Te ʼu Fehuʼi ʼa Te Kau Lautohi

Koteā te faka ʼuhiga ʼo te ʼui ʼaē e Sesu ko tana tagata kaugana agatonu ʼe “poto”?

Neʼe lagaʼi e Sesu ia te fehuʼi ʼaenī: “Ko ai moʼoni te tagata kaugana agatonu mo poto ʼaē kua fakanofo e tona pule ki tana hahaʼi faifekau, ke ina foaki kiā nātou tanatou meʼa kai ʼi tona temi totonu?” (Mateo 24:45) Ko te “tagata kaugana” ʼaē ʼe ina foaki ia te “meʼa kai” fakalaumālie, ʼe ko te kōkelekāsio ʼa te kau Kilisitiano ʼaē neʼe fakanofo ʼaki te laumālie. He koʼē neʼe ʼui e Sesu ʼe ko he tagata kaugana poto?a

ʼAki ia te ʼu akonaki ʼa Sesu, ʼe feala ke lelei age tatatou mahino ki te faka ʼuhiga ʼo te kupu “poto.” Ohagē lā, ʼi tana talanoa ʼo ʼuhiga mo “te tagata kaugana agatonu mo poto,” neʼe talanoa ia Sesu ki te lea fakatā, ʼo ʼuhiga mo te ʼu tāupoʼou e hogofulu neʼe natou nonofo ʼalaʼala ki te tau mai ʼo te tagata ʼohoana. ʼAki te lea fakatā ʼo te ʼu tāupoʼou, ʼe tou manatuʼi ai ia te kau Kilisitiano fakanofo ʼi muʼa ʼo te taʼu 1914, ʼaē neʼe natou ʼatalitali fakamālotoloto ki te haʼu ʼo te Tagata ʼOhoana lahi, ia Sesu Kilisito. ʼO ʼuhiga mo te ʼu tāupoʼou e hogofulu, ko te toko nima neʼe mole feʼauga tanatou moʼi lolo ʼi te tau mai ʼo te tagata ʼohoana, neʼe mole natou kau ai ki te taumafa ʼo te ʼohoana. Ko te tahi ʼu tāupoʼou e toko nima neʼe natou popoto. Neʼe natou ʼave mo nātou he moʼi lolo ʼe feʼauga, ʼo feala ai hanatou hoko atu ia tanatou fakamālamaʼi, ʼo kaku ki te temi ʼaē neʼe haʼu ai ia te tagata ʼohoana pea neʼe natou kau ai ki te taumafa.—Mateo 25:10-12.

ʼI te haʼu ʼa Sesu ʼi te mālohi ʼo tona Puleʼaga ʼi te taʼu 1914, tokolahi ʼi te kau Kilisitiano fakanofo neʼe natou ʼamanaki ʼe natou fakatahi atu aipē mo ia ʼi selō. Kae neʼe kei toe ia te gāue lahi ke natou fai ʼi te kele, pea neʼe mole teuteu ʼihi ki te faʼahi ʼaia. Ohagē ko te ʼu tāupoʼou ʼaē neʼe mole popoto, neʼe mole natou mālolohi ʼi muʼa atu ʼi te faʼahi fakalaumālie, koia neʼe mole feala ke natou hoko atu ia tanatou fakagigila ia te mālama. Kae tokolahi neʼe natou popoto—mo fakasiosio poto—pea neʼe natou mālolohi ʼi te faʼahi fakalaumālie. ʼI tanatou ʼiloʼi ʼaē kei lahi ia te gāue ʼaē ʼe toe ke fai, neʼe natou fiafia ʼi tona fakahoko. Koia, neʼe natou liliu ai ko “te tagata kaugana agatonu mo poto.”

Tou toe vakaʼi mo te fakaʼaogaʼi e Sesu ia te kupu “poto” iā Mateo 7:24. Neʼe ʼui fēnei e Sesu: “Ko ʼaē foki ʼe fagono ki ʼaku palalau pea ina fakaʼaoga, ʼe fakatatau anai ia ki he tagata poto neʼe ina laga tona fale ʼi he fuga maka.” Ko te tagata poto ʼe ina laga ia tona ʼapi ki he tafitoʼaga ʼe mālohi, naʼa hoko mai he ʼafā. Kae ko te tagata vale ʼe ina laga ia tona ʼapi ʼi te ʼone pea maumau kātoa. Koia, ko te tisipulo ʼa Sesu ʼaē ʼe poto ʼe sio fakatomuʼa ki te ʼu fua kovi ʼo te mulimuli ki te ʼu poto fakatagata. Ko tana fakasiosio tonu pea mo tana fakafuafua lelei ʼe ina uga ia ia ke ina fakatafito mālohi ia tana tui, tana ʼu gāue pea mo tana ʼu akonaki ki te ʼu meʼa ʼaē neʼe akoʼi e Sesu. ʼE toe fai fēia ia “te tagata kaugana agatonu mo poto.”

Pea kotou tokagaʼi foki mo te fakaʼaogaʼi ʼo te kupu “poto” ʼi te ʼu Koga Tohi-Tapu Faka Hepeleo. Ohagē lā, neʼe fakanofo e Falaone ia Sosefo ke pule ki te tufa ʼo te meʼa kai ʼi Esipito. Neʼe ko te fakatuʼutuʼu ʼaia mai ia Sehova moʼo fafaga ʼo tana hahaʼi. He koʼē neʼe filifili ia Sosefo? Neʼe ʼui fēnei age e Falaone ki ai: “ ʼE mole he tahi ʼe poto pea mo ʼatamai ohagē ko koe.” (Senesi 41:33-39; 45:5) ʼO toe fēia pē, ʼe ʼui ʼi te Tohi-Tapu ko Apikaela neʼe “poto lelei.” Neʼe ina foaki ia te meʼa kai kiā Tavite, te fakanofo ʼa Sehova pea mo tana kau tagata. (1 Samuele 25:3, 11, 18) Neʼe feala ke ʼui ko Sosefo pea mo Apikaela neʼe nā popoto he neʼe nā mahino ki te finegalo ʼo te ʼAtua pea mo nā gāue ʼaki he fakasiosio poto pea mo he fakafuafua lelei.

Koia, ʼi te ʼui ʼaē e Sesu ko te tagata kaugana agatonu ʼe poto, neʼe ina fakahā ai ko nātou ʼaē ʼe natou fakatātā ia te tagata kaugana ʼaia ʼe natou maʼu anai ia te fakasiosio tonu, te fakasiosio poto, pea mo te fakafuafua lelei heʼe natou fakatafito ia tanatou tui, mo tanatou ʼu gāue, pea mo tanatou ʼu akonaki ki te Folafola moʼoni ʼa te ʼAtua.

[Kiʼi nota]