Kua Vave Fakagata Te ʼu Mamahi Fuli!

Lagi neʼe ʼi ai he ʼaho neʼe koutou fai ai ia te fehuʼi ʼaenī: ‘He koʼe koa ʼe hoko te ʼu mamahi fuli ʼaenī?’ Lolotoga ni ʼu sēkulō, ko te malamanei neʼe maʼuli mamahi ʼaupito ʼuhi ko te ʼu tau, te masiva, te ʼu tuʼutāmaki, te ʼu fai fakapō, te heʼe faitotonu, te mahaki, pea mo te mate. ʼI te ʼu sēkulō ʼaenī kua hili, neʼe hoko ki te malamanei te ʼu mamahi neʼe mole heʼeki hoko ʼi te ʼu sēkulō ki muʼa atu. ʼE gata anai koa ʼi he ʼaho te ʼu mamahi fuli ʼaia?

Ei kua vave hoko mai te temi ʼaē ka fakagata ai te ʼu mamahi ʼaia! ʼE ʼui ʼi te Folafola ʼa te ʼAtua, te Tohi-Tapu: “[ʼE] pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” ʼE fualoa anai koa tonatou faʼahiga maʼuli ʼaia? “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.”—Pesalemo 37:10, 11, 29.

ʼI te ʼosi pulihi e te ʼAtua ia te agakovi pea mo te mamahi, ʼe liliu anai te kele ko he palatiso. Pea ko te hahaʼi ʼe feala anai ke nātou māʼuʼuli ʼo heʼegata, ʼi he maʼuli fiafia pea mo haohaoa mai te mahaki. ʼI te Tohi-Tapu, ʼe fakakikite fēnei: “[Ko te ʼAtua] e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi.”—Apokalipesi 21:4.

ʼI te mālama foʼou ʼaia, ʼe toe fakatuʼuake anai mo te kau mate ke nātou maʼu mo nātou te ʼu tapuakina ʼaia: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:15, MN ) Koia neʼe feala ai kiā Sesu ke ina ʼui ki te tagata agakovi ʼaē neʼe fakahemala pea neʼe tui kiā te ia: “E ke fakatahi anai mo au i Palatiso.”—Luka 23:43.

He Koʼe Neʼe Hoko Te ʼu Mamahi?

Kapau ko te ʼAtua neʼe ina fakatuʼutuʼu ke maʼu e te malamanei he ka haʼu taulekaleka feiā, pea he koʼe neʼe ina fakagafua ke hoko te ʼu mamahi? He koʼe neʼe ina fakagafua ke hoko ʼo fualoa ia te ʼu mamahi ʼaia?

ʼI te temi ʼaē neʼe fakatupu ai e te ʼAtua ia Atama mo Eva, neʼe haohaoa tonā ʼu sino pea mo tonā ʼu ʼatamai. Pea neʼe ina tuku ia nāua ki te ʼōloto faka palatiso pea mo ina foaki age tanā gāue fakafiafia. ʼE ʼui ʼi te Tohi-Tapu: “Neʼe sio ai te ʼAtua kiā meʼa fuli neʼe ina fai pea koʼeni ko te meʼa ʼaia neʼe lelei ʼaupito.” (Senesi 1:31) Kana neʼe nā fakalogo la ki te ʼAtua, neʼe feala pe ke nā maʼu hanā fānau haohaoa, pea ko te kele kātoa ʼe liliu anai ko he palatiso, pea ko te hahaʼi ʼe nātou māʼuʼuli anai ʼo heʼegata ʼi te tokalelei pea mo te fiafia.

Neʼe foaki e te ʼAtua kiā Atama mo Eva ia te loto faʼifaʼitaliha. Neʼe mole ina fakatupu nāua ke nā hage ko ni ʼu masini. Kae ko tonā maʼuli fiafia neʼe fakalogo ki tanā fakaʼaogaʼi fakalelei ʼo tonā loto faʼifaʼitaliha ʼaia—ke nā fakalogo ki te ʼu lao ʼa te ʼAtua. Ohage ko te ʼui ʼa te ʼAtua: “Ko au, Sehova, ko au tou ʼAtua, ia Ia ʼaē ʼe ina akoʼi koe ke ʼaoga kiā te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” (Isaia 48:17) Ko te fakaʼaogaʼi kovi ʼo te loto faʼifaʼitaliha ʼe iku ki te tuʼutāmaki, koteʼuhi neʼe mole fakatupu te tagata ke ʼāteaina mai te ʼAtua. ʼE ʼui fēnei ʼi te Tohi-Tapu: “Ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.”—Selemia 10:23.

Meʼa fakaʼofaʼofa, he ko tatatou ʼu ʼuluaki mātuʼa neʼe nā manatu ʼe feala hanā ʼāteaina mai te ʼAtua, pea ʼe maui mālie pe anai tonā maʼuli. Kae ʼi te temi ʼaē neʼe nā fakafisi ai ki te pule ʼa te ʼAtua, neʼe mole kei nā maʼu ai tana tokoni pea neʼe puli ai mo tonā maʼuli haohaoa. Pea neʼe nā kamata hifohifo ai ʼi tonā sino pea mo tonā ʼatamai ʼo aʼu ai mo tanā mātutuʼa pea mo tanā mamate. Koia neʼe nā tuku hoholo mai ai leva kiā tatou ia te agahala pea mo te mate.—Loma 5:12.

Ko Ai ʼAē ʼe Tonu Ke Pule Ki Te Malamanei?

He koʼe neʼe mole matehi e te ʼAtua ia Atama mo Eva, kae ke ina toe fakatupu he tahi age taumātuʼa foʼou? Koteʼuhi neʼe fakafihiʼi te pule faʼitaliha ʼa te ʼAtua ʼo te ʼatulaulau. Neʼe malaga ai te fehuʼi ʼaenī: Ko ai ʼaē ʼe tonu ke pule ki te malamanei, pea ko te takitaki ʼa ʼai ʼaē ʼe lelei? Pea mo te tahi fehuʼi: ʼE maʼuli fīmālie age anai koa te tagata mo kapau ʼe mole takitaki e te ʼAtua? ʼI tana tuku ki te malamanei he temi fualoa ke nātou takitaki ʼāteaina tonatou maʼuli mai iā te ia, neʼe fakahā ai e te ʼAtua ʼo talu ai peʼe lelei age ki te malamanei mo kapau ʼe mole nātou fakalogo kiā te ia. Kua feʼauga te temi ʼaē neʼe tuku ai e te ʼAtua ki te tagata ke ʼāteaina mai tana takitaki, ʼo ina ʼahiʼahiʼi te ʼu faʼahiga takitaki kehekehe ʼi te faʼahi faka politike, faka sosiale, faka ekonomika pea mo faka lotu.

Neʼe koteā tona ʼu fua? Lolotoga te ʼu lauʼi afea taʼu ʼo te hisitolia ʼo te tagata, neʼe ʼāsili age ʼosi te maʼuli mamahi ʼa te malamanei. ʼI te sēkulō ʼaenī kua hili, neʼe tau te malamanei mo te ʼu mamahi ʼaupito. Neʼe fakapogi te ʼu lauʼi miliona hahaʼi ʼi te temi ʼo te Holokoseta. Neʼe mamate te toko 100 miliona tupu ʼi te ʼu tau. Neʼe lahi ʼaupito te fai fakapō pea mo te agamālohi. Kua lahi ʼaupito te fakaʼaogaʼi ʼo te toloke ʼi te malamanei. Kua mafola mo te ʼu mahaki ʼaē ʼe maʼu ʼi te ʼu felāveʼi fakasino. ʼI te taʼu fuli, ʼe mamate te toko hogofulu afe hahaʼi ʼi te pakupaku pea mo te mahaki. ʼI te malamanei kātoa kua pulinoa te maʼuli faka famili pea mo te ʼu aga ʼaē ʼe tonu ke fai. ʼE mole he puleʼaga fakatagata ʼe ina lava fakatokatoka ia te ʼu fihifihia ʼaia. Mole heʼeki ʼi ai he puleʼaga fakatagata kua ina lava pulihi te mātutuʼa, te mahaki pea mo te mate.

Kua hage pe te ʼaluʼaga ʼo te malamanei ko te meʼa ʼaē neʼe fakakikite ʼi te Tohi-Tapu ʼo ʼuhiga mo totatou temi. ʼE fakahā ʼi te Folafola ʼa te ʼAtua, ko totatou temi ʼe ko “te u aho fakamuli” ʼo te mālama ʼaenī, ʼaē ʼe tonu ke hoko ai ‘te ʼu temi faigataʼa ʼaupito.’ Pea ohage ko tona ʼui ʼi te Tohi-Tapu, “ko te hahai agakovi mo kaka e fakaʼalu anai tonatou koviʼage.”—2 Timoteo 3:1-5, 13.

Kua Ōvi Mai Te Fakagata ʼo Te ʼu Mamahi

ʼE ʼasi mai ʼi te ʼu meʼa fuli ʼaē neʼe hoko, kua ōvi mai te temi ʼaē ka fakagata ai e te ʼAtua te takitaki ʼāteaina ʼaē ʼa te tagata mai iā te ia. ʼAki te temi, kua ʼiloga lelei ʼe mole feala ke fua lelei te takitaki ʼāteaina ʼa te tagata mai te ʼAtua. Ko te takitaki pe ʼa te ʼAtua ʼe ina lava foaki te tokalelei, mo te fiafia, mo te maʼuli haohaoa, pea mo te maʼuli heʼegata. Koia kua vave fakagata leva e Sehova ia te agakovi pea mo te ʼu mamahi. Ko te kiʼi temi siʼi pe, pea fakatokatoka leva e te ʼAtua te ʼu fihifihia ʼo te malamanei, ʼaki tana fakaʼauha ʼo te mālama agakovi ʼaenī.

ʼE ʼui fēnei ʼi te lea faka polofeta ʼa te Tohi-Tapu: “ ʼI te ʼu ʼaho ʼo te ʼu hau ʼaia [te ʼu puleʼaga fakatagata ʼo te temi ʼaenī] ko te ʼAtua ʼo te lagi ʼe ina fakatuʼu anai he puleʼaga [ʼi te lagi] ʼe mole pulihi anai ʼi he temi. . . . ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Taniela 2:44) ʼE talanoa tāfito ʼi te Tohi-Tapu ʼo ʼuhiga mo te fakatonuhia ʼo te pule faʼitaliha ʼa Sehova, ʼaki tona Puleʼaga ʼi selo. ʼI tana fakakikite te koga maʼuhiga ʼo te fakaʼiloga ʼo “te ʼu ʼaho fakamaʼuli,” neʼe ʼui e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.”—Mateo 24:14, MN.

Ka hoko mai anai te fakaʼosi, ko ai ʼaē ka hāofaki anai? ʼE tali fēnei ʼi te Tohi-Tapu: “Ko te hahaʼi agatonu ʼe nātou nonofo anai ʼi te kele, pea ko nātou ʼaē ʼe mole hanatou lakahala ʼe nātou nonofo ai anai. ʼO ʼuhiga mo te hahaʼi agakovi, ʼe toʼo anai ia nātou ʼi te kele.” (Tāʼaga Lea 2:21, 22) Ko te hahaʼi agatonu ʼe ko nātou ʼaē ʼe nātou ako te finegalo ʼo Sehova pea mo nātou maʼuliʼi. Neʼe ʼui fēnei e Sesu Kilisito: “Ko te faka ʼuhiga ʼaenī ʼo te maʼuli heʼegata, ke nātou ako ke nātou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3, MN ) Ei, “e fakamole te malama-nei . . . kae kia ia ae e ina fai te finegalo o te Atua e mauli [ia] o talu ai.”—1 Soane 2:17.

Ko te ʼu vaega ʼo te ʼu Tohi Faka Keleka Faka Kilisitiano ʼe toʼo mai te Tauhi Foou Fakaʼuvea “ad experimentum.” Ko te tahi ʼu vaega, ʼe toʼo mai te Tohi-Tapu Les Saintes Écritures — Traduction du monde nouveau — avec notes et références, MN.