Tou Vikiʼi Sehova ʼUhi Ko Tana ʼu Gāue Lalahi!
“E vikiviki e toku laumalie te Aliki, . . . koteuhi kua fai e te Mafimafi ia mea lalahi kia te au.”—Luka 1:46-49.
1. Koteā te ʼu gāue lalahi ʼaē neʼe fai e Sehova ʼe tāu ai mo te fakavikiviki?
ʼE TĀU mo Sehova ke fakavikiviki kia te ia ʼuhi ko tana ʼu gāue lalahi. ʼI te fakamatala ʼa te polofeta ko Moisese te faka ʼāteaina ʼo Iselaele mai Esipito, neʼe ina tala fēnei: “Neʼe sio ʼokotou mata ki te ʼu gāue lalahi ʼa Sehova.” (Teutalonome 11:1-7) ʼO toe feiā, ʼi te tala ʼa te ʼaselo ko Kapeliele ki te taupoʼou ko Malia ʼo ʼuhiga mo te tupu ʼa Sesu, neʼe tali fēnei e Malia: “E vikiviki e toku laumalie te Aliki, . . . koteuhi kua fai e te Mafimafi ia mea lalahi kia te au.” (Luka 1:46-49) ʼI totatou ʼuhiga kau Fakamoʼoni ʼa Sehova, ʼe tou fakavikiviki kia te ia ʼuhi ko tana ʼu gāue lalahi, ohage ko tana faka ʼāteainaʼi ia Iselaele mai te ʼu noʼo ʼo Esipito pea mo te tupu faka milakulo ʼo tona ʼAlo ʼofaina.
2. (a) Koteā te “fakatuʼutuʼu heʼegata” ʼa te ʼAtua maʼa te hahaʼi fakalogo? (b) Koteā ʼaē neʼe hoko kia Soane ʼi tana nofo ʼi te motu ʼo Patemosi?
2 Ko te ʼu tuʼuga gāue lalahi ʼa Sehova neʼe pipiki ki tana “fakatuʼutuʼu heʼegata,” ʼaē ko te tapuakina ʼo te hahaʼi fakalogo ʼaki te Mesia pea mo tona Puleʼaga hau. (Efeso 3:8-13, MN ) Neʼe hā māmālie te fakatuʼutuʼu ʼaia ʼi te temi ʼaē neʼe feala ai ki te ʼapositolo matuʼa ko Soane ke sio ki te matapā neʼe tuʼu ava ʼi selo. Neʼe logo ki he leʼo neʼe hage ko he fakatagi pupuhi ʼe ina ʼui fēnei: “Hake mai ki heni, pea e au fakaha anai kia te koe te u mea e maua ke hoko.” (Apokalipesi 4:1) ʼI tona fakatūʼa e te puleʼaga Loma ke nofo ʼi te motu ʼo Patemosi “he neʼe palalau ʼo ʼuhiga mo te ʼAtua pea neʼe fakamoʼoni kia Sesu,” neʼe maʼu e Soane “te fakahā ʼa Sesu Kilisito.” Ko te meʼa ʼaē neʼe sio pea mo logo kiai ia te ʼapositolo, neʼe fakahā tāfito ai te fakatuʼutuʼu heʼegata ʼa te ʼAtua, ʼo foaki ai he fakamahino fakalaumālie pea mo he fakaloto mālohi ki te kau Kilisitiano moʼoni fuli ʼo totatou temi.—Apokalipesi 1:1, 9, 10, MN.
3. Ko ai ʼaē ʼe fakatātā e te toko 24 kau tagata ʼāfea ʼaē neʼe sio ki ai ia Soane?
3 ʼI te matapā ʼaia ʼaē neʼe avahi ʼi selo, neʼe sio ia Soane ki te toko 24 kau tagata ʼāfea, neʼe heheka ohage ko he ʼu hau ʼi te ʼu hekaʼaga faka hau pea mo ʼonatou kolona hau. Neʼe nātou tulolo ia muʼa ʼo te ʼAtua pea mo nātou ʼui fēnei: “E ke taau, Aliki tomatou Atua, ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape, pea nee ke finegalo ke natou mauli pea nee fakatupu ai natou.” (Apokalipesi 4:11) Ko te ʼu tagata ʼāfea ʼaia ʼe nātou fakatātā te kau Kilisitiano fakanofo fuli ʼaē kua fakatuʼuake pea kua nātou maʼu te tuʼulaga māʼoluga ʼaē neʼe fakapapau age kia nātou e te ʼAtua. ʼE uga e tonatou loto ke nātou fakavikiviki kia Sehova ʼuhi ko tana ʼu gāue lalahi ʼaē neʼe ina fai ʼi tana fakatupu ia meʼa fuli. Mo tatou ʼe tou ōfo ʼi te hā ʼaia ʼo te “mafimafi heegata mo [te] uhiga atua” ʼo Sehova. (Loma 1:20) Pea kapau ʼe lahi te ʼu meʼa ʼaē ʼe tou ako ʼo ʼuhiga mo Sehova, pea ʼe toe lahi anai mo te ʼu tupuʼaga ke tou vikiʼi tana ʼu gāue lalahi.
Tou Tala Te ʼu Gāue ʼa Sehova ʼAē ʼe Tāu Mo Te Fakavikiviki!
4, 5. Koutou tuku mai he ʼu faʼifaʼitaki ʼo te fakavikiviki ʼa Tavite kia Sehova.
4 Ko te tagata fai pesalemo ko Tavite neʼe ina fakavikiviki te ʼAtua ʼuhi ko Tana ʼu gāue lalahi. Ohage la, neʼe hiva fēnei ia Tavite: “Koutou hiva maʼa Sehova, koutou ʼaē ʼe nonofo ʼi Sione; koutou fakahā ki te hahaʼi tana ʼu gāue. Fakahā mai tou ʼofa, Ê Sehova; sio ki toku mamahi ʼuhi ko nātou ʼaē ʼe fehiʼa kia te ʼau, Ê ko koe ʼaē ʼe ke toe toʼo ake ʼau mai te ʼu matapā ʼo te mate, ke feala haku tala tau ʼu gāue fuli ʼaē ʼe tāu ke fakavikiviki ʼi te ʼu matapā ʼo te taʼahine ʼo Sione.” (Pesalemo 9:11, 13, 14) ʼI tana ʼosi foaki ki tona foha ko Salomone te paki ʼo te fale lotu, neʼe tapuakina pea mo fakavikiviki e Tavite te ʼAtua, ʼo ina ʼui fēnei: “ ʼE ʼa koe, Ê Sehova, te māʼoluga, mo te mālohi, mo te taulekaleka, mo te takimuʼa, pea mo te ʼalikisia . . . ʼE ʼa koe te puleʼaga, Ê Sehova, ia Koe ʼaē ʼe ke toe hikihiki koe ke ke pule kia meʼa fuli. . . . Pea ʼi te temi nei, Ê tomatou ʼAtua, ʼe mātou fakafetaʼi kia te koe pea mo fakavikiviki ki tou huafa taulekaleka.”—1 Fakamatala 29:10-13.
5 ʼE fakaafe tuʼa lahi tatou e te Tohi-Tapu—ei, ʼe ina uga tatou—ke tou fakavikiviki ki te ʼAtua, ohage ko tona fai e Tavite. ʼI te tohi ʼo Pesalemo ʼe lahi te ʼu fai fakavikiviki ki te ʼAtua, pea ko te teitei vaelua ʼo te ʼu hiva ʼaia neʼe tohi e Tavite. Neʼe fakavikiviki pea mo fakafetaʼi tuʼumaʼu kia Sehova. (Pesalemo 69:30) Tahi ʼaē meʼa, talu mai te ʼu temi muʼa, ko te ʼu hiva ʼaē neʼe fai e Tavite pea mo ʼihi hahaʼi, neʼe fakaʼaogaʼi mo fakavikiviki kia Sehova.
6. ʼE ʼaoga feafeaʼi kia tatou te ʼu Pesalemo?
6 ʼE ʼaoga lahi te ʼu Pesalemo ki te kau atolasio ʼa Sehova. Ka tou fia fakamālo ki te ʼAtua ʼo ʼuhiga mo tana ʼu gāue lalahi ʼaē neʼe ina fai maʼa tatou, pea ʼe feala ke tou manatuʼi te ʼu kupu matalelei ʼaē ʼe tou maʼu ia Pesalemo. Ohage la, ʼi tatatou ʼaʼala ake ʼi te uhu, ʼe feala ke tou fai te ʼu palalau ʼaenī: “ ʼE lelei ia te fakafetaʼi kia Sehova pea mo hiva moʼo tou huafa, Ê Māʼoluga! Ke tala ʼi te uhu tou loto manavaʼofa pea mo tau agatonu ʼi te ʼu pōʼuli, . . . he neʼe ke fakafiafia ʼau, Ê Sehova, ʼuhi ko te meʼa ʼaē neʼe ke fai; ʼuhi ko te ʼu gāue ʼo tou ʼu nima ʼe ʼau kalaga fakafiafia.” (Pesalemo 92:1-4) Kapau neʼe tou lava tauʼi he faʼahi neʼe ina tāʼofi tatatou tuputupu ʼi te faʼahi fakalaumālie, pea ʼe feala ke tou fakahā tatatou fiafia pea mo totatou loto fakafetaʼi ʼi te faikole, ohage ko tona fai e te tagata fai pesalemo ʼi tana hiva fēnei: “Ê koutou ʼōmai, tou kalaga fakafiafia kia Sehova! Tou kalaga te mālo ʼo totatou Maka ʼo te hāofaki. Tou ʼolo ki ʼona muʼa ʼaki he ʼu fakavikiviki; ʼaki he ʼu hiva tou kalaga tona mālo.”—Pesalemo 95:1, 2.
7. (a) Koteā ʼaē ʼe tou tokagaʼi ʼi te ʼatu katiko ʼaē ʼe hivaʼi e te kau Kilisitiano? (b) He koʼe ʼe tonu ke tou tautonu ki te ʼu fono pea ke tou nonofo ʼo aʼu ki tona fakaʼosi?
7 ʼE tou hiki totatou ʼu leʼo ʼi te ʼu katiko ʼaē ʼe tou hiva ʼi te ʼu fono pea mo te ʼu fakatahi moʼo fakavikiviki kia Sehova. ʼE tou tokagaʼi ʼe lahi te ʼu katiko ʼe toʼo mai te ʼu manatu ʼo te tohi ʼo Pesalemo. ʼE tou fiafia heʼe tou maʼu ʼi te temi nei, he ʼu katiko fakalave loto moʼo fakavikiviki kia Sehova! ʼE tonu ke tou tautonu ki tatatou ʼu fono pea mo tou nonofo ʼo aʼu ki tona fakaʼosi, moʼo hiva fakavikiviki ki te ʼAtua, pea ke tou fakatahi ai mo te ʼu tēhina mo tuagaʼane, moʼo fakavikiviki kia Sehova ʼaki te katiko pea mo te faikole.
“Koutou Fakavikiviki Ia Sah!”
8. Koteā ʼaē ʼe maʼu ʼi te kupu “Aleluia,” pea koteā tona faka ʼuhiga?
8 ʼI te kupu “Aleluia” ʼe tou mau ai te fakavikiviki kia Sehova, he ko te fakaliliu ʼaia ʼo te kupu faka Hepeleo pea ko tona faka ʼuhiga: “Koutou fakavikiviki ia Sah.” Ohage la ia Pesalemo 135:1-3, ʼe tou maʼu ai te fakaafe mālohi ʼaenī: “Koutou fakavikiviki ia Sah! Koutou fakavikiviki te huafa ʼo Sehova, koutou momoli he ʼu fakavikiviki, Ê ʼu kaugana ʼa Sehova, ia koutou ʼaē ʼe tutuʼu ʼi te ʼapi ʼo Sehova, ʼi te ʼu malaʼe ʼo te ʼapi ʼo totatou ʼAtua. Koutou fakavikiviki kia Sah, heʼe agalelei ia Sehova. Koutou hiva ki tona huafa, heʼe ko he meʼa lelei.”
9. Koteā ʼaē ʼe ina uga tatou ke tou fakavikiviki kia Sehova?
9 ʼI tatatou mamata ki te ʼu meʼa fakatalakitupua ʼaē neʼe fakatupu e te ʼAtua pea mo tana ʼu gāue fuli ʼaē neʼe ina fai maʼa tatou, ko totatou loto fakafetaʼi ʼe ina uga tatou ke tou fakavikiviki kia te ia. Ka tou fakakaukauʼi te ʼu milakulo ʼaē neʼe fai e Sehova ki tana hahaʼi ʼo te temi muʼa, pea ʼe uga tatou e totatou loto ke tou fakavikiviki kia te ia. Pea ka tou metitasioʼi te ʼu fakapapau ʼo te ʼu meʼa lalahi ʼaē ka fai anai e Sehova, pea ʼe tou fia fakavikiviki pea mo loto fakafetaʼi ai kia te ia.
10, 11. He koʼe ʼe tonu ke tou fakavikiviki ki te ʼAtua ʼi tana faʼu tatou?
10 ʼE tou fia fakavikiviki kia Sah ʼuhi ko tana faʼu tatou. Neʼe hiva fēnei ia Tavite: “ ʼE ʼau vikiviki anai kia te koe [Sehova], heʼe fakamanavahe pea mo fakaofoofo toku faʼu. ʼE fakatalakitupua tau ʼu gāue, pea ʼe mahino lelei kia te ʼau te meʼa ʼaia.” (Pesalemo 139:14) ʼE moʼoni, ʼe “fakaofoofo” totatou faʼu pea ʼe tou lava sio, mo logo, pea mo fakakaukau. Koia, ʼe mole tonu koa la ke tou fakavikiviki ki totatou Tupuʼaga ʼi totatou maʼuli katoa? Neʼe ko te ʼu palalau ʼaia neʼe fai e Paulo ʼi tana tohi ʼaenī: “Pe koutou kakai, pe koutou iʼinu, pe ko he meape e koutou fai, koutou fai ia meafuape ki te kololia o te Atua.”—1 Kolonito 10:31.
11 ʼE tou fai anai ia meʼa fuli moʼo faka kolōliaʼi ia Sehova mo kapau ʼe tou ʼofa moʼoni kia te ia. Neʼe ʼui e Sesu ko te ʼuluaki fakatotonu ʼaenī: “E ke ofa anai ki te Aliki tou Atua mo tou loto katoa, mo tou laumalie katoa, mo tau fakakaukau katoa pea mo tou malohi katoa.” (Maleko 12:30; Teutalonome 6:5) ʼE mahino ia ʼe tonu ke tou ʼofa kia Sehova pea mo tou fakavikiviki kia te ia, he ko ia totatou Tupuʼaga pea ʼe ina foaki mai ia “meʼa ʼofa lelei fuli pea mo te mōlaga haohaoa fuli.” (Sakopo 1:17, MN; Isaia 51:13; Gaue 17:28) Pea tahi ʼaē meʼa, ko totatou ʼu fealagia fakakaukau, mo totatou ʼu kalitate fakalaumālie, pea mo totatou mālohi fakasino—totatou poto pea mo totatou ʼu fealagia fuli—neʼe foaki mai e Sehova. ʼUhi ko ia totatou Tupuʼaga, ʼe tāu mo ia ke tou ʼofa pea mo tou fakavikiviki kia te ia.
12. Koteā takotou manatu ʼo ʼuhiga mo te ʼu gāue lalahi ʼa Sehova pea mo te ʼu palalau ʼaē ʼe tuʼu ia Pesalemo 40:5?
12 ʼE tonu ke tou ʼofa pea mo fakavikiviki kia Sehova, ʼuhi ko tana ʼu gāue lalahi! Neʼe hiva fēnei ia Tavite: “Neʼe lahi te ʼu meʼa ʼaē neʼe ke fai, Ê Sehova toku ʼAtua, māʼia mo te ʼu gāue fakatalakitupua pea mo tau ʼu manatu kia mātou. ʼE mole he tahi ʼe tatau mo koe. Ka ʼau fia talanoa pea mo palalau kiai, pea ʼe mole ʼau lava fakamatala heʼe nātou lahi ʼaupito.” (Pesalemo 40:5) Neʼe mole feala ke lau e Tavite te ʼu gāue fakaofoofo fuli ʼa Sehova, pea ʼe toe feiā pe mo tatou. Kae tou haga fakavikiviki tuʼumaʼu ki te ʼAtua mokā tou tokagaʼi hana gāue lahi.
ʼE Pipiki Te ʼu Gāue Mo Te Fakatuʼutuʼu Heʼegata ʼo Te ʼAtua
13. ʼE pipiki feafeaʼi tatatou ʼamanaki mo te ʼu gāue lalahi ʼa te ʼAtua?
13 Ko tatatou ʼamanaki ki te ka haʼu ʼe pipiki ki te ʼu gāue lalahi ʼaē ʼe tāu mo te fakavikiviki ʼo te fakatuʼutuʼu heʼegata ʼo te ʼAtua. Hili te agatuʼu ʼi Eteni, neʼe foaki e Sehova te ʼuluaki lea faka polofeta neʼe maʼu ai te ʼamanaki. ʼI tana tauteaʼi te gata, neʼe ʼui fēnei e te ʼAtua: “ ʼE ʼau tuku anai he fehiʼa ia koe mo te fafine, ʼi tou hāko pea mo tona hāko. Pea ʼe ina fakavolu anai koe ʼi tou ʼulu pea ʼe ke fakavolu anai ia ia ʼi tona muliʼi vaʼe.” (Senesi 3:15) Ko te ʼamanaki ki te Hāko ʼo te fafine ʼaē neʼe fakapapau neʼe nofo ʼi te loto ʼo te hahaʼi agatonu ʼi te ʼosi fakahoko e Sehova te gāue lahi, ʼi tana hāofaki Noe pea mo tona famili ʼi te Tulivio ʼaē neʼe molehi ai te hahaʼi agakovi ʼi te kele katoa. (2 Petelo 2:5) ʼI te ʼu fakapapau faka polofeta ʼaē neʼe fai ki te ʼu tagata tui ohage ko Apalahamo pea mo Tavite, neʼe fakahā fakatomuʼa ai te ʼu meʼa ʼaē ka fakahoko e Sehova ʼaki te Hāko ʼaia.—Senesi 22:15-18; 2 Samuele 7:12.
14. Koteā te faʼifaʼitaki lahi ʼo he gāue lahi neʼe fai e Sehova maʼa te malamanei?
14 Neʼe hā lelei te ʼuhiga ʼo Sehova, ko he tahi ʼe ina fai he ʼu gāue lalahi maʼa te malamanei, ʼi te temi ʼaē neʼe ina foaki ai tona ʼAlo ʼulu tokotahi—te Hāko ʼaē neʼe fakapapau, ia Sesu Kilisito—ko he sakilifisio faitotogi. (Soane 3:16; Gaue 2:29-36) Neʼe foaki e te totogi ʼaia he tafitoʼaga ke tou tokalelei ai mo te ʼAtua. (Mateo 20:28; Loma 5:11) Neʼe fakatahiʼi e Sehova te ʼu ʼuluaki hahaʼi ʼaē kua tokalelei mo ia ʼi te kokelekasio faka Kilisitiano, ʼaē neʼe fakatuʼu ʼi te Penikosite ʼo te taʼu 33 ʼo totatou temi. ʼAki te tokoni ʼa te laumālie maʼoniʼoni, neʼe nātou ʼolo ki mamaʼo ʼo faka mafola te logo lelei ki te hahaʼi tokolahi, ʼo nātou fakahā, ʼaki te mate pea mo te fakatuʼuake ʼo Sesu, ʼe feala ke maʼu e te hahaʼi fakalogo te ʼu tapuakina heʼegata ʼi te pule ʼo te Puleʼaga ʼa te ʼAtua ʼi selo.
15. Neʼe fakaofoofo feafeaʼi te meʼa ʼaē neʼe fai e Sehova ʼi totatou temi?
15 ʼI totatou temi, neʼe fakaofoofo te meʼa ʼaē neʼe fai e Sehova moʼo fakatahiʼi te toe ʼo te kau Kilisitiano fakanofo. Neʼe tāʼofi te ʼu matagi ʼo te fakaʼauha moʼo fakagafua te fakaʼiloga ʼo te toe ʼo te toko 144 000, ʼaē ka nātou kaugā hau anai mo Kilisito ʼi selo. (Apokalipesi 7:1-4; 20:6) Neʼe tokaga te ʼAtua ke faka ʼāteainaʼi te kau Kilisitiano fakanofo mai te ʼu noʼo fakalaumālie ʼo ‘Papiloni Lahi,’ te kautahi faka malamanei ʼo te lotu hala. (Apokalipesi 17:1-5) Ko te faka ʼāteaina ʼaia ʼa te toe ʼo te kau fakanofo ʼi te taʼu 1919 pea mo tonatou puipui e te ʼAtua talu mai ai, neʼe ina faka fealagia ai ke nātou fai teā? Ke nātou gigila ʼo nātou fakahoko te faka mafola fakaʼosi ʼi muʼa ʼo te fakagata e Sehova te tuʼu agakovi ʼa Satana, ʼi te “mamahi lahi” ʼaē kua vave hoko mai.—Mateo 24:21; Taniela 12:3; Apokalipesi 7:14.
16. Koteā ʼaē ʼe hoko ʼi te temi nei ʼaki te faka mafola ʼo te Puleʼaga ʼi te malamanei katoa?
16 ʼAki he faʼafai, ko te ʼu Fakamoʼoni ʼa Sehova ʼaē kua fakanofo neʼe nātou takitaki te faka mafola ʼo te Puleʼaga ʼi te malamanei. Koia ko te “tahi ʼu ōvi” ʼaē ʼe tuputupu, ʼe nātou liliu ʼi te temi nei ko he kau atolasio ʼa Sehova. (Soane 10:16, MN ) ʼE tou fiafia heʼe kei maʼu te fealagia ki te hahaʼi agamālū ʼo te kele ke nātou fakatahi mai kia tatou ke tou fakavikiviki kia Sehova. Ko nātou ʼaē ʼe nātou tali ki te fakaafe ʼaē ke “haʼu,” ʼe feala ke hāofaki nātou ʼi te mamahi lahi, ʼaki te ʼamanaki ʼaē ke nātou fakavikiviki kia Sehova ʼo heʼegata.—Apokalipesi 22:17.
ʼE Toko Lauʼi Afe Ia Nātou ʼe Hū Ki Te Tauhi Moʼoni
17. (a) Koteā te gāue lahi ʼaē neʼe fai e Sehova ʼo ʼuhiga mo tatatou gāue fai faka mafola? (b) Neʼe fakahoko feafeaʼi ia Sakalia 8:23?
17 ʼE fai ʼi te temi nei e Sehova he ʼu gāue lalahi ʼe tāu mo te fakavikiviki ʼo ʼuhiga mo tatatou gāue fai faka mafola. (Maleko 13:10) ʼI te ʼu taʼu ʼaenī, neʼe ina ‘avahi te matapā lahi ki te gāue.’ (1 Kolonito 16:9) Neʼe feala ai ke tala te logo lelei ʼi te ʼu telituale lahi ʼaē neʼe tāʼofi ʼi te temi muʼa e te ʼu fili ʼo te moʼoni. Tokolahi ʼaē neʼe maʼuʼuli ʼi te temi muʼa ʼi te fakapōʼuli fakalaumālie kua nātou tali nei ki te fakaafe ʼaē ke nātou tauhi kia Sehova. ʼE nātou fakahoko te lea faka polofeta ʼaenī: “Koʼeni te meʼa ʼaē neʼe ʼui e Sehova ʼo te ʼatu kautau: ‘ ʼE hoko anai ʼi te ʼu ʼaho ʼaia, ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea, ʼo nātou ʼui fēnei: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.” ’ ” (Sakalia 8:23) Ko nātou ʼaē ʼe palalau ki ai ia “te ʼu tagata e toko hogofulu” ʼe ko te kau Sutea fakalaumālie, te toe ʼo te kau Kilisitiano fakanofo ʼi te temi nei. Mai tona ʼaluʼaga ʼaē ko te mataʼi numelo hogofulu ʼe feala ke faka ʼuhiga ki te katoa ʼo he meʼa ʼi te kele, koia ko “te ʼu tagata e toko hogofulu” ʼe nātou fakatātā te “hahai kaugamalie” ʼaē ʼe fakatahi mo “te Iselaele a te Atua,” ʼaē ʼe nātou faʼufaʼu te ‘faga ōvi e tahi.’ (Apokalipesi 7:9, 10; Kalate 6:16) ʼE ko he toe fiafia lahi te sio ʼaē ki te tokolahi ʼi te temi nei ʼe nātou fai fakatahi he tauhi taputapu ʼi tonatou ʼuhiga kau atolasio ʼa Sehova ʼAtua!
18, 19. Koteā te fakamoʼoni ʼe fakahā ai ʼe tapuakina e Sehova te gāue fai faka mafola?
18 ʼE tou fiafia he ko te toko lauʼi hogofulu afe—peʼe teau afe—ʼe nātou tali te tauhi moʼoni ʼi te ʼu fenua ʼaē neʼe puleʼi ʼi te temi muʼa e te lotu hala, pea neʼe hage ia neʼe mole he tahi ʼe ina tali anai te logo lelei. Koutou vakaʼi te Annuaire des Témoins de Jéhovah ʼo te taʼu ʼaenī, pea koutou fakatokagaʼi te ʼu fenua ʼaē kua fakahā ai ko te toko 100 000 peʼe teitei 1 000 000 te ʼu kaugā fagona ʼo te Puleʼaga ʼi ai. ʼE ko he fakamoʼoni mālohi ʼaia ko te gāue fai faka mafola ʼo te Puleʼaga ʼe tapuakina e Sehova.—Tāʼaga Lea 10:22.
19 ʼI totatou ʼuhiga hahaʼi ʼa Sehova, ʼe tou fakavikiviki pea mo fakafetaʼi ki tatatou Tāmai ʼi selo heʼe ina foaki mai kia tatou he ʼuhiga moʼoni ki totatou maʼuli, mo he gāue ʼe fakapale lahi, pea mo he sio fakatomuʼa ki te ka haʼu. ʼE tou maʼuʼuli ʼaki te ʼamanaki ʼaē ke hoko te ʼu fakapapau fuli ʼa te ʼAtua, pea mo tou lotomālohi ke tou ‘nofo ʼi te ʼofa ʼo te ʼAtua, ʼo talitali ki te maʼuli heʼegata.’ (Suta 20, 21) ʼE tou fiafia ʼi tatatou sio ʼi te temi nei ki te hahaʼi tokolahi ʼaē kua toko 6 000 000 ʼe nātou fakavikiviki ki te ʼAtua! ʼAki te tapuakina moʼoni ʼa Sehova, ko te toe ʼo te kau fakanofo pea mo te tahi ʼu ōvi ʼaē ʼe kaugā gāue mo nātou, ʼe nātou gāue ʼi te ʼu kokelekasio e 91 000 ia fenua e 235. Ko tatou fuli ʼe fafaga lelei ʼi te faʼahi fakalaumālie ʼaki te ʼu faiga ʼi te temi fuli pe e “te kaugana agatonu mo fakapotopoto.” (Mateo 24:45) Ko he kautahi faka teokalatike ʼe tuputupu pea mo ina foaki he tokaga ʼofa, ʼe ina fakatuʼutuʼu te gāue ʼo te Puleʼaga ʼi te ʼu filiale e 110 ʼa te kau Fakamoʼoni ʼa Sehova. ʼE tou fakamālo ki te haga ʼa Sehova ʼo uga te loto ʼo tana hahaʼi ke nātou ‘faka maʼuhigaʼi ia ia ʼaki tonatou ʼu koloā.’ (Tāʼaga Lea 3:9, 10) Koia ʼe feala ke hoko atu tatatou fai faka mafola ʼi te malamanei, pea ʼe laga nei te ʼu pilō tā tohi, te ʼu Petele mo te ʼu ʼapi ʼo te kau misionea, te ʼu Fale ʼo Te Puleʼaga, pea mo te ʼu Fale Fakatahi ʼo mulimuli ki te ʼu meʼa ʼaē ʼe ʼaoga.
20. ʼE malave feafeaʼi kia tatou mokā tou fakakaukauʼi te ʼu gāue lalahi ʼa Sehova ʼaē ʼe tāu mo te fakavikiviki?
20 ʼE mole feala ke tou talanoa ki te ʼu gāue lalahi fuli ʼaē ʼe tāu mo te fakavikiviki ʼo totatou Tāmai ʼi selo. Kae ʼe lava tāʼofi koa te loto ʼa he tahi ʼe faitotonu ke fakatahi ki te hahaʼi ʼaē ʼe nātou fakavikiviki kia Sehova? Kailoa! Koia, ke kalaga fakafiafia fēnei ia nātou fuli ʼaē ʼe ʼoʼofa ki te ʼAtua: “Koutou fakavikiviki kia Sah! Koutou fakavikiviki kia Sehova mai selo, koutou fakavikiviki kia te ia ʼi te ʼu potu māʼoluga. Koutou fakavikiviki, koutou fuli ko tana ʼu ʼaselo . . . Kau tūpulaga pea mo koutou kau taupoʼou, kau matutuʼa pea mo te kau tama. Ke nātou fakavikiviki ki te huafa ʼo Sehova, he ko tona huafa tokotahi pe ʼaē ʼe māʼoluga ʼaupito! Ko tona ʼalikisia ʼe māʼoluga ake ia ʼi te kele pea mo te lagi.” (Pesalemo 148:1, 2, 12, 13) Ei, ʼi te temi nei ʼo talu ai, tou fakavikiviki kia Sehova ʼuhi ko tana ʼu gāue lalahi!
ʼE Koutou Tali Feafeaʼi Anai?
• Koteā ʼihi ʼu gāue ʼa Sehova ʼe tāu mo te fakavikiviki?
• ʼI takotou manatu, koteā ʼaē ʼe tonu ke ina uga koutou ke koutou fakavikiviki kia Sehova?
• Koteā te pikipikiga ʼo totatou ʼamanaki pea mo te ʼu gāue lalahi ʼa te ʼAtua?
• ʼI te gāue ʼaē ko te faka mafola ʼo te Puleʼaga, ʼe fakahoko feafeaʼi e Sehova he ʼu gāue ʼe tāu mo te fakavikiviki?
[Paki ʼo te pasina 10]
ʼE koutou kau koa ʼaki tokotou loto katoa ki te ʼu hiva fakavikiviki ʼaē kia Sehova?
[Paki ʼo te pasina 13]
ʼE tou fiafia heʼe kei maʼu te fealagia ki te hahaʼi agamālū ke nātou fakatahi mai kia tatou moʼo fakavikiviki kia Sehova