ʼE Fua Lelei Anai Kiā Tātou Tatatou Kātakiʼi Te ʼu Mamahi
“ ʼE matou kalagaʼi ʼe fiafia ia nātou ʼaē neʼe natou faʼa kātaki.”—Sake 5:11.
1, 2. Koteā ʼaē ʼe hā mai neʼe mole fakatuʼutuʼu e Sehova ke maʼuli mamahi te tagata?
ʼE MOLE he tahi iā tātou ʼe fia maʼuli mamahi; pea ʼe fēia mo Sehova ʼAtua ia totatou Tupuʼaga ʼe mole loto ia ke maʼuli mamahi hina tahi. ʼE tou fakamoʼoni ki te faʼahi ʼaia mokā tou lau tana Folafola pea mo tokagaʼi te meʼa ʼaē neʼe hoko ki muli age ʼi tana fakatupu te tagata pea mo te fafine. Neʼe ʼuluaki fakatupu e te ʼAtua ia te tagata. “Ko Sehova ʼAtua neʼe ina faʼu te tagata ʼaki te efu ʼo te kele pea neʼe ina pupuhi ki tona ihu te mānava ʼo te maʼuli, pea neʼe liliu ai te tagata ko te nefesi maʼuli.” (Senesi 2:7) Neʼe haohaoa te sino pea mo te ʼatamai ʼo Atama, pea neʼe mole tonu ia ke mahaki peʼe mate.
2 Neʼe feafeaʼi te nofoʼaga ʼaē neʼe maʼuli ai Atama? “Neʼe fakatuʼu e Sehova ʼAtua ia te ʼōloto ʼi Eteni, ʼi te potu ʼesitē, pea neʼe ina tuku kiai te tagata ʼaē neʼe ina fakatupu. Pea neʼe fakahomo e Sehova ʼAtua mai te kele ia te ʼu faʼahiga fuʼu ʼakau kehekehe ʼaē neʼe matalelei ki te sio pea mo lelei ki te kai.” (Senesi 2:8, 9) Neʼe taulekaleka te nofoʼaga ʼo Atama. Neʼe mole ʼi ai he mamahi ʼi Eteni.
3. Koteā te ʼu lelei neʼe maʼu e te ʼuluaki taumātuʼa?
3 ʼE tou lau fēnei iā Senesi 2:18: “Neʼe ʼui e Sehova ʼAtua: ‘ ʼE mole lelei ke nofo tokotahi te tagata. ʼE au fai anai hona tokoni ke liliu ko hona fakakātoa.’ ” Neʼe fakatupu e Sehova ia he fafine ʼe haohaoa maʼa Atama, ʼo feala ai ke maʼu he maʼuli faka fāmili fiafia. (Senesi 2:21-23) ʼE toe ʼui mai ʼi te Tohi-Tapu: “Ko te ʼAtua neʼe ina tapuakiʼi ia nāua pea mo folafola age e te ʼAtua kiā nāua ʼo fēnei: ‘Kolua fānaunau, pea kolua liliu ʼo hahaʼi, pea kolua fakafonu te kele, pea kolua puleʼi.” (Senesi 1:28) Neʼe maʼu e te ʼuluaki taumātuʼa ia te pilivilēsio taulekaleka ke nā fakalahi ia te Palatiso ʼo Eteni ʼo aʼu ki te temi ʼaē kā liliu ai te kele kātoa ko he palatiso. Pea ʼe nā fakatupu anai he hōloga ʼe natou fiafia, ʼe natou hao mai te mamahi. ʼI kamataʼaga taulekaleka leva ʼaia!—Senesi 1:31.
Te Kamataʼaga ʼo Te Mamahi
4. Kā tou vakavakaʼi te hisitolia ʼo te tagata, koteā ʼaē ʼe hā lelei mai ʼo ʼuhiga mo te mālamanei?
4 Kae kā tou fakatokagaʼi te ʼaluʼaga ʼo te maʼuli ʼo te tagata lolotoga te hisitolia, ʼe hā lelei mai neʼe ʼi ai te meʼa neʼe liliu ʼo fakatupu kovi ʼaupitō ki te maʼuli. Neʼe hoko te ʼu meʼa kovi, ʼo tupu ai te maʼuli mamahi ʼaupitō ʼa te tagata. Lolotoga te ʼu sēkulō, ko te hōloga fuli ʼo Atama mo Eva neʼe natou liliu ʼo mahahaki, mo mātutuʼa, pea mo mamate. Neʼe mole liliu te kele ko he palatiso ʼe fonu ai he hahaʼi fiafia. ʼE fakahā lelei te faʼahi ʼaia iā Loma 8:22: “Ko te ʼu meʼa fuli ʼaē neʼe fakatupu, ʼe natou haga lāuga fakatahi pea mo mamahi fakatahi ʼo aʼu mai ki te temi nei.”
5. Neʼe feafeaʼi te kau ʼa tatatou ʼu ʼuluaki mātuʼa ki te tuku hōlo ʼo te maʼuli mamahi ki te tagata?
5 ʼE mole ko Sehova ʼaē ʼe tonu ke tukugākoviʼi ʼo ʼuhiga mo te mamahi lahi ʼaē ʼe hoko nei ʼi te kele talu mai fualoa. (2 Samuele 22:31) ʼE ko te hala pē ia ʼa te tagata. “Neʼe natou fai te ʼu aga heʼeʼaoga, neʼe natou aga fakalialia.” (Pesalemo 14:1) ʼI te kamataʼaga neʼe foaki ki tatatou ʼu ʼuluaki mātuʼa ia te ʼu meʼa lelei fuapē. Ke feala ke hoko atu te ʼaluʼaga ʼaia, ko te meʼa pē ʼaē neʼe fakamaʼua age kiā nāua, ko tanā fakalogo ki te ʼAtua, kae ko Atama pea mo Eva neʼe nā fia ʼāteaina mai ia Sehova. ʼI te mole kei fia fakalogo ʼo tatatou ʼu ʼuluaki mātuʼa kiā Sehova, neʼe mole kei nā maʼu ia te maʼuli haohaoa. ʼAki te temi neʼe liliu māmālie pē tonā sino ʼo popo ʼo aʼu ki tanā mamate. Kua toe maʼu mo tātou ia te maʼuli heʼe haohaoa.—Senesi 3:17-19; Loma 5:12.
6. Koteā te gāue neʼe fai e Satana ki te fakatupu ʼo te mamahi?
6 Neʼe kau foki mo te laumālie fakapulipuli ʼaē neʼe fakahigoa ko Satana te Tēvolo, ki te kamataʼaga mai ʼo te mamahi. Neʼe faʼu ia ia mo te loto faʼitaliha. Kae neʼe ina fakaʼaogaʼi kovi te fealagia ʼaia, ʼo ina faigaʼi ke tauhi te hahaʼi kiā ia. Kae ko Sehova tokotahi pē ʼe tonu ke tou tauhi ki ai, ʼe mole ko te ʼu meʼa ʼaē neʼe ina fakatupu ʼaē ke tou tauhi kiai. Neʼe ko Satana ʼaē neʼe ina fakahalaʼi ia Atama mo Eva ke nā ʼāteaina mai te takitaki ʼa Sehova, heʼe hagē ai leva ʼe nā ‘tatau mo te ʼAtua, ʼo nā ʼiloʼi te meʼa ʼaē ʼe lelei pea mo te meʼa ʼaē ʼe kovi.’—Senesi 3:5.
ʼE Ko Sehova Tokotahi Pē ʼAē ʼe Tonu Ke Pule Kiā Meʼa Fuli
7. Koteā ʼaē neʼe hā lelei ʼi te ʼu fua kovi ʼo te fakafeagai ʼaē ki te pule ʼa Sehova?
7 ʼE hā ʼi te ʼu fua kovi ʼo te talagataʼa, ko Sehova tokotahi pē ʼi tona tuʼulaga Tuʼi ʼo Te ʼAtulaulau, ʼaē ʼe tonu ke pule kiā meʼa fuli pea ʼe ko tana pule tokotahi pē ʼaē ʼe faitotonu. ʼI te ʼu taʼu ʼaenī kua hili neʼe ʼiloga mai ko Satana, ʼaē ko “te pule ʼo te mālama ʼaenī,” neʼe agakovi, mo heʼe faitotonu, pea mo mālohi tana pule, ʼo mole hona fua. (Soane 12:31) Ko te pule fualoa pea mo kovi ʼa te tagata ʼi te takitaki ʼa Satana neʼe hā ai foki tanatou mole lava pule ʼi te faitotonu. (Selemia 10:23) Koia, ko te ʼu pule fuli ʼaē ʼe mole ʼalutahi mo te finegalo ʼo Sehova ʼe mole hona fua lelei. Neʼe hā lelei te faʼahi ʼaia ʼi te hisitolia ʼo te tagata.
8. Koteā te fakatuʼutuʼu a Sehova ʼo ʼuhiga mo te ʼu pule fakatagata fuli, pea ʼe ina fakahoko feafeaʼi anai te fakatuʼutuʼu ʼaia?
8 Neʼe tuku e Sehova te ʼu lauʼi taʼu e afe ki te hahaʼi ke natou sisio ki te ʼu ikuʼaga ʼo tanatou pule faʼitaliha mai iā te ia, pea koia kua tonu leva ke ina toʼo te ʼu faʼahiga puleʼaga fuli ʼi te kele kae ina fetogi ʼaki tona puleʼaga. Ko te lea faka polofetā ʼo ʼuhiga mo te faʼahi ʼaia ʼe ina ʼui fēnei: “ ʼI te ʼu ʼaho ʼo te ʼu hau ʼaia [te ʼu pule fakatagata] ko te ʼAtua ʼo te lagi ʼe ina fakatuʼu anai he puleʼaga [tona puleʼaga ʼi selō ʼaē ʼe takitaki e Kilisito] ʼe mole pulihi anai ʼi he temi. . . . ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Taniela 2:44) ʼE fakagata anai te pule ʼa te kau temonio pea mo te tagata, pea ʼe gata pē ki te Puleʼaga ʼo te ʼAtua ʼaē ʼe ʼi selō kā ʼafio anai pea mo pule ki te kele. Ko Kilisito ʼaē kā Hau anai ʼi te puleʼaga ʼaia, pea ʼe kaugā hau anai mo te toko 144 000 hahaʼi agatonu neʼe toʼo mai te kele.—Fakahā 14:1.
ʼE Fua Lelei Anai Kiā Tātou ʼi Tatatou Kātakiʼi Te ʼu Mamahi
9, 10. Neʼe fua lelei feafeaʼi kiā Sesu tana kātakiʼi te ʼu mamahi ʼaē neʼe tau mo ia?
9 ʼE ʼaoga ke tou vakaʼi te ʼu faʼahi ʼaē ʼe fakamaʼua kiā nātou ʼaē kā pule anai ʼi te Puleʼaga ʼi selō. ʼUluaki, neʼe fakahā e Kilisito Sesu ʼe tuha mo ia ke ina maʼu te tuʼulaga Hau. Neʼe fualoa te temi ʼaē neʼe nofo ai iā tafa ʼo Sehova ʼo fai te finegalo ʼo tana Tamai, ʼo liliu ko Tona “tufuga faiva.” (Tāʼaga Lea 8:22-31) ʼI te temi ʼaē neʼe fakatotonu ai e Sehova ke haʼu Sesu ki te kele, neʼe fakalogo lelei ki te fakatuʼutuʼu ʼaia. ʼI tana nofo ʼi te kele neʼe tokaga tāfito ʼo faka mafola ki te hahaʼi ia te pule faʼitaliha ʼo Sehova pea mo tona Puleʼaga. Neʼe tuku mai e Sesu ia te faʼifaʼitaki lelei ʼaki tana fakalogo kātoa ki te pule ʼaia.—Mateo 4:17; 6:9.
10 Neʼe fakatagaʼi Sesu, pea ki muli age neʼe matehi leva ia. Pea ʼi te lolotoga ʼo tona minisitelio, neʼe sio ia ki te maʼuli mamahi ʼa te mālamanei. Neʼe fua lelei koa kiā ia tana sio ki te faʼahi ʼaia pea mo tau mo ia mo te mamahi? ʼEī, pea ʼe ʼui fēnei iā Hepeleo 5:8: “Logolā ko te ʼAlo [ʼo te ʼAtua], kae neʼe ina akoʼi te fakalogo ʼaki te ʼu mamahi ʼaē neʼe ina ʼūtakiʼi.” Neʼe lahi age te lotomahino pea mo te manavaʼofa ʼa Sesu ʼaki te ʼu meʼa ʼaē neʼe hoko kiā ia ʼi te kele. Neʼe ina logoʼi te maʼuli ʼaē ʼe tau mo te mālamanei. Neʼe feala ke lotomahino kiā nātou ʼaē neʼe maʼuli mamahi pea mo mahino lelei age ki tana gāue ʼaē kā ina fai moʼo tokoni kiā nātou. Kotou fakatokagaʼi peʼe feafeaʼi te faka maʼuhigaʼi e te ʼapositolo ko Paulo ia te faʼahi ʼaia ʼi te tohi ʼo Hepeleo: “Neʼe tonu ke liliu ʼo tatau mo tona ʼu ‘tehina’ ʼi te ʼu faʼahi fuli pē, ke feala ai hana liliu ko he pelepitelō lahi ʼe agaʼofa pea mo agatonu ʼo ʼuhiga mo te ʼu meʼa ʼa te ʼAtua, ke ina foaki he sākilifisio faifakalelei ki te ʼu agahala ʼa te hahaʼi. Mai tona ʼaluʼaga ʼaē neʼe mamahi ʼi te temi ʼaē neʼe ʼahiʼahiʼi ai ia ia, ke feala hana tokoni kiā nātou ʼaē ʼe ʼahiʼahiʼi.” “E ʼi ai totatou pelepitelō lahi, ʼe mole ko he tahi ʼe hala mo manavaʼofa ki ʼotatou vaivaiʼaga, kae ko he tahi neʼe ʼahiʼahiʼi ʼi te faʼahi fuli pē ohagē ko tātou, kae neʼe mole hana agahala. Tou fakaovi ʼaki te fakahagatonu ki te ʼafioʼaga ʼo te ʼofa makehe, ke tou maʼu ai te manavaʼofa pea mo maʼu te ʼofa makehe moʼo tokoni mai ʼi tona temi totonu.”—Hepeleo 2:17, 18; 4:14-16; Mateo 9:36; 11:28-30.
11. ʼE fua lelei feafeaʼi anai kiā nātou ʼaē kā hau pea mo pelepitelō ʼi te kā haʼu ia tonatou maʼuli mamahi ʼaē ʼi te kele?
11 ʼE feala hatatou toe manatu fēia ʼo ʼuhiga mo te toko 144 000 ʼaē “neʼe totogi” mai te kele ke natou kaugā hau mo Kilisito Sesu ʼi te Puleʼaga ʼi selō. (Fakahā 14:4) Neʼe natou tutupu fuli ʼi te kele, ʼo natou lahilahi ake ʼi he mālama ʼe maʼuli mamahi ai te hahaʼi, pea mo māʼuʼuli mamahi mo nātou. Tokolahi iā nātou neʼe fakatagaʼi, pea toe matehi mo ʼihi ʼuhi ko tanatou nonofo agatonu kiā Sehova pea mo tanatou fia mulimuli ia Sesu. Kae neʼe ‘mole natou ufiufi ʼi tanatou fakamoʼoni ʼo ʼuhiga mo tonatou ʼAliki, ʼo natou tali tonatou ʼu mamahi ʼuhi ko te logo lelei.’ (2 Timoteo 1:8) ʼAki tonatou maʼuli mamahi ʼaē ʼi te kele, neʼe tuha ai mo nātou ke natou fakamāu mai te lagi ia te hahaʼi ʼaē ʼi te kele. Neʼe lahi ai tanatou ako ia te lotomahino, mo te lotoʼofa, pea mo te fiafia ʼi te tokoni ki niʼihi.—Fakahā 5:10; 14:2-5; 20:6.
Te Maʼuli Fiafia ʼo Nātou ʼAē Kā ʼAmanaki Māʼuʼuli ʼi Te Kele
12, 13. ʼE fua lelei feafeaʼi kiā nātou ʼaē ʼe ʼamanaki māʼuʼuli ʼi te kele ia te ʼu mamahi?
12 ʼE feala koa ki te mamahi ʼo te temi nei ke ina fakatupu he fua lelei kiā nātou ʼaē kā ʼamanaki māʼuʼuli ʼo heʼegata ʼi he kele faka palatiso, ʼaē ʼe mole toe ʼi ai anai te mahaki, mo te mamahi, pea mo te mate? Ko te lotomamahi pea mo te lotohoha ʼaē ʼe maʼu mai te mamahi, ʼe mole ko he ʼu faʼahi ʼe tou fakaʼamu kiai. Kae kā tou ʼūtakiʼi te ʼu mamahi ʼaia, pea ʼe feala ke lahi totatou ʼu kalitātē pea mo tou maʼuli fiafia.
13 Kotou fakatokagaʼi te manatu ʼaē ʼe ʼui ʼi te Folafola ʼa te ʼAtua ki te faʼahi ʼaia: “Tatau aipē mokā ʼe kotou mamahi ʼuhi ko te faitotonu, fiafia ia koutou.” “Kapau ʼe laukoviʼi koutou ʼuhi ko te huafa ʼo Kilisito, ʼe kotou fiafia.” (1 Petelo 3:14; 4:14) “Fiafia ia koutou mokā leakoviʼi koutou, pea mo fakatagaʼi koutou, pea mo lau he ʼu loi kiā koutou ʼo ʼuhiga mo te ʼu meʼa kovi fuapē ʼuhi ko au. Kotou fiafia pea ke kotou hihiki fakafiafia, heʼe lahi tokotou fakapale ʼi selō.” (Mateo 5:11, 12) “Fiafia te tagata ʼaē ʼe ina haga kātakiʼi te ʼahiʼahi, koteʼuhi ʼi tana liliu ko he tagata kua leleiʼia, ʼe ina maʼu anai te kolona ʼo te maʼuli.”—Sake 1:12.
14. He koʼē neʼe fiafia ia te kau ʼatolasio ʼa Sehova logolā tonatou mamahi?
14 ʼE mahino ia ʼe mole tou fiafia ʼuhi ko te ʼu mamahi ʼo te temi ʼaenī. Ko te maʼuli fiafia, mo te maʼuli faka feʼauga, ʼe haʼu ia mai tatatou ʼiloʼi ʼaē ʼe tou mamahi heʼe tou fai ia te finegalo ʼo Sehova pea mo tatatou mulimuli ki te faʼifaʼitaki ʼa Sesu. Ohagē lā, ʼi te ʼuluaki sēkulō, ko ʼihi ʼi te kau ʼapositolo neʼe pilisoniʼi pea mo fakamāuʼi ʼi muʼa ʼo te telepinale lahi Sutea pea mo tukugākoviʼi nātou ʼi tanatou faka mafola te logo ʼo ʼuhiga mo Sesu Kilisito. Neʼe huipiʼi ia nātou pea neʼe tuku age ke natou ʼolo. Neʼe natou feafeaʼi ki tonatou gaohi koviʼi ʼaia? ʼE ʼui ʼi te Tohi-Tapu neʼe natou “mavae ʼi muʼa ʼo te Sanetualio, ʼo natou fakafiafia he neʼe tāu mo nātou tonatou fakalainoaʼi ʼuhi ko tona huafa.” (Gāue 5:17-41) Neʼe mole ko he meʼa fakafiafia tonatou tā pea mo tanatou logoʼi te mamahi ʼo tonatou kakano, kae ko te meʼa ʼaē neʼe natou fiafia ai, he neʼe mahino kiā nātou neʼe gaohi koviʼi fēia nātou ʼuhi ko tanatou nonofo agatonu ʼaē kiā Sehova pea mo mulimuli ʼi te ʼu tafugā vaʼe ʼo Sesu.—Gāue 16:25; 2 Kolonito 12:10; 1 Petelo 4:13.
15. ʼE fua lelei feafeaʼi kiā tātou ʼi te kā haʼu mo kapau ʼe tou kātakiʼi te ʼu mamahi ʼo te temi nei?
15 Kapau ʼe tou maʼu te manatu ʼaē ʼe lelei mokā tou kātakiʼi te fakafeagai pea mo te fakataga, pea ʼe fakatuputupu ai iā tātou te faʼa kātaki. Ko he faʼahi ʼe tokoni mai anai kiā tātou ke tou kātakiʼi te ʼu mamahi kā hoko mai. ʼE tou lau fēnei: “Kotou faka ʼuhigaʼi te faʼahi ʼaia ohagē ko he fiafia kātoa, ʼoku tehina, mokā kotou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.” (Sake 1:2, 3) ʼE tou toe lau ia te manatu ʼaia iā Loma 5:3-5: “Tou fakafiafia ʼi tatatou nofo ʼi te mamahi, heʼe tou ʼiloʼi ko te mamahi ʼe ina fakatupu te faʼa kātaki, pea ko te faʼa kātaki ʼe ina fakatupu ia he tagata ʼe lelei, pea ko te tagata ʼe lelei ʼe ina fakatupu ia te ʼamanaki; pea ko te ʼamanaki ʼe mole kākā.” Kapau ʼi te temi nei ʼe tou kātakiʼi te ʼu ʼahiʼahi ʼaē ʼe tau mo tātou ʼi totatou ʼuhiga Kilisitiano, pea ʼe tou nofo teuteu anai moʼo tauʼi te ʼu ʼahiʼahi ʼi te mālama agakovi ʼaenī.
ʼE Fakapale Anai Tātou e Sehova
16. Koteā anai te fakapale kā foaki e Sehova ki te ʼu hau pea mo te kau pelepitelō ʼi tanatou ʼūtakiʼi tonatou ʼu mamahi?
16 Tatau aipē pe puli hotatou ʼu koloa faka mālama ʼuhi ko te fakafeagai peʼe fakatagaʼi tātou ʼi tatatou fia haʼele ʼi te ala ʼo te ʼAtua, kae ʼe tou fiafia heʼe tou ʼiloʼi ko Sehova ʼe ina fakapale lahi anai tātou. Ohagē lā, kiā nātou ʼaē ʼe natou maʼu ia te ʼamanaki ki te maʼuli ʼi selō, neʼe tohi fēnei e te ʼapositolo ko Paulo: “Neʼe kotou . . . tali fakafiafia ke kaihaʼa tokotou ʼu koloa, heʼe kotou maʼu, e koutou, he koloa ʼe lelei pea mo tologa” ʼi tokotou ʼuhiga kaugā hau ʼi te Puleʼaga ʼo te ʼAtua. (Hepeleo 10:34) Kotou fakafuafua age muʼa ia tanatou fiafia ʼi tanatou kau ki te foaki ʼo te ʼu tapuakina taulekaleka ki te hahaʼi ʼo te kele ʼo te mālama foʼou, ʼi te takitaki ʼa Sehova pea mo Kilisito. Koia ʼe moʼoni te ʼu palalau ʼaenī neʼe fai e te ʼapositolo ko Paulo ki te kau Kilisitiano agatonu: “ ʼE au fakafuafua ai foki ko te ʼu mamahi ʼo te temi ʼaenī ʼe ko he meʼa noa ia mokā ʼe fakatatau ki te kolōlia ʼaē kā fakahā iā tātou.”—Loma 8:18.
17. Koteā ʼaē kā fai e Sehova maʼa nātou ʼaē ʼe natou maʼu te ʼamanaki ke māʼuʼuli ʼi te kele pea mo natou tauhi agatonu kiā te ia ʼi te temi nei?
17 ʼO toe fēia mo nātou ʼaē ʼe natou maʼu ia te ʼamanaki ki te maʼuli ʼi te kele, tatau aipē pe puli honatou ʼu lelei ʼi te temi nei peʼe natou filifili ke natou māʼuʼuli faka feʼauga ʼuhi ko tanatou fia tauhi ʼaē kiā Sehova, ko nātou ʼaia ʼe ina fakapale lahi ʼaupitō anai ʼi te kā haʼu. ʼE ina foaki anai kiā nātou ia te maʼuli haohaoa, te maʼuli heʼegata ʼi he palatiso ʼi te kele. ʼI te mālama foʼou ʼaia, ko Sehova ʼe ina “holoholoʼi anai te ʼu loʼimata fuli pē ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi.” (Fakahā 21:4) ʼI toe fakapapau taulekaleka! Ko te ʼu meʼa ʼaē ʼe tou tali lelei ke tou situʼa kiai ʼi te tuʼu ʼaenī ʼuhi ko Sehova, ʼe mole honatou tatau mo te maʼuli taulekaleka ʼi te temi kā haʼu, ʼaē kā ina foaki anai ki tana ʼu kaugana agatonu ʼaē ʼe tau mo te ʼu mamahi.
18. Ko te fakapapau fakaloto fīmālie fea ʼaē ʼe foaki mai e Sehova ʼi tana Folafola?
18 ʼE mole he mamahi ʼe lagi kei tou haga kātakiʼi ʼi te temi nei, ʼe feala ke ina toʼo anai te maʼuli heʼegata ʼaē kā tou maʼu ʼi te mālama foʼou ʼo te ʼAtua. Ko te ʼu mamahi fuli ʼe pulihi anai ʼaki te ʼu ʼaluʼaga taulekaleka ʼaē kā maʼu ʼi te mālama foʼou. ʼE ʼui fēnei iā Isaia 65:17, 18: “ ʼE mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto. Kae ke kotou fakafiafia ʼaupitō, pea mo loto fiafia ʼo talu ai ʼi te ʼu meʼa ʼaē ʼe au fakatupu.” Koia, neʼe feala ai ke ʼui fēnei e Sake te tehina ʼo Sesu: “ ʼE matou kalagaʼi ʼe fiafia ia nātou ʼaē neʼe natou faʼa kātaki.” (Sake 5:11) ʼEī, kapau ʼe tou agatonu ʼo kātakiʼi te ʼu mamahi ʼi te tuʼu ʼaenī, ʼe fua lelei ai kiā tātou ʼi te temi nei pea mo te kā haʼu.
ʼE Kotou Tali Feafeaʼi Anai?
• He koʼē neʼe tau te mālamanei mo te mamahi?
• Ko te ʼu lelei fea ʼaē ʼe lava maʼu e te kau pule ʼo te kele ʼi te kā haʼu pea mo tana hahaʼi ʼi tanatou tau mo te ʼu mamahi?
• He koʼē ʼi te temi nei ʼe tou lava maʼuli fiafia logolā te ʼu mamahi ʼaē ʼe tau mo tātou?
[Paki ʼo te pasina 13]
Neʼe maʼu e totatou ʼu ʼuluaki mātuʼa ia te kā haʼu taulekaleka
[Paki ʼo te pasina 15]
ʼI te tokagaʼi ʼaē e Sesu te ʼu mamahi neʼe tokoni kiā ia ke liliu ko he Hau ʼe agalelei pea mo he Pelepitelō Lahi
[Paki ʼo te pasina 17]
‘Neʼe fiafia te kau ʼapositolo he neʼe tāu mo nātou tonatou fakalainoaʼi’ ʼuhi ko tanatou tui