiai ia Tāʼaga Lea 20:29: “Ko te meʼa ʼaē ʼe matalelei ʼi te kau tūpulaga ko tonatou mālohi.” Ei, kau tūpulaga ʼe koutou maʼu te mālohi—ko he faʼahi maʼuhiga moʼo fakavikiviki kiā Sehova. ʼE koutou lava fakaʼaogaʼi lelei feafeaʼi te faʼahi ʼaia?
ʼE Koutou Lava Fakavikiviki Feafeaʼi Ia Sehova?
15. Ke fua lelei tatatou fakavikiviki kiā Sehova, koteā ʼaē ʼe tonu ke ina uga tatou?
15 Ke fua lelei takotou fakavikiviki ʼe tonu ke haʼu mai tokotou loto. ʼE mole feala ke fua lelei takotou fakavikiviki kiā Sehova mo kapau ʼe koutou fai te faʼahi ʼaia heʼe loto e ʼihi ke koutou fai. Koutou manatuʼi te fakatotonu ʼaenī ʼaē ʼe lahi tokotahi ʼi te ʼu fakatotonu: “E ke ofa anai ki te Aliki tou Atua mo tou loto katoa, mo tou laumalie katoa, pea mo tou atamai katoa.” (Mateo 22:37) Kua koutou ʼiloʼi lelei koa ia Sehova ʼi takotou ako takitokotahi ia tana Folafola? ʼAki takotou ako ʼaia ʼe koutou liliu ai ʼo ʼoʼofa kiā Sehova. ʼE koutou fakahā anai tokotou ʼofa ʼaia ʼi takotou fakavikiviki kiā te ia. ʼI takotou kua mahino lelei ko te ʼofa ʼaē ʼe ina uga koutou pea mo mālohi iā koutou, pea kua feala ai ke koutou fakavikiviki fakafiafia kiā Sehova.
16, 17. He koʼe ʼe maʼuhiga takotou aga ʼo ʼuhiga mo te fakavikiviki kiā Sehova? Koutou tuku mai he faʼifaʼitaki.
16 Kae ʼi muʼa ʼo takotou fakavikiviki ʼaki takotou ʼu palalau, koutou vakaʼi muʼa peʼe feafeaʼi takotou aga. Kanapaula neʼe ko he agamāhani ʼa te kiʼi taʼahine Iselaele ʼi te temi ʼo Elia, ʼi te agapauʼu, mo aga heʼe fakaʼapaʼapa, peʼe aga fakakākā, ʼe koutou manatu koa neʼe fakalogo anai e te kau Silia tana ʼu palalau ʼo ʼuhiga mo te polofeta ʼo Sehova? Kailoa ia. ʼO toe feiā pe, ʼe fakalogo atu anai te hahaʼi mo kapau ʼe nātou sisio atu ʼe koutou aga fakaʼapaʼapa, mo gaohi meʼa fakahagatonu, pea mo agapoto. (Loma 2:21) Tou vakaʼi te faʼifaʼitaki.
17 Ko te kiʼi taʼahine taʼu 11 ʼi Potukalia, neʼe fakaneke ia ia ʼi te faleako ke kau ki te ʼu fakafiafia neʼe mole ʼalutahi mo tona leʼo ʼo loto’ aē neʼe akoʼi ʼaki te Tohi-Tapu. ʼAki he aga fakaʼapaʼapa neʼe ina fakamahino age ki tana fafine faiako te tupuʼaga ʼo tana mole kau ki te ʼu fakafiafia ʼaia, kae neʼe manukiʼi ia ia e te fafine faiako. ʼAki te temi, neʼe faiga liuliuga e te fafine faiako ke ina fakalainoaʼi ia ia, ʼo ina vāʼi tana lotu. Kae neʼe aga fakaʼapaʼapa tuʼumaʼu pe te kiʼi taʼahine. ʼI te ʼu taʼu ki muli age, neʼe liliu te tuagaʼane finemui ʼaia ʼo pionie kātoa. ʼI te fakatahi, neʼe ʼalu ʼo mamata ki te kau papitema, pea neʼe ina tokagaʼi te tahi ʼe ina ʼiloʼi. Neʼe ko tana fafine faiako! ʼI tanā ʼosi fefāʼufuaʼaki, neʼe ʼui e te fafine ki te tuagaʼane neʼe mole ina galoʼi tana aga fakaʼapaʼapa. Neʼe ʼaʼahi ia ia e te Fakamoʼoni, pea neʼe palalau age te fafine faiako ʼo ʼuhiga mo te aga ʼa te taʼahine. Neʼe kamata ai te ako Tohi-Tapu, pea neʼe tali leva e te fafine ia te moʼoni. Ei, ʼaki takotou aga ʼe feala ke koutou fakavikiviki kiā Sehova!
18. Koteā ʼaē ʼe feala ke fai e he tūpulaga mo kapau ʼe faigataʼa kiā ia hana kamata palalau ʼo ʼuhiga mo te Tohi-Tapu pea mo Sehova ʼAtua?
18 ʼE faigataʼa koa kiā koutou ʼi ʼihi temi hakotou kamata palalau ki takotou tui ʼi te faleako? ʼE mole ko koutou pe ʼaē ʼe feiā. Kae ʼe feala ke koutou uga takotou ʼu kaugā ako ke nātou faifehuʼi atu ʼo ʼuhiga mo takotou tui. Ohage la, kapau ʼe feala pea mo fakagafua ʼi te faleako, he koʼe koa ʼe mole koutou ʼolo mo he tohi faka Tohi-Tapu pea mo koutou lau ʼi te temi kai peʼe ko he tahi temi faigamālie? ʼE feala ke fia ʼiloʼi e takotou ʼu kaugā ako peʼe koteā te tohi ʼaē ʼe koutou lolotoga lau. Ka koutou tali anai ki tanatou ʼu fehuʼi pea mo fakahā age kiā nātou te ʼu manatu ʼaē neʼe koutou leleiʼia ʼi te alatike peʼe ko te tohi ʼaē ʼe koutou lau, ʼe feala anai hakotou kamata he fai palalau lelei mo nātou. Koutou manatuʼi ʼo fai he ʼu fehuʼi, ke koutou ʼiloʼi ai te ʼu faʼahi ʼaē ʼe tui kiai takotou ʼu kaugā ako. Koutou fakalogo ʼaki he aga fakaʼapaʼapa, ʼo koutou vaevae mo nātou te ʼu meʼa ʼaē neʼe koutou ako ʼi te Tohi-Tapu. Ohage ko tona fakahā ʼi te pasina 29, tokolahi te kau tūpulaga ʼe nātou fakavikiviki ki te ʼAtua ʼi te faleako. ʼE nātou fiafia lahi ai, pea ʼe tokoni ai ki te tokolahi ke nātou ʼiloʼi ia Sehova.
19. ʼE lava fua lelei feafeaʼi ki te kau tūpulaga tanatou fai faka mafola ʼi te ʼu ʼapi?
19 ʼE ko he meʼa lelei ʼaupito takotou fakavikiviki kiā Sehova ʼi te fai faka mafola ʼi te ʼu ʼapi. Kapau ʼe mole heʼeki koutou kau kiai, he koe ʼe mole koutou fakatuʼutuʼu ke koutou kau kiai? Kapau kua koutou kau kiai, pea ʼe feala koa ke koutou fai hakotou tahi ʼu fakatuʼutuʼu? Ohage la, koutou kumi ke koutou fetofetogi takotou ʼu faʼahiga palalau ʼi te ʼu matapā, koutou hikihiki takotou faʼahiga fai ia te gāue, ʼo koutou kumi tokoni ki ʼakotou ʼu mātuʼa peʼe kiā nātou ʼaē kua māhani ʼi te gāue ʼaia. Koutou ako ke koutou popoto ʼi te fakaʼaogaʼi lahi ʼo te Tohi-Tapu, ke fua lelei takotou fai ʼaʼahi, pea mo koutou kamata he ako Tohi-Tapu. (1 Timoteo 4:15) Kapau ʼe lahi takotou fakavikiviki kiā Sehova ʼi te faʼahi ʼaia, pea ʼe toe lahi anai tona fua lelei kiā koutou, pea ʼe lahi anai takotou fiafia ʼi takotou minisitelio.
Ko Te Temi Fea ʼAē ʼe Tonu Ai Ke Koutou Kamata Fakavikiviki Kiā Sehova?
20. He koʼe ʼe mole tonu ke manatu e te kau tūpulaga ʼe kei nātou liliki fau moʼo fakavikiviki kiā Sehova?
20 ʼI te ʼu fehuʼi e tolu ʼaē ʼe tou vakaʼi ʼi te alatike ʼaenī, ʼe faigafua age te tali ki te fehuʼi fakamuli ʼaenī. Koutou tokagaʼi te tali fēnei ʼaē ʼe tuʼu ʼi te Tohi-Tapu: “Koia, ke ke manatuʼi tou Tupuʼaga lahi ʼi te ʼu ʼaho ʼo tou temi tūpulaga.” (Tagata Tānaki 12:1) Ei, koutou kamata fakavikiviki kiā Sehova ʼi te temi nei. ʼE faigafua hatatou ʼui fēnei: “ ʼE mole heʼeki feala ke au fakavikiviki kiā Sehova heʼe kei au veliveli fau, ʼe mole heʼeki au poto lelei. ʼE lelei haku talitali ke hoki au lahilahi ake.” Neʼe ʼi ai te tūpulaga neʼe manatu feiā, ʼe ko Selemia, ʼaē neʼe ina ʼui fēnei kiā Sehova: “Kailoa Ê Tuʼi ʼAliki ko Sehova! Koʼeni ʼe mole heʼeki au poto lelei ʼi te palalau, heʼe kei au tamasiʼi.” Neʼe fakaloto fīmālie ia ia e Sehova ke ʼaua naʼa mataku. (Selemia 1:6, 7) ʼO toe feiā pe, ʼe mole tonu ke tou mātataku mokā tou fakavikiviki kiā Sehova. ʼE mole ina fakagafua anai ke hoko he meʼa ʼe kovi kiā tatou.—Pesalemo 118:6.
21, 22. He koʼe ko te kau tūpulaga ʼaē ʼe nātou fakavikiviki kiā Sehova ʼe nātou hage ko he ʼu mosiʼi hahau, pea he koʼe ʼe fakaloto mālohi te fakatatau ʼaia ʼa te kau tūpulaga ki he ʼu mosiʼi hahau?
21 ʼE mātou fakaloto mālohiʼi koutou kau tūpulaga ke ʼaua naʼa koutou fakatātāʼofi ʼi te fakavikiviki kiā Sehova! ʼI te temi ʼaē ʼe kei koutou tūpulaga ai ʼe ko te temi lelei ʼaia ke koutou kau ki te gāue maʼuhiga ʼaupito ʼaē ʼe lolotoga fai nei ʼi te kele. Ka koutou kau kiai, pea ʼe koutou kau anai ki te famili faka malamanei ʼaē ʼe nātou fakavikiviki kiā Sehova. ʼE fiafia Sehova ʼi takotou kau ki te famili ʼaia. Koutou tokagaʼi te ʼu palalau ʼaenī neʼe fai e te tagata fai pesalemo kiā Sehova: “Ko tau hahaʼi ʼe nātou foaki fakamalotoloto anai ia nātou ʼi te ʼaho ʼo tou ʼu mālohi faka solia. ʼI te taulekaleka ʼo te maʼoniʼoni, ʼi te mafoa ʼo te ʼaho, kua ʼi ai tau kau tūpulaga ohage ko he ʼu mosiʼi hahau.”—Pesalemo 110:3.
22 ʼE ko he meʼa matalelei te tapa gigila ʼo te ʼu mosiʼi hahau ʼi te mālamagia ʼo te laʼā. ʼE ko he meʼa fakamokomoko, mo gigila, pea ʼe mole feala hona lau. ʼE feiā te manatu ʼa Sehova ʼo ʼuhiga mo koutou kau tūpulaga ʼaē ʼe koutou fakavikiviki agatonu kiā te ia ʼi te temi faigataʼa ʼaenī. Ko takotou fili ʼaē ke koutou fakavikiviki kiā Sehova ʼe ina fakafiafia moʼoni tona loto. (Tāʼaga Lea 27:11) Koia kau tūpulaga koutou faiga ke koutou fakavikiviki kiā Sehova!
ʼE Koutou Tali Feafeaʼi Anai?
• Koteā he ʼu tupuʼaga maʼuhiga ke koutou fakavikiviki ai kiā Sehova?
• Koteā te ʼu faʼifaʼitaki faka Tohi-Tapu ʼe fakahā ai ʼe feala ke fua lelei ʼaupito te fakavikiviki ʼa te kau tūpulaga kiā Sehova?
• Ia ʼaho nei, ʼe lava fakavikiviki feafeaʼi te kau tūpulaga kiā Sehova?
• Ko te temi fea ʼaē ʼe tonu ke kamata fakavikiviki ai e te kau tūpulaga kiā Sehova, pea koteā tona tupuʼaga?
[Paki ʼo te pasina 25]
Kapau la ʼe maʼu e tokotou kaumeʼa hona faʼahiga poto, ʼe mahino ia ʼe koutou talanoa anai ki ʼihi ʼo ʼuhiga mo ia
[Paki ʼo te pasina 27]
Ko takotou ʼu kaugā ako ʼe nātou fai atu anai he ʼu fehuʼi ʼo ʼuhiga mo tokotou lotu
[Paki ʼo te pasina 28]
Kapau ʼe koutou fia hikihiki takotou fai faka mafola, pea koutou kole tokoni ki te kau Fakamoʼoni ʼaē kua nātou māhani ʼi te gāue ʼaia